الخميس، 10 مارس 2011

فتش عن الجنس فى أزمة قرية صول - مركز أطفيح

رحنا أطفيح امبارح

على فكرة ... كان معانا

زياد العليمى - المخرج خالد يوسف - الفنانة بسمة - ناصر عبد الحميد - جورج اسحق - الشيخ محمد حسان - الشيخ صفوت حجازى - عمرو حمزاوى - دينا ابو زيد وغيرهم كتير من ثوار 25 يناير وأنا وزوجى طارق على ، وكلهم سمعوا القصة دى من رجال القرية ونساءها

الحكاية غريبة وتنفع فيلم كما ساعد على اشعالها اياد خفية

واحد مسيحى ظبطوه مع بنت مسلمة

همة من عاداتهم لما ولد يتظبط مع بنت ... البنت تتقتل والولد كمان لكن عشان ما تحصلش فتنة قالوا يسيب البلد ويمشى

طلبوا من الولد يسيب البلد وفعلا مشى لمدة 4 أيام ثم عاد

فى نفس الوقت ولاد عم البنت راحوا لأبوها وطلبوا يسلمهالهم عشان يقتلوها زى عوايدهم

المهم ان ابوها جاب البندقية وطخ واحد من ولاد اخوه قام التانى طخ ابوها وماتوا همة الإتنين وابن عمها الثالث هرب

وطلع أهل البلد على بيت الواد المسيحى

بالمناسبة هو مش واد قوى يعنى - هو أب ومتزوج

يعنى كان بيخون مراته كمان

المهم .... راحوا الناس على بيت الواد عشان يجيبوه ... امه قالتلهم انه مستخبى فى الكنيسة

راح الرجالة عشان يجيبوه من الكنيسة ومارضيوش يدخلوهم فهجموا على الكنيسة للبحث عنه

لحد كدة والموضوع عادى

المفاجأة بقى .... استعدوا

لقوا فى الكنيسة بعض ملابس داخلية نسائية ورجالى وصور لهم ولزوجاتهم واخواتهم البنات

فطبعا حرقوا الكنيسة للتخلص من السحر الأسود اللى بيعمله القسيس لرجالة البلد عشان يربطهم ولبنات البلد عشان ما تتجوزش على حسب اعتقادهم ... ونايمين فى أرض الكنيسة ورافضين تماما وبيقولوا على جثثهم ان الكنيسة ترجع تانى

لكن هناك قصة أخرى وسر دفين انا عرفته

سر الدفين هو ان فى كل قرى مصر الستات بتروح للشيوخ والقساوسة لفك الأعمال

وأنا شخصيا اعرف كتير من النساء يذهبن للقساوسة من أجل ذلك

الستات فى قرية صول بأطفيح كانت بتروح للقسيس عشان يعملهم حاجة تفك اجوازهم او تحببهم فيهم

والبنات كانت بتروح عشان يتفك نحسها ويتجوزوا

لما الرجالة دخلوا الكنيسة ولقوا الكلام دة ... الستات خايفة تقول انهم كانوا بيروحوا وان همة اللى ودوا الحاجات دى بنفسهم كأثر لفك السحر

والرجالة اللى عارفين ان زوجاتهم راحوا مش ممكن ابدا هيعترفوا بكدة

فالكل اتفق ضمنيا على ان القسيس كان بيسحرلهم وان هو اللى ربطهم

وطبعا مش دى الحقيقة دة اللى عايزين يصدقوه

رجالة كتير مابتعرفش ففضلوا ان الكنيسة تكون بتعمل لهم عمل على انهم يكونوا ما بيعرفوش

الخلاصة فتش عن الجنس

العجيبة بقى ان فى ورق اتوزع فى القرية محدش عارف مصدره مكتوب فيه انه عند الهجوم على الكنيسة لقوا فيها

ملابس داخلية

اعمال سحر

خمور

مين اللى كتب وطبع الورق دة و وزعه على أهل البلد كلهم رغم ان البيان كاذب وبيزود من عنده شوية لزوم التسخين؟؟؟؟

حاولنا نفهمهم ان مفيش سحر وان النساء فى مصر تذهبن للكنيسة احيانا لفك السحر لكن قولوا لى هتفهموا الصعايدة ازاى ان مفيش حاجة اسمها سحر؟؟؟

ستات كتير فى الريف والحضر بتروح الكنيسة عشان البركة وعشان يفكوا أعمال سحر ... دى ثقافتهم وانا لا أنتقدهم لكن فى نفس الوقت الرجال فى القرية فاكرين ان الكنيسة سرقت ملابسهم وصورهم عشان تعملهم ربط

هل تعلموا ان فى ناس كتير بتروح الكنائس لهذا السبب ؟؟؟ والمسلمين أكتر من المسيحيين كمان فى الموضوع دة

قعدنا مع المسيحيين وهمة مصرين ان الكنيسة تتبنى مكانها

قعدنا مع المسلمين وهمة مصرين ان الكنيسة تتبنى برة البلد

قعدنا فى قعدات فيها مسيحيين ومسلمين وكانوا متفهمين

فى واحد مسيحى قالى ان فى بيت ورا الكنيسة بتاع واحد اسمه ميلاد وهو ساحر وان هو السبب فى كل دة وانه هرب ومشى من البلد

المهم ان الموضوع كله داخل فيه الجنس بمشاكله والدجل والشعوذة والمعتقدات الريفية لكن فى حد بيسخن وبيوزع منشورات ومعايا صورة من المنشور دة

كمان المسلمين زعلانين لأن فى قناة قالت كلام مش مظبوط عن انهم بياخدوا اتاوات من المسيحيين فى القرية والحقيقة المسيحيين أنكروا انهم قالوا اى حاجة زى دى وكل كلامهم عن بناء الكنيسة

الإعلام بيسخن من كل ناحية سواء اعلام الدولة أو الإعلام المسيحيى

الجيش متبهدل هناك لدرجة صعبوا علية

همة محاصرين الأرض والمسلمين معتصمين فيها لمنع اعادة البناء

لأنهم لو ضربوا واحد مسلم فقط ... هيعرضوا حياة المسيحيين فى القرية للخطر من الإنتقام ... دول صعايدة\

بالمناسبة ... البنت قتلوها امبارح

للأسف كمية الجهل رهيبة فى هذا المكان ... الله يخرب بيت النظام القديم اللى سايب الناس عايشة فى الجهل والتخلف دة

دول فى العصور الوسطى والله

ادعوا ربنا يوفقنا ونحلها

هنروح تانى وتالت لحد ما تتحل

هناك 11 تعليقًا:

غير معرف يقول...

علي فكره الكلامه ده كذب وانا مش عايز اقول كلام عيب وفاضي يعني مش عايز اشتم واسبلك وانا من اهالي المركز بس مش من القريه اللي حصل فيها كده وربنا مفيش حد من الأعلامين دوول بيقول الحقيقه لانه دوول ولا حرام اصلا ربنا ياخدمك ويريحنا منك ياجاهلا ياولاد الوسخه اهالي البلد دي فاهمين عنك ياديوسن علي اعرضك انتو بيتمشو مالط في الشارع والبوس والأحضان بتخدوها من حد غير أجوازك يبقي ايه فاهمك في الغيره وفي الكلام ده لما انتو اصلا ماعندكم اصل حسبي الله ونعم الوكيل

أسوور يقول...

يعنى كل اللى راحوا صول عرفوا الحقيقة وانت بتقول العكس - عمرو خالد - محمد حسان - صفوت حجازى - جورج اسحق - المخرج خالد يوسف - الفنانة بسمة - ائتلاف شباب الثورة

كلنا كدة كذابين وانت راجل محترم

عموما اخلاقك واضحة من اسلوبك فى الكلام

أسطى في زمن البلي يقول...

على فكرة يا دكتورة


انا ضد الدجل

لكن


انا كمان باقول انه فيه سحر

بس مش بتاع الدجالين اللي بيضحكوا على السذج


فيه دجل و فيه شعوذة و فيه ضحك على البسطاء


و برضه

فيه سحر و سحر حقيقي كمان

و دا موضوع يتعمل فيه كذا دكتوراه

.


شوفي يا دكتورة


مسلسل الكذب عندنا لسه ما انتهاش


اللي راحوا كانوا كذابين مضللين

و اللي موجودين كانوا متربيين في نفس الجو

و لسه متأثرين

أقصد مش ها يفوقوا


لان الجرعة كانت عالية جدا



كلامك جرئ قوي يا دكتورة

في مجتمع كله نعام


.

سامى زاهر يقول...

موضوع السحر ..كتب الصلوات فى الكنائس مكتوبة بالغة القبطية و حروفها شبيهة باللاتينية مع وجود بعض حروف من اللغة الهيروغليفية و اما اسماء الناس الموجوده فى قصاصات ورقية صغيرة فهى توضع لطلب المعونة لتتلى اثناء الصلاة وومكن يكون فيها اسماء مسيحين او مسلمين مفيش فرق.
موضوع الملابس ..دى ملابس التبرعات للفقراء و كلنا بنعمل كدة ياما بنوديها الجامع او الكنيسة او جمعية رسالة
موضوع الخمر..مقصود به عصير الكرمة اللى بنستعمله مع القربان و هو خالى من الكحول ويتناول منه المسيحين جمعيا مع ملاحظة ان نصيب المتناول يكون اقل من ملعقة شاى صغيرة و قطعة قربان اقل منعقلة الاصبع (علشان مباحث التموين)

misha و lado يقول...

that's not sex
that's an animal sex
mental rape

غير معرف يقول...

Fakranyyyy

wa7shanyyyyy Geddddddan

Regards
Lojain :)

غير معرف يقول...

ثقافة الهزيمة .. العتبة الخضراء‏

و تقول الحكومة المصرية التعيسة أنها تسعى لبناء أربع محطات نووية بحلول عام 2025، على أن يبدأ تشغيل أولاها في 2019 ، وأن يضيف البرنامج النووي الجديد ما يصل إلى 4000 ميجاوات !!! علما بأن تكاليف بناء 4 مفاعلات نووية حوالى 20 مليار دولار. و نشرت جريدة المصرى اليوم فى 20 سبتمبر 2010 تصريح د.حسن يونس وزير الكهرباء و الطاقة جاء فيه سيتم إيفاد 67 مهندساً مصريا إلى كل من الولايات المتحدة، وروسيا، وفرنسا، وكوريا الجنوبية، للتدريب على التكنولوجيا النووية. وبالفعل هذا مفيد لأرسال الأصدقاء و المعارف فى رحلة مدفوعة الأجر على حساب الشعب المصرى الفقير.

..تكلفة مفاعل نووى جديد يبلغ 5.52 مليار إيرو ، و 300 من مراوح توليد طاقة الرياح تنتج ما يعادل مفاعل نووى و تتكلف 900 مليون إيرو فقط!!! باقى المقال ضمن مقالات ثقافة الهزيمة بالرابط التالى

www.ouregypt.us

ابراهيم رزق يقول...

طبعا انا رحت اطفيح و صول

اللى انتى بتقولى ده عليه صحيح الناس طيبين جدا لكن سهل اثارتهم

ابحثى عن عضو مجلس الشعب بتاع الوطنى لواء الشرطة
هو المحرك للاحداث
تحياتى

غير معرف يقول...

كل الكلام دة كلة صح

Entrümpelung wien يقول...

شكرا لكم ..))

Entrümpelung wien يقول...

شكرا على الموضوع