الثلاثاء، 24 فبراير 2009

يشرفنا حضوركم حفل توقيع العدد الثالث من سلسلة مدونات مصرية للجيب كتاب "أنا انثى " .
.الكتاب بقلم مجموعة من المدونات النساء
وهو أول كتاب يناقش اهتمامات المرأة بقلم نسائى
ويطرح القضايا التى تدور بخلد المرأة للنقاش
ضيفة شرف الحفل ..(غادة عبد العال ) صاحبة مدونة ..عاوزة أتجوز..
والتي صدر لها كتاب بنفس العنوان عن دار الشروق
ومن المشاركات في كتاب ..أنا أنثى
نوارة نجم
اسر ياسر
ايناس لطفى
شمس الدين
رشا عبد الرازق
بيلا شريف
مكسوفة
بسمة عبد الباسط
مريم الغنيمى
إيمان نادى
زهراء امير بسام
آية الفقى
مروة السيد
أميرة محمد محمد محمد
فاتيما
مذكرات عانس
نرمين البحطيطى
سلمى أنور
انجى سمراء النيل
سارة ابراهيم على
سمر مجدى
مروة النجار
شيماء حسن
نسرين عبد النعيم
د.مرام محمود
نجلاء الشربينى
محاسن
يصاحب الحفل عرض فيلم قصير
المكان :المركز الثقافى الدولى17 ش السد العالى ميدان فينى الدقى
الشارع المقابل لشيراتون القاهرة
اقرب محطة مترو انفاق محطة شارع التحرير
الزمان الثلاثاء الموافق 3 مارس الساعه 4.30 عصرا

السبت، 21 فبراير 2009

skylight: الجواز وسنينه .. و وايلد هارت .. وانا فى مباراة تدوينية خاصة بموضوع التحرشات#links#links

skylight: الجواز وسنينه .. و وايلد هارت .. وانا فى مباراة تدوينية خاصة بموضوع التحرشات#links#links

http://elnaswiel3alam.blogspot.com/2009/02/how-to-get-high-on-weed-and-still-blog.html

الجواز وسنينه .. و وايلد هارت .. وانا فى مباراة تدوينية خاصة بموضوع التحرشات

تعليق الزميلة الجواز و سنينه على البوست السابق http://amyasser.blogspot.com/2009/02/blog-post.html
بصى انا مقدره موقفك جداااابس انا عايزه اقولك ان فعلا مستقبله هايضيع و ان ابوه كان عنده حق انه يقف معاه بس اكيد فى البيت كان هايبهدله بس لو بهدله فى القسم يبقى اكد الموضوع اكترطبيعى ان الابهات و الامهات تقف فى صف اولادها حتى لو متأكدين انهم غلطانينمتهيألى كفايه انه اتبهدل لغايه كده و اكيد عرف معنى الزل و اكيد مش هايكررها تانىو الحمد لله مافيش هتك عرض او حاجه ما تتصلحش و الحمد للهو بعدين ما كانش لوحده اللى عمل كده حتى لو هو اللى بدأ بس كان فيه غيره ليه يتعاقب لوحده علشان طلع اهبل و ماهربش؟؟؟مش بدافع عنه بس صعبان عليه مستقبله اللى فعلا هايضيع لو عايزه تخوفيه فهو و اهله اكيد مرعوبين كفايه بس ما توصلش لضياع المستقبل العفو عند المقدره
ردت الزميلة
Wild at Heart
إلى "الجواز وسنينه وجهة نظرك هي أحد أسباب ضياع الحقوق وانتشار هذه الظاهرة المقززة بيننا لحد ما بقت "عادي"، الزفت ده كان عارف كويس إنه بيعمل حاجة غلط ولو ماكانش عارف كده ماكنش انكر في القسم، لما مستقبله يضيع يبقى هو اللي ضيعه بإيديه مش آسر ولا أي بنت تانية هي السبب، أرجو تراجعي موقفك يا "الجواز وسنينه")وتعرفي إن العفو عند المقدرة في اللي مثلاً خبطني بالعربية من غير قصد لكن جرح حيائي بالشكل ده يبقى لازم يتعاقب
ثم كتبت على مدونتها
http://dustanddreams.blogspot.com/ البوست الآتى
حكايتي مع التحرش الجنسي عمرها أكثر من 13 سنة وطول السنين دي ماحستش بالأمل غير الأيام دي .. غير لما الإعلام اهتم ولقيت مدونيين وصحفيين وغيرهم بيدافعوا عن الضحية مهما كانت الظروف المحيطة بالحادثة وهو ده اللي لازم يحصلمن ساعة ما الموضوع اتفتح أو بمعنى أصح اتفجر في أكتوبر 2006 والناس بدأت تتغير واحدة واحدة، الناس بدأت تفهم إن في قانون بيعاقب التحرش الجنسي والمعاكسات لأنها جريمة .. الناس بدأت تفهم إن ظروف الحادثة سواء المكان أو الزمان أو أخلاق الضحية أو مظهرها أو عقيدتها مابتغيرش في الأمر شئ لأن التحرش الجنسي .. جريمةالبنات بدأت تفهم إن لازم مايسيبوش حقهن ويمشوا في طريق المحاضر والمحاكمات الصعب...عرفوا إن تحقيق العدالة محتاج شجاعة وجرأة، وعرفوا إنهم كده بيصلحوا المجتمع .. الناس بدأت تفهم إن الفضيحة مش على المجني عليها، على الجاني اللي عقدة النقص والكلاكيع و(الازدواجية للأسف) والقذارة اللي جواه خلته يشوه نفسية البنات كده نهى رشدي
وآسر وقطر الندى و(أنا) وكل بنت دافعت عن حقها...إليكن السلام
ردت
الجواز و سنينه فى مدونتى ومدونة Wild at Heart بالتعليق التالى
حكايتك مع التحرش ليهااكتر من 13 سنه؟؟؟؟؟؟عايزه اقولك حاجه لو واحد ساب باب شقته مفتوح و جه حرامى و سرقه يبقى العيب على الحرامى و لا عليهو لو واحد قفل باب الشقه كويس بس برضوا اتسرق يبقى العيب على الحرامى و لا عليهالواحد يعمل اللى عليه الاول و بعد كده يشتكىهو ده بالظبط لما الواحده تكون ملتزمه فى لبسها و تتعاكس يبقى العيب على الشاب و ساعتها تقطعه اربا اربالكن اللى لابسه مش ولابد و عايزه الناس تبقى مؤدبه طب ازاى؟؟؟؟اعرف ناس كتر اوى و على درجه كبيره من الجمال و مش بيعانوا من التحرش لانهم بياخدوا بالاسباب يعنى بتخرج فى موقت مناسب ليها من ناحيه الامان حد بييجى ياخدها من المكان اللى هيه فيهفيه حديث عن الرسول ما معناه ان لما الزمان يبوظ فكل واحديلزم بيته مش هاقولك ما تخرجيشاخرجى بس خدى احتياطات امانك و انتى مش هاتعانى من التحرشمش كل واحده تعمل اللى ما بدالها و تقولى بيتحرشوا مهم لازم يتحرشوا يعنى هايبقى التلفزيون و النت و الفضائيات و البنات فى الشارع و الظروف الاقتصاديه والزمن على الولاد
ردت وايلد ..
Wild at Heart
الجواز وسنينه،أنا عايزة أفهم حضرتك افتضرتي منين إن أنا مش ملتزمة في لبسي؟؟؟وعايزة أقوللك إني عندي 13 سنة ولما أقول بقالها 13 سنه يبقى بدأت تحصل من وأنا عندي 10 سنين بالذمة عيلة عندها عشر سنين المفروض تلتزم في لبسها أو أصلاً تاخد بالها إن ماحدش يأذيها إزاي يعني؟؟ يبقى الذنب عليها ولا على الوسخ اللي عمل فيها كده والناس اللي بتقول إن الضحية هي السبب؟إيه المنطق الغريب اللي بتفكروا فيه ده؟؟إزاي واحدة تبقى ماشية في الشارع عادي ولا راجعة من الشغل ولا بتتفسح ولا نازلة الشارع غلاسة هي حرة وحد يرتكب ضدها جريمة وتقولوا هي السبب؟ إزاي يعني؟بالنسبة للأمثلة اللي حضرتك جايباها أفهم من كده إن حضرتك لو لقيتي باب شقة مفتوح حتخشي تسرقيها؟ أكيد لأ، ليه؟ عشان السرقة حرام ويعاقب عليها القانون، مش عشان صاحب الشقة سايبها مفتوحة، حكاية إن البنت تعمل اللى عليها ولا ماتعملوش دي حاجة ربنا وحده هو الوحيد اللي من حقه يحاسبها، لا أنا ولا إنت ولا أي كلب بيتحرش بالبنات من حقه يهاجمها لأنها "مش ملتزمة" المفروض إن كل واحد يفضل في حاله إلا إذا حد طلب مننا المساعدة أو التدخل في شئونه، غير كده المفروض إن حضرتك تمشي في الشارع من غير ما تتدخلي في تصرفات أو مظهر الناس لإن كل واحد حر، أيوه كل واحد حر ولو ماكانش ربنا خلقنا أحرار كان خلقنا والحجاب على راسنا، وماكانش خلق جنة ولانار بقىوالله أصحاب حضرتك محظوظين لكن أنا وأصحابي باختلاف درجة جمالنا واحتشامنا بنعاني من التحرش من غير تمييز، القانون يا حبيبتي قال إن اللي يتعرض لأنثى يتعاقب، أنثى، مقالش محجبة ولا منقبة ولا نازلة في وقت مناسب ولا وضح أي ظروفيعني حضرتك ماسمعتيش قبل كده عن تحرشات حصلت في نص النهار وفي شارع زحمة؟ أنا عايزة مرة تبقى ماشية كدة لا بيكي ولا عليكي وحد يتحرش بيكي وساعتها حتعرفي مين فينا اللي صح.
رديت انا :
الجواز وسنينه .. الجريمة جريمة يا سيدتى ايا كان مكان وقوعها او اسباب وقوعها او من هو المجنى عليهالناس زمان كانت بتسيب ابواب بيوتها مفتوحة وكمان محلاتها ومكانش حد بيسرقها لأن الدنيا كانت بخيرالناس فى الأرياف .. واحب اقولك ان انا افخر بإنتمائى للريف .. الناس هناك بتسيب فعلا بيوتها مفتوحة ومحدش بيدخل يسرقها ابدا .. لو انا ماشية عريانة ملط .. ممكن واحد يبلغ البوليس عنى بتهمة الفعل الفاضح لكن مش ممكن يلمسنى لأنه لو لمسنى يبقى جريمة هتك عرض ولا يبررها فى القانون انى كنت عريانة .. والدتى استاذة فقه وشريعة على المعاش وتبلغ من العمر 63 سنة ومحجبة جدا وبتتعرض للتحرشات برضهانتى كدة بتدى مبررات للمتحرشين .. اللى مش بيهمهم اى سن ولا لبس معين ولاشكل ولا نيلة .. دول اسمهم متحرشين .. وعلى فكرة حكاية وايلد عن التحرش بيها من 13 سنة اى وهى طفلة صغيرة .. حكاية حصلت لنا كلنا تقريبا واحنا صغيرين وما اعتقدش ان مفيش بنت لم يتحرش بيها واحد فى اسانسير او فى محل وهى بتشترى طلبات او حتى فى الشارع او واحد فجأة بتلاقيه قالع قدامها او مبين جزء معين من جسمه .. او .. او .. او ..كلها قصص عارفاها البنات وبتتحكى بس لما بنكبر وبنقدر نواجه نفسنا بانها مكانتش غلطتنا والقوى فينا هو اللى بيبدأ يحارب المرضى دول زى ما انا عملت وهأعمل انشاء الله .. مش بس عشانى .. لأ عشان كمان انا عندى بنتين عايزة اربيهم على الحق .. وعلى عدم الخوف .. وانا صغيرة كانت ماما تقولى اوعى تخلى حد يلمسك .. اوعى تخلى حد يعاكسك .. ودة كان بيخلينى اخاف احكيلها لأن كلمة اوعى دى كانت بتخلينى افكر ان لما حد يعمل كدة تبقى غلطتىدلوقتى انا حريصة انى اقول لبناتى .. لو حد عاكسك او لمسك تيجى تقوليلى عشان اوديه للبوليس .. بناتى 6 سنوات و 4 سنوات ونص .. حافظين رقم النجدة 122 عشان اعرفهم ان القانون موجود وهنلجأله لما حد يعترض طريقناوهمة عارفين ان مامتهم اتصلت بالبوليس لما حد ضايقها فى الشارع .. انا دلوقتى عارفة انهم مش هيخافوا فى المستقبل .. ومش هيترددوا فى اللجوء للقانون .. ومش هيتكسفوا يقولوا لو حاجة حصلت زى دى
ردت الجواز وسنينه
ولا عايزه اقولك انى مش بعيب عليكى عدم الحجاب ده فرض و انتى اكيد عارفه زيه زى الجهاد الجهاد فرض على الرجال فقط و الحجاب فرض على النساء من دون الرجال .. حضرتك انا عامله ماجيستير فى الشريعه الاسلاميه .. و بعدين انا عايزه اقولك انا لما رديت عليكى ما كلمتكيش فى انك تتحجبى و لا اقدر اقولك صلى او حجى ده حاجات كل واحد عارفها و مسؤال عنها ادام ربنا مش ادامى .. انا بس قلت للى قالت ان الحجاب حريه .. ده بيغيضنى جدا و كانهم بيدافعوا عن التقصير فى حق الله .. كان عندى اهون انهم يقولوا ده غلط زى ما قلتى حتى لو انك مش مسلمه مش من حق حد ينتهك حرمتك و لا حد يقولى ان كل واحد بيلبس على حسب الطبقه اللى هو منه و كأن الحجاب و فروض ربنا ليها طبقه و بعد كده يتكلموا بالاسلام و غض البصر من الولاد .. طيب ده شيزوفرينيا بجد .. بيطالبوا الولد بغض البصر و مش بيطالبوا البنت بالحجاب؟ مهم الاتنين من الاسلام .. انا لم اقصدك بهجومى انا قصدت كل اللى حاول يجاملك على حساب فروض ربنا .. اما حكايه ان زمان كان فيه امان .. عندك حق جداااا بس لما كتروا الحراميه حرستى على بيتك حطيتى نظام امان ليه .. و حرصتى على العربيه و حطتيها فى جراج .. كمان المفروض نحافظ على جسمنا و نغطيه من عيون الكلاب لانهم لا يوصفوا إلا بكلمه الكلابلما يكون ربنا حاتطلنا نظام حمايه فالاولى اننا نتبعه لانه اكيد ربنا ما فرضدش حاجه إلا لمصلحتنا حتى لحم الخنزير فى تحريمه هو الخمر مصلحه الانسان و ليست مصلحه ربنا .. انا بس عايزه اقولك ان كل الناس اللى بتقولك استمرى مش هايقفوا جنبك لو الولد طلع برائه و طلعتى انتى اللى اتبليتى عليه .. اخرهم ايه هايقولولك كام كومنت مش قضيه يعنىانا لما قلتلك اتنازلى مش تفريط فى حقك .. بس هو رعبك و انتى رعبتيه اكتر من الرعب اللى انتى شوفتيه انتى عشتى كام دقيقه رعب و هو عايش كام يوم رعب ؟؟؟؟ لو على عدم حدوث ده مره تانيه فهو مش هايعمله و مش هانحاسب كل المتحرشين فى شخصه .. وحكايه ان مامتك كانت بتقولك اوعى حد يلمسك كلنا امهاتنا قالولنا كده و حتى الاولاد دلوقت المفروض يقولولهم كده .. الدنيا بقت زقت و حاجه تقرف .. بس المفروض كانوا فعلا قالوا زى ما قولتى لبناتك ربنا يحفظ كل البنات يارب .. طيب انتى عارفه انا على اد ما انا ملبسه بناتى حمالات و شورتات فى الصيف بس بقول لما يكبروا شويه هاينتهى الكلام ده النفوس المريضه كتير و انا بحميهم هالبسهم شيك جدا بس اكيد مش هايكون لبس النونات ده مستمر علشان انا بشوف بنات و ظهرت عليهم علامات البلوغ و الام مستصغرها و عملاها نونه بس الغريب مش شايف كده و على فكره انا لما كنت بتعاكس كنت فعلا بحس انى انا اللى غلاطانه .. اظاهر ان الامهات كلهم كانوا واحد .. انتى مش فى وضع دفاع عن نفسك لانى لما وجهت الكلام ليكى ما قلتلكيش اتحجبى انا بس كنت عنيفه مع البنت اللى قالت انها ليها 13 سنه بيتحرشوا بيهاعلى فكره انتى اسلوب الحوار معاكى ممتع و راقى .. غيرك كان ممكن يرد بقله زوق بس انتى انسانه اخلاقك باينه فى كلامك .. ياريت تكون وجهه نظرى باينه و موضوع القضيه دى انا مش شايفه انه حتى لو الولد اتحبس ده هايمنع غيره بدليل قضيه نهى رشدى .. يمكن لو ده اخوكى ما كونتيش صدقتى انه عمل كده لانك عارفه تربيته و كنتى هاتدافعى عنه جدااا و مش هاتصدقى انه عمل كده؟؟؟ و حتى لو عمل كده هاتدافعى عنه علشان مستقبله برضوا ..اسفه انك افتكرتى انى بهاجمك
ردى انا : الجواز وسنينه : الحق حق والقانون قانون وضع لإستخدامه .. والولد اللى بتقولى انه بيعيش الرعب كل يوم .. لا تأخذنك به شفقة ورحمة لأن دول اللى بيعيثوا فى الأرض الفساد .. انا امرأة فى اقترب من الأربعين .. متزوجة ولدى طفلتين .. كنت رايحة عزا .. ومش محتاجة طبعا اقولك الناس وهى رايحة عزا لفرد من الأسرة بتبقى لابسة ايه ولا شكلها ايه.. اكيد انتى عارفة .. الولد عاكسنى ولما حاولت تنبيهه ان لى ابناء فى مثل سنه .. شتمنى بأقذع الألفاظ أمام ابنة اختى اليتيمة التى ارعاها فى بيتى واعتبرها ثالت بناتى .. وتقدم اصدقاؤه لمساندته واثبات انهم رجالة قوى بمواصلة توجيه شتائم والله يندى الجبين لها .. الحجاب مش موضوعنا خالص هنا ومش هاتكلم عنه .. اللى بقوله هنا حالة خرق قانون ووضع غير مقبول .. ومش ممكن يعنى افرض الحجاب مثلا على واحدة كتابية لما واحد يتحرش بيها .. هو ماعاكسنيش وقالى .. ياقمر ومشى ..ولو ان دة برضه جريمة يعاقب عليها القانون .. لأ دة حاصرنى هو واصدقاؤه فى الطريق لبيتى .. ونعتونى بأسوأ ما تتخيلى من الصفات .. والفاظ يندى لها الجبين .. طب لو كان سرق شنطتى وجرى؟؟ .. هل كنتى هتدافعى عنه برضه وتلتمسى له العذر؟؟ ولا الشنطة والفلوس لهم قيمة اكبر من كرامة امرأة وترويع انسان؟؟ ترويع الآمنين فى الطريق هو اسوأ ما يمكن حدوثه .. انا بناتى صغيرين وبيحصل ان واحدة تمرض فى منتصف الليل واضطر الى اصطحابها للمستشفى ولا يمكن ابدا ان اتهاون مع عدم شعورى بالأمان فى الحى الذى اعيش فيه .. بل فى الشارع الذى اقيم به .. قرارى انا كنت واخداه ونشر الموضوع كان فقط للتأكد من صحة القرار .. يمكنك مراجعة البوست .. احترم وجهة نظرك فى موضوعى حتى لو اختلفنا ولو اختلف معك القانون .. لكن لا يمكن ابدا ان اوافقك على ان يكون التحرش الجنسى بطفلة عمرها 10 أعوام شىء عادى او حتى ان تتحمل جزء من المسئولية بأى صورة من الصور دى حتى فى نظر الدين والقانون غير مكلفة.. تعجبت لقسوتك مع البنت .. رغم انى لما قريت تعليقها كادت دموعى ان تسيل لأنى عارفة كويس هى بتتكلم عن ايه؟ .. وعارفة مقدار الألم الذى تعيشه كل يوم وهى تتذكر ما حدث لها وكيف يؤثر على نفسيتها .. .. وأعلن من هنا انى مستعدة لمساندتها فى اللجوء للقضاء حتى اخر العالم .. ولا يكفينى ان احجب بناتى او ان ادعو الله ان يجنبهم مثل تلك امور .. فالساكت عن الحق شيطان اخرس .. ولن يكفينى حكم الإعدام ان حدث ما حدث لها لإحدى بناتى او اى بنات اخرين فى هذا السن وفى اى سنوارجع واقولك ان ربطك التحرش بالحجاب ممكن ياخده اى متحرش كعذر ويقول ما هى مش محجبة بقى وكدة يبقى عرضها ولحمها ملك للعامة .. صدقينى المتحرشون لا يهمهم انتى لابسة ايه .. وبيبقوا فى منتهى الخسة .. واخويا اول واحد واقف جنبى هو وجوزى وابويا وامى وبقية اخواتى البنات .. الولد اللى انتى شايفة انه بيعيش الرعب كل يوم زية زى اى مجرم او اى متجاوز للقانون يعمل العملة وبعدين يقعد يعيط لما يتقفش .. اكيد ماتخيلش ان دة هيوديه للمثول امام القضاء .. اكيد انا مكنتش اول واحدة يعمل معاها كدة .. ولو سبته بدون ان ينال عقابه اكيد برضه مش هأكون اخر واحدة .. ومش هيتعظ اى من اصدقاؤه ولا المتحرشون اللى زيه .. الا لما يتنفذ حكم القانون فيه الناس اللى بتتحرش بالمحجبات والمنقبات كمان فى المواصلات العامة عندهم برضه اخوات واهل ولا يعفيهم هذا من المسئولية القانونية .. لأن الستات دول برضه عندهم اهل بيخافوا عليهم وحرمتهن من حرمة اهلهن وازواجهن تصدقى .. لو كانت امه او اى حد من اهله جه يعتذر عما بدر من ابنهم يمكن كنت فكرت .. لكن اكتفوا بمكالمات اللواءات بتوعهم وبس .. خلى بقى اللواءات ينفعوهم .. والأهل اللى ما يصدقوش ان ابنهم عمل كدة .. يبقوا يستاهلوا لأنهم مش قريبين من ابنهم كفاية ولا مهتمون بمتابعة سلوكه وتربيته .. لدرجة انهم مش عارفينه على حقيقته وسايبينه واقف على النواصى يلف بعربيته ومتوقعين ايه بعد كدة .. انا بأسألك بمنتهى الوضوح .. هل ما فعله الولد دة يعتبر جريمة فى حقى وحق المجتمع أم لا؟؟ .. وهل التحرش بطفلة او حتى قاصر يعد جريمة فى حقها وحق المجتمع أم لا؟ نورتى المدونة .. واذكرك ان اختلاف الرأى لا يفسد للود قضية
رد الجواز وسنينه عايزه اقولك ان فعلا المتحرش مش بيهمه .. و عارفه اساس الرعب اللى عشتيه و متخيلاه جدا .. و عارفه ان اهلك اكيد لازم يقفوا جنبك .. لانهم عارفينك كويس و لان ده حد اعتدى عليهم كلهم فى شخصكو لو طالوا يقطعوه هايعملو .. بس انتى طلبتى رأيى و انا قلتهولك .. مش من مصلحتك ان مستقبله يضيع صح و لا غلط .. انتى لو عايزه تربيهم اطلبى منهم مبلغ كبير و ممكن تتبرعى بيه لحاجه خيريه مثلا بس دخوله السجن وسط المجرمين مش هايفيدك بحاجه .. الولد اللى عنده 19 سنه يعتبر مراهق .. ده يادوب فى القانون يادوب من سنه واحده يعامل كراشد .. عارفه الحكايه دى بتفكرنى بأيه .. مره واحد سرق فى عهد سيدنا عمر ابن الخطاب و لما كانوا هايقويموا عليه الحد طلب العفو و قال انها اول مره فرد عليه سيدنا عمر و قاله لو كانت اول مره ما كانش ربنا فضحك و لما سألوا طلع انها المره الثالثه و اقاموا عليه الحد هو وقع فى شر اعماله و متهيألى نال جزاءه بس لو دخل السجن مش هايطلع انسان صالح إلا لو دخلوا المتحرشين سجن خاص او حاجه تأهيليه .. و بعدين برضوا نفس السؤال .. مش لوحده اللى تحرش لماذا يعاقب لوحده لانه طلع غبى و مش هرب؟ .. اما بخصوص ان المحجبه و المنقبه برضوا بيتحرشوا بيهم فانا قلتلك اننا فى زمن رديئ و فيه حديث عن الرسول ما معناه ان الزمن لما يبوظ فالتلزم بيتك .. مش هاقلك اقعدى فى البيت لانى انا نفسى مش اقدر اعمل كده .. بس انتى عارفه ان الدنيا وحشه فعلى الاقل تاخدى وسائل احتياطات امانك ..زى ما بتخافى من الحراميه و مش هاتروحى تصلحيهم عامليهم بنفس الطريقه حاولى تجنبهم .. و عايزه اقولك ان لو محتاجه حاجه بالليل فادلوقت فيه دلفرى و دى كمان مسؤليه الرجل مش مسؤليتك انه هو اللى ينزل .. طيب انتى عارفه انا استغربت اننا فعلا لما عربيتنا بتبوظ بندى بتاعتنا لازواجنا رغم ان المنطقى انهم هم اللى عادى انهم يتبهدلوا فى سبيل حمايتنا مش احنا اللى نركب تاكسى و همه ليهم وسيله مواصلات امنه .. برضوا بقولك انى حاسه بيكى بكى و فى الاخر القرار ليكىو انتى طلبتى رأى الناس و انا قلتلك رأيى ..سعدت بمعرفتك و الحوار معك
تكملة الحكاية عند حفصة فى

الثلاثاء، 10 فبراير 2009

خدشوا حيائى فى الطريق العام

اللى حصل يا انى انتقلت للسكن فى مكان جديد فى المقطم
المكان راق جدا وتتوسطه وتلفه الحدائق
تشكوا البنت اللى بتساعدنى فى البيت انها بتتعرض كل ما تنزل تجيب طلب لمعاكسات سخيفة تصل لحد اللمس
تشكو ابنة اختى التى تقيم معى من محاولات جذبها من ذراعها والتعدى عليها بأقذع الألفاظ وهى جاية من الدرس
اتضايق واطلب منهما ان تلتزما قواعد الطريق والإحتشام فى الملبس والإلتزام بمواعيد الخروج من البيت
فى يوم مشئوم .. تعطلت سيارة زوجى واضطر لاستعارة سيارتى ..
كان هناك عزاء لفرد من الأسرة يجب ان احضره
اتفقت مع زوجى ان استقل تاكسى وان اقابله فى العزاء بالمهندسين ونعود سويا

وبعد أن ارتديت السواد أنا وابنة اختى ذات ال 15 ربيعا .. طلبت صغيراتى بعض الحلوى
قبل ان اذهب للعزاء اتجهت لأقرب كشك سيرا على الأقدام وهو على بعد 200 متر من المبنى الذى اقطن قيه .. اشتريت ما اردت وسرت عائدة الى البيت لأعطى الحلوى للصغيرات واتجه للعزاء
اثناء سيرى لاحظت عدد كبير من الشباب يقفون فى الشارع على الناصية
بعضهم يقف بجوار سيارته فارهة كانت ام لا وبعضهم يجلس على الرصيف
وتستطيع ان تشتم رائحة الحشيش واضحة

فجأة بدأت سيارة بيضاء فى اللف حولى انا والفتاة فى استفزاز مع الأمركة واستخدام الفرامل بطريقة مستفزة
وفى محاولة للنجاة قلت للولد اللى سايق العربية .. عيب .. عيب انا عندى ابناء فى سنك

ولم يهمه ما قلت طبعا .. بل انه زاد من وقاحته وبدأ يوجه لى كلمات وشتائم غاية فى البذائة
كنت على بعد 100 متر تقريبا من بيتى ولم استطع التحرك بسبب التفاف بقية اصحاب الولد اللى فى العربية حولنا وابتدوا يوجهوا لنا الفاظ خارجة وتخدش الحياء
حاولت ان اردعهم ببعض الصياح ولكن لرقى المنطقة الشديد لم يهتم احد رغم ان البعض القى نظرة من شرفة منزله واكتفوا بالفرجة
وفجأة وبطريقة مسرحية خلع احد هؤلاء الشباب حزامه فى محاولة لتخويفى وتهديدى بالضرب عندما بدأت فى الصياح
حقيقى خفت .. بل اترعبت .. وحسيت انى محشورة فى الحتة دى
مش عارفة اوصل بيتى ومش عارفة ارجع للشارع الرئيسى ولا حتى فى حد ينجدنى من المارة او السكان

اتصلت بالنجدة من الموبايل وانا اقف فى مكانى ..
حضر ملازم اول اسمه مهاب الشبوكشى من نقطة شرطة المقطم .. وبدأت بعض السيارات تفر
طارد الضابط الشجاع احداها فى محاولة يائسة لإيقافها فلم يفلح وكاد قائدها ان يصدمه بالسيارة اثناء فراره

وكان مازال الفتى ذو السيارة البيضاء موجودا فى المكان بس ركن العربية على جنب و خلاص
اشرت الى السيارة البيضاء التى بدأت الموضوع بأكمله وكنت قد سجلت رقمها على الموبايل
والى الفتى الذى تحدى كل الأعراف فقام الضابط باصطحابه للنقطة

وهناك حررت محضر متهمة اياه واخرين بجنحة خدش حياء انثى فى الطريق العام
والولد بالطبع بينكر وبيقول مش انا دة انا كنت واقف بأتفرج ..
حضر ابوه ليفاجئنا انه مع ابنه قلبا وقالبا وقال لى بالحرف الواحد بمنتهى الكبر والعنجهية
انتى بتدعى عليه .. هو مش من سنك عشان يعاكسك اصلا

فاجبته ان الولد بالفعل مش من سنى يعنى ما اعرفهوش قبل كدة ومفيش ضغينة ضده
وقصصت عليه ما حدث .. ولكن لا حياة لمن تنادى

فى الحقيقة انا انتظرت ان يحضر الأب قبل ان اوقع على المحضر على امل ان يوبخه ابوه ويعرفه غلطه
لكننى فوجئت انه يدافع بشراسة عن الولد الذى بدا لى انه قد افسده الدلال

الولد ذو ال 19 عاما وهو طالب طبعا ..اتحول للنيابة التى
وتهمته خدش حياء انثى والقضية اخدت رقم 3038
لعام 2009 جنح الخليفة
انا الآن فى ازمة بسبب ان اهل الولد يقولون انى مفترية وانه مجرد عيل وطالب وانه مستقبله هيضيع
وفى نفس الوقت يتصل بى كل شوية ناس من طرفهم ..
من أول معاون مباحث للواء مش عارفة ايه فى مديرية الأمن للضغط على للتنازل والتصالح

انا لا اريد ان اتصالح واريد فقط ان العدل ياخد مجراه وان الولد دة يبقى عبرة للى زيه ولأهله واهالى الولاد اللى بيستهينوا بالآخرين
زوجى يؤيدنى تماما رغم تعرضه للضغط برضه بمكالمات من ناس كبار .. لكن اجابته كانت واضحة فى ان انا اللى اتأذيت وان انا الوحيدة اللى اقدر اقرر ايه اللى يتعمل
بحثت فى القانون وعرفت ان المادة 306 من قانون العقوبات رقم 95 لسنة 96 بتنص على انه " يعاقب بالحبس مدة لا تتجاوز سنة وبغرامة لا تقل عن مائتى جنيه ولا تزيد عن ألف جنيه أو بإحدى هاتين العقوبتين لكل من تعرض لأنثى على وجه يخدش حياؤها بالقول او بالفعل فى طريق عام او مكان مطروق

فما هو موقفكم من الموضوع .. هل انا صح ام لا؟؟؟