الأحد، 16 مارس 2008

سندريللا العصر الحديث


سندريللا مامتها ماتت وهى صغيرة وباباها اتجوز واحدة ست عشان تاخد بالها منها وتربيها
كانت ست طيبة .. علمتها تعتز بنفسها .. وعلمتها ازاى تدافع عن نفسها ..وعلمتها ان البنت زى الولد ماهيش كمالة عدد
سندريللا كانت بتروح تمرين السباحة والجودو والجمباز والكاراتيه والتنس وكرة القدم
كانت بتحب تركب الحصان وودخلت كلية الطيران
وفى يوم شافت فى التليفزيون اعلان عن حفلة كبيرة عاملها ابن الرئيس وعازم فيها كل بنات البلد
راحت الحفلة بعد ما نزلت هى ومرات باباها الطيبة واشترت اجمل الفساتين
ووضبت شعرها وماكياجها وبقت اجمل البنات
وفى الحفلة شافها ابن الرئيس وطلب يرقص معاها وقالها انه معجب بيها وعايز يتجوزها
قالتله ازاى تتجوزنى عشان بس انا حلوة لازم تحبنى وتحب شخصيتى
وطلبت منه انه يدخل معاها فى اختبارات
اتبارزوا بالسيف واتسابقوا بالحصان وبالعربية ووطاروا بالطيارة ونطوا بالبراشوت
لعبوا كوتشينة ووشطرنج وبلاى استيشن غلبته وغلبها وفى النهاية لقاها بتعرف تعمل حاجات كتير زيه بالظبط
وعرف ان الجمال لوحده مش كفاية
وقالت سندريللا لابن الرئيس انا بعرف اعمل كل حاجة انت بتعملها لكن هل يا ترى انت كدة برضه؟
طلبت منه يعمل ملوخية وماعرفش .. طلبت منه يعمل ببرونة للبيبى وماعرفش .. طلبت منه يخيط زرار البلوزة بتاعتها ومعرفش
قالتله روح اتعلم وتعالى اتجوزنى
مشى زعلان لكن صمم انه يتعلم زيها تمام .. ويكون مناسب ليها
ورجع بعد ما بقى يعرف كل حاجة وطلب يتجوزها
قالتله هو انت هتتجوزنى ليه؟؟ .. قالها عشان حبيتك .. .. وافقت سندريللا
وعاشوا فى تبات ونبات وخلفوا صبيان وبنات
اصلنا بنتجوز بالحب .. وبنخلف بالحب .. وبنكبر ولادنا بالحب
وتوتة توتة خلصت الحدوتة
***
هى دى حكاية سندريللا اللى بأحكيها لبناتى

هناك 50 تعليقًا:

http://kasperb4.blogspot.com/ يقول...

يا خبر ابيض
دي مشكلة
لو كل الأمهات بتحكي لبناتها الحدوتة دي كده الشباب هتعنس اكتر ماهي معنسة
ههههههههه

يعني انا عشان اثبت لخطيبتي اني بحبها لازم اكون بعرف اطبخ واعمل ببرونة؟

أسوور يقول...

الام وامال
لأ لازم تكون عارف قيمة اللى هى بتعمله وتكون كمان عارف قدراتها
وماتشوفهاش مجرد لوحة جميلة وبس
تحياتى

غير معرف يقول...

ههههههههههههههههههههههههههه

ايه كل ده .....

انا كده عرفت ليه الشباب عنسوا...

بس بينى وبينك...

حقها برضه ....

اصلها مش هتتجوز عشان تشتغل وبس

محمد فوزي يقول...

تحياتي لشخصك الكريم اولا , وبعدين القصه دي رمزيه مش كده؟ يعني ليه مثلا الام بتموت والبنت بتتعلم من مرات ابوها؟ وبعدين ايه حكاية ابن الريس دي؟ احنا اتولدنا في العصر الحديث برده وعمر ما حد حكالنا اي قصه الا ويقول فيها ابن السلطان
اتوقع كده من البلوج الفوازيري اللي قبله انك بتحبي تسيبي الناس تفكر , طب ممكن اعرف ايه الجوايز لو سمحتي؟

أسوور يقول...

سفاح كرموز
هو الشباب تعنس لما تقدر البنات اللى المفروض يرتبطوا بيها
؟؟
اللى هى الأم والأخت والإبنة والزوجة؟؟
وبعدين هو دة المطلوب
اللى مش هيقدر زوجته حق تقديرها يبقى بلاش منه احسن
لما الجمال يروح هيفضل ايه من الزوجة غير شخصية تعيش معاها بقية عمرك؟
البنت زى الولد ويمكن تقدر تعمل حاجات هو مش بيعرفها ومع ذلك الرجل لا يؤمن بذلك .. اما السبب فواضح ثقافة بتنتقل عبر الأجيال
اساطير وحكايات عن البنت الجميلة اللى عايزها الأمير عشان جمالها وهو بس بماله
تحياتى يا سفاح

غير معرف يقول...

جامده اوى يا سكاى لايت ..
out of the box
انتى فعلا بتعلمى بناتك كده ؟؟ يارب بس يلاقوا الى يفهم ده .. و يقدروا يكونوا بنات اقوياء فى مواجهه تخلف المجتمع

Lasto-adri *Blue* يقول...

ونعمة التربية يا ياسمين
أنا قررت أحكيها لولادى كمان ... عشان لازم كل حد يتعمل من وهو صغير معنى المسؤولية ويعنى إيه تحترم الآخر زى ما شايف نفسك قوى يعنى

أسوور يقول...

محمد فوزى
طبعا هى الحكاية رمزية
اشكرك لفهمك للبوست
تحياتى

أسوور يقول...

كوكو
اثلجتى صدرى بجد باللى كتبتيه
ولأنى مش عايزة بناتى يعانوا من التخلف اللى عانينا منه قررت اربى فيهم قيم مختلفة
ودة من خلال حكاية قبل النوم
تحياتى لكوكو

أسوور يقول...

Lasto-adri *Blue*
اشكرك يا بلو
كلامك دة هأعتبره اطراء من شخصية جميلة زيك
فعلا يا بلو لازم يتعلموا انهم لهم قيمة وكبيرة كمان وقيمتهم فى عقولهم وقدراتهم مش فى جمالهم
تحياتى

الشرقاوى يقول...

أولى تدويناتى عن التدوين و المدونات

رأييى فى وائل عباس
http://blog-eyes.blogspot.com/

غير معرف يقول...

وبرضو راحت لحفلة ابن الريس!!
مش شايفة انه المبدأ مختلفش كتير؟ :D

على فكرة طبعا في الواقع لو واحد لقي واحدة طيارة وبتنط بالباراشوت وبتبارز بالسيف وتركب الحصان..أكيد مش هيتجوزها :D

ميمنعش اني لو جالي في يوم من الأيام بنت (استر يا رب) هاعلمها بعض هذه المهارات..هاعلمها تضرب نار وتلعب كاراتيه :D

بيجاسوس المصرى يقول...

تحية طيبة ليكى و عودة حميدة لتدوين مرة اخرى و التى اسعدتنى جدا جدا

ذكرتنى حينما كنت صغيرا كنت احب اسمع القصص من كتاب كليلة و دمنة و ما كانت تخبئه خلفها و التى فهمتها بعد ذلك
فالرمز تظل عالقه فى اذهانا حتى نحكيها للابنائنا و خاصة فى ظل التخلف الثقافى الموجود و المنتشر بسرعة البرق
أصبح فيه المثقف العاقل متخلفا فى اعين الناس
و اصبح الجاهل فيه فهلوى بيلعب بالبيضة و الحجر بل اصبحوا هم من يتحدثوا بأسمائنا فى المواقع القيادية

حمد الله على السلامة و اسمحلى بأضافة الاميل
بالحق بلاش ابن الريس فى القصص لان الحطيان لها اودان
هههههههههههههههههه
تحياتى

أسوور يقول...

أحمد ناصر
استر يا رب؟؟!!!
شكرا لك

أسوور يقول...

بيجاسوس المصرى
والله زيارتك هى التى اسعدتنى
واسعدنى اكثر انى ما زلت فى الأذهان
خاصة لدى مدون عظيم مثلك

الأمير ابن الملك .. ابن الريس
كله واحد

بس المهم ان الجيل تتغير مفاهيمه عن الزواج الذى يزرعون ثقافة خاطئة عنه فى الحواديت منذ نعومة اظافر الصغار

البنت قاعدة قدام المراية عشان توقع عريس غنى
والولد بيدور على جمال وصورة جوفاء وبس

حبيت اغير تلك المفاهيم فى اذهان صغيراتى

اشكرك مرة اخرى على زيارتك
تحياتى

momken يقول...

القصه جميله طبعا يا ام ياسر
بس ليه لما سائلته بتعرف تعمل ملوخيه
ماسلهاش هى تقدر توفر له الحمايه ولا لاء
ولما سالته بيعرف يخيط الزورار ماسلش هى بتعرف توفر الامان ولا لاء؟
وهى لما سئلته بيعرف يمسح الشقه ماسالهاش بتعرف تتحمل المسئوليه ولا لاء

سندريلا الجديده ثقفتها محدوده مش بتشوف غير نفسها بس
مش بقول ان الطبيخ والمسح والخياطه حق مكتسب للراجل
بس فى حجات كتيره جدا هى متقدرش تقدمها
الجواز مش شركه تضامن يجب ان يقدم فيه كل شريك مثل الاخر تماما
لكنها شراكه يجب فيها ان يكمل كل طرف الاخر

تحياتى

غير معرف يقول...

هههههههههههههه
عسووووووووله قوى الحدوته دى
متهيالى انها حدوته للكبار قبل الصغار كمان
اكتر كلمه عجبتنى هى
انت عاوز تتجوزنى ليه
عشان حبيتك
حبه لسندريللا هو اللى خلاه يتعلم يعمل حاجات كتير ممكن المجتمع الرجولى يستنكر ان راجل يعملها
وحلو قوى ان سندريللا قدرت تحتفظ بشطارتها البيتي.. مع كل الحاجات التانيه
:)

أسوور يقول...

وينكى
واحشانى يا ست البنات
و وحشنى ذكائك المتقد كالمعتاد
انتى من القلائل اللى فهموا البوست كالعادة يعنى

حكاية البنت الذكية بدل البنت الجميلة الى فلقونا بيها
وكأن البنت لازم تبقى مجرد صورة
والولد مجرد بنك
تحياتى

أسوور يقول...

ممكن
تعليقك هو التعليق النموذجى للرجل الذى لا يعى دور المرأة ولا يقدرها والذى يعتقد انه الأقوى والأفضل وان دوره محدد بأنه البنك وهى دورها محدد بانها ام العيال
النغزى تغيير المفهوم بتاع البنت الجميلة والشاب الغنى
وكمان ان قدرات كل واحد بتختلف عن الآخر رغم ان البنات ممكن تتعلم كل حاجة بيعملها راجل بالإضافة لما يتحملونه من اعباء منزل وامومة
كمان والدليل ان كتير من الأمهات تعيش مع ابنائها بدون زوج وتعمل وتربيهم وتتحمل كل الأعباء المنزلية
بل انى اعرف الكثير من الأزواج يعملون فى نفس المكان وهم متزوجون
تعود الزوجة لتقوم باعمال المنزل بينما يعود الزوج ليتناول غذاؤه وينام قدام التليفزيون
اشكرك

غير معرف يقول...

اولا حمدالله على السلامة نورتى التدوين من تانى

وحشتينى جدا والله
وقصتك دى كلنا بنطالب بيها وياريت الكل يفهمها كويس

لازم الواحد قبل ما يدور على الجمال يدور على العقل والشخصية وطريقة التفكير لان ده اللى هيفضل والجمال هيروح
ولازم كمان الواحدة تعرف كل حاجة جوة البيت وبرة البيت وماتنساش دورها كزوجة وأم وست بيت بالأضافة الى شغلها وباقى الحاجات التانية

تعرفى كلامك ده منطبق عليها جدا حاليا لما جه خطيبى يخطبنى من فترة بسيطة وما أعتمدش على شكلى بس لا أعتمد انه يتكلم معايا ويتناقش ويعرف شخصيتى وفكرى وانا كمان كنت عايزة اعرف شخصيتة وفكرة قبل شكله وحاجات تانية كتير الناس بتدور عليها

والحمد لله ربنا وفقنا

تحياتى لكى ونورتى مرة تانية

أسوور يقول...

bos bos
انتى اللى نورتينى يا سكر
الحمد لله ان الحكاية لقت ناس بتفهم عشان تستوعبها
وكمان الف مبروك الخطوبة .. انتى تستاهلى كل خير
تحياتى

كراكيب عادل يقول...

حمدلله علي السلامة يا اسوور

حكاية مناسبة للعصر فعلاااااااا

ربنا يخليهم لك

momken يقول...
أزال المؤلف هذا التعليق.
momken يقول...

اعتقد انك مقرتيش تعليقى كويس

او على الاقل مفهمتوهوش

شكرا

Al-Firjany يقول...

يمكن أفضل تعليق بتاع العضو "ممكن"
وأحب أضيف

الحكاية تحكي عن شاب تافه، وفتاة أتفه
كل اللي الشاب بيعرف يعمله بلاي ستيشن وجيمز، لأ وهي كمان بتعرف اللي بيعرفه وكلها أمور خارج إطار الحياة الزوجية الأصعب (ألعاب ومبارزة و.. و..)
ماشي .. لو هنمشيها إنها بتعرف الي هو بيعرفه ونعدي على توافه الأمور يا أمورة .. مش شايفة إن حضرتك حولتي الحياة الزوجية إلى صراع (كعادة البوستات هنا؟) تعرف إيه من إللي بأعرفه؟ هي الحياة تكامل .. ولا نظام مين يعرف أكتر؟ صراع .. ولا هتضيف لي إيه؟

الألذ إن حضرتك مشيتي على أمور من صميم قدرات الرجل ولم تذكريها في القصة، وحتى لو على الطبيخ اللي الست بتعرف تعمله في حين الراجل ما "بيعرفش"، ومفيش داعي نتكلم على اكلاشيه أشهر طباخين في العالم، ولا أمهر طهاة العالم، ولكن ما بين سطور القصة الست عارفة كل حاجة بيعرفها الراجل، وهو لا حول له ولا قوة. مش عاوز اقول منظور قاصر، ولكنه رؤية أحادية بعيدة عن الواقع.
=-=
يا ترى بقى لو طلب الزوج من الزوجة دفع الضرر أو التفكير في مصير الأسرة من البنات والصبيان، هتعرف، ولا هتسلكها بمعرفتها على إعتبار إن فيه ستات ممشية أمورها من غير المتسلط اللي ربنا أخده من وشها، ولا الحيوان اللي والحمد لله طلقها أو خلعته؟؟
Talk sense please
==
الحياة أكبر من إننا نحصرها تقدر تعمل إيه، ولا إيه اللي هتضيفه لي ..وكأنها بين طلبة في جامعة، أخدت مني مذكرة طيب وهتديني إيه في المقابل؟؟ أو بضاعة.
هي لايقة كدة فعلا، بضاعة تذهب إلى الحفل، ولكن هنا البضاعة بشرية.

Mohamed Hesham Safa يقول...

جميلة جدا ...

ربنا يخليلك بناتك ويفرحك بيهم دايما ً

...............

والسـ ختام ــلام

غير معرف يقول...

Hello. This post is likeable, and your blog is very interesting, congratulations :-). I will add in my blogroll =). If possible gives a last there on my blog, it is about the TV Digital, I hope you enjoy. The address is http://tv-digital-brasil.blogspot.com. A hug.

أسوور يقول...

ممكن
الفيرجانى
أنا فهمت تعليقك كويس بس انت اللى مافهمتش القصة اصلا ولا الهدف منها
الحكاية دى انا بأحكيها فعلا لبناتى عشان يحسوا ان لهم قيمة بما سوف يقومون به فى المستقبل
وحتى أشجعهم على التقدم فى حياتهم حتى تصلا لسن الزواج وحتى يعلموا أن دورهم فى الزواج ليس بدور بسيط وأن ما يتقنون عمله من أعمال منزلية له قيمته
كما أننى أبين لهم أن الحياة تكامل حتى لو أتقن كل منهم دور الآخر فمن المهم تقسيم الأدوار
وأيضا أن الرجل ليس بالمركز أو المال والجاه بل أن أفضل زوج هو من اختارها واختارته عن حب وليس لأنها جميلة أو لأنه صاحب مال وجاه
حكاية سندريللا الأصلية تعلم الصغار أن المرأة مجرد صورة جميلة وأن الرجل مجرد مركز ومال وجاه وهو ما لا أحب أن أربى بناتى عليه

والقصة قد تبدو تافهة للبعض مثلما قال الفيرجانى لكنها تحمل بعض المعانى للصغار والتى قد تزرع فى داخلهم وتمنحهم تقدير لدورهم ودور الطرف الآخر أيضا وأهمية أن تكون الحياة مبنية على الحب
وأنا أؤكد فى كل مرة أحكىها للبنات على جملة نحن نتزوح بالحب ونخلف بالحب وبنربى ولادنا بالحب

فهل وصلت الفكرة؟؟
شكرا لك للإهتمام بابوست رغم نظرتكما التى تقول انه سطحى

تحياتى

أسوور يقول...

محمد هشام
أشكرك على تعليقك اللطيف
تحياتى لك

أسوور يقول...

الفيرجانى

اشكرك بداية على اهتمامك وترك تعليق على البوست

ولكن هل انت متزوج؟
اشك

انا شخصيا ألعب مع زوجى بالفعل الكوتشينة والبلاى ستيشن ونتبارى فى العديد من الأشياء اللطيفة والتى تمنحنا نوع من المشاركة مع بناتنا
كلنا بنلعب مع بعض ونتحمس ونضحك ونداعب معضنا البعض
انت فاكر ان الحياة تمشى من غير المشاركة فى الحاجات اللطيفة اللى زى اللعب والضحك والسفر من حين لآخر والمفاجآت والمنافسة؟؟
لا يا سيدى
لو لم نفعل لأصبنا حياتنا الزوجية بالملل
ولو لم أجيد انا الطبيخ لن يثنى هو على طعامى ولن اتحمس لتقديم المزيد
ولو لم نعلم صغارنا ان دور الأم لا يقل أهمية عن دور الأب لقل تقديرهم للمرأة التى هى أمى وأمك وزوجتك أيضا
وحقيقة ان لى زوج رائع يثنى على كل ما أقوم به من دور فى المنزل .. فى المطبخ .. أو مع الصغار
مما يعطى بناتنا شعور بأهمية كل من الب والأم معا
ويمنحهما الثقة بالنفس

انصحك بأن ترتب لحياة كاملة فيها الجد وفيها اللعب والضحك

والتبارى بين الزوجين والمنافسة تخلق جو من المرح وليس العكس يا سيدى
سوف تعرف معنى ما اقول بعد أن تتزوج

تمنياتى لك بحياة يملؤها المرح

تحياتى

micheal يقول...

و دي تبقي أحلي سندريلا في الدنيا
بنت بميه راجل و لو أني مبحبش المثل ده
:)
لان البنت لما تكون شخصيتها قويه فهده مش معناه أنها راجل
أهلا و مرحبا بعوده سندريلا المدونات و سيده التدوين الاولي
تحياتي

Al-Firjany يقول...

الموضوع مش إني شايف الحياة الزوجية خلو من التهريج أو كلها جد .. والحمد لله مش متزوج .. وغالبا لن لعلل في نفسي ومش عاوز أقول الآخرين

مش بأقول القصة تافهة، أنا قلت الشاب نفسه فيه شيء من التفاهة وهي كمان
الخيط اللي لقطته من الزميل ممكن إنه بيقول إن فيه أشياء أكبر يقدر الثنائي يعطوها لبعض أو يكملوا بيها بعض أهم من لعب
بالتاكيد اللعب ليه دور جيد في الجواز وغير الجواز .. ولكن المسؤولية في الجواز خصوصا في الوقت الحالي أهم بكتير من هتديني إيه وهأديك إيه في المقابل

أكيد بالحب نقدر نعمل حاجات كتير ونسهل حاجات كتير، بس حكي القصة أوحى لي بتبادلية في علاقة، ونفع واستنفع، عكس التكاملية اللي بأشوف الجواز من خلالها

الجانب التاني هو سندريلا الأولى أكيد كان فيه نوع من النمطية في حكي القصة، بس هكذا كانت المرأة في عهد سندريللا، وإن كان ظلم سندريلا انحصر في زوجة أب وبنتين، وانتشال من ساحرة ثم من أمير

دخول الجواز كان نوع من الخلاص وأفتكر كان فيه حب ورغبة قوية (دعوة إلى حفل آخر، وبحث مضني) وما أفتكرش إن الأمير هيحاول يتعلم الطبيخ وإلاالطباخين هيترفدوا .. والبيوت تتشرد :-)))
وده طبعا ما يرضيكيش :-)))
==
ربنا يوفق بنات حضرتك ويفهموا الحياة الزوجية من منظور الحب والتكامل
ويلاقوا ابن رئيس أو ابن ناس يبني معاهم حياتهم بالحب

ده لو لقوا حد لسة بيفكر في الجواز يومها
(مش قصدي تجريح أبدا ولا إهانة، بس أفتكر حضرتك فاهمة حالة العزوف الحالية)

تحياتي لحضرتك

أسوور يقول...

الفيرجانى
سعدت جدا بمتابعتك للبوست والتعليقات حتى وان كنت تختلف معى فى الرأى

ر احنا حولنا الحكاية كلها لحكاية عصيرة تنفع تمشى مع العصر دة

فخلينا الأمير ابن الرئيس وبدل الحفل العبيط اللى البنات تجرى عليه خلينا فى مباريات بينهم فى أى شىء ولو حتى الطبيخ اللى انت مستقل بيه كدة ومضايقك قوى

ولمعلوماتك .. أكثر الطباخين شهرة هم من الرجال لا لشىء سوى أن المرأة لا تريد أن تعمل نفس المهنة داخل وخارج المنزل ومع ذلك يعجبنى كلامك عن الموضوع دة لأنه يدل على ان الطبيخ مش حاجة حقيرة بتعملها الست فى البيت ولا ان كون ابن الرئيس يتعلمها عشان يكسب حب البنت يبقى تفاهة

الولد فى وجهة نظرك تافه .. هو فعلا تافه من الأول هو يعنى الأمير كان بيعمل ايه فى حكاية سندريللا الأصلية؟؟؟

على الأقل هنا البنت اتعلمت من صغرها ازاى انها ممكن تكون ماهرة فى حاجات كتير وان الحب بس مش أى حاجة تانية هو اللى ممكن يجمع اتنين مهما كانت قدراتهم

وانهم يلعبوا دة مش وحش
دة مناسب جدا للأطفال ومفاهيمهم

انت عايزنى اقول لبناتى انهم كانوا بيحضروا دكتوراه؟؟ لازم الموضوع يناسب سنهم وعصرهم

وكون انك تتجوز او ما تتجوزش دة يخصك طبعا لكن صدقنى لو قريت البوست بتاعى تحت عنوان
ليه الناس بتتجوز؟؟

هتعرف ان الزواج نظام اجتماعى لا بديل له ولم تستطع البشرية حتى فى أكثر دول العالم تحررا أو كفرا أن تجد له بديلا .. عبر الأزمان .. عبر الأجيال .. عبر الأديان .. عبر الثقافات المختلفة .. الخ

لا بديل عن الزواج كنظام اجتماعى يا سيدى

انت ما زلت صغيرا ولم تعتركك الحياة .. وفى يوم هأستنى دعوة منك تعزمنى على فرحك .. وهآجى على فكرة

ولو ماعزمتنيش .. ابقى افتكر كلامى دة .. والحياة هتثبتلك انى صح

فرق السن وفرق الخبرة جعلوك تندفع فى قرار خاص بالمستقبل بل وتقرر ان بناتى كمان مش هيتجوزوا
:)

ومش عارفة مين هم اللى عازفين عن الزواج دول
يمكن فى سنك اصحابك لسة ما اتجوزوش بس لكن فى عمر ما سوف تجد كل من حولك متزوجين ومعهم ابنائهم يلعبون حولهم ويمكن كمان تبقى بتزور اصحابك انت المدام عشان تلعبوا دورين كونكان او تطلعوا رحلة سوا كلكوا
وهتقعد تشكر فى أكلها وعمايل ايديها قدام كل الناس ومش هتحب غير اللى هى بتعمله ومش هتحس بالأمان غير لما رجلك تلمس رجلها باليل وتبقى مستنية حضنك الدافى عشان تندس فيه فى ليالى الشتا الباردة

وهتتختنقوا وهتتصالحوا وهتكرهوا بعض ساعات وبعدها على طول تحبوا بعض أكتر من الأول .. ولما تعيا تسهر جنبك ليالى ولما تتعب تجرى بيها على الدكتور
وتحب ولادكوا عشان هم حتة من حبيبتك وحتة منك

وتحكيلهم حكاية سندريللا القديمة وتتفاجىء بأسئلة ذكية من جيل مش مستوعب فكرة الأمير اللى بينقى عروسة بالطريقة دى وهيسألوك ليه سندريللا عايزة تروح الحفلة؟
وليه الأمير عايز يتجوزها مع انه رقص معاها بس؟
وهيسألوك هى مقاس جزمتها كان كام؟
وليه وافقت تتجوزه مع انها ما تعرفوش؟

وليه مرات باباها شريرة كدة وليه هى ساكتة ومستسلمة كدة؟

بناتى سنهم 5 سنين و4 سنين
وبيسألونى الأسئلة دى فعلا

وتغييرى فى الحكاية كان بمساعدتهم ومن بنات أفكارهم

والحكاية لوتافهة أو الولد اللى فيها تافه فاهو على قد سنهم يا سيدى

تمنياتى لك بالسعادة
اعتبرنى بأتنبأ

:)

nohamy يقول...

حفلة توقيع مجموعة بن أدم مع وقف التنفيذ
أن شاء الله
لمحمد التهامي
في مكتبة عمر ستور فى طلعت حرب فوق فلفلة

الساعة 6

أسوور يقول...

كراكيب عادل
انت نورتنى
وواحشنى التدوين وناسه

Al-Firjany يقول...

مش حكاية إني حاولت أختلف بس أصلي حاولت أختلف في مدونة تانية ليها نفس أو شبه بعض كلام وأفكار حضرتك، وفي الأخر شتمنا بعض بشكل لا يليق بيها قبل إنه لا يليق بي
وندمت على ده للأسف
فبالتالي حاولت إني أختلف بشكل محترم وقلت جايز لفهمي لما بين السطور يكون غلط
أنا مش عاوز أبقى زي اللي داير على مدونات بنات وعمال يقول لهم أنا مش هأتجوز .. أو السبب ، لأني كان مقصدي حاجة تانية وفي الآخر قلب لقباحة :-(((
هناك مش هنا .. بس ما يمنعش إن كلام حضرتك جميل جدا ... وسيفته عندي
أصلي بيني وبينك بأدور على أرضيات مشتركة من هنا وهناك، وما بأصدق ألاقي كلام حلو بأاسيفه على طول
==
المهم سندريلا زمان حاجة ودلوقت وبعدين حاجة تانية
وجايز بعدين الأمير هيشيت معاها أ,ن لاين ومين عارف يمكن الأمير نفسه يبقى زي حالاتي
ربنا يوفق بنات حضرتك ويستوعبوا أجمل ما في القصة :-)))
على فكرة وكلام في سرك، مش بس البنت اللي بتتعلم حاجات كتير ومن صغرها، الراجل كمان بيتعلم حاجات كتيرة خصوصا لو والدته مش موجودة، ويمكن دي حسيها هنا كمغترب .. يعني الظروف فعلا بتجبر الواحد إنه يتعلم أشياء كان فاكر إنها مش من مسؤولياته
دي من بعض أفكار ويليام جولدنج الكاتب الأمريكي المعروف.
كفاية كدة علشان وقت حضرتك

وبالتوفيق لمصر قدام الارجنتين :-))))

أسوور يقول...

الفيرجانى
سعدت بعودتك وأسفت لإختلافك حتى السباب مع احدى المدونات ايا كانت فأنا ضد أن نعبر عن آرائنا بالسب
وأرى ان هناك نقد بناء وهناك نقد هدام
ونقدك من النوع البناء لأنه يثير حوار وجدل دون اسفاف او ابتذال

وأشكرك مرة أخرى على انك سجلت كلامى عندك

وتحية لفريقنا .. يا رب نغلب
على فكرة انا حريصة ان اشارك زوجى كل الماتشات واتحمس جدا لكل شىء يحبه وهو كذلك

واظن لو قلتلك بنحب الكورة جدا ولها شعبية خاصة فى بيتنا لسعدت اكثر

تحياتى لك

عين فى الجنة يقول...

اهلا بعودتك للتدوين مرة اخرى
السؤال المفروض البنت تساله للى عايز يخطبها هو
تقدر تقف فى طابور العيش كام ساعة؟
تحياتى

shabfa2re يقول...

حلوة بجد

أسوور يقول...

راجى
اضحكتنى من القلب يا راجى
تحياتى

أسوور يقول...

شاب فقر
اشكرك بجد
تحياتى

Mohamed Kamal Hassan يقول...

حلوة أوى التدوينة دى
وحمدا لله ع السلامة
ـــــــــــــــــــ
بقولك
بعتلك إيميل
ياريت تشوفيه ضرورى

شكرًا

محمد حمدي يقول...

اقولك خلاصه الحدوته ؟

الست بتقلب الترابيزه على الراجل .. وبدل ما هو الى يروح ينقى ويختار ويشوف مين بتعرف تطبخ ومين لاء , اصبح لازم عليه هو الى يعرف يطبخ ويخيط عشان يفوز بقلب حبيبته

حلوة حدوته سندريلا العصر الحديث , الا ان مشكلتها الوحيده انها مينفعش تتطبق فى مجتمع لو الست سبقت جوزها فى المشى بيزعقلها (حقيقه بتحصل فى الارياف) دة غير ان اسم المرأه عوره زى جسمها


سيبك انتى .. بجد بجد البلوج سبوت نور من جديد

micheal يقول...

يلا بقي عاوزين المزيد من البوستات
تحياتي

Bongo يقول...

البلوج بتاعك عجبني جدااا

و ستايله مبهج و لذيذ

اول زيارة , ربنا يوفقك

تحياتي

safa7_karmooz يقول...

ليه بس كده

حاسك بتخلينى نتبهدل عشان نلاقى بوست جديد..

بس برضوا هدخل كل يوم لغاية لما الاقى قلمك رجع يكتب تانى..:)

إبـراهيم ... يقول...

قصة متميزة يا ياسمين، وعصرية جدًا
*************

بس الحقيقة أنا جااااااااي أعزمك على حفل توقيع كتابي ( المسحوق والأرض الصلبة) الجمعة الجاية 11 /4 ف عمر بوك ستور ف طلعت حـرب فوق فلفلة
.
.
حسيت من واجبي أن أفعل ، وأكيد تشرفيني

Hannoda يقول...

قصتك بتتكلم عن الزواج يا أسوور.. و الزواج في كل المجتمعات مصاب بأمراض كتير
مش بس بعدم تقدير الآخر
لا ده حاجات كتير قوي محتاجة بوست طويل
أما عن نظرة الرجل للست و اللي قصتك اتكلمت عنها فأنا شايفة صورة تحزن و تدعو للتشاؤم و مش عارفة عندي حق ولا ايه؟

أما عما تدعو له القصة من ان لازم أهتم بفكري و علمي و ثقافتي فده كان أجمل مافيها.. لإن هو ده اللي بيبني الاحترام مش لدى الرجل و بس
لدى المجتمع كله

تحياتي ليكي
وحمدالله ع السلامة

غير معرف يقول...

Hello! I am Wangbu. I am from the Philippines. There are so many blogs in this world. I found your blog one of the most wonderful. I am happy to visit it.

أميرة جمال مصرية الديانة والجنسية يقول...

عجبتني جدا جدا هحكيها لساره

لازم كلنا نتعلم كل حاجه سواء ولد

او بنت والملوخيه بالذات

ههههههههههههههههههه

ضحكت جدا جدا انا بأشكرك لانك مبدعه

جدا