الخميس، 18 سبتمبر 2008

المرأة .. الزوج .. الآخر

من بوست الصديق هارملس استوحيت هذا البوست
http://harmless2000.blogspot.com/

للنساء تركيبة عجيبة تدفعهن للإنتقام من الزوج ومن انفسهن احيانا بالاتجاه لرجل آخر .. أما لماذا ؟؟ فيمكن تلاقى اجابة فى النماذج اللى هحكى عنها لنساء خائنات ..

أعرف امرأة جميلة ذات قوام ممشوق .. كان كل هدفها أن تتزوج وتنجب وقابلت رجل ورمت شباكها وتزوجته
وانجبت طفلة.. ثم ملته .. وتبينت أنها لم تنتق الرجل المناسب بها .. فسقطت فى يد اول رجل حاك شباكه حولها.. ثم اصيب زوجها بمرض عضال .. فتفرغت له ولخدمته .. واصبح الوحيد فى حياتها .. حتى توفاه الله

امرأة اخرى تزوجت وهى صغيرة فى السن وبعد ان حظت بطفلها الأول بدأت تستسلم للآخر ..ثم لرجل ثان عشان المركب تمشى.. و الحقيقة ان زوجها لم يكن صالحا لا للإنفاق ولا للفراش .. فالجنس عنده فقط وسيلة للإنجاب .. والبنت غنية و وارثة .. ليه يبذل مجهود فى حاجة هى بتوفرها له وللأبناء .. ولما قاربت اموالها على النفاذ بعد 15 سنة زواج .. طلبت الطلاق .. وحصلت عليه .. وقطعت علاقتها بكل الرجال

واحدة جوزها اتجوز عليها.. وكان كل مرة يروح لمراته التانية تدور على آخر تقضى معاه اليلة .. تقنع نفسعا ان الحياة كدة هتمشى .. ولازم الظلم يبقى معادلته مظبوطة من الطرفين

أخرى على قدر ضئيل من الجمال .. زوجها اهلها لأول طارق .. أقصد طامع .. البنت اهلها أغنياء .. وفروا الشقة والعربية للزوج الوسيم .. وسيم آه .. لكن لا من نفس المستوى الإجتماعى ولا المادى .. طمعان وبيقولها بكل صراحة .. لولا فلوسك ماكنتش اتجوزتك .. عندها طفل منه .. وتخونه مع الآخر .. وتتحمل ضربه وسبه المستمر لها .. وتجد عند الآخر ما لم تجده عند زوج اعطته كل شىء ولسة بيعايرها بقبحها

امرأة أخرى احبت رجل متزوج ولم تستطع ان تتزوجه .. فتزوجت من رجل بدا مناسبا .. وبعد الزواج اعتمد على راتبها الكبير وسيارتها والراتب الشهرى الذى كان يمنحه لهم ابوها .. فعادت تقابل الآخر .. المتزوج .. حتى طلبت الطلاق وتزوجت من الآخر .. عادى .. المجتمع وافق لما اطلقت انها تكون زوجة تانية ..

واحدة كمان مات عنها زوجها ولها طفل منه .. احبها رجل وتزوجته .. كان يعامل ابنها معاملة سيئة .. .. شعرت انه يعاملها خى كذلك .. فالإبن حتة منها .. فظهر الآخر .. ولما تناقشها تقولك يستاهل

واحدة كانت بتحب واحد ورفض يتقدملها واتجوز واحدة تانية .. اتجوزت اول راجل اتقدملها .. وبعد سنوات لم يحقق لها زوجها طموحاتها فى الحياة .. ولم يوفر لها ولا مسكن ولا مصاريف .. بل وفرها لها أهلها .. وعادت تتصل بحبها الأول .. وظلت فى تلك العلاقة لأكثر من 20 سنة .. عندها بنات فى الجامعة .. ولسة برضه مع الآخر .. زوجها سمع وقالولوا .. وطنش .. الشقة بتاعتها والعربية كمان .. ولما تناقشها تقول .. وهو ايه اللى مقعده معايا وهو عارف .. طب اقولها ايه دى؟؟

اخرى زوجها يخونها مع طوب الأرض .. وهى بتعرف .. ماسيدجات ومقابلات وبيات فى اسكندرية وشرم الشيخ مع عشيقات مختلفات .. ظلت على حافة الإنهيار .. تتخانق وتطلب الطلاق رغم انها لديها منه طفلان .. وفجأة بطلت .. وطنشت .. ظهر الآخر واستسلمت له .. وقالت .. الحياة كدة احسن .. بطلت اتخانق واطلب الطلاق .. احنا دلوقت فى الهوا سوا .. اول ما يقولى هأتأخر برة اجرى على الشارع او امسك التليفون واسلى نفسى بالآخر .. متعادلين

كلهن شايفين ان الزوج يستاهل .. وان احساسها انها بتؤذيه بيريحها ويخليها تكمل حياتها عادى .. والغريب انهم لما بيطلقوا غالبا ما بيرجعوا للإستقامة فى حياتهن .. مفيش مبرر للخيانة .. لكن هى دى الحقيقة الصادمة .. المجردة من أى تلوين

العجيب ان قليل جدا من الأزواج ممكن يصدق ان مراته ممكن تخونه .. ناقشت رجال كثيرين فى الموضوع دة .. ورغم ان كل راجل ناقشته فى الموضوع دة كنت عارفة انه بيخون مراته وبحاول اقنعه ان دة ممكن يحصل برضه معاها .. الغريبة كلهم مصرين ان .. إلا مراتى
وعجبى



هناك 17 تعليقًا:

محمد حمدي يقول...

تدوينه رائعه كعادتك وقصص كتيره ومتنوعه والاهم انها واقعيه

يمكن الاقرب لقلبى قصه


اخرى زوجها يخونها مع طوب الأرض .. وهى بتعرف .. ماسيدجات ومقابلات وبيات فى اسكندرية وشرم الشيخ مع عشيقات مختلفات .. ظلت على حافة الإنهيار .. تتخانق وتطلب الطلاق رغم انها لديها منه طفلان .. وفجأة بطلت .. وطنشت .. ظهر الآخر واستسلمت له .. وقالت .. الحياة كدة احسن .. بطلت اتخانق واطلب الطلاق .. احنا دلوقت فى الهوا سوا .. اول ما يقولى هأتأخر برة اجرى على الشارع او امسك التليفون واسلى نفسى بالآخر .. متعادلين


بحس ان الست فيها مش غلطانه .. الغلطان هو المجتمع بازدواجيه حكمه على خيانه الرجل والمراه

تحياتى ليكى .. ولو اتاخرتى تانى فى الكتابه بجد هزعل منك

Doba يقول...

عجبانى دماغك
عجبانى طريقتك
وشدتنى بوستاتك
فهروح اكملهم
ولنا لقاء آخر
مع بوست جديد
بس يكون بحماس

لأنك تملكين نهج فى التفكير
فى إنتظارك

تحياتى على إثارة موضوع من أهم المواضيع خطورة خاصة بالمرأة

هبة

أسوور يقول...

محمد حمدى

المشكلة ان المجتمع فيما يخص الرجل والمرأة عامل زى النعامة .. حاطط دماغه فى الرمل

لكن صدقنى هى دى الحقيقة

تخيل ان فى حكايات كتير مشابهة لم أذكرها

كفاية انى اقولك ان من بين كل 10 ستات .. بتخون ازواجها حوالى 7 على الأقل

تحياتى

أسوور يقول...

دودا

تعليقك بقى هو اللى كله حماس

واشكرك على تشجيعك

misha و lado يقول...

90 % من الرجال في مصر خنازير
والخنزير كائن شهواني جدا / غبي جداااا

أسوور يقول...

ميشا ولادو
عندك حق
نورتينى

micheal يقول...

للأسف كله بقي بيهتم بإرضاء شهوته ونزواته فقط ولا إعتبار لكرامة الزوجة...فبالتالي هي كمان بتفكر في رد الإساءة بمثلها والنتيجة تفكك أسري يدفع ثمنه الأبناء
تحياتي

micheal يقول...

نسيت أقول الف حمد الله ع السلامة بالعودة
:)
تحياتي

أنا حر يقول...

موضوع مهم قوي فعلا بتتكلمي فيه بس بقى طبيعي الفترة الاخيرة لاسباب كتير
اهمها احنا مش عارفين يعني ايه علاقة بين الجنسين وليه بنتجوز ويعني ايه نكون اسرة
في فيلم زمان اتقال فيه جملة شدتني قوي بتقول

اي امرأة تنتظر ان تسمع كلمة "أحبك" وأي رجل ينتظر أن يسمع أنه جيد في علاقاته النسائية
وعجبي
تحياتي

أسوور يقول...

مايكل
هو دة اللى حبيت اوضحه فعلا
تحياتى لك

أسوور يقول...

أنا حر
أى امرأة تريد ان تسمع كلمة احبك وبرضه انها كويسة فى الفراش
زى الراجل بالظبط
ودة اللى بيخلى الست بتنهار لما تعرف ان جوزها بيبص برة ولو حتى لساقطات
لأن دة بيعنى انها مش كويسة كست ومش مكفياه كإمرأة زيها زى اى راجل
تحياتى ونورتنى

غير معرف يقول...

كل سنة و انت طيبة آسوور حبيبتى
وحشانى كتير .. الحمد لله انك بخير
موضوعك ده مهم جدااا وواقعى و ينفع يتعمل منه فيلم سينيما ناجح
تحياتى يا قمر ربنا يخليكى لنا
ناديه طه
حوريه

غير معرف يقول...

كل سنة و انت طيبة آسوور حبيبتى
وحشانى كتير .. الحمد لله انك بخير
موضوعك ده مهم جدااا وواقعى و ينفع يتعمل منه فيلم سينيما ناجح
تحياتى يا قمر ربنا يخليكى لنا
ناديه طه
حوريه

LOJAIN يقول...

"العجيب ان قليل جدا من الأزواج ممكن يصدق ان مراته ممكن تخونه .. ناقشت رجال كثيرين فى الموضوع دة .. ورغم ان كل راجل ناقشته فى الموضوع دة كنت عارفة انه بيخون مراته وبحاول اقنعه ان دة ممكن يحصل برضه معاها .. الغريبة كلهم مصرين ان .. إلا مراتى
"

ازيك يا ياسمين ولو انى زعلانة منك جدا بس نخلينا فى موضوع البوست
الجزء اللى اقتبسته واللى بعتبره هو لب الموضوع هو ده السبب فى تعليقى
عارفة ليه يا ياسمين بيقولك الا مراتى

لانه عارف انه شخص يتستحق الخيانة
فيرمى الكورة فى ملعب غيره
مش بس عشان هو خاين
عشان هو ناقص و بيبرر لنفسه انه يرضى كل الاذواق
و حكاياتك انا عندى منها كتيييير

ولو تطرقنا لاصحاب ازمة منتصف العمر مش هابطل كلام من هنا لشهرين جايين

رمى الكورة فى ملعب الغير فى رايى نوع من انواع الفلكلور المصرى فى تبرير ازدراء الاخرين من الشخص محل النقد

"قرعة بتتعايق بشعر بنت اختها "

نظام لما تقول احنا ناس متاخرين يقولك ازاااى دا الفراعنة بنو الاهرامات و انشئوا حضارة و غزوا العالم و مش بعيد طلعوا القمر بسفينة الشمس
قمر عنخ امون
سيادتك فراعنة , لا , بتتكلم ليه؟؟

كل زوج بيخون مراته مش ممكن تخونه
يااكيد خانته قبل , يا بتخونه فى نفس الوقت , ياهى كويسه وهو هينتهى عمره وهو اعمى باذن الله

لنا الله
Regards:
Lojain :)

prince4ever يقول...

من اكثر المدونات احتراما اللي دخلتها
اخيرا لقيت مدونه في فكر رائع بجد و مدونه محترمه لها سلك غير كل اللي موجود
تحياتي ليكي وللفكر الرائع
رامي

Hannoda يقول...

كلامك رسملي صورة مؤلمة
وبقالي كتير بقرا في المدونات موضوعات زي ده

كلها مع بعض متفقة فحاجة واحدة أو اتنين
ان فيه هوة كبيرة جدا بين الرجل و المرأه في مجتمعنا
واننا ولا مثقفين ولا متحضرين ولا قادرين نحترم بعض

ولولا ان فيه حاجة اسمها شهوة بتجبرنا على البحث عن شريك
كان زمان البلد عبارة عن رجال و نساء عذاب لا علاقة بأحد منهم بالاخر

طهقان يقول...

بعد اللي الواحد شافه على البلوتوث وفضائح الموابيلات


يا لهوي يا لهوي

فعلا بدأ يصدق أي حاجة

والحمد الله الواحد مابيلعبش بديله بتاتا

لانه
كما تدين تدان

وكما قيل

عفوا تعف نسائكم في المحرمُ ،
فمن زنى بدرهمٍ
يُزنى ببيته بغير الدارهمُ

فالحمد لله
الواحد قطع ديله نهائيا
:)