لماذا لن أعط صوتى للإخوان؟؟؟

الإخوان المسلمون .. انتهازيين على أعلى مستوى .. وعلى فكرة مفيش بينى وبينهم حاجة وشبابهم زى الفل انما بيستبعد رأيهم .. والرأى رأى مكتب الإرشاد .. والشورى شورة مكتب الإرشاد والمرشد العام

الشباب كانوا عايزين ينزلوا معانا يوم 25 يناير .. ورفضت الجماعة المشاركة .. ولما نزل الشباب يوم 28 يناير وبدأت الثورة تنجح ... أعلن مكتب الإرشاد ان الجماعة شاركت بينما لم ينضم الإخوان رسميا الى التحرير الا فى الثلاثاء الأول من بدء الثورة .. دة اول شىء ضايقنى منهم

.. قلنا مش مشكلة يمكن حسوا بالندم .. ثم بدأوا استغلال الدين فى الإستفتاء الذى اقره المجلس العسكرى وفهموا الناس ان الإستفتاء هيجيب لهم الإستقرار وشجعوهم يقولوا نعم .. والناس صدقت بتوع الدين ولم تصدق شباب الثورة ساعتها وكلكوا قلتوا "نعم" لفخ المجلس الذى دعمه طبعا الإخوان

بدأوا يقولوا للناس ان الليبرالية كفر بينما هى ليست كذلك وكلنا مؤمون والحمد لله وانما الليبرالية هى "" حماية حقوق الأقلية تحت ظل حكم الأغلبية .. فقط .. حتى لا يظلمهم الأغلبية ويجورون عليهم ..

واننا عايزين نغير المادة التانية عشان نخلى البلد فاسقة !!!!!!!!!!!!!!!!!!!!!

وعشان نجيب رئيس مسيحى .. بينما المصريين 85 % منهم مسلمين .. يعنى حتى لو رشح نفسه رئيس مسيحى مش هينجح .. ولو نجح واعطى له المسلمين اصواته يبقى ساعتها اكيد راجل كويس فعلا ..

لم يخطر فى بالنا الموضوع من اصله .. انما هم من اثاروه ..

وبدأوا يحقنوا المصريين بكلام مالوش لازمة يؤجج النفوس .. ولم يعد يرغب المجلس العسكرى فى مقابلة شباب الثورة أو أخذ رأيهم .. مستبعدين أغلب الإئتلافات والأحزاب

حاولوا يستغلوا زيارة أردوغان فى الدعاية لأنفسهم ثم خذلهم أردوغان وصرح ان الدولة تكون علمانية بينما المواطن يكون له دين

عقدوا تحالف مع حزب النور ومع الوفد .. وساعة الإنتخابات فضوا التحالفات وخليوا بالوفد والنور معا واعلنوا الحرب على حزب النور

قالوا هننزل على 30 % فقط من مقاعد المجلس .. ودلوقتى نازلين على 100 % من دوائر مصر .. وعايزين يبقوا أغلبية .. ليه ؟؟ عشان همة اللى يحطوا الدستور!!!!!!!!!!!!!!!!!!

يعنى ديكتاتور جديد عايز يستبعد بقية التوجهات السياسية من صياغة عقد يحكم العلاقة بين الشعب والنظام .. يعنى تبقى انت النظام وكمان تتحكم فى انك تعمل العقد بمزاجك وتقول موافقة فى مجلس الشعب زى الحزب اللى قبله .. الظاهر مايعرفوش نظام غيره .!!!!!!!!!!!!!

وييجى ماسبيرو .. مجزرة للأقباط .. أو وقيعة أو أيا كان .. فلا يقدم الإخوان سوى تعازيهم بدون أى رد فعل .. كأنه بيطبطب على المجلس طول الوقت

قدم د . البرادعى وثيقة مبادىء أساسية لفظ حقوق الأقليات .. سواء كانوا اقلية فى الديانة أو من المعارضة .. رفضوا الوثيقة .. قدم البسطاويسى اخرى .. واجتمعنا كلنا حول وثيقة الأزهر فى النهاية .. ومع ذلك رفضوها برضه

وييجى المجلس يحضر خازوق .. وهو وثيقة السلمى .. يعنى المجلس هيديهم حكم البلاد ببلاش كدة ؟؟؟ .. يقدم وثيقة السلمى .. وفيها تلاقى انك هيتحكم فيك العسكر تانى فى مقابل انه يدينا حقوق انسان .. ههههه .. وكمان بيقولك مش عايزين حد يسألنا صرفنا فلوسنا فى ايه .. لا برمان ولا رئيس ولا غيره

وطبعا ما يعجبش الإخوان والسلفيين اللى افتكروا انهم هياكلوا الكعكة وحدهم

فصلوا ابو الفتوح لمعارضته لهم .. والراجل بصراحة زى الفل ... حاجة كدة ضمير ايه واخلاق ايه .. وحط ايده فى ايد البرادعى من أجل مصلحة مصر رغم ترشحهم ضد بعض فى سباق الرئاسة .. لأ وشوف الندالة .. يدعموا العوا ضده :)))))))

تقرب الإنتخابات ويدعوا السلفيين الى مليونية التحرير ضد وثيقة السلمى .. ولتحديد موعد غايته 30 ابريل لتسليم السلطة .. نزلنا معاهم عادى لأن دة مطلب لينا برضه منذ البداية ..وروحنا بيوتنا باليل حتى شباب 6 ابريل روحوا

ويبقى بعض أهالى الشهدا اللى كانوا قاعدين من قبل كدة اصلا .. ودخل الأمن حرق الخيم وضرب أهالى الشهداء ضرب مبرح وبهدلهم صباح السبت

طبعا نزلنا كلنا نحمى الناس دى ..لدرجة فى ناس مانزلتش فى يناير ومع ذلك نزلت فى نوفمبر

وبدأت المجزرة .. وكل الشعب شاف الصور والفيديوهات والمباشر فى القنوات الفضائية او على النت .. وحتى التليفزيون المصرى ذاع

ومع ذلك لا ينطق الإخوان .. بالكتير يقدموا تعازيهم كالمعتاد

ساعتها بقى ماقدرتش اتحمل .. هو يا ناس القتل فى الأشهر الحرم مش حرام؟؟ .. دم الشهيد كدة عادى ومشغولين بالإنتخابات ؟؟؟

فى الميدان .. قابلت أصدقائى من شباب الثورة تاركين دوائرهم غير عابئين الا بدم الشهداء وتحديد موعد لرحيل المجلس .. ولما لم يستجيب .. طلبنا رحيله .. وكالمعتاد .. الإخوان صامتون .. والمجلس بيتفرج على قتل الشباب بالغاز والرصاص فى التحرير

مش فاضيين .. مشغولين بالإنتخابات .. يا جماعة عندهم شغل .. انتوا هتقرفونا بالشهدا بقى كل شوية

فى المناطق الشعبية .. وزعوا البطاطين والسمن والارز وحتى الطماطم والخيار .. على الناس

أخدوا صورة بطاقة المواطنين فى المناطق العشوائية ويدوهم 150 جنيه .. يااااااااااااااا بلاش

وفى أول أيام الإنتخابات يخالفون القانون بشراسة واصرار .. ويوزعون دعايتهم أمام اللجان عينى عينك وتحت سمع وبصر الشرطة والجيش .. صحيح مش همة بس اللى عملوا كدة .. لكن فين بقى الضمير وربنا اللى بتتكلموا عنه طول الوقت .. ومين اللى جعلكم وكلاء عن الله من أصله؟؟؟

كل ما سبق من عمايل الإخوان السودا يأخذنى إلى كلمة واحدة " الإنتهازية"لو عايز تعرف حجم الإخوان الحقيقى .. علم الشعب حكمة يضع العبارة الآتية حلقة فى أذنه

الحكومة ليس من مهامها أن تدخلنا الجنة .. الحكومة مهمتها الأولى هى .. أن تجعل مصرنا للمواطن جنة

آسور ياسر

المرأة لن تعود الى الخلف

المرأة لن تعود الى الخلف بعد ما حققناه من مكاسب فى الثورة

المرأة شاركت واستشهدت واعتقلت وانضربت واصيبت

ووقفنا نحمى الميدان فى لجان على المداخل والمخارج

لم نتفرغ للتمريض والطعام .. بل أتينا بكل الأسرة

واصطحبنا أبنائنا غير عابئين بما يمكن ان يحدث

سأحكى لكم عن نماذج رايتها فى يوم جمعة الغضب 28 يناير

صممت على النزول للتحرير .. وتردد زوجى .. فقلت له : ابق كما شئت .. لكنى سوف اذهب وان كتب لى الموت .. سوف ترفع بناتى الرأس لأن أمهم ماتت من اجل الحرية

نزلت بصحبة صديقتى أمانى فى سيارتى ونزل زوجى بسيارته ليصلى فى مسجد مصطفى محمود

ركنا السيارة فى نادى الصيد .. مشينا الى مسجد مصطفى محمود .. وجلسنا فى ستاربكس

كان هناك الكثيرات ممن جلسن فى انتظار انطلاق المظاهرة

كانت نساء راقيات وفتيات فى عمر الزهور .. متحفزات .. مترقبات .. قد ملأن المكان

انطلقنا جميعا بعد أن سلم الامام وسرنا من شارع جامعة الدول منطلقين الى شارع البطل احمد عبد العزيز

وفى الطريق قادت النساء المظاهرة وتدفقت النساء من ابواب العمارات فى المهندسين والدقى

وهتفت المرأة فهتف ورائها الرجال .. لدرجة شجعتنى لقيادة المظاهرة لمسافة فى شارع البطل احمد عبد العزيز وشارع التحرير

كانت تسير اسر كاملة

وكان هناك كثير من الامهات اصطحبن ابنائهن من المراهقين والشباب الصغير

فى ميدان الجلاء .. وبعد ان اشتد الضرب .. رايت امرأة تتشح بالسواد كالبسطاء وتحمل رضيعا على كتفها

الطفل يبكى من حرقة الغاز والمياه المحملة به التى انسالت على اجسادنا كالنار

قلت لها .. روحى يا ماما عشان الولد

قالت بإصرار : عايزة اشارك وما ينفعش اسيبه

تراجعنا بعد اشتداد الضرب وجرينا فى الشوارع الجانبية

كان معى صديقتى امانى وهى ام لطفلتين

وهناك قابلت احدى الصديقات وبالصدفة قابلت ابنة عمة زوجى الذى طبعا لم اجده فى الزحام

ونحن نجرى قابلت حوالى 5 بنات من متوسطى الحال

وعرفت انهم بيشتغلوا فى كوافير .. و اول مرة يطلعوا فى مظاهرة

وكان الكل يتحدث عن التوريث وقمع الشرطة وطول مدة حكم مبارك كاسباب للخروج

حتى متوسطى الحال والثقافة

نوراة نجم .. قادت نوارة نجم المظاهرات منذ البداية وكانت ممن اعتصمن بشكل دائم فى التحرير

وكانت هناك الكثيرات من المعتصمات .. واشرفن على كل شىء وشاركن فى كل شىء

ام واخت خالد سعيد

كنا قد عرفنا كلنا أم الشهيد خالد سعيد التى كانت بمثابة أم الميدان

كانت تدور وتلف طوال اليوم فى الميدان لتبث الحماس فى قلوبنا وتثبتنا بكلمات أم مكلومة على ولدها

أميرة سراج .. أم لثلاثة اطفال وموظفة

قابلتها فى لاشارع وانا فى اتجاهى للتحرير .. قلت لجمع من النساء تعالوا معانا التحرير

فقفزت أميرة سراج بجوارى ومن يومها واحنا اصحاب

هالة قطامش .. جارتى .. لم تذهب الى مظاهرة فى حياتها ولكن تحمست للنزول للتحرير

وكانت بتروح وتيجى معايا لما تعرف تلاقى حد يقعد بابنها

هالة مصطفى .. اعلامية وسيدة مجتمع وشاركت فى الاعتصام وكانت تحرص على اصطحاب الأطعمة كل يوم للثوار

ناهيك عن حملات التبرع بالدم التى توجهت لها الكثير من الفتيات لمنح دماؤهن للجرحى والمصابين

وكان هناك نساء مجهولات احضرن الخل من مطابخهن واعطيناه ايانا فى المظاهرة لنحمى انفسنا من المسيل للدموع

لن نعود .. لن نتخلى عن حقوقنا .. لن نقبل استبعادنا من اى منصب او مشاركة

لن نقبل التفرقة فى المواطنة .. لا طبقا للقانون ولا طبقا للمجتمع

المرأة ليست نصف المجتمع .. وانما هى أم المجتمع وصنيعتها

اذا اردت ان تتعرف على حال شعب فإنظر الى نساؤه

واحنا نساء مصر .. اثبتنا اننا .. وعن جدارة .. مواطنون متساوون فى الحقوق والواجبات ونستطيع بناء الوطن جنبا الى جنب مع الرجل ..و نرفض ان نكون مواطنون من الدرجة الثانية

فتش عن الجنس فى أزمة قرية صول - مركز أطفيح

رحنا أطفيح امبارح

على فكرة ... كان معانا

زياد العليمى - المخرج خالد يوسف - الفنانة بسمة - ناصر عبد الحميد - جورج اسحق - الشيخ محمد حسان - الشيخ صفوت حجازى - عمرو حمزاوى - دينا ابو زيد وغيرهم كتير من ثوار 25 يناير وأنا وزوجى طارق على ، وكلهم سمعوا القصة دى من رجال القرية ونساءها

الحكاية غريبة وتنفع فيلم كما ساعد على اشعالها اياد خفية

واحد مسيحى ظبطوه مع بنت مسلمة

همة من عاداتهم لما ولد يتظبط مع بنت ... البنت تتقتل والولد كمان لكن عشان ما تحصلش فتنة قالوا يسيب البلد ويمشى

طلبوا من الولد يسيب البلد وفعلا مشى لمدة 4 أيام ثم عاد

فى نفس الوقت ولاد عم البنت راحوا لأبوها وطلبوا يسلمهالهم عشان يقتلوها زى عوايدهم

المهم ان ابوها جاب البندقية وطخ واحد من ولاد اخوه قام التانى طخ ابوها وماتوا همة الإتنين وابن عمها الثالث هرب

وطلع أهل البلد على بيت الواد المسيحى

بالمناسبة هو مش واد قوى يعنى - هو أب ومتزوج

يعنى كان بيخون مراته كمان

المهم .... راحوا الناس على بيت الواد عشان يجيبوه ... امه قالتلهم انه مستخبى فى الكنيسة

راح الرجالة عشان يجيبوه من الكنيسة ومارضيوش يدخلوهم فهجموا على الكنيسة للبحث عنه

لحد كدة والموضوع عادى

المفاجأة بقى .... استعدوا

لقوا فى الكنيسة بعض ملابس داخلية نسائية ورجالى وصور لهم ولزوجاتهم واخواتهم البنات

فطبعا حرقوا الكنيسة للتخلص من السحر الأسود اللى بيعمله القسيس لرجالة البلد عشان يربطهم ولبنات البلد عشان ما تتجوزش على حسب اعتقادهم ... ونايمين فى أرض الكنيسة ورافضين تماما وبيقولوا على جثثهم ان الكنيسة ترجع تانى

لكن هناك قصة أخرى وسر دفين انا عرفته

سر الدفين هو ان فى كل قرى مصر الستات بتروح للشيوخ والقساوسة لفك الأعمال

وأنا شخصيا اعرف كتير من النساء يذهبن للقساوسة من أجل ذلك

الستات فى قرية صول بأطفيح كانت بتروح للقسيس عشان يعملهم حاجة تفك اجوازهم او تحببهم فيهم

والبنات كانت بتروح عشان يتفك نحسها ويتجوزوا

لما الرجالة دخلوا الكنيسة ولقوا الكلام دة ... الستات خايفة تقول انهم كانوا بيروحوا وان همة اللى ودوا الحاجات دى بنفسهم كأثر لفك السحر

والرجالة اللى عارفين ان زوجاتهم راحوا مش ممكن ابدا هيعترفوا بكدة

فالكل اتفق ضمنيا على ان القسيس كان بيسحرلهم وان هو اللى ربطهم

وطبعا مش دى الحقيقة دة اللى عايزين يصدقوه

رجالة كتير مابتعرفش ففضلوا ان الكنيسة تكون بتعمل لهم عمل على انهم يكونوا ما بيعرفوش

الخلاصة فتش عن الجنس

العجيبة بقى ان فى ورق اتوزع فى القرية محدش عارف مصدره مكتوب فيه انه عند الهجوم على الكنيسة لقوا فيها

ملابس داخلية

اعمال سحر

خمور

مين اللى كتب وطبع الورق دة و وزعه على أهل البلد كلهم رغم ان البيان كاذب وبيزود من عنده شوية لزوم التسخين؟؟؟؟

حاولنا نفهمهم ان مفيش سحر وان النساء فى مصر تذهبن للكنيسة احيانا لفك السحر لكن قولوا لى هتفهموا الصعايدة ازاى ان مفيش حاجة اسمها سحر؟؟؟

ستات كتير فى الريف والحضر بتروح الكنيسة عشان البركة وعشان يفكوا أعمال سحر ... دى ثقافتهم وانا لا أنتقدهم لكن فى نفس الوقت الرجال فى القرية فاكرين ان الكنيسة سرقت ملابسهم وصورهم عشان تعملهم ربط

هل تعلموا ان فى ناس كتير بتروح الكنائس لهذا السبب ؟؟؟ والمسلمين أكتر من المسيحيين كمان فى الموضوع دة

قعدنا مع المسيحيين وهمة مصرين ان الكنيسة تتبنى مكانها

قعدنا مع المسلمين وهمة مصرين ان الكنيسة تتبنى برة البلد

قعدنا فى قعدات فيها مسيحيين ومسلمين وكانوا متفهمين

فى واحد مسيحى قالى ان فى بيت ورا الكنيسة بتاع واحد اسمه ميلاد وهو ساحر وان هو السبب فى كل دة وانه هرب ومشى من البلد

المهم ان الموضوع كله داخل فيه الجنس بمشاكله والدجل والشعوذة والمعتقدات الريفية لكن فى حد بيسخن وبيوزع منشورات ومعايا صورة من المنشور دة

كمان المسلمين زعلانين لأن فى قناة قالت كلام مش مظبوط عن انهم بياخدوا اتاوات من المسيحيين فى القرية والحقيقة المسيحيين أنكروا انهم قالوا اى حاجة زى دى وكل كلامهم عن بناء الكنيسة

الإعلام بيسخن من كل ناحية سواء اعلام الدولة أو الإعلام المسيحيى

الجيش متبهدل هناك لدرجة صعبوا علية

همة محاصرين الأرض والمسلمين معتصمين فيها لمنع اعادة البناء

لأنهم لو ضربوا واحد مسلم فقط ... هيعرضوا حياة المسيحيين فى القرية للخطر من الإنتقام ... دول صعايدة\

بالمناسبة ... البنت قتلوها امبارح

للأسف كمية الجهل رهيبة فى هذا المكان ... الله يخرب بيت النظام القديم اللى سايب الناس عايشة فى الجهل والتخلف دة

دول فى العصور الوسطى والله

ادعوا ربنا يوفقنا ونحلها

هنروح تانى وتالت لحد ما تتحل

يا حلاوة يا مصر

كنت أمام التليفزيون أنا وزوجى عندما أذاع خبر رحيل بن على بعد قيام ثورة الياسمين فى تونس

ورغم أن زوجى ليس له علاقة بالسياسة من قريب او بعيد بل يتجنب الحديث عن مصر وسياساتها ، الا انى وجدته يصمت وتدمع عيناه

ثم قال بفرحة ممزوجة بالتعجب والاعجاب جملة لن أنساها ما حييت

قال بالحرف الواحد :: يا حلاوة يا تونس .. ثم أخذ يرددها عدة مرات

قلت له لماذا نحن خانعون هكذا ؟؟؟ والله التوانسة رجالة

وأخذت أنتقد نفسى قائلة : كل اللى بنعمله اننا نقعد على الفيس بوك وننتقد ونقول ومحدش بيعبرنا

مش عارفة احنا بقينا ضعاف كدة ليه؟ مصر بلد عريق لكن شعبها نسى الإنتماء ونسى ان البلد دى بتاعته

ردد وعيناه لا تفارق الشاشة .. وكأنه لم يسمع حرفا مما قلت : يا حلاوة يا تونس .. يا حلاوة يا تونس

لم يخرج زوجى من قبل فى مظاهرة ولكن أمام اصرارى على النزول قرر مصاحبتى يوم الجمعة - جمعة الغضب - على زوجته وأم بناته المجنونة المتمردة المارقة كما يصفنى ॥ ومن يومها وهو بينزل كل يوم ॥ تدفق الحماس الى قلبه والى عقله ॥ الحماس ॥ ذلك الشعور الذى يمنح الإنسان حب الحياة

اليوم ॥ ونحن نغادر التحرير للحصول على قسط من الراحة فى البيت ... نظر خلفه والتقط بعض الصور للملايين الحاشدة فى الميدان تطالب برحيل مبارك ॥ تطالب بحقها فى الحياة ॥ بحقها فى الحرية

نظر الى عينى مباشرة ثم قال لى والدموع تفيض من عينيه فى زهو وفخر : يا حلاوة يا مصر .. يا حلاوة يا مصر .. يا حلاوة يا مصر

الحياة ............. الموت

جلست على أريكتها وقطتها بجوارها .. لا تليفون بيرن ولا باب بيخبط

لم يعد احد يزورها منذ مدة طويلة ولم تعد تدق تليفوناتها الا فى المناسبات

تضع على ساقيها الدقيقتين اللاب توب وتحاول التواصل مع العالم من حولها بلا جدوى

تغوص فى ذكرياتها

تتذكر كيف كانت يوما ما شابة .. جميلة .. يافعة .. قوية .. منطلقة بلا حدود

لا يحول بينها وبين اهدافها حائل

تتذكر ساقيها وهى تنطلق لتسابق الريح وهى طفلة تلهو بلا هدف

تتذكر الرجال فى حياتها .. احبها الكثير .. واحبت القليل منهم

عدة زيجات فاشلة

زوجها الأخير ... حبها الكبير .. حتى هو رحل عنها من اجل امرأة تصغره بعشرين عاما

ثم عاد اليها نادما بعدما تمكن منه المرض ليرحل مرة اخرى وللأبد

ابنائها ... اين هم الآن ؟؟ أين ضحكاتهم التى كانت تملأ البيت بالبهجة؟

تركوها وحيدة ... منهم من سافر ومنهم من هاجر ومنهم من مل مصاحبة أمه العجوز

لم تعد تراهم الا فى المناسبات ... هذا ان لم يكتفوا بالسؤال عنها تليفونا او عبر الإيميل

عاشت حياة صاخبة يملؤها الخوف من الموت

رقصت ولعبت وتلاعبت بها الحياة

عملت بجد واجتهاد رافضة فكرة ان الرجل أفضل

ربت بناتها وأبنائها على المساواة

علمتهم ان يعطوا المجتمع كما يأخذون منه .. ونسوها فى غمرة أخذهم وعطائهم للدنيا

نهلت من الدنيا قدر خوفها من الموت

خافت ان يأتيها فجأة .. ان يباغتها بينما هى ترقص او وهى تعمل او وهى تحتضن ابنتها او اثناء حضور حفل تخرج ابنها ... خافت ان يخطفها من بين احبائها

اصدقائها ... اين هم الآن ؟؟؟ منهم من اخذته الحياة ومنهم من رحل عن الدنيا واختطفه الموت فزاد رعبها منه

الموت .. ذلك المجهول الذى ظل يحوم حولها بظلاله طوال حياتها

ترى كيف يكون الموت؟

يد تدق الباب بشدة ... طرقات تتوالى تكاد تحطمه ... لا يتوقف جرس التليفون عن الرنين ... وجرس الباب ايضا

ليصنع الدق والطرق مع الرنين مع مواء القطة العنيف سيمفونية صاخبة

اصوات متداخلة ... محدش بيفتح ليه؟؟

صوت يصرخ ... اكسروا الباب

يدخل الابن .... وصرخة تشق عنان السماء ..... ماماااااااااااااااااااااااااااااااااااااااااااااااااا

ماتت ماما

العادات الجنسية السيئة للرجال

كثير من المقالات والكتب تحاول توضيح الأمور الجنسية وتعريف كل جنس بالآخر سواء ذكر أو أنثى لكن الحقيقة ان غالبية الرجال عارفين كويس ايه اللى يبسط المرأة ويمنحها الشعور باللذة الجنسية لكن بيستهبلوا

اللذة تختلف عن الذروة ... اللذة ان الناس تستمتع بالممارسة ... الممارسة نفسها ...
اما الذروة هى الوصول لدرجة النشوة القصوى والتى تلى الشعور باللذة
--------------------------

-----------------
تعالوا نشوف ايه العادات السيئة اللى بيقع فيها الرجال عادة فى علاقتهم الجنسية
لو سألت أى راجل عن المرأة وما يمتعها هيقولك كتير وقليل
المشكلة انه عادة حافظ ومش فاهم
لكن المصيبة ان فى فاهمين لكن مطنشين .. او مكسلين

انا بأتكلم هنا عن رجل وامرأة قد يكون مر على زواجهم 3 سنوات فأكثر

اللى لازم نركز فيه ان المخ هو أهم الأعضاء الجنسية والغريب ان قليلين من يستخدمونه فى ادارة العلاقة الجنسية ودى غلطة يقع فيها غالبية الازواج

لازم تؤهل المرأة للعلاقة وتؤهل نفسك كمان .... استرجاع الذكريات الجميلة والأحداث المشجعة فى الذاكرة يحفز المخ للتدخل لصناعة علاقة جيدة
------------------------------------------------
ما تستغربش لما تبقى لسة شاخط فى مراتك عشان كوباية الشاى اللى عملتهالك طلعت دلعة .. وتقولها بعد نص ساعة الكلمة المعتادة (ياللا) ... ساعتها ممكن تتهرب منك وانت مش فاهم طبعا ليه؟ مخها رافضك لأنها حست من نقدك ليها فى شىء هى بتعمله تطوعا اللى هو الشاى مثلا ... حست انك مش مقدر اللى بتعمله
ولو استجابت بتبقى مش فى المود ومخها يخيم عليه الكآبة ... الكآبة هى أشد اعداء الجنس
---------------------------------------------
قاعد قدام التليفزيون وطلعت هيفاء وهبى ... تقعد بقى انت تقولها .. اهى دى الستات ولا بلاش .... مزة صحيح ... وتتطلع فيها بمنتهى الشغف مع ان مراتك لسة صابغة شعرها من اسبوع وانت ما أخدتش بالك
------------------------------------------
المرأة مخلوق صعب ومعقد جدا .... وكل ما حولها ينعكس عليها
المرأة زى الأرض كل اللى تزرعه فيها هيرجعلك وكل ما تهتم بالزرعة هتبقى احلى وأجمل وهتديك خير كتير
الرجال أغلبهم بيكسلوا ويطنشوا ويفكروا ان الأرض دى هتتزرع لوحدها طالما انك زرعت فى الأول .. هو احنا هنفضل نزرع طول الوقت ولا ايه؟
:)))
----------------------------------------
التقديم للجنس ....

كتير من الرجال بينسوا البوس بعد 3 سنين من الزواج (احصائية) ... كتير منهم بينسوا اللذة ويبقى هدفهم فقط هو الوصول للذروة .... الست ما تعرفش تصل للنشوة او الذروة بدول المرور بمرحلة اللذة

ويجب حقيقة ان المرحلة دى تاخد حقها تماما وبلاش نكسل ونطنش

لو لاقى نفسك مش قادر يبقى بلاش أحسن
---------------------------------
فى رجال برضه بيحاولوا يجددوا فى الحياة الجنسية بتغيير الأوضاع الجنسية

يا ريت نعرف الست بتحب أنهى وضع ونركز عليه ....
يا ريت نبطل ناخد خبراتنا من أفلام البورنو لأنها مجرد أفلام ومزيفة تماما والشعور اللى الممثلة بتوصلهولك مش شرط يكون هو الحقيقة
الأوضاع الغريبة الغير مريحة ... نتفاداها
---------------------------------
ابدأ انت بمداعبة زوجتك .......... كثير من الزوجات تشكين من أن زوجها يبدأ دائما الممارسة مركز كل التركيز على عضوه الذكرى
يا جماعة دى المرحلة التالتة .... يجب ان يكون الأول فى قبلات ومداعبات ولما تبدأ الست تتجاوب نبدأ ندخل العضو الذكرى فى الموضوع

حركة سخيفة تشكو منها بعض الزوجات

كف عن مد يدك مدعيا الخبرة لتبين ان كانت بدات فى انزال السائل المزلق الطبيعى الذى يفرزه المهبل عند الإستعداد للإيلاج .... لأن الحركة دى تشبه عند الرجل ان امرأة تطمئن على قوة انتصابك كل شوية فتزيد من توترك
---------------------------------
تذكر ان المرأة عايزة دايما تبقى المزة بتاعتك ..... وتذكر انها كانت فعلا المزة قبل ما تتجوزها ولو انت حسيت انها مابقتش مزة يبقى انت السبب لأنك التغيير الوحيد اللى حصل فى حياتها

عندما أرى امرأة تهمل فى مظهرها ... اعرف ان زوجها لا يثنى على جمالها ولا على مظهرها
عندما أرى امرأة مكتئبة ونكدية ... اعرف ان جوزها هو مصدر ذلك
عندما أرى امرأة سخيفة ... أعرف انها تتعرض لغلاسات زوجها باستمرار
عندما أرى امرأة عصبية المزاج ... اعرف ان جوزها مش مشبعها جنسيا
عندما ارى امرأة تخون زوجها .... اعرف ان زوجها بطل يمارس دور الذكر فى حياتها فوقعت فى براثن آخر بيعاملها على انها المزة
---------------------------------
اعرف ايها الرجل ان العلم بيقول ان مفيش امرأة باردة وأخرى سخنة
لكن فى راجل بيسخن وراجل مابيعرفش يسخن
-----------------------------------
السؤال المعتاد السخيف الذى عادة يوجهه الرجل لزوجته فى السرير .... هاه خلاص.؟؟

كأنه يتعجلها .... فتبدأ هى بادعاء الاورجازم لتتخلص من شعورها انها متأخرة عليه
:))) واتحدى ان راجل يعرف الفرق بين اورجازم المرأة الحقيقى والأورجازم المزيف

السؤال دة بينتج عنه انها تعرف انه مش بيحس بيها لما تصل للذروة وهنا بقى المخ هيبدأ يترجم الشعور دة على ان جوزها مش عارفها جنسيا وبالتالى تهبط المؤشرات لأن المخ اتشغل بقضية اخرى غير الجنس
----------------------------------------
الاطالة بدون لازمة ..... لما الرجل يطيل العملية اكثر من اللازم وهو فاكر ان كدة يبقى كويس بيحصل نتايج مش كويسة .... زى ايه؟
الست بتعتقد انه مارس الجنس مع أخرى او مع نفسه
تعتقد انه غير مثار .. او ان رغبته تجاهها قد فترت .... او انه مكانش عايز وبيؤدى واجب وخلاص
وبالتالى تعطى نتائج سلبية
----------------------------------------
لا تحاول بدء الممارسة وعضوك غير منتصب تماما ....... موضوع تشكوا منه كثير من الزوجات
مستعجل على ايه يعنى؟
----------------------------------------
لا تنسى القبلة والتلامس بدون هدف الممارسة طوال اليوم
انت كدة بتحضرها للممارسة ... لما تيجى نازل الصبح وتبوسها ولما ترجع تبوسها ... ادخلها المطبخ وهى بتعمل الأكل واحضنها وداعبها
خليها بتاخد شاور واعمل نفسك بتبص عليها وخليها تشوفك وانت بتتفحص جسدها بشغف
مازحها جنسيا من حين لآخر خلال اليوم ....
لأن دة بيرفع درجة استعداد المخ للممارسة
--------------------------------------
أسوأ حل يلجأ له الزوج حل مشكلته الجنسية هو ان يدخل طرف تالت فى المشكلة ... يعنى الخيانة
لا تلجأ لهذا الحل ابدا ... حل غبى وبشع ويحطم كل العلاقات .... حتى لو كان تحت مسمى الراجل ممكن يتعدد
لأن الست كمان بتعرف تتعدد كويس قوى
-----------------------------------
لما تلاقى مراتك بتتهرب من العلاقة ... توقف واسأل نفسك ليه ولا تستخف

وتذكر ان المرأة زى الأرض .... بتديك على قد رعايتك لها واللى بتضعه من بذور

من اهم البذور بذرة الرغبة ... كل ما مراتك تحس انك ترغب فيها ... هتشعر انها ترغب فيك

تزرعها حب ... تلاقى حب اكبر ...
تزرعها اثارة ورغبة ... هتلاقى اثارة ورغبة اكبر
تزرعها اهتمام ورعاية ... تلاقى اهتمام ورعاية اكثر
تزرعها ايمان بأنوثتها ... تلاقى انوثة ماحصلتش

تذكر

انك تعلم تماما ما تريده زوجتك لكن انت بتستهبل
ان انت تملك الآداة التى تمتعها فلا تستسخدمها استخدام خاطىء
انها لديها نفس رغباتك الجنسية ... وليس أقل
انك عارف طريقك لجسمها فلا تتجاهل معرفتك بزوجتك
سائل المرأة هو البداية وليس النهاية
تحدث معها اثناء العلاقة وتجنب الصمت فتعرف اكثر فى كل مرة تمارس


لو نسيت حاجة يبقى نقولها فى المناقشات

المصريون يصنعون أكبر علم فى العالم تحت شعار .. مصر هتفضل غالية عليا

قررت بعد احداث ماتش مصر والجزائر فى السودان ان اصنع اكبر علم فى العالم
أكبر علم فى العالم لازم يكون مصرى
وبالفعل اتخذت خطوات جدية فى تنفيذ المشروع
سجلت فى موسوعة جينيز للأرقام القياسية
سجلت الفكرة فى الشهر العقارى
انشأت جروب على الفيس بوك تحت عنوان
المصريون يصنعون أكبر علم فى العالم
تحت شعار مصر هتفضل غالية عليا
شارك فيه الآلاف من المصريين العاشقين لمصرنا الحبيبة
شاركوا بالجهد والفكر والدعم المعنوى
قررت عرض العلم فى مهرجان ضخم يليق بمصر
سوف يتفتتح المهرجان شخصية عامة
يحضره الفنانين وكبار رجال الدولة
لا سياسة ولا دين .. كلنا مصريين
اعتمد على المدونين المتحمسين للفكرة للترويج لها
اعتمد على الإعلام التدوينى واتوجه لزملائى المدونين لدعمى معنويا واعلاميا
صورة الحملة على المدونة .. وضعها على مدوناتكم للترويج للحملة
توقيع
آسر ياسر
http://www.youm7.com/News.asp?NewsID=१६०९९५
خبر الحملة فى اليوم السابع
http://www.almasry-alyoum.com/article2.aspx?ArticleID=235383&IssueID=१६०८
خبر الحملة فى المصرى اليوم
http://www.almasry-alyoum.com/article2.aspx?ArticleID=२३५४५४
مقال د. ياسرايوب عن الحملة

نحن نستخدم حيواناتهم المنوية لنحصل على الصغار

لماذا تصر المرأة على ان تنادى بالمساواة وتقلل من شأن نفسها؟؟؟
هم أدنى منا ... وما يفعلونه فى الحياة هو الأصعب والأقل شأنا وليس ما نفعله نحن
نحن نحمل البشرية كلها فى احشائنا
نحن نبدع فى بقائهم احياء بعد ولادتهم
نحن نصنع شخصياتهم ونكونها بأنفسنا
نحن نستخدم حيواناتهم المنوية لنحصل على الصغار
نحن نستخدم قوتهم ليبنون لنا بيوتنا وليحضرون لنا كل ما نشتهى
نحن نستخدم مجهودهم فى العمل لنشترى زينتنا
نحن نحكمهم بغريزة البقاء الأولى وهى الطعام والشراب
ونسيطر عليهم بغريزة البقاء الثانية وهى الجنس
ورغم اننا تتحكم فينا نفس الغرائز الا اننا اقنعناهم بغير ذلك
ازاى ما أعرفش؟؟ :))

نسيطر على الرجل بساندويتش على الفطار
بطبق ملوخية وحمام محشى
بصينية بسبوسة وقالب كريم كراميل
بكوب شاى بعد الغذاء وفنجان قهوة الصبح بدرى

الرجل لو زعل من زوجته يرافق عليها ويمكن يتجوز عليها
... قليل لما يطلقها
تلاقى واحد جاى كل يوم يشتم فى مراته ويسب ويلعن وفجأة ييجى القهوة وهو مبهدل ودقنه طويلة
فى ايه يا عم ؟؟؟ ايه اللى حصل؟؟؟
مراتى سابت البيت وطالبة الطلاق ... مش هى دى اللى طول الوقت مش طايقها
أه بس مقدرش استغنى عنها

قارن فى حالات الطلاق كم نسبة الطلاق بسبب رغبة المرأة وكم راجل هو اللى بيطلق؟

لما الست تكتشف ان الرجل اللى معاها مش مكفيها ف حاجة ما
جنس او مال او عاطفة
تسيبه فورا وتشوف غيره بلا تررد ... بلا رحمة ... وبكل قسوة تطرده من حياتها

روضته على الا يعبر عن مشاعره ... روضته على ألا يشكو ويبكى
الدموع للنساء فقط ... قمة التحرر من الألم فى البكاء
عليهم ان يتألمون

تسيطر المرأة على الحاجات الأساسية للرجل
شهوة الطعام لبقاء الفرد نفسه
شهوة الجنس لبقاء النوع

يسعى الرجل ويكد ليوفر الرفاهية وهى تجلس فى البيت تشكو انه معزمهاش على العشا من شهرين

لا تتخلى سيدتى عن سيطرتك ... انها مصدر قوتك
فلتظل ايها الرجل تعيش وهم القوة .... فأنت مصدر راحتنا

بيقولوا : الستات فى مصر واكلينها والعة

ملحوظة: السى ان ان ارابيا تذكر التدوينة فى اللينك التالى

http://arabic.cnn.com/2009/entertainment/7/8/blogs.8july/index.html

أوضاع المرأة المصرية بالأرقام والإحصائيات من الجهاز المركزى للتعبئة والاحصاء - سبتمبر 2008

- بلغت نسبة الذكور 51,1% فى تعداد 2006 من عدد السكان ونسبة الإناث 48,88% وانخفاض متوسط عدد أفراد الأسرة فوصل إلي 4,18%

السنة	2007
الذكور	37097
الاناث	35635
الاتعداد الكلى	7273

مما يفهم منه ان الإناث فى مصر عددهم اقل من الذكور ... المعلومة لمن يقولون ان التعدد واجب لأن عدد النساء أكتر من عدد الرجال

بلغ عدد المتزوجين 29,189,966 في تعداد 2006 بنسبة 62.69 من السكان في سن الزواج وبلغ عدد حالات الطلاق 437,953 وبلغ عدد حالات الترمل 2,942,709 بنسبة 6.32 % من السكان في سن الزواج.

ردا على من يتقولون بأن تحرر المرأة وخروجها للعمل وقانون الخلع ضاعف حالات الطلاق

بلغت قوة العمل بلغ 24।6 مليون فرد خلال الربع الثانى من العام الحالى بزيادة قدرها مليون و119 الف فرد على نفس الفترة من عام 2007 . كما بلغ حجم قوة العمل بين الذكور خلال تلك الفترة 19.172 مليون فرد بزيادة قدرها 762 الف فرد بزيادة قدرها 4.1% وحجم قوة العمل بين الاناث 5.461 مليون فرد بزيادة 257 الف فرد عن نفس الفترة من عام 2007 بنسبة 4.9% حيث وصل معدل المساهمة فى قوة العمل بين الذكور بلغ 72% ومعدل المساهمة فى قوة العمل بين الاناث بلغ 21.4% مقابل 71.5% للذكور 21.1% للاناث عن نفس الفترة


الفقرة دى للى بيقولوا ان خروج المرأة للعمل يضيع فرص الذكور فى الحصول على وضائف

- نسبة النساء المشاركات في سوق العمل تصل الى ما يزيد على 3 ملايين امرأة، أي ما يزيد على 20% من قوة العمل في المجتمع، والتي تزيد على 16 مليون عامل.تعداد الإناث يقبل عن تعداد الذكور منذ عام 1997فى جميع الأعمار ... سواء فى سن الزواج أو فى الطفولة أو فى الشيخوخة

ردا على من يتقولون ان النساء عمرهم أطول فان متوسط عمر النساء يزيد عن متوسط عمر الذكور بمعدل5%وهى من أقل النسب فى العالم

-واحدة من بين كل 3نساء تتعرض للعنف الأسرى ،غالبية مرتكبى العنف ضد المرأة من الأزواج

- النساء خارج قوة العمل (الرسمية) يقترب عددهن من 20 مليون امرأة.

- نصف هذا العدد (حوالي 10 ملايين امرأة) يعملن أعمالاً غير منظورة في القطاع الهامشي (المشاغل، الزراعة، البائعات الجائلات، الشغالات .. إلخ).

- يقترب عدد الفلاحات المصريات من 8 ملايين فلاحة يسهمن بما هو أكثر من 40% من إنتاج الحاصلات الزراعية.

- ارتفعت نسبة الأسر التي تعولها النساء من 22।5% من الأسرة المصرية إلى 31।5% أي أن ثلث الأسر المصرية تقريباً تعولها النساء। بخلاف اناث تشارك الرجل فى الإعالة

انا بقول تقعدوهم فى البيوت وتريحهوم وتصرفوا عليهم بنفسكوا

- نسبة الأمية لدى النساء تصل إلى 62.5% من إجمالي عدد النساء في مصر.

- نسبة النساء المصابات بالأنيميا تتراوح بين 17% و63% حسب درجة خطورة المرض.

- إن نسبة النساء المعرضة للإصابة بالاكتئاب تبلغ 76% (بينما النسبة عند الرجال 24%).

الاناث تهمل فى العناية الصحية والنتيجة انيميا ... عبارة غبية بتتقال للمرأة الحامل ،ما كل الستات بتحمل من زمان اشمعنى انتى اللى تعبانة

احب اقولكوا ان كل الستات بتتعب فى الحمل ، حملته أمه وهنا على وهن

الإكتئاب سيطر على اغلبية الإناث نتيجة المعاملة السيئة والعنف الذى تتعرضن له

مايقرب من70%من الفقراء فى العالم اناث ... لأ صحيح واكلينها والعة و مخلصين على فلوس الرجالة

حبيبة ماما .... سما

أجمل البنات .... تمت 5سنوات
******
سما
هتشوفى الكلام دة فى يوم من الأيام تكونى بتعرفى تقرى
انتى حاجة جميلة قوى فى نظرى ... وبحبك قوى قوى
انتى الوحيدة اللى بتخلينى اضحك من قلبى ... وانتى الوحيدة اللى بتقدرى ترسمى ابتسامة على وشى
وانا معاكى بتهون علية كل الاحزان لأنك انتى فرحة قلبى
********
لما عرفت انك جوايا زعلت وقلت لباباكى مش وقته خالص
لأن نور كان عندها 8شهور بس ... باباكى دافع عنك قوى وزعل منى
قلتله طيب انت زعلت ليه ؟هو انت تعرف اللى فى بطنى لسة ..... قال معرفهوش لكن أعرف اللى خلقه
************
رحت للدكتور عماد حسنى قالى لو انا دلوقتى فتحت الخزنة وقلتلك خدى المليون جنيه دى هتعملى ايه؟؟
قلتله هاخدهم ... قل يعنى مش هتقولى مش وقته؟؟ ... العيال يا آسر أغلى من مال الدنيا
وفى ناس تتمنى تدفع كل مالها عشان طقل ............. فسكتت
**************
يوم ما اتولدتى كنت بايتة عند نانا فى العجوزة .... وكان لسة على معادك 20يوم
قمت من النوم الصبح وقلت لمامتى انا حاسة انى هأولد النهاردة
قالت دى تفاسيح ,, تحبى اعملك ايه النهاردة ,,بط ولا كوارع ....اصلى قلتلها ان كان نفسى فيهم
************
مادام هأولد يبقى لازم أخلص مشاويرى قبل ما اتربط جنب البيبى
لبست بسرعة وتزلت رحت البنك وانا فى الطابور قلت للناس انا هأولد يا ريت توسعولى
ضحكوا ومحدش اتحرك ,, محدش صدقنى
**********
طلعت من البنك لقيت الونش بيشيل العربية
اصلى ركنت صف تانى عشان مكنتش قادرة امشى من الالم
جريت على الظابط وقلتله ,, سامحنى اصلى رايحة أولد .... ضحك وقالهم سيبوا العربية
كانت عربيتى سيينا لونها رصاصى فى الوقت دة
***********
رحت على شركة التأمين على السيارات عشان أجدد التأمين
المندوب كان قريبنا ،كلمته قلتله ينزل بالورق لأنى مش قادرة اطلع ... ومرضتش اقول انى هأولد أحسن يكلم العيلة كلها
نزل واول ما شافنى قالى انتى شكلك تعبان قوى روحى المستشفى احسن وانا هأخلصلك كل حاجة
**************
كان الموبايل بتاعى فيه مشكلة فرحت نوكيا عشان اصلحه
وانا فى الطريق اتصل بية باباكى وهو بيكلمنى جالى الألم .... فسكتت من الوجع
وهو حس وقالى انتى تعبانة ولا ايه؟ .... قلتله انا حاسة انى هأولد النهاردة
قالى اقفى مكانك وانا هأجيلك حالا
ولأنى مامى مش بتسمع الكلام مشيت برضه ورحت نوكيا اصلح الموبايل
*****************
فى نوكيا بالدور طبعا ومقدرتش اقول للناس انى هأولد ليضحكوا تانى وميصدقونيش
باباكى اتصل وهو بيصرخ ,, انتى فييييييييييييين؟ فى نوكيا ...... انتى بتستهبلى وقفل السكة
*****************
فى نوكيا فضلوا يتدلعوا والولد اللى كان معايا بيتابع كان بطىء جدا
او يمكن انا اللى حسيت كدة .... فقلتله على فكرة انت لازم تبقى اسرع من كدة والا هأولد هنا
فضحك ... قلتله ... على فكرة انا بأتكلم جد جدا
وقلت انى محتاجة الموبايل جدا جدا حالا
ادانى موبايل من عندهم لحد ما موبايلى يخلص
ويا دوبك بحط الشريحة لقيت باباكى بيتصل وبيصرخ فى التليفون
انا برة قدام نوكيا جنب عربيتك بقالى ساعة ... اطلعى حالا هنروح المستشفى
اديت للموظف الموبايل بتاعهم وقلت بلاش مكالمات لحد ما موبايلى يخلص
واستنيت لحد ما اتصلح الموبايل بعد ييجى ساعة ونص فى نوكيا
**************
طلعت لقيت باباكى عصبى ومتوتر وقال انه كلم الدكتور وطلب منه يجيبنى حالا
بس انا قلتله ... لازم أروح بيتى الأول عشان اجيب لبس البيبى واحضر الشنطة
اتحايل علية انه هو يروح او اى حد بعد ما يودينى المستشفى
وانا مرضتش ابدا ... انتى عارفة مامى بتحب تعمل حاجتها بنفسها
**************
رضخ فى النهاية وانطلق بسرعة من الدقى على المقطم
وكان بيسوق بسرعة جدا وقالى ان الدكتور قاله هاتها بسرعة ومتسمعش كلامها
بس بابى مقدرش يقنعنى وكان خايف علينا انا وانتى يا سما
*****************
حضرت الحاجة ورجعنا المستشفى
وانا داخلة من الباب اتصلت بية سحر مامة ميرو مادى يا سما
قلتلها عرفتى منين ؟؟؟ دة انا لسة مقلتش لحد
طبعا قريبنا بتاع شركة التأمين اتصل بيها اول ما روح وقالها انى شكلى هأولد خلاص
****************
فى المستشفى جت نهى مامة جنة وعمر وكانت معاها طنط نادية
وكنت خلاص بأتألم جدا لما سألتنى نهى ... تفتكرى اعمل لون السيراميك ايه
اصلها كانت لسة هتتجوز ... صرخت فيها جامد .... سيراميك ايه وهو دة وقت سيراميك؟؟
باباكى قالى انه هيروح يجيب غدا ... وطلبوا بيتزا ... ونزل
***************
بعدها بدقايق قالوا لازم تدخلى العمليات حالا
صرخت وكنت عايزة باباكى ... حاولت ما اولدكيش غير وهو هنا
بس انتى كنتى مستعجلة قوى ومرضتيش تستنى بابى
**************
فتحت عنية وقلت هى فين ؟؟
كانوا مشغولين بأختك نور اللى فكروها هتغير منك
قمت من السرير ورحت شفتك ... كنتى صغيرة قوى قوى
شلتك وحضنتك وبوستك
وكل يوم كنت بأسهر معاكى اغنيلك اغنية نوال الزغبى
آه يا انا يا انا م اللى احبه يا نا
الناس تنام الليل وانا سهرانة
*************
ومن يومها وابتسامتك منورة حياتى
بحبك يا سما