الأحد، 5 أغسطس، 2007

ليه الناس بتتجوز؟


حقيقى ليه الناس بتتجوز؟؟
ليه لم يجد المجتمع صيغة أخرى للعلاقة بين الرجل والمرأة غير الزواج؟؟
كل الناس بإختلاف معتقداتها وأديانها ومذاهبها وقبائلها وطريقة حياتها .. و.. و..
كل البشرية عبر كل القرون وعبر جميع الحضارات وحتى آكلى لحوم البشر
من أكثر المجتمعات بدائية إلى أكثر المجتمعات تحضرا !!
كلهم اختاروا الجواز كصيغة للعلاقة بين الرجل والمرأة أيضا
طيب ليه؟؟؟؟؟
هو ليه الشكل الإجتماعى للجواز لا ولم ولن يتغير عبر الأزمنة وبإختلاف الأمكنة؟؟
ورغم اننا بنشتم فى الجواز
ونقول مشروع اجتماعى فاشل
بيدمر العلاقة بين الراجل والست وانه خنيق وبيجيب لورا
وكلاااااام كتييييييييير من النوع دة .. رغم كل دة الا اننا برضه لسة بنتجوز
اقصد الجنس البشرى بأكمله
احنا مش بنتزاوج زى الحيوانات .. احنا بنتجوز ونعيش مع بعض للأبد غالبا
يتخانقوا المتجوزين .. يبهدلوا بعض .. يقطعوا بعض
يكسرلها ذراعها .. تفتح له دماغه
يحدف مراته من البلكونة.. يمكن عشان الطراوة
تقطع جوزها وتعبيه فى اكياس لحمة .. يمكن عشان اللحمة غالية
برضه البشرية بتتجوز .. وتفرح بالجواز
ويشجعوا المتجوزين الغير متزوجين على الجواز
رغم انهم تعبانين مع الشريك
طب ليه العذاب؟؟
ماحدش يقولى عشان النسل .. الخلفة مش محتاجة الشكل الإجتماعى دة
وممكن العيال تيجى من غير جواز
وحتى اللى عندهم عقم بيتجوزوا
وماحدش يقولى عشان ربنا قال كدة
لأن الملحدين بيتجوزوا والمجوس وعبدة الشمس وجميع الأديان
واللادينيين برضه كانوا بيتجوزوا
وماحدش يقولى المجتمع يضغط على العلاقة لتصبح زواج
يبقى كدة رجعنا لنقطة البداية
ليه المجتمع أصلا منذ بدء الخليقة لم يجد صيغة غير الزواج
للعلاقة بين الرجل والمرأة؟؟
فكرت كتير وقلت أكيد العلاقة بين الرجل والمرأة محتاجة دة عشان تبقى أحسن
احنا محتاجين لبعض .. محتاجين نعيش مع بعض .. نشارك بعض حياة
كل واحد مننا محتاج حد يعيش معاه حياته بتفاصيلها
من خير وشر وصحة ومرض وحلو ومر
كل واحد مننا محتاج يكون له ذكريات يحكى عنها ويفتكرها مع شخص ما
يبقى مشاركة الحياة هى الهدف مش عشان نكمل نص دينا ولا عشان نتناسل
كل واحد مننا محتاج حد يهتم بيه ويعنيه امره
كل واحد مننا محتاج حد يخاف عليه ويحبه
عشان كدة احنا بنتجوز

هناك 80 تعليقًا:

Mohamed Hamdy يقول...

انا أكتر الناس حظا انى بحط اول تعليق يا ياسمين

حتى قبل التدوينه متظهر فى مجمع بلوجرز تايمز

اما عن البوست الرهيب بتاعك فا متهيالى عشان الدين .. لان فى المجتمعات الملحدة نسبه الجواز اقل من نسبتها فى المجتمعات المتدينه .. هو فى راى عملى بيقولك ان كل الموضوع هو الرغبه فى الجنس لكن من خلال شكل دينى ميجبش قلق نفسى واحساس الشخص انو عاصى لربنا .. اما ليه الملحد بيتجوز بيكون عشان التكييف القانونى الى يخلى ولادة يحملو اسمه ويرثوا بعدة ويحفظ ماء وجههم فى المجتمع .. ومتهيالى الدليل على كدة ان المجتمعات الى بيكون فيها عادى العلاقه بدون جواز بيقل فيها معدلات الجواز جامد اوى .. لكن اللغز والى متهيالى انتى بتطرحيه هو ان رغم قله المعدلات برضو فى ناس بتتجوز .. ودى فعلا حاجه محتاجه تفكير اعمق . ومتهيالى تحليلك له جميل جدا من الناحيه الانسانيه

دايما بوستاتك مختلفه وجميله .. وانا كنت هعمل زيك ركن احلى البوستات بس لقيت انها هتتملى بكل بوستاتك فا اكتفيت احطك على راس قايمتى للمدونين المفضلين ...

تحياتى ليكى يا بروفيسيرة المدونين وقلبهم النابض

harmless يقول...

متفق معكى ان مافيش سبب عقلى للجواز
ولا حتى الدين
فجميع المجتمعات اعتمدوا الزواج نظام اجتماعى راسخ وثابت واساسى من قبل الاديان ومن بعدها وفى عصور الالحاد ومع عبده البقر والنار وحتى شواذ قوم لوط كانوا يتزوجون

وحتى المجتمعات التى نظن انهم لا يتزوجون هم فى الحقيقه يتزوجون ولكن دون اوراق ربما لصعوبة التطليق فى دينهم او فى قوانينهم
لكنهم يتزوجون بكل مواصفات الزواج

فالزواج بعد تجريده من التفاصيل لا يعدو الا ان يكون تحديدا
مجرد تحديد
فلان لفلانه
وفلانه لفلان
والاسلام يرى ان من حق المجتمع كله ان يعرف اى فرد من افراده اذا اراد ان يعرف من زوج فلانه ومن زوجة فلان
لذا لا تجوز السرية فى الزواج
ولا يجوز انكار الزوجيه لاى سبب
وهذا فى رايى هو المعنى الحقيقى للاشهار وليس المعنى فى وجود شاهدين فقط

والحقيقه ان البشريه جربت انواع مختلفه من العلاقات
جربت العلاقات الشيوعيه وجربت الزواج المتعدد وجربت اى شئ يخطر على بالك

ولكن يمكنك ان تتخيلى انه حتى فى مجتمع يتيح كل النساء لكل الرجال ستجدى ان بعد فتره كل اثنين يتفقون على الاخلاص ويشعرون بالغيره ويطلبون الخصوصيه وستظهر المنازعات والمنافسات وربما الجرائم

اذا الزواج بهذا الشكل فطره
وكل ما فعله الانسان انه تماشى مع الفطره
وجرب غيرها فمجها ورفضها

اما عن اسباب او تفسير او مظاهر تطبيق الفطره
فكلامك الاخير هو الحقيقه

Tam يقول...

انتي سألتي السؤال وتقريبا رديتي عليه

تقريبا بالنسبالي السبب هو الدين يليه بدرجه أقل المجتمع
يعني أنا لما لقيت انسانه بحبها وعايز اقضي اطول وقت ممكن معاها
لقيت أن الطريقه الوحيده هنا في مجتمعنا أني اتجوزها

جاييز أوي لو كنت عاييش في مجتمع تاني كان تفكيري هايتجه اني اسعي اننا نعيش مع بعض وخلاص غالبا منغير جواز

Mirage يقول...

الجواز يأتى لاشباع مجموعة من الغرائز من اهمهم خلق سبب قوى للبقاء واحساس بالامان ورغبة فى بناء مستقبل واحساس بالامان مع الشخص الذى نحبه

كل هذه الغرائز لا نستطيع ان نحيا بدونها وان حدث فتكون حياة اشبه بالموت

ياسمين يقول...

محمد حمدى
انا اللى محظوظة بتعليقك الأول

بالنسبة لتفسير وجود الزواج على انه مطلب دينى
انا اعترض
:)
ليه؟؟
لأن حتى المجتمعات اللادينية بتتجوز فيها الناس
ومش بنسب قليلة ولا حاجة
المسألة عندهم مسألة مراحل عمرية
يعنى مش هتلاقى كتير متجوزين فى العشرينات
يزيد عدد المتزوجين كثيرا فى الثلاثينات من العمر
نادرا لما تلاقى حد ما اتجوزش فى الأربعينات كمرحلة عمرية
وطبعا الخمسينات وما بعدها
يعنى برضه عندهم بيعرفوا مع الوقت وكلما تقدم بهم العمر ضرورة الزواج كنظام اجتماعى

طيب انا شخصيا اعرف اجانب كانوا عايشين مع بعض لسنوات طويلة وخلفوا عيال وفى النهاية يقولوا نتجوز قانونيا مع انهم متزوجين فعلا علنا ويشكلون اسرة وجزء من المجتمع وماحدش بينقدهم
ليه؟
ليه عايزين نتجوز؟؟ وليه الجواز هو أفضل؟؟
احنا عايزين نتجوز .. هى دى الحقيقة
مش الدين يا محمد .. لأ
حاجة فى البشر .. فى الناس
بتدفعنا للبحث عن شريك واحد نشاركه الحياة
نبذت المجتمعات التعدد وزواج المتعة
واحتفظ الجميع بشكل واحد للزواج اجتمعت عليه الغالبية من البشر عبر كل العصور وفى كل الحضارات
اعتقد انها حاجة فينا احنا يا محمد .. حاجة جوانا تبحث عن شريك للحياة
سواء بشكل رسمى على ورق او حتى بشكل غير رسمى زى اللى عايشين مع بعض طول العمر وبرضه بيوصلوا لتسجيل الزواج رسميا ارضاءا للقوانين
لكن احنا بنرضى نفسنا بالشراكة دى
شراكة اسمها جواز .. اتنين .. اتنين .. عايزين يعيشوا مع بعض حتى الموت
نورتنى يا محمد
والله فخورة لأنك أول تعليق بجد

ياسمين يقول...

هارملس
صديقى العزيز
عجبنى تعليقك جدا
وشعرت بالغيرة من كلامك عشان ماخطرش فى بالى ماأضيفهوش للبوست
بجد تعليقك مكمل للبوست بشكل مذهل

تحياتى

مـحـمـد مـفـيـد يقول...

العزيزه يا سمين

برافو علي بوستك الرائع وهذا ليس بجديد عليكي

انا اعتقد انها ضروره مهمه جدا ولا غني عنها بعيدا عن كل الاصوات التي تنادي بغير ذلك فأنا شخصيا احتفلت بعامي الثالث في الزواج ولكن شعرت وكأنه 3 أيام من فرط السعاده
واتفق مع العزيز محمد حمدي جدا في كلامه

أغيب وأعود لاجدكي متألقه كالعاده

gohayna يقول...

عن نفسي شايفه ان الزواج ما هو الا اطار لتحديد ما هيه العلاقات بين
فردين اتفقوا علي الارتباط بينهم

وبالتبعيه الاعلان عن الارتباط دا

الزواج ما هو الا منظومه بتحكم العلاقات دي

لان من غيره الدنيا تبقي فوضي

يمكن زي ما بتقولي اننا محتاجينه عشان لما نكبر في العمر يكون لينا ذكريات نتعكز عليها

ودا مقدرش اعارضك فيه


وبايد كلام هارملس بجد شارح نفسه



هدخلك تاني يا سمسم عشان ارغي اكتر من كدا

سلام مؤقت يا قمر

أميرة ويلز يقول...

والله يابنتى كل واحد بيتجوز عشان سبب معين فى دماغه واختلفت الاسباب والزواج واحد

تحياتى

nadine يقول...

آخر كلام قلتيه هو الصح بعينه

عن نفسى، شايفة ان المفروض الجواز ده هو عقد إخلاص و حب بين اتنين بيحبوا بعض و عايزين يعيشوا مع بعض على طول
فالجواز بيكون شاهد على إخلاصهم و حبهم اللى من المفترض انه يستمر لحد آخر ايامهم

بس مع الوقت الجواز بقى غاية مش وسيلة
يعنى مثلا تلاقى البنت اول ما تكبر و يبان عليها النضوج، كل اللى حواليها يلمحوالها ان مصيرها الجواز زى كل حد و انها تتشطر بقى عشان توقع عريس محترم

و الولد طول ماهو طالع داخل، امه تدعيله ياما نفسى اشوفك متجوز و اشوف احفادى يابنى

و للأسف بقى كل الناس تفكيرهم عن الجواز بقى بالطريقة دى، و اصبحوا الأهل بيربوا عيالهم و يستحملوهم لحد ما يكبروا عشان يدلقوهم فى بيت العدل

و وسط كل ده، فقد الجواز كينونته و هدفه الأساسى، و بقت الناس تدور على الجواز... و بعدين الحب
مع ان الحقيقة هى العكس: الحب هو اللى بينتهى بجواز

العيب مش فى الجواز فى حد ذاته
و الدليل ان هناك اشخاص فهموا الجواز صح و عايشين فى سعادة و حب
المشكلة هى فى مفهومنا إحنا للجواز

هتيجى تقوليلى بقى إن فيه ناس بيتجوزوا عن حب و مع ذلك حياتهم مليانة مشاكل
فى الحالة دى هرد عليكى و اقولك انه مفيش حياة بدون مشاكل
الحياة عموما هى سلسلة من المواقف و الصعاب بنتخطاها عشان نوصل ل
level
أعلى
و ممكن جدا نتغلب على مشاكل الجواز عن طريق الإنصات للطرف الآخر

انا عارفة انى طولت عليكى، بس فعلا الموضوع ده منرفزنى جدا، منرفزانى النظرة السطحية للناس تجاه الزواج
عشان كده بقى شركة اجتماعية فاشلة

البوست اكتر من رائع يا ياسمين
تحياتى يا سكرة

Reemo يقول...

بعيدا عن الأديان
وفكره حرمانيه العلاقات بدون زواج

انا هتكلم عن طبيعه الانسان
اللى اعتقد من وجهه نظرى انها هى اللى فرضت عليه فكره الزواج

فطبيعه الانسان انه ملول وبيحب التغيير حتى لأقرب الاشياء والاشخاص لعقله وقلبه
كلنا هذا الشخص
وكتير بنحس برغبتنا فى الابتعاد لبعض الوقت وأخذ اجازه من لهيب المشاعر

ده بيجعل الحب فى حاله تهديد دائم
وكنوع من انواع الأمان
ظهرت فكره الزواج
كصك او وثيقه أمان تتيح للحب بعض من الطمأنينه والارتياح
فى مواجهه ظروف الحياه والتقلب فى المشاعر وتلك الطبيعه البشريه الملوله

بمعنى انه تعهد من الحبيب لحبيبه بانه باق على حبه
حتى لو تغلبت عليه طبيعته الملوله
فهو مازال على حبه ووعده ورغبته فى تمضيه باقى حياته بجواره

ده تفسيرى لظهور فكره الزواج فى مختلف المجتمعات حتى اللى لا تحرم العلاقات بدون الزواج
مجرد أمان وطمأنينه ووعد بالبقاء للأبد

البوست روعه يا ياسو
كنا اتكلمنا فى حاجه قريبه من كده
دايما متميزه يا قمر
قبلاتى

tohamy يقول...

بدون اسباب
حاجة كدة
الطبيعة الانسانية

The Alien يقول...

الجواز موجود قبل وجود اﻷديان
يعني مثلا الفراعنة كانوا بيتجوزوا
يعني الفكرة إنسانية مش جاية من السما

إنتي اللي خلتيني ولأول مرة أخد بالي من الموضوع دا
فعلا الإنسانية مطلعتش فكرة غير الزواج للتعبير عن علاقة إمرأة برجل

الجواز هو إشهار لعلاقة وإرتباط بين إمرأة ورجل
والعلاقة بين الإتنين شئ غريزي بكل ما تحمله من مشاعر وإنفعالات
يعني موجودة وهتفضل موجودة
لإن الطرفين دايما محتاجين بعض
عشان كدا الجواز موجود بشكل أو بأخر

تحياتي

hosnysoliman يقول...

العزيزة ياسمين
الاجابة فى منتهى البساطه..السبب هو الانانية ورغبة الانفراد والتملك..كلا الطرفين يسعى لكى يمتلك الاخر ويظن ذلك..حتى ان علاقات الارتباط سواء المكتوبة او التى تقال عند الزواج تدل على ذلك هذا بالاضافة الى انها عادة اجتماعية متوارثة ولكنها كذلك تاكيد للانانية كذلك..والدليل ان الطلاق ما هو الا فشل فى امكانية تطويع كل منها الاخر للامتلاك..

hosnysoliman يقول...

ياسمين
صحيح فيه حاجة تانية افتكرتها وده الشىء العجيب المحتاج للسؤال والتفكير ومحاولة ايجاد الاجابة وهو ما يؤكد فرضيتى فى هذا الموضوع الا وانها الانانية المطلقة
هو انه لا يحق لااى امراة ان يكون لها اكثر من زوج على عكس الرجل الذى اعطى لنفسه هذا الحق حتى لو دخلنا الى مجال الشرع نجد انه مع عدم حرمانية التعدد فى الدين الا سلامى..الا انه بعيدا عن الاديان فان فكرة اقتران المراة باكثر من رجل مرفوضه على مدى التاريخ على حد علمى..ان ذكورية المجتماعات شىء قديم ليس له علاقة بالدين
فما هو السبب فى ذلك
اليس ذكورية المجتمع منذ الازل واصلا ان حواء خلقت من احد اضلاع ادم فلا بد وان يكون ضلعه هذا له وحده والا يستفيد منه شخص اخر
شىء عجيب ومحير وارجوا ان اجد اجابة لهذه التساؤلات التى كنت سببا فى ظهورها على حيز الفكر

عبقرينو يقول...

اسباب كتييييييييييييييير بالنسبة للمتدنيين الدين بالأساس وهكذا
لكن السبب المشترك للكل هو أن الانسان حيوان إجتماعى لايستطيع الحياة بمفرده مهما كان وضعه الاجتماعى والمادى
أما باقى الكائنات الحية فالتزواج يكون بغرض النسل
هذا رأييى ولكن أرى أن كلمة زواج لايمكن اطلاقها على اى علاقة غير العلاقات الانسانية التى هدفها التواصل والرحمة لأنه فى وضع الرجل الذى يمارس الرذيلة أو حتى الأنثى التى تمتهنها لا يطلق عليه زواج ولكنه ممارسة للجنس
لذلك الزواج مفهومه أوسع من ممارسة الجنس

ســــــردية يقول...

العبد لله عامل محاولة تحتاج للدعم
لتأصيل وعي حقيقي بالهوية المصرية
من خلال سـرديات مصرية نلقي الضوء على التراث المصري ومفاتيح الشخصية المصرية بقراءة غير منحازة لهذا التراث
التجربة لسه في أولها ستتدعم بكم

حصان بري يقول...

انتي بتقولي ليه الناس بتتجوز
ولا قصدك ليه رجل وامراءه يرتبطوا
الاول علشان التدين او الفطره
والدليل ان بره كله بيرتبط وبيعيش مع بعض في بيت واحد من غير جواز

ليه بقي واحد يكتب علي نفسه ارتباط ازلي لباقي حياته
سجن اختياري
فممكن يكون الدافع في الاول الحب
ممكن بعد كده بيختفي الدافع ده وبتحل محله دوافع زي العشره والاولاد والتعود .... الخ
:) وممكن زي مابتقولي علشان يشاركوا بعض ذكرياتهم وحياتهم
تحياتي يا جاسمين

truelove يقول...

عارفة ليه يا يا سمين بنتجوز علشان كل واحد فينا في جزء منه بعيد عنه ومش هيرتاح الا لما الجزء ده يتحد معاه يعني الجواز = الكماااااااااااال يعني انا من غير حبيبي وجوزي ناقصة ومش كاملة بذمتك في احلى من الجواز تحياتي ليكي

شيماء الجيزى يقول...

يمكن انا كمان هتفق مع معظم التعليقات بس انا نفسى اسأل السؤال ده زمان ودلوقت ..يعنى من خمسين سنة يا ياسمين ..الجواب كان هيكون ايه ودلوقت الجواب يكون ايه
اعتقد ان زمان كان الاقبال على الجواز والاعتقاد بالسعادة فيه اكبر من دلوقت

هو زى متقولى كده امر واقع ولو سألتى معظم الناس انت اتجوزت ليه ورد بالرد التقليدى المعروف
سنة الحياة
او لتكملة نص دينةدينه
فدة لانه فعلا مش عارف ليه السبب الفعلى فى الجواز
او كلمة جواز

موضوعك فعلا بيطرح اسئلة عميقة جدا
بس انا كمان بتفق معاكى فى تعليقك النهائى على اجابة الموضوع

ولون حتى الآن مش كل شريك بيختار بعناية علشان يكون شريك الحلو والمر
تقريبا بيكون شريك المر فقط


معلش اعذرينى ..الايامدى انا فى خناق مع نفسى

تحياتى لكِ ياسمين

sharlishablin يقول...

اعتقد ان اهمية الزواج تكمن فى المشاركة التى تصبح بين الزوجين و اعتقد ايضا انه لا تصح المشاركة فى اى شئ بدون عقد و العقد شريعة المتعاقدين فطالما اتفقنا و وقعنا عقد اذا فنحن ارتضينا ان نتشارك على المكسب و الخسارة او على السعادة و الشقاء .
و على العموم فان الطبيعة البشرية حتى و بدون عقود او غيره تحتاج دائما الى شريك و قد ثبت عتلميا و بالتجربة هو ان اول ما يقوم به من يتوه فى الصحراء هو ان يبحث عن شئ يقف بجواره و على ذلك فان طبيعتنا البشرية تحتاج دائما الى جانب اخر تحتمى به و تطمئن اليه و تانس به .

micheal يقول...

أنا عن نفسي مش عاوز خالص
:)
تحياتي لكي

Hannoda يقول...

البوست بتاعك فكرني بحاجة غريبة يا ياسمين
فكرني بقصص عبير اللي كنت مداومة عليها في فترة المراهقة بتاعتي

كان أكتر حاجة بتعجبني فيها هي القصص اللي البطلة و البطل تجبرهم الظروف على الحياه مع بعض لفترة لوحدهم

و على حسب ظروف القصة مرة يكون السبب حادثة في مكان مقطوع أو أي فبركة بيعملها لمؤلف عشان نقتنع إن ما كانش فيه حل غير و جودهم لوحدهم وهمّ أغراب مع بعض

كان بتكبر بينهم مشاعر بموت فيها.. تعود .. ألفة .. فهم.. راحة.. إندماج

كنت كتير بحلم بالمشاعر ده

ولما كبرت فهمت إني كنت بحلم في الحقيقة بالجواز

catroz يقول...

كلام جميل اوى يا ياسمين
فعلا الاتنين محتاجين لبعض
يشاركوا كل حاجه
فرحه و سعاده
حزن و الم
و تكتمل الحياه
زكريات حلوه
و زكريات مؤلمه

أبو ضحى يقول...

تفتكرى كده يا ياسمين ؟!0
المعانى كتير و بتتغير مفاهيمها من واحد للتانى و مع نفس الشخص بتغير ظروفه

الحقيقة ان مفيش معنى ثابت لأى حقيقة حتى الحقيقة دى كمان

و بصراحة مفيش ابيض و اسود الا فى خيال بعض الناس و انا منهم
كله الوان منها الفاقع و منها الباهت..و فى منها المراوغ و كمان الواضح
كله الوان

هو انا خرجت بره الموضوع و لا ايه
:)

معلش لكن الجواز له اسباب تانية بردو

تحياتى
----
انتى رجعتى و لا ايه؟

mohamed hesham يقول...

بوست جميل جدا وطريقة عرض رائعة ...

الجواز (أو الارتباط عموما ) أجمل شئ في الدنيا ...

دي أول مرة أمر بمدونتك وان شاء الله مش آخر مرة ...

والسـ ختام ــلام

islam yousef يقول...

انتى كلامك صح يا ياسمين
بس فيه ناس هاتعترض
ممكن الزكريات نجيبها من اى سكه تانيه
موضوع الخوف على الآخر
فده مش ممكن تلاقيه اليومين دول الا نادرا
المصلحه بقت بتطغى
حتى على العلاقات الاسريه


القنى بقت فيه ناس بتدعوا لشيوعية الجنس
يعنى ممكن الواحد او الواحده يمارسور العلاقه مع كذا شخص فى وقت واحد
صوت الشذوذ بدأيظهر

ممكن تلاقى ده كتير فى عالم المدونين
تحياتى

ياسمين يقول...

tam
الجواز كان اتنين بيعيشوا مع بعض قصاد الناس من غير ما يستخبوا

ومع الوقت عملوا ورق وقوانين وشروط وهكذا

حتى مجرد اختيارك انك تعيش مع واحدة بتحبها للأبد بدون عقد هو فى حد ذاته جواز

أعرف ناس كتير فى أوروبا وأمريكا عاشوا مع بعض وخلفوا وسجلوا العلاقة بعد سنين والمجتمع يعتبرهم متزوجين

تحياتى

ياسمين يقول...

Mirage
طيب انا معاك ان الجواز بيشبع الجنس

طيب اللى فى مجتمعات متحررة جدا جدا والجنس فيها متاح بلا قيود؟؟ ليه بيتجوزوا؟؟
الحاجة للشعور بالأمان أنا معاك فيها

لكن النظام الإجتماعى للزواج لم يخلق من أجل الجنس بدليل اننا لما بنعجز ونفقد القدرة على ممارسة الجنس كما كنا فى الشباب بنتجوز برضه للونس

تحياتى

ياسمين يقول...

محمد مفيد
كل سنة وانت طيب وعقبال العمر كله يا محمد

تحياتى لزوجتك ورفيقة عمرك

ياسمين يقول...

جهينة
كلام هارملس يا عزيزتى جعلنى أشعر بالغيرة لأنى لم أكتبه فى البوست رغم انه جال بخاطرى

واحشانى يا جهينة

ياسمين يقول...

اميرة ويلز
مبروك رجوعك لنا يا قمر
تقصدى يعنى تعددت الأسباب والجواز واحد
تحياتى

ياسمين يقول...

نادين
انتى عندك حق فعلا فى كل كلامك
علشان كدة انا كتبتب البوست دة
ليه الناس بتتجوز؟؟
فى كتير بيتعاملوا مع الجواز كأمر مسلم به بدون فهم لماهية الجواز عشان كدة ناس كتير بتفشل
الجواز مش مجرد جنس ولا رغبة فى الإنجاب لأن فى المجتمعات المتحررة الناس بتتجوز رغم اباحية الجنس بدون زواج والإنجاب كمان
تحياتى

ياسمين يقول...

ريمووو
فعلا كلامك يعتبر مفسر ومكمل للبوست
الموضوع مش جنس ولا خلفة ولا كلام من دة
الشعور بالأمان ومواجهة تقلب التغيرات فى المشاعر جعل من العلاقة اكثر قوة
تحياتى

ياسمين يقول...

تهامى
الطبيعة الإنسانية دى بقى موجودة فينا ليه؟؟
دة موضوع البوست

ياسمين يقول...

The Alien
هتصدقنى لو قلتلك انك انت أحد الأسباب التى دفعتنى بشدة للتفكير فى هذا الموضوع مليا من يوم ما اتقابلنا فى المهندسين يوم التصوير
آه .. انت
تحياتى

ياسمين يقول...

hosnysoliman
كالمعتاد تعليقك متفرد ونابع عن خبرة كبيرة بالحياة
أما لماذا لا تتزوج المراة بأكثر من رجل
دة عشان الذكر الأقوى سيطر على الأرض دائما فقدم من القاعد والقوانين ما يناسبه هو بدون اعتبار للآخر اللى هو المرأة
تحياتى

ياسمين يقول...

عبقرينو
فعلا فى فرق كبير بين الزواج والتزاوج اللى هو بغرض الجنس والإنجاب
تحياتى

ياسمين يقول...

سردية
هآجى ازورك فى القريب العاجل
تحياتى

ياسمين يقول...

حصان برى
حتى برة وفى الدول اللى فى منتهى التحرر
برضه الناس بتتجوز
تحياتى

ياسمين يقول...

truelove
هو فعلا كدة
انا برضه من غير جوزى بحس انى ناقصة ومش كاملة
حتى فى عز المشاكل بنحتاج لبعض
تحياتى

ياسمين يقول...

شيماء الجيزى
فعلا الناس مع الزمن فقدت القدرة على تحديد سبب الجواز واتجهوا لأسباب تانية غير السبب الحقيقى
السبب مش الجنس ولا الخلفة والدليل ان فى مجتمعات متحررة جدا وبرضه بيتجوزوا واللى مش بيخلف برضه بيتجوز
ولما المتجوزين بيكبروا وتنتهى مهمة الخلفة والجنس برضه بيفضلوا متجوزين
الزواج رغبة فى المشاركة الحياتية
تحياتى

ياسمين يقول...

شارلى شابلن
العقود شىء حديث وكان الناس بيتجوزوا زمان بدون عقود
كفاية اتنين يقعدوا مع بعض فى مكان واحد وكل الناس تعرف
الزواج رغبة فى مشاركة الآخر لحياتنا ورغبة فى وجود شاهد على حياتنا
تحياتى

ياسمين يقول...

مايكل
أعرف ناس كتير كانوا زيك كدة عاشوا سنين طويلة مش عايزين
ودلوقتى بيدوروا على حد يشاركهم حياتهم
ضحكهم .. حزنهم .. فرحتهم .. ألمهم
الوحدة وحشة والإنسان مخلوق اجتماعى
تحياتى

ياسمين يقول...

هنودة
كلامك بيثبت ان التعايش بين اتنين ولو حتى مش عارفين بعض كويس زى جواز الصالون ممكن برضه يولد الحب
الحب مش هو اللى بيدفعنا نتجوز
لكن هو اللى بنحصل عليه لما نتجوز
تحياتى

ياسمين يقول...

كاتروز
دى حقيقة
المشاركة هى الهدف من الزواج وليس الجنس او الإنجاب والا ما بقاش جواز بقى اسمه تزاوج زى بتاع الحيوانات والكائنات الأخرى
تحياتى

ياسمين يقول...

أبو ضحى
انا رجعت فعلا
بس مشغولة مع أختى لأنها بتعزل
اخبارك ايه؟
طمنى عليك ولو فى ايميل
تحياتى

ياسمين يقول...

محمد هشام
أهلا بيك ونورت المدونة
هأروح أزورك قريبا
تحياتى

ياسمين يقول...

اسلام يوسف
أى نظام وجد لعلاقة الرجل بالمرأة غير الزواج اختفى مع الوقت
أو لم يعمم
الزواج هو الشكل الوحيد الذى اتفق عليه غالبية البشر عبر العصور المختلفة وعلى اختلاف الديانات والملل والحضارات والأماكن كمان
تحياتى

The Groom يقول...


ياسمينا أنا نازل مصر ان شاء الله يوم الاتنين الجاي

حقعد لحد اخر الشهر ان شاء الله يعني حوالي 18 يوم

حتعملوا لقاء المدونين الشهري امتى وفين؟

أما موضوع البوست فأنا ماليش نفس أتكلم فيه دلوقتي

تحياتي لك من ماناساس البلد

أبو ضحى يقول...

ياسمين
حمدا لله على السلامة
لو عاوزه تعرفى اخبارى..زورى المدونة و انتى تعرفى كل حاجة

تحياتى

ياسمين يقول...

The Groom
هنعمل اللقاء وانت هنا
تيجى بالسلامة
وأخيرا هنتقابل
:)
تحياتى

ياسمين يقول...

أبو ضحى
رايحة حالا

وينكى يقول...

ياسلام عليكى يا سمسم لما بتجيبى من الاخر وبتعرفى تقولى كل الكلام اللى جوايا واللى على لسانى
انتى بجد ماحصلتيش
فعلا الجواز بيوفر اقوى صوره ممكنه للمشاركه بين اتنين فى كل حاجه
صعب قوى ان حد يعيش الحياه دى لوحده
حتى لو كان انه يلاقى حد يتخانق معاه ويفش فيه غله لما يكون متضايق

سهر الليالى يقول...

الناس بتتجوز علشان اممممممممممممم
على رأى اللى قالها مره وماكونتيش قاعده معايا علشان يكرمشوا وهما مع بعض ووقتها بس هيعرفوا هما ليه اتجوزا وليه اختاروا بعض وعــجــبـــى
وحشتينــــــــــى جدا جدا جدا

ياسمين يقول...

وينكى
والله انتى على طول رافعة معنوياتى
وكلامك عن الخناق برضه صح
تخيلى حد مش عارف حتى يتخانق أو مش لاقى حد يفش فيه غله
شوفى حياته تبقى ازاى
نورتينى يا سكر

ياسمين يقول...

سهر الليالى
يا ترى مين اللى قالى كدة؟
حد أعرفه؟
واحشانى يا سكر

غمض عينيك يقول...

قدر ولا بد منه

فى القلب يقول...

العيال يا ياسمين بعد شويه هكبر فى السن و مش هبقى مرغوبه من قطاع عريض من الرجال
فجاء الاسلام بفكره الزواج لانه دين رحمه ليرحمنى ويجعلنى أشعر بلمسه يد ابنى أو بنتى فى ذلك الوقت الذى يغيب عن بال الكثير انه سيصل له
وكده أتمتعت بحب الرجل الوحيد ألى اخترته
مع انه ليس أفضل الرجال
ولاكن لازم لكل شئ سوف أخذ منه شئ هينفعنى فى يوم من الايام ادفع ضريبه من الاول
والانسان السعيد هو من لا ينظر تحت رجله لاكن ينظر لابعد شويه

micheal يقول...

صدقيني يا ياسمين في بعض الاحيان تكون الوحده أفضل رغم قسوتها
تحياتي لكي

محمد ياسر يقول...

انا برضه كنت عامل اخر بوست عندى عن سبب الجواز لكن انتى جبتيه بطريقة واسلوب جميل و فى الاخر قلتى انه مشاركة فى كل شئ لاننا محتاجين مشاركة
المهم شوفى البوست يا ريت هو هنا فى المدونة دى
http://hadoutamasrya.blogspot.com/

loumi يقول...

العزيزة ياسمين
العلاقه بين الرجل والمرأه قد تأخذ اشكالا مختلفه ويالتالي تسميات مختلفه
واطلقت كلمه زواج على العلاقه الشرعيه بين الرجل والمرأه لانه بموجب هذه العلاقه اصبح لكل منهم حقوق مكفوله
فى حال حصل اى مشاكل ووصلوا لمرحل الانفصال
والزواج فى اساسه اشهار لهذه العلاقه
لضمان حقوق جميع افراد الاسره
اما كوننا نقول عليه نظام اجتماعي
فاشل فنحن الفشله وليس الزواج فى حد
ذاته
فالزواج جاء كما قلت لضمان حقوق كل اطراف هذه العلاقه الشرعيه
ولا شك ان احتياجنا لمن يشاركنا حياتنا وذكرياتنا هو اقوى دافع لدى اغلبنا للزواج
لذلك نتزوج

ياسمين يقول...

غمض عنيك
طيب

ياسمين يقول...

محمد ياسر
هأروح أشوفه

ياسمين يقول...

لومى
واحشانى يا ست الكل
والله منورانى
فعلا المشاركة هى الحاجة الوحيدة اللى بتفضل بين المتجوزين
ولا الجنس بيفضل ولا العيال بتفضل
كله بيروح لحاله ويبقى الزوجان بذكرياتهما
لذلك ينبغى ان تكون الذكريات سعيدة
:)
تحياتى

LAMIA MAHMOUD يقول...

اعتقد ان زي ما قلتي عشان نلاقي حد نفتحله دماغه ويكسرلنا دراعنا وبعدين نتصالح

حد نكبر جنبه ويكبر جنبنا .. حد يضمنلك انك مش حتعيشي لوحدك

وياااااااه بقى لو توافر ان الحد ده يكون حد بتحبيه

loumi يقول...

العزيزة ياسمين
وانت كمان واحشانى يا قمر
والبلوج منور بأصحابه
يا رب تكوني بخير وتكوني قضيتى
وقت ممتع
تحياتي

أميرة ويلز يقول...

ياسمين بمناسبة موضوعك دة عايزاكى تمرى على موضوع مهم جدا فى مدونتى عايزين رايك

قيد من حرير

الجواز فى بلدنا امرأة مقهورة ورجل متسلط والا ايه رايك ؟؟؟

ياسمين يقول...

لمياء محمود
بيهمنى رأيك قوى
وبأستنى تعليقاتك بفارغ الصبر
وبيعجبنى طريقة تفكيرك

تحية كبيرة

ياسمين يقول...

لومى الرقيقة
اسعدتنى عودتك للمتابعة
سلام كبير لأحلى بلوجراية

ياسمين يقول...

أميرة ويلز
رايحة حالا

islam يقول...

صح

عصفور المدينة يقول...

أستاذة ياسمين أحييك على هذه الفكرة الرائعة ولكن أعترض على مفهوم أن الزواج اختراع اجتماعي أو تطور طبيعي ابتكره المجتمع لوجود الرجل والمرأة معا ولكنه فطرة خلق الله عليها آدم وأبنائه
هو الذي خلقكم
من نفس واحدة وجعل منها زوجها ليسكن إليها فلما
تغشاها حملت حملا خفيفا فمرت به فلما أثقلت دعوا
الله ربهما لئن آتيتنا صالحا لنكونن من الشاكرين

يعني فيه حياة مشتركة وسكينة ومرت به ودعوا الله ربهما مع بعض وعلى فكرة هذه الآية ليست عن آدم بدليل اللي بعدها

فلما آتاهما صالحا جعلا له شركاء فيما آتاهما

أرجع للفكرة الفكرة رائعة أنت تدعين إلى فهم حقيقي للزواج واستصحاب هذه الفكرة دائما في إدارة العلاقة الزوجية

وبعدين ربنا سمى الزوجة أو الزوج الصاحب بالجنب يعني هي صحوبية خاصة جدا

فيه فكرة مهمة أيضا ذكرتيها وهي السخرية والتسخط على الزواج وهذا مرض اجتماعي يحتاج إلى معالجة وسأتكلم عنه إن شاء الله وأعتقد أنت أقدر على الكلام فيه باستفاضة

gohayna يقول...

الزواج والنظره الشموليه ليه


رغم اني قلتلك قبل كدا ان الزواج نوع مت التحديد بين شخصين وتطويقهم بعلاقه سليمه فطريه ديبنيه

الا انه بيثل عهد يمكن ميكونش مكتوب علي ورقه الزواج

عهد بينهم علي قضاء كل دقيقه من العمر للاخر

من اجله ولاجله

التعاهد علي اقتسام الذكريات والكلمات والمواقف والانفاس

اقتسامهم علي شخصين

كلا منهم يسعي لرسم ملامح حياته في ذاكره الاخر

عشان لما يكبروا زي ما بتقولي يكون عندهم رصيد يخليهم يكملو مع بعض يا يا سمين



سؤال صغير اوي

انتي فين يا قمر

مختفيه فين يا حجه؟

طمنيني عليكي

micheal يقول...

ايه أخر أخبار اللقاء سنوي صحيح
:)
تحياتي

farida يقول...

تحليل جميل و نظره مختلفه للجواز
و لأني متجوزه عجبني قوي البوست ده

لأني فاهمه لما الواحد بيتجوز و يبص حواليه يلاقي الناس مش مستريحه
و الناس اللي متجوزتش حتموت وتتجوز

و الواحد بيسأل
هو ليه الناس بتتجوز؟؟

هنا الجنة يقول...

lama rapena khala2 adam we khala2 ba3deeh 7awa2 .. adam kan ebtada ye7es bel elwe7da

Adam 2allaha enti meen we rapena khala2ek leeh ..

2alet .. khala2any rappy le taskon elay .. y3ny rapena khala2 7awa sakan we beet we roo7 we dafa le Adam

we 3shan keda be netgawez

themyth يقول...

الجواز دة حاجة العن من المعتقل تدخل و متخرجش انا احب ان الانسان يكون حر
www.lifeonnile.blogspot.com
read ma new post

Osaid Rasheed يقول...

This is a great blog
Good work

غير معرف يقول...

6K聊天室,080中部人聊天室,聊天室交友,成人聊天室,中部人聊天室,情色聊天室,AV女優,AV,A片,情人薇珍妮,愛情公寓,情色,情色貼圖,情色文學,色情小說,色情,寄情築園小遊戲,AIO交友愛情館,情色電影,一葉情貼圖片區,色情遊戲

言情小說,情色論壇,色情網站,微風成人,成人電影,嘟嘟成人網,成人,成人貼圖,成人交友,成人圖片,18成人,成人小說,成人圖片區,微風成人區,成人網站,免費影片,色情影片,自拍,hilive,做愛,微風成人,微風論壇,AIO

情趣用品,情色,成人,A片,自拍

情趣用品,色情,成人影片,色情影片,免費A片

情趣用品,成人網站,A片下載,日本AV,做愛

情趣用品,美女交友,A片,辣妹視訊,情色視訊

情趣用品,色情聊天室,聊天室,AV,成人電影