الشعب اللى مصدق!!

نفس الشعب اللى صدق اعلام عبد الناصر ومخابراته ومراكز قواه .. نفس الشعب اللى صدق اننا انتصرنا ف يونيو ٦٧ رغم احتلال سيناء .. هو نفس الشعب اللى صدق ان الاخوان قتلوا السادات رغم ان المتهمين باغتياله جميعا ظباط مخابرات حربية .. هو نفس الشعب اللى صدق ان مبارك مكانش يعرف بالفساد والظلم وان ابنه ومراته همة السبب ف الثورة ..رغم انه استمر ٣٠ سنة فى الحكم .. هو نفس الشعب اللى صدق ان ثورة يناير مؤامرة .. وان ابنائهم من الثوار خونة وعملاء .. نفس الشعب اللى صدق ان حماس جت من بلدها قتلت المتظاهرين على كوبرى قصر النيل لتمنعهم من الاعتصام !! هو نفس الشعب اللى صدق ان ٣٠يونيو ثورة .. هو نفس الشعب اللى صدق ان السيسى انقذ مصر من الاخوان اللى كان شريكهم اصلا .. نفس الشعب اللى صدق عبد الناصر هو نفس الشعب اللى بيصدق السيسى .. ورغم ان كل نظام بيفضح اللى قبله بس لسة مصدقين ..احنا واقفين فى نفس المربع من اكتر من ٦٠ سنة !!!!

تجربتى مع ابنتى .. ومشكلة قضم الأظافر

بدأت الاحظ ان أظافر ابنتى الصغيرة لا تنمو .. كلما حاولت قصها لا اجد لها أظافر .. فى البداية كان أظفر الابهام ثم تلاه أظافر اخرى .. وكانت تقضمهم قبل النوم ثم اصبحت تقضمهم تلقائيا عندما تتوتر .. وتطور الامر حتى اصبحت تقضم جميع اظافرها باستمرار ..
وقبل ان اتخذ اى اجراء او ان اعلق اى تعليق .. دخلت ع النت عملت سيرش فى كيفية التعامل مع تلك المشكلة .. و وجدت بالفعل كثير من النصائح كان أولها عدم نهر الطفل وتوبيخه على اى عادة سيئة لان هذا يزيد من توتره ويزيد من تمسكه بتلك العادة .. وعدم التحدث عن هذا سلوك مع الآخرين أمامه لان هذا يؤكد على السلوك السىء ..
وبدأت أولا فى التحدث معها بلطف كالكبار .. تعالى يا سما .. عايزة اتكلم معاكى ف موضوع قرقضة ظوافرك .. عشان انا خايفة ان العادة دى تفضل معاكى وانتى كبيرة ودة هيبقى محرج ليكى قوى .. كان ليا واحدة زميلتى ف الشغل بتعمل كدة وكان بيبقى شكلها مضحك فى الاجتماعات .. كان ليا مدير بيعمل كدة ومحدش كان بيحترمه .. انا مامى وانتى حبيبتى وهقبل منك أى عيب وهفضل أحبك مهما كنتى .. لكن انا حاسة انك هتبقى حد مهم فى المجتمع ومش معقول تبقى مديرة ولا دكتورة ولا مدرسة وتقرقضى ظوافرك  !!. 
المهم البنت بدأت تتكلم عن المشكلة وقالت انها حاولت تبطلها لكن هى مش عارفة .. وقالت انها بتقرقض اظافرها لما تحس بالتوتر .. وفورا استغليت انا الفرصة وقلت لها طب تعالى نقرا سوا على النت عشان نحدد المشكلة واسبابها وكيفية علاجها .. وايه الدور اللى عليكى وايه اللى عليا وكدة .. اقتنعت وبدأت تقرأ .. وقمت انا عملت نفسى مشغولة .. عشان اسيبها تتعلم تحل مشاكلها عن طريق العلم والخبراء وتجارب الآخرين ..
من ناحيتها هى قالتلى اوعدك انى احاول .. وفعلا بذلت مجهود لكن كان ضعيف ومع اى مشكلة كانت بترجع تانى .. و كان فى تحسن شوية بطىء .. حبيت اساعدها وجتلى فكرة .. فقلت لها انا نفسى فى هدية منك .. قالت ايه ؟ قلت لها نفسى اقص لك ظوافرك مرة فى حياتى .. وهديكى اكبر حضن وبوسة فى الدنيا..
فى اول مرة جتلى بظافر واحد بس .. أخدتها بالحظن ونزلت فيها بوس وقلت لها انها اقوى واشجع بنت فى الدنيا وانى فخورة بيها جدا وأظهرت لها فرحة كبيرة .. واحتفظت بالظافر المقصوص فى علبة صغيرة وكتبت على العلبة "strong sama".. و حكيت للناس اللى هى بتحبهم وطلبت منهم يشجعوها ..
بعد شوية جتلى بإتنين من اظافرها لاقصهم .. ثم ثلاثة .. ثم اربعة .. وكل مرة اشجعها واعمل فرح .. ويوم ما قصيت لها كل أظافرها اخدتها فسحتها جبت لها هدية .. وهكذا حتى اقلعت ابنتى عن قضم اظافرها بعد محاولات استمرت عدة شهور .. وقد توقفت تماما منذ عامين وحتى الآن .. 
الان هى فى سن العاشرة .. وهى تقص لأصدقائها تلك القصة وتشجع زملائها ممن يسلكون نفس السلوك وتحاول مساعدتهم .. 
بالحب والصبر .. احبوا صغاركن وشجعوهم .. وسوف تذهلكم النتائج !

رسالة للستات عشان همة نور عنينا

بما ان اغلب الرجالة بتروح الشغل واغلب الشركات جايبة مولدات فأنا هوجه كلامى للستات عشان همة نور عنينا ،،
بالنسبة للغسيل اللى بيقعد ف الغسالة باليومين والتلاتة .. تنزلى تشترى طشت غسيل وشوية برسيل يدوى وامرشى الغسيل على ايدك .. دى الايد البطالة نجسة
بالنسبة للكنس .. انسى المكنسة .. مالها المقشة .. دى حتى عفارها هيفكرك بأرض مصر الطاهرة
بالنسبة للطبيخ .. استخدمى وابور الجاز .. اهو منه ينور ومنه يدفى ومنه يطبخ
بالنسبة للمية .. عارفة انها بتقطع عشان المواتير بتقف .. تجيبى البستلة ام حنفية وتعبيها لوقت الزنقة
بالنسبة للثلاجة اللى الاكل بيبوظ فيها .. تنزلى كل يوم السوق تشترى طبختك وعلى قد اكلك اليوم بيومه وبس .. اما المية فحلها القلل القناوى .. قلتين تلاتة وصينية وهتشربوا مية باردة وتدعولى
بالنسبة للكاتل .. بلا كاتل بلا كلام فارغ .. السبرتاية هى الحل
بالنسبة للسخان .. قومى سخنيلك شوية مية ع الوابور يا ولية وتنجزيهم بشوية مية م البستلة وهيكفوكى انتى والعيال والراجل ومش لازم تتليفوا .. بلاش تبذير
بالنسبة للمروحة .. تجيبى ورقة كراسة وتطبقيها خلف خلاف وتعملى مروحة وتهوى لحد ما ايدك تورم
بالنسبة للدفاية .. تجيبى قصعة وشوية قوالح درة وتولعى فيهم وتتلمى مع العيال حواليها بس ف البلكونة عشان متولعيش ف الشقة
بالنسبة للسيشوار .. تطلعى تقفى ف البلكونة لحد ما شعرك ينشف 
بالنسبة للتليفزيون .. عندك راديو ترانزستور تجيبيه من شارع عبد العزيز وتسمعيه .. وهينمى خيالك 
بالنسبة للماكياج واللبس .. هتوفريهم لان محدش هيشوفك اصلا ف الضلمة ودى ميزة كبيرة 
بالنسبة لجوزك .. جتك نيلة .. هو بعد اللى فات دة كله لسة لكى نفس !!!!!

تقولى ... اقولك

تقولى ايه سبب قطع الكهربا؟؟
اقولك مفيش بترول يشغل محطات الكهربا 
تقولى ليه مفيش بترول؟؟
اقولك مفيش فلوس ولا دعم
تقولى لماذا؟؟
 اقولك  دخول العسكر الحكم فى اى دولة فى العالم -سواء مقتنع او مش مقتنع- ترجمته فى القانون الدولى "انقلاب عسكرى"
 تقولى بس دى ثورة شعبية!! 
اقولك تبقى انقلاب لما العسكر ياخدوا الحكم 
تقولى بس السيسى نجح بالانتخابات!! 
اقولك مكانش مفروض اصلا يترشح 
تقولى ما هو قلع البدلة العسكرية ولبس مدنى يبقى مدنى!! 
اقولك دة عند الست الوالدة ولا مؤاخذة مش عند الدول المتخصرة
تقولى بيتآمروا علينا
اقولك لو دة نفسه حصل ف بوركينا فاسو هيبقى نفس رد الفعل الدولى
تقولى ايه دخلهم احنا احرار؟؟
اقولك قوانينهم بتمنع الدعم عن اى دولة يحصل فيها انقلاب عسكرى واحنا شحاتين من زمان قوى
تقولى السيسى قال مش محتاجين منهم حاجة وهنعتمد على نفسنا
اقولك طب وبيلف ع السعودية والامارات ورايح روسيا يعمل ايه ؟ 
تقولى طب ما هى كدة فرجت
اقولك مهما كان مش زى حصة مصر من دول اوروبا وامريكا التى توزع الدعم ع الدول النامية ومنها مصر
تقولى وهنفضل كدة كتير
اقولك غالبا طول ما السيسى ف الحكم

العنف لا يولد الا العنف

كنت من معارضى نظام مرسى .. ايقظنى زوجى يوم ١٤ اغسطس ليخبرنى فى كلمات مقتضبة "فضوا رابعة بالقوة" .. وشعرت كأن جبلا سقط على رأسى فجأة .. وظللت اردد عبارة واحدة لم استطع ان انطق بغيرها "يا نهار اسود .. يا نهار اسود .. يا نهار اسود ..." 
نعم لقد كان يوم فض رابعة هو اكثر الايام قتامة وسوادا منذ بدء ثورتنا فى يناير ٢٥ .. حيث قامت الثورة من اجل حرية الرأى ومن اجل كرامة المواطن .. وكانت مصادماتنا مع الشرطة يوم ٢٨ يناير بالطريقة التى تعودوا مواجهة المظاهرات بها .. انما فض رابعة !!! ان تنتهك حياة المصريين لاختلافهم فى الرأى بهذه الطريقة البشعة !!! .. ان يبارك الاعلاميين وجموع الشعب هذا العمل الاجرامى !!! .. ان يتغنى المجرمون بالمجزرة "تسلم الأيادى " .. 
صحفية سابقة واعلم ما يدور فى المطبخ الاعلامى .. هذا شعب قد غسلت ادمغته .. هذا الشعب يفضل ان يهلل للفائز على ان يقف على كلمة الحق .. هذا الشعب قد فقد انسانيته منذ عهود .. 
بعد ان استوعبت الصدمة .. بدأت اتصل بأصدقائى واقاربى ممن اعتادوا الذهاب الى اعتصام رابعة .. وفجعت فى مقتل الصديق المهندس رجل الاعمال المسالم صاحب الضحكة والمرح "أيمن زكى" وغيره كثيرون لم يستحقوا القتل .. 
بينما يهلل كثير ممن حولى ويبارك المذبحة .. كان هناك بصيصا واحدا من الضوء .. اتفقت او اختلفت معه .. لا يمكن ان تنسى مواقفه الانسانية .. وحرصه على قول الحق .. فالبرادعى الوحيد الذى اعترض على الفض بالقوة .. بل استقال ورحل اعتراضا .. وحظى بهجمة اعلامية لا تقل شراسة عن الهجمة على الاخوان .. واى مؤيد لهم .. واى كائن كان يعترض على المذبحة حتى لو كان معارض لنظام مرسى !!! .. سواء داخل مصر او خارجها .. فرد كان او مؤسسة او دولة !!
وبدأ الاعلام فى تهويل المواجهة بين المعتصمين فى رابعة والمكلفين من السيسى شخصيا بفض رابعة مهما كان الثمن .. وصور للناس اكاذيبا لا يصدقها الا المغيبون .. بداية من تشويه المعتصمين .. وحتى تأليف قصصا عن التعذيب داخل رابعة والجثث تحت المنصة .. لا ولن يصدقها اى شخص حضر اعتصاما يوما ما .. بل يصدقونها جموع حزب الكنبة والفلول ومؤيدى النظام السابق ..والا اى احمق هذا من يصدق ؟؟؟
حذرت كل من حولى من المؤيدين والمصدقين للاعلام المصرى الفاسد .. من ان رابعة مجزرة وان اسلوب الاطاحة بمرسى بداية لم يكن حكيما .. وان مصر سوف تتعرض لعقوبات اقتصادية بسبب تدخل العسكريين فى الحكم ..  واننا هنشوف ايام سودا .. لان اغلب الناس نزلت فى يونيو تطالب مرسى نفسه بانتخابات رئاسية مبكرة وليس تدخلأ عسكريا !!
لعب الاعلام دورا محوريا فى تجريم وتخوين كل معارض للسيسى .. بدأت حملة القبض على كل اخوانى .. وكل مؤيد لمرسى .. وكل ناشط سياسى ليبرالى او اشتراكى اعترض على المذبحة .. وصدر قانون يجرم التظاهر .. وألقى بالجميع فى غياهب السجون .. ١٤٠ ألف ناشط .. شباب وفتيات فى عمر الزهور .. اودعوا السجون .. وصدرت احكام جماعية بالاعدام لم يشهدها التاريخ من قبل .. وعاد الامن يعيث الفساد فى الجامعات .. وتم الغاء انتخابات الجامعات .. بل ان كليات بالازهر ودار علوم تم فصل بعض طلابها من التعليم الجامعى بأكمله وليس من كلياتهم فقط .. فلا تستغربوا جيلا كاملا من العنف .. فلا يولد العنف الا العنف!!
فإن كنت مقتنعا ان نظام مرسى كان نظاما غبيا .. احذر فأنت حاليا تؤيد نظاما مجرما ..
وبعد عام من المجزرة .. اصدرت الهيومان رايتس وواتش تقريرها .. اذا اردت ان تصبغ يدك بلون الدم ..  فأيد فض رابعة !!

المتزوحون "٣"

فى فيلم لفؤاد المهندس يقوم عبد المنعم مدبولى بدور طبيب نفسى .. نراه يعالج مريض عنده عقدة من قصر القامة فينصحه ان يردد "انا مش قصير قزعة .. انا طويل واهبل " .
ولمن لا يعرف دى نظرية موجودة فعلا ابتكرها طبيب نفسى ألمانى .. وكانت شكوى كثير من الازواج انهم مبقوش حاسين بالحب تجاه زوجاتهم .. فكان بيطلب ان كلا منهم يوميا يقف امام المرآه ويردد " انا بحب زوجتى فلانة عدة مرات " .. وبالفعل الطريقة نجحت وعاد اليه الازواج يشكرونه على انهم رجعوا يحبوا زوجاتهم ..
تخيل نفسك رابط ايديك ورا ظهرك لمدة طويلة .. مابتستخدمهاش .. هيحصل ايه ؟؟ .. طبعا هتتعطل .. هتتوقف عن العمل .. وهتنمل ومتبقاش حاسس بيها .. بعد كدة هتضطر تقطعها .. هو دة بالظبط اللى بيحصل لما نبطل نقول كلمة "بحبك" لشريك حياتنا .. الحب بيتنسى جوانا .. وبييجى وقت مانلاقيهوش موجود .. وتتقطع اواصر العلاقة ونستغرب ايه اللى حصل ؟؟
احرصوا على ترديد كلمة "بحبك" .. يوميا .. من ناحية .. تبقى بتستخدم الحب اللى جواك وبتعبر عنه .. ومن ناحية تانية بتقنع نفسك من غير ما تدرى بثبات حبك وابديته
وقول لى بحبك قولى .. عايزة اسمعها تملى .. هو طلب مشروع وهام وحقيقى من اى زوجة لزوجها .. والعكس ايضا

المتزوجون "٢"

كلمة "نكدية" كلمة يرددها دائما الرجال عن زوجاتهم .. طيب تعالوا كدة نشوف معنى الكلمة دى !
النكَد فى معجم مختار الصحاح هو : كل شىء جر على صاحبه شر او جعل الامر صعبا وعسيرا
يعنى الكلمة فيها نوع من التهديد .. يعنى ايه ؟؟ فلنعط مثال لذلك.. من مواقف تحدث فى كل البيوت تقريبا
عندما تتأخر الزوجة فى ارتداء ملابسها وهى خارجة مع جوزها .. فيبدأ الزوج يزعق ويبرطم ويهلل .. فتغضب الزوجة وتعتبر ذلك اهانة .. طب والله ما انا خارجة .. فيصفها زوجها بالنكدية
عندما يعود الزوج متأخرا كل ليلة .. تغضب الزوجة وتزعق وتبرطم وتهلل .. فيبدأ الزوج ويتهمها انها نكدية
عندما تطلب الزوجة شىء معين ويرفض الزوج ذلك .. فتغضب الزوجة وتبرطم وتهلل وتزعق .. فيتهمها فورا انها نكدية
عندما تتشاجر الزوجة مع الابناء بسبب اى غلطة .. يتدخل الزوج لصالح الابناء ويغضب ويتهمها انها نكدية
عندما يتشاجر الزوج مع الابناء فتحاول الزوجة تهدئة الامور .. او التدخل لصالح الابناء .. يغضب الزوج ويتهمها انها نكدية
اى ان الزوجة نكدية فى كل الاحوال سواء كانت هى التى بدأت الشجار او التى انهته
اعتقد ان كلمة نكد يجب ان يعدل معناها فى مختار الصحاح
معنى كلمة نكد فى مدونة لكل نساء الشرق
نكَد : زوجة تناقش او تعترض او تعارض او ترفض الاهانة او تتدخل فى حوار يخص الزوج
هتقولوا لى طيب ما الزوج برضه بيعمل نفس الشىء ..
هقول لكم ان الرجال لا يعترفون بأخطائهم غالبا .. بل ويكررونها .. وقد ورثوا كلمة "نكدية" ابا عن جد بدون فهم او استيعاب .. ولو راجعوا سلوكياتهم سيكتشفون انه "يا عزيزى كلنا نكديين "

المتزوجون "١" ..

شىء جميل لما يكون اعز اصدقاءك هو شريك حياتك .. كتير بيتصور كل طرف انه بعيد عن الطرف التانى .. او انه مش صديق حقيقى .. وكتير بنخبى حاجات عن شركاء عمرنا سواء كنا ذكور او اناث .. ولو فكرت شوية هتلاقى ان كل طرف بيخبى عن التانى الحاجات اللى لو عرفها ممكن تزعله .. ودة معناه اننا مازلنا بنهتم بزعل بعض .. والاهتمام فى حد ذاته حب .. الاهتمام مش بس اننا نضحك فى وش بعض او اننا نخرج مع بعض او اننا نقول كلام حلو لبعض .. الاهتمام فعل .. ومفيش اهتمام اكتر من انك تخاف على زعل شريك حياتك ..
يمكن تقول او تقولى لنفسك .. لو كان بيحبنى كان عمل كذا او كذا .. ولو كان بيحبنى كان مخباش عليا كذا .. لكن الاهتمام باخفاء ما يغضبك فى حد ذاته هو حب كبير .. لانه لو مكناش بنحب .. مكناش نتعب نفسنا ونهتم باننا مانزعلش شركائنا ..
تصور او تصورى ان شريكك عمل حاجة تزعلك وقالك "هو  كدة واذا كان عاجبك" او "انا هعمل اللى يعجبنى والباب يفوت جمل" ... شوف صدمتك واحساسك ساعتها هيبقى ازاى .. طب بالذمة دة يبقى اهتمام ؟؟؟ طب بالذمة دة يبقى حب؟؟ 

حدث بالفعل

اعتبر نفسى دودة قراءة .. اقرأ كل شىء وعن كل شىء بنهم شديد .. واشتريت كتاب عن قراءة الكف و كان لى صديق مقرب اسمه ايهاب  حسام .. صديقى الانتيم .. فقالى مازحا .. اقرى لى كفى بقى طالما قريتى كتاب عن قراءة الكف .. وامسكت بيده و وجدت خط العمر طبقا للكتاب .. تقريبا قد انتهى .. فقلت له مداعبة .. الكتاب طلع سكة لان المفروض انك تكون دلوقتى ميت .. وقد توفى فى حادث سيارة بعدها بأيام !!!

بعد سنوات 

يعلم كل اصدقائى ان عندى كتاب تفسير الاحلام لابن سيرين .. وبالتالى يتصلون بى عندما يرون حلما ما من حين الى آخر .. اتصل بى  صديق مقرب جدا اسمه هانى الزرقانى .. وهو صديق عمر .. وقال لى انا حلمت حلم وعايزك تفسريه .. انا حلمت انى كنت نايم وابويا الله يرحمه بينادى عليا .. قمت ادور على الشبشب وانا بقوله طيب يا بابا انا جاى اهوه .. ففتحت الكتاب وهو معايا على التليفون .. على باب رؤيا الموتى .. وسألته انت شفته ولا لأ ؟؟ قال لأ سمعت صوته فقط .. ولقيت مكتوب في الكتاب بالنص "من رأى ميتا يناديه من حيث لا يراه فانه يموت " .. وبعدها باسابيع قليلة جائنى خبر وفاة هانى وحيدا فى منزله !!

عزيزتى الزوجة .. هيعملها تانى ليه ؟؟

عزيزتى الزوجة
متزعليش لو جوزك مبيفكرش يبعتلك رسالة حب ..
متزعليش لو جوزك مبيفكرش يطلب منك الخروج معاه "من غير العيال"
متزعليش لو جوزك مجابلكيش هدية ف عيد الحب
متزعليش لو جوزك مبصش ف عنيكى من سنين
متزعليش لو جوزك بطل يسألك عن اللى بتحبيه او اللى بتكرهيه او حتى اللى نفسك تعمليه

هو كان بيعمل الحاجات دى قبل الجواز عشان يوقعك فى حبال الهوى الدايبة ويتجوزك
وطالما انه دلوقتى .. بيرجع كل يوم يلاقيكى مراته .. هيعملها تانى ليه ؟؟؟