الاثنين، 8 أكتوبر 2007

أول تاج

مرر لى هذا التاج من الزميلة العزيزة لمياء محمود بمناسبة يوم كلنا ليلى
وهذا هو طبعا اول تاج اقبله واتجاوب معه لكن لو قرأتم الأسئلة ستعرفون السبب
واذا عرف السبب .. بطل العجب
هل انتي سعيدة كفتاة وبدورك في الحياة؟
انا لا املك الحق فى ان اكون سعيدة ام لا .. كونى فتاة ليس وضع من اختيارى بل هو قدر قدر لى
اما دورى فى الحياة فأنا اشعر انه منقوص وان بداخلى طاقة كبيرة لم تخرج بعد

ما الذي لا يعجبك في المجتمع تجاه نظرته لليلى؟
المجتمع ينظر للمرأة على انها أداة .. مجرد أداه لإمتاع الرجل
بينما هى فى الحقيقة مخلوق كامل الأهلية .. له كل الحق فى ان يختار
المرأة محرومة من حق الإختيار
ما رأيك في دور الاعلام في ترسيخ صورة نمطية عن المرأة؟ ومعالجات قضايا المرأة؟ وتأثيره؟
الإعلام جزء من المجتمع وبرغم ان هناك جهود كثيرة مبذولة للإرتقاء بنظرة المجتمع للمرأة الا انها ضعيفة ومبتورة
فى احد المشاهد حوار بين البطلة وحماتها بتقولها هو من امتى يا بنتى الراجل بيفهم الست .. الرجالة عمرهم ما بيفهموا الست .. الست هى اللى المفروض تفهم الراجل وتشوفه عايز ايه وتشوف ايه اللى يريحه
الست هى اللى تيجى على نفسها عشان راحة جوزها
هى دى النظرة التى يرسخها الإعلام فى الأذهان

ما رأيك في يوم ليلى؟
يوم ليلى فكرة رائعة لإبراز دور المرأة ومطالبها البسيطة جدا
مطلبها الوحيد فى ان تعامل كإنسان لا كمدينة ملاهى
اول خطوة اقتراح لتغيير مشاكل معينة؟
الأسرة نواة المجتمع .. انادى كل أم ان تعلم ابنائها الذكور كيف ان للإناث حقوق
وكيف ان للمرأة آدمية يجب أن تحترم
مش بس البنات هم اللى المفروض يعرفوا حقوقهم
لأ .. كمان الصبيان لازم يتربوا على احترام كل ما هو مؤنث

هل تحبين نفسك ام تتظاهرين بالقوة؟

أحبنى طبعا لكنى فى نفس الوقت اتظاهر بالقوة
هل يتعارض تقدير الذات مع التظاهر بالقوة؟؟؟؟؟

هل تعرفين دورك في الحياة ام تنساقين وتلعبين ادوار مرسومة فقط؟

ومن منا لم يرسم له القدر دورا فى الحياة ؟؟ .. المهم هو كيف نمارس ادوارنا

هل انت مستعدة ان تدافعي عن وجهة نظرك عموما ام تجبنين عند المواجهة؟ وهل ترين جبنك صفة شخصية ام يغذيها من حولك؟

لم اكن ابدا جبانة .. ولم استسلم يوما لرأى مخالف .. ولم اخشى فى الحق ابدا لومة لائم
كرهت الأقنعة منذ نعومة اظافرنى ورغم ان اوقعنى ذلك فى كثير من المشكلات
الا انى لم ارتد قناعا قط ولم اكن ابدا الا انا

ما مشاكل ليلى الملحة في المجتمع من وجهة نظرك؟ ما مصدرها؟ هل يمكن حلها؟ وهل عندك موقف شخصى من واقع الحياة؟

االسؤال دة عايز بوستات كاملة عشان يتجاوب عليه
أكبر مشاكل المرأة انها لا تعامل وينظر اليها ولا يعترف بها كإنسان له عقل وقلب ومطالب وحاجات
يحتاج حل تلك المشكلات الى أجيال وبرضه الأسرة والأم الواعية هى التى سوف تحل المعضلة
عندى موقف شخصى طبعا ..
واجهت مشكلة نظرة المجتمع مهما كانت مكانتها ومستواها الإجتماعى
على أنها اللى المفروض تخضع عندما يغضبها الرجل
وانها هى التى يجب أن تتحمل تبعات نزواته حتى وان جرحتها
وانها التى يجب ان تحمى الأسرة حتى وان أمسك الرجل بمعول وحطم قلبها
هل تري المرأة اقل من الرجل في اي مستوى من المستويات؟
وان كان فعلا فما هي هذه المستويات؟

لا يوجد نقص .. العلاقة بين الرجل والمرأة علاقة تكامل لا احلال ولا تبادل

منذ مرور سنة منذ يوم ليلى الاول ماذا تغير في وضع ليلى؟

التغيير مش هنحسه دلوقتى .. هنحسه فى أولادنا وبناتنا
بس لازم نتمسك ونعلمهم ازاى يحترموا ليلى

هناك 37 تعليقًا:

بسمه عبدالباسط يقول...

بجد أجاباتك رائعة كما عودتينا فى كل مواضيعك
وموضوع التاج لذيذ جدا لأنه مش تاج عادى لأ ده بيناقش قضية وإنتى ناقشتيها كويس قوى
وكل اللى قلتيه وأن التغير مش هنحسة دلوقتى أنا برضة فهماه وحساه وبقول نفس الكلام أن التغير هنحسه فى الأجيال اللى بعد كده
تحياتى لكى

بسمه عبدالباسط يقول...

أيه ده أنا أول كومنت
ماليش هدية بقى ولا أيه
مع أنك وحشتينا قوى
بس رجعتى بقوة بحاجة كلنا محتاجينها

Unknown يقول...

اسمحيلى يا استاذة يا سمين
انتى مصرة انك تبينى ان المراة مظلومة ظلم
متظلموش حد قبل كدة
مش معنى دة انى بقول ان المراة مظلومة
هة فعلا مظلومة
بس انتى بتعمقى الظلم دة

بدليل لما التاج سالك عن اية اللى بيعجبك فى نظرة المجتمع لليلى
ذكرتى عيوب مش مميزات

نيجى بقى للظلم اللى واقع المراة

وبصفتى هنا فى مدونتك اللى بحترمها جدا
برجوكى تحاولى تبينى لنا اية هو فعلا الظلم اللى واقع عالمراة
عشان انا وكل الرجالة نبقى عارفين فعلا اننا بنظلم المراة فى كذا وكذا
لانى ممكن اكون ظلمها ومش حاسس
لان عندى اصول او قواعد غلط اتربيت عليها
رغم انها غلط

معلش دخلت سخن

تحياتى تانى لحضرتك

أسوور يقول...

بوس بوس
واحشانى يا قمر

انتى فهمتى السبب الرئيسى اللى خلانى قبلت التاج الوحيد اللى جاوبته فى حياتى التدوينية
حسيت انه ممكن يقول حاجة غير بحب افطر ايه وبصلى التراويح ولا لأ

تحياتى

أسوور يقول...

واحد مش فاهم حاجة
غلطة مطبعية والله يا فندم

احنا هنا بنتكلم عن المرأة
صح
عن ايه اللى مضايقنا كجنس آخر موجود فى الدنيا
صح
تخيل نفسك بتسأل مثلا الزنوج فى أمريكا ولما يقولوا انهم مظلومين ييجى واحد ابيض يقول ظالمينكم فى ايه؟؟

المهم

عايز تعرف ايه الظلم يبقى تبطل تنفى ان فى ظلم او فى مشكلة
اول حل لأى مشكلة هو الإعتراف بأن فى مشكلة
لما واحد يضرخ لازم تسأله بتصرخ ليه؟
قمة الظلم ان حد يصرخ وكل اللى نعمله اننا نقله بطل صريخ صوتك مضايقنا ودة اللى دايما بحصل مع المرأة

الظلم واقع من نظرة الرجل للمرأة كأداة للمتعة .. وكأداة للإنجاب
وتاصيل تلك النظرة
انا شخصيا مؤمنة ان الرجل برضه أداة لمتعة المرأة وأداة للإنجاب بس دة ما اداش للمرأة حق انها تعامله بنظرة دونية بينما هو يفعل

يجب ان يؤمن الرجل ان العلاقة بينه وبين المرأة هى وعلاقة تكامل .. لا احلال ولا تبادل
يعنى ايه
يعنى احنا بنكمل بعض بنسب متساوية ولا يمكن ان يحل الرجل محل المرأة او العكس ولا يمكن تبادل الأدوار

لماذا يحقر الرجل من شأن اهتمامات المرأة ودورها ؟؟
مثال
هم فالحين غير فى الزواق والمرايات
هم فالحين غير فى الطبيخ
دى آخرها تقعد تربى العيال

طيب ماهى ادوار هامة برضه
مش زينة المرأة برضه حاجة فى طبيعتها .. هو احنا بنسخر من الرجل لما بيحلق ذقنه مثلا؟؟

وبعدين لما الست تطبخ لجوزها وللبيت كله تبقى تستحق الشكر مش السخرية ولا حتى فى الضمير
يعنى الرجل فى داخله يقلل من دور المرأة فى الحاجات البسيطة دى

وبعدين لما الست تقرر انها تهمل دورها فى تربية العيال .. مين هيعمل دة؟؟ الراجل؟؟

لأ ولو خرجت للعمل تبقى بتاخد مكان راجل .. يا سبحان الله .. حتى فى الرزق بتتدخلوا

طب يا ريت

دور الرجل احنا عارفينه ومش بنقلل منه لكن كل اللى احنا عايزينه ان الراجل يعرف ان الست بتفكر زيه لو توفرت الظروف وانها لو قرت تبقى مثقفة ولو اتعلمت تبقى ينفع تشتغل
طولت عليك
تحياتى

محمد حمدي يقول...

أنتى كنتى فين يا ياسمين قلقتينى عليكى جدا

أما عن البوست فا رغم انى شفت البوست دة عند كتير لكن عندك انتى له طعم خاص جدا .. وكنت مستنى البوست يوصلك وفرحت لما لمياء مررته لك

تحياتى الحارة لك

Ahmad Hegab يقول...

منورة البلوج

بصى يا سيتى مش كل الرجاله بينظرو لليلى على انها أداة للمتعة انا عارف ان تقريبا 90 % من الرجاله كدا بس فى ناس مش كدا و انت عندك حق الام هى المسؤله عن تريت الذكور على التفكير السليم

تحياتى و عودة قوية

مـحـمـد مـفـيـد يقول...

العزيزه ياسمين
بجد يأستمتع جدا لما بدخل عندك
المهم اني اري ان لا فرق بين المرأه والرجل
فكلنا مكملين للاخر والنظره الخاطئه من الاشخاص هي التي تجعل فرقه بين الاثنين
فلا تستقيم الحياه دون زوجه أو ام او ابنه او اخت
وهكذا لا تستقيم الا بوجود الاب والزوج والاخ والابن
فلابد من تصحيح المفاهيم لدينا أولا

أبو ضحى يقول...

ياسمين
انتى بتقولى الامهات لازم يربو اولادهن على احترام كل ما هو مؤنث ..بس المشكلة ان الاولاد هيسمعوا كلام و هيشوفو غيره فى بيتهم و من ابوهم و امهم اللى بتربيهم على كده

----------------------------

متهيألى الموضوع لازم يشارك التعليم فى المدارس فى ترسيخه فى أذهان الأطفال من الصغر..لازم يتعلمو ان الراجل مش مخلوق كامل و لا الست كمان...ربنا خلقهم كده عشان يكملوا بعض مش يحاولو ياخدو ادوار بعض

------------------------

و قبل ما يكون التغيير فى مناهج التعليم يكون محاولة التغيير فى عقول المعلمين. لأن بصراحة المعلم مش هيقدر يقنع الاولاد بحاجة هو نفسه او نفسها مش مقتنع بيها

-------------------------

الموضوع مش بسيط و لا هيتغير فى سنة و لا تلاتين..التغير فى المواضيع اللى زى دى بيبقى تغير تدريجى

----

أعتذر عن سوء الظن فى تعليقى على
البوست السابق، و أتمنى تنورى مدونتك اللى ناحيتى تانى

تحياتى

voice of love يقول...

رائعة كعادتك
ويؤسفنى ان كلامك صحيح عن وجهة نظر المجتمع فى المرأة
ولكن أملى فى التغيير كبير لأنه لا يصح أبدا ان تكون تلك نظرة نصف المجتمع لنصفه الآخر والذى يعد كلا منهما مكملا للآخر
تحياتى وتقديرى ووحشتينى

Hannoda يقول...

إجابات رائعة جدا

دايما كنت مابحبش تجمع البنات على الكلام في حقوق المرأة و دورها و مكانها و الكلام ده كله

دايما كنت بحس ان الكلام ده كله بعيد عني جدا
يمكن عشان ما احتكتش في الحياه ولا بأخ في البيت
و أبي كان دوما ألطف من النسيم

ولم أندمج في منازل أصدقائي فأرى الفرق

فلم أكن أشغل بالي

لأني لم أتعود للأسف بأن أشغل تفكيري بما لا يقترب مني

و كما تعودت منك
أن تضعي نظرنا على كل ما هو مظبم في محيطنا


تحياتي لياسمين اللي بتتظاهر بالقوة وهذا من وجهة نظرها

Mr_Tea يقول...

العزيزة ياسمين
أولاً أحب أن أشكرك على سؤالك عنى أثناء فترة مرضى
ثانياً أحب أن أقول لكى ان مدونتك ثرية للغاية و تحتاج وقت طويل للإلمام بكل موضوعاتها لذا سأكتفى اليوم بتسجيل حضورى مع وعد بتكرار الزيارة
و يشرفنى أن تكررى زيارتك لمدونتى المتواضعة فى المستقبل القريب

تحياتى

أسوور يقول...

محمد حمدى
اطمن رمضان قرب يخلص وهتلاقونى زى زمان
منور يا محمد

أسوور يقول...

أحمد حداد
نسبة 90% هى نسبة لا يستهان بها واحنا هنا بنتكلم عن القاعدة وطبعا لكل قاعدة شواذ
تحياتى

أسوور يقول...

محمد مفيد
كالمعتاد تعليق رائع ومفيد من محمد مفيد
تحياتى
منور

أسوور يقول...

أبو ضحى
النقطة الأولى غاية فى الأهمية لكن لما بيتزرع شىء معين منذ الصغر بيبقى داخلنا حتى وان حاولت البيئة المحيطة تغييرهوطبعا لازم فعلا يكون التعليم والإعلام والتربية بيكملوا بعض فى الموضوع دة
تحياتى

أسوور يقول...

voice of love
واحشانى يا ست البنات
والموضوع شائك ومحتاج لأجيال عشان يتغير
تحياتى

أسوور يقول...

هنودة
التفرقة الحقيقية هتعرفيها وتحسى بيها لما تتجوزى يا هند
اتمنى انك ما تحسيهاش ابدا
تحياتى

أسوور يقول...

Mr_Tea
حمد الله على سلامتك
وهأزورك قريب
تحياتى

أبو ضحى يقول...

ياسمين
أنتى فاكرانى؟

شبكة موجز يقول...

تحياتى على البوست الجامد ده الموضوع والفكره جمال جدا وخصوصا حكايه التاج

أسوور يقول...

ابو ضحى
انت حساس قوى

Ezz يقول...

معدي بس عشان أقول كل سنة و انتي طيبة...عز

micheal يقول...

ههههههههههههه..حتي بوم ما تعملي التاج تعمليه علي مشاكل المرأه
ع العموم تاج لذيذ
كل سنه و أنتي طيبه
تحياتي

أسوور يقول...

عز
وانت طيب وبصحة وسلامة

أسوور يقول...

بنوتة من مصر
منورة المدونة يا اجمل بنوتة

أسوور يقول...

مايكل
شفت بقى
مشاكل المرأة الشرقية بتطاردنى حتى فى الأحلام
منور يا جميل

Al-Firjany يقول...

هو حضرتك ليه حاصرة العلاقة ما بين الرجل والمرأة في ظالم ومظلوم؟ بالطبع فيه ظلم (وشايف الجملة دي مهمة على ما يبدو كصك غفران) ولكن ليه بس حاصرين الحياة وعلاقة طبيعية ما بين جنسين في كلمة واحدة؟

هو أنا ملاحظ تركز النقطة دي تحديدا في المسلسلات (ومش عارف هل احنا معترفين بإن المسلسلات مرآة حقيقية للمجتمع ولا لأ؟) والنقطة مذكورة من قاع المجتمع "بكرة أجيب لك الواد يا أبو بهية" واحتياج الراجل له، إلى قمته "بكرة تجيبي العمدة الصغير أو ولي العهد" ومفيش ولية للعهد :-))

ولكن مش معنى كدة إن علاقة ما بين راجل وست تبقى بس مجرد خلفة والسلام! هي كدة في بعض الحالات بس ما أفتكرش كلها. ومش معنى إنها شخصية يبقى لازم أعمم! أو أجري ورا جملة في مسلسل أو فيلم علشان أعمم!

ماشي الراجل مش فاهم الست ، بس هل هي وبس اللي بيتطلب منها إنها تفهم الراجل؟ يعني ما حدش بيطلب من الراجل إنه يفهمها؟ مفيش خالص؟!! ولا اصحابه ولا أمه ولا والده؟ ما تخربش على نفسك يا بني؟! معلش حضرتك على ما يبدو تابعتي كلمات البطل أو الأبطال .. ولكن نسيتي بعض أدوار الكومبارس اللي بتعارض طرحك!
مش عاوز أرد طويل .. but i will keep an eye here
مدونة حضرتك نموذج لمتابعة "الآخر" ويمكن بأدور عليها بقى لي فترة .. لأني لسة ما اتجوزتش .. والسبب ممكن يظهر في تعليقات تالية بإذن الله
بالمناسبة فيه كتاب عاملاه واحدة صحفية مصرية من فترة عن نوع خاص من العلاقة بين الراجل والست والجنس كعامل مشترك .. حأحاول أدور لحضرتك عليه، لأنه بالنسبة لي جيد جدا وممكن يوفر علي تعليقات كتيرة :-))
Firjinand

شيماء الجيزى يقول...

ياسمين

معلش هحكتب تعليق بره السرب

فى واحده او واحد زى مبعتقد عامل مدونه قمه فى السفاله
ودى وجهة نظرى بيروج لمدونته بشكل قذر الى حد كبير

وهو انه يستخدم خاصيةفى الكومنتات ممكن من خلالها يكتب الاسم واللينك للمدونه فقط

فيقوم عامل ايه الظريف انه يكتب اسم مدون مشهور ومعروف
ويقوم كاتب اللينك
ويكتب الكومنت
زور الموقع ده
ويكتب اسم موقعه

فلابد ان تلاحظى ان ممكن اسمك يروج لشئ زى ده

وياريت كل المدونين يخلى بالهم
وخدى بالك من وجود كومنت زى ده

تحياتى

أبو ضحى يقول...

ياسمين

يمكن أكون حساس أوى زى ما أنت بتقولى

كل الموضوع ان أنا كنت متعود منك على ردود معينة و تشجيع منك و ده من أول ما ابتديت تدوين
و دايما معتبرك أخت ليا زى ما قلتلك قبل كده فى مرة كنا بنتكلم فيها

لكن لما غبت شوية حسيت أن كل حاجة متغيرة .. وده سبب سؤالى

أبو ضحى يقول...

أتمنالك رحلة سعيدة و كل سنة و أنت طيبة
:)

.:.-=- ELGaZaLy-=-.:. يقول...

همممممممممممممممممممم

اجباتك جميلة يا ياسمين

كالعادة مراة تعبر عن فكرك بشكل رائع

كل سنة وانتى طيبة عيد سعيد ان شاء الله

MoHaMeD HoSSaM يقول...

كل سنة وانتى طيبة

اى اخبارك؟

Fantasia يقول...

3eed sa3eed ya yasmine. Kol sana wenty w2osretek b7eer. A big kiss for your cute girls :)

micheal يقول...

كل سنه و أنتي طيبه

Young entrepreneur يقول...

السلام عليكم
العدد الثالث من المجلة نزل, يا ريت تزورونا و نعرف رأيكم
Trateesh kalam

Eman and Yasser يقول...

عزيزتنا الفاضله
نحن نتفق معكى كلياً ونعتقد أن التغيير قادم لامحالة لأن العالم كله أصبح يدرك ويقدر الدور الذى تلعبه المرأه كشريك مساوى للرجل في كل مجالات الحياة. إننا كاأسرة مصرية نشعر بالفرح والسرور عندما نقرأ ونشاهد عدد كبير من المقالات التي تريد إنصاف المرأة في هذا المجتمع.إننا نربى أولادنا على أن الولد والبنت متساويان في الحقوق والواجبات