الخميس، 2 أبريل، 2009

انا بخون مراتى .. طب أعمل ايه فى حياتى؟؟؟




رغم ان الخيانة هى فعل يدمر الحياة بين اى اتنين .. متجوزين او مخطوبين او حتى بيحبوا بعض وبينهم وعود
الا ان كتير من الرجال ما زالوا يخونون .. والحقيقة اننى رايت بيوتا تنهار بسبب الخيانة
تنهار العلاقة .. حتى وان لم يحدث الطلاق .. لذلك قررت ان اكتب هذا البوست
********
بتخون مراتك .. صح؟؟ .. طيب يبقى لازم تاخد احتياطاتك .. ازااااااااااى؟؟؟
اقولك
الكمبيوتر الشخصى بيتقلب .. والباصوورد فى برامج بتكشفها
بلاش حداقة وتعمل نفسك خبير كمبيوتر لأن الخبرا كتير
وتخلى بالك كويس من الموبايل لأنه أول حاجة بتتفتش
تمسح كل الماسيدجات والميسدات والتليفونات الواردة والصادرة من الحبوبة بتاعتك
وبلاش تستخدم موبايل نوكيا لأنه بيسجل على اللوج كل حاجة
ولو مسحت اللوج .. مراتك هتشوفه ممسوح .. وهتتأكد انك بتخونها على طول

ولو عملتله لوك على الكمبيوتر او الموبايل هتبقى موضع شك بقية عمرك

الأفضل انك تستخدم سامسونج وتريح نفسك ..او ممكن تشترى تليفون تانى خالص وتسيبه فى مكان آمن
الشغل مثلا .. وبلاش العربية لأن العربية بتتفتش برضه
*******
أما بالنسبة للعربية بقى
تخلى بالك من شعر الحبوبة اللى ممكن يكون على الكرسى
وتفتش كويس فى الطفاية عشان الروج والسجاير او أى حتى ورقة لبان
اللبان دة معناه انك عايز تعطر بقك النونو عشان البوسة تبقى معطرة
ويا لهوى بقى لو حاطط فى العربية برفان ولا مضمضة بالنعناع
تبقى رحت فى خبر كان لأن دة معناه انك مهتم تبقى ريحتك مفحفة طول اليوم
تبقى يا اما بتخون . . أو بترسم على خيانة
وخلى بالك من الحاجات اللى بتقع من الحبوبة ساعات .. بقصد .. او من غير قصد ..ماتسيبش مصيرك تحدده الحبوبة
قلم روج .. قلم كحل .. فردة حلق .. عقد اتفرط من فرط المحبة ونسيت منه حبة
منديل عليه ماكياج سواء فى العربية او فى جيبك
******
نيجى بقى لجيبك
اياك تنسى فى جيبك فاتورة شراء هدية للحبوبة .. او ريسيت من مطعم اتغديتوا فيه
أو حتى وصل من اجزخانة مكتوب فيه .. فياجرا او ساعات كاندوم
وتبقى مصيبة لو لقت مراتك فى جيبك الكاندوم أو الفياجرا..لأنها هتفهم على طول انك على علاقة جنسية بواحدة تانية
********
نيجى للعلاقة الجنسية
اياك .. اياك .. اياك ترجع البيت حاسس بالذنب
تقوم تحب توجب مع المدام عشان تسمع لنفسك العبارة الشهيرة اللى بيقلها كل خائن
أنا مراتى واخدة حقها فى السرير وزيادة .. زى ما ربنا قال تمام .. انفاق وفراش
لا ايها الزوج الخائن .. أنصحك نصيحة نصوحة بلااااااااااااااااش
اى زوجة بتعرف ببساطة شديدة ان جوزها مش بكامل طاقته .. وطبعا دة معناه انه بدد طاقته فى حتة تانية
اوعى تقولى .. انا جامد .. انا جدع .. انا راجل قوى .. سيبك من الكلام الفارغ دة .. مكانش حد غلب
مراتك هتلاحظ فورا التغيير .. هتقول دة خسع .. او مبقاش عنده رغبة فية
دة لو انت ما اتقفشتش اصلا .. ودى حاجة نادرة جدا
********
طيب اتقفشت .. تعمل ايه؟؟؟
الغالبية بينكروا ويتشالوا ويتحطوا ويتهموا الزوجة بالوسوسة والشك والبارانويا
بلالالالالالالالالالالالالالالاش
هتحاول على طول تثبتلك انها على حق وانك خاين .. كذاب .. مخادع
واى ست فى الدنيا سهل قوى تثبت ان جوزها خاين
نصيحتى لك.. اعترف على طول .. اعترف وانت راكع على ركبتك وبتبوس ايديها
قلها انها غلطة ومش هتتكرر .. واطلب السماح ويا ريت شوية دموع
الست ضعيفة قدام الراجل الضعيف .. وجبروتك هيوصلها للحبوبة وعنوانها ونمرة تليفونها كمان
***********
الحبوبة بقى .. تعمل فيها ايه؟؟؟
تقطع علاقتك بيها فورا وتستنى فترة لحد ما مراتك تطمن وابقى شوف غيرها
وبلاش تقولها ان مراتك قفشتك .. عشان ما تحاولش ابتزازك
قل ادبك عليها وافتعل خناقة وارمى كارت الموبايل السرى فى النيل
وطبعا مش هأوصيك انك اوعى تكون معرف الحبوبة تليفون
أوعنوان بيتك ولا شغلك
ان كيدهن عظيم
*************
بالنسبة لكيدهن
خلى بالك ان مراتك هتعمل نفسها سامحتك بعد ما تقطمك شهر او سنة
اسمع كل كلمة تقولها وانت لابس وش عم الندمان .. وكل كلمة تقولها ترد تقول
عندك حق .. انا ما استاهلكيش .. انا ندل .. انا وغد .. انا عيل .. انا بحبك .. وكتر من حكاية بحبك دى
والأهم من دة كله انك تأكد فى كلامك طول الوقت على انك غلطت غلطة كبييييييييييرة
فى حقها وحق نفسك وانها مش هتتكرر ابدا
وانك بتدعى ربنا انه يسامحك على النزوة اللى كان وراها شيطان معندهوش ضمير
**********
بالنسبة لموضوع النزوة
مراتك مش هتصدقك .. ومش هتهمد .. هتفضل تفتش وراك برضه .. وتشك فيك
موبايلك اوعى تقفله .. تقولها انت رايح فين وجاى منين
مش من نفسك كدة .. هتفهم انك مبالغ حبتين .. لما هى تسأل تجاوب .. من غير اى عصبية او نرفزة
النرفزة معناها انك مزنوق ومش عارف تتصرف وتلاقى رد مناسب

اوعى تقول لنفسك .. انا زهقت.. او تحسسها انك مخنوق منها
بالعكس كل ما تحاول تفلفص هتتمسك اكتر وهتطول فترة الشك
.. اللى مابيعملش حاجة غلط مش بيتنرفز
طمنها على قد ما تقدر .. خليها تحس انك كتاب مفتوح وان مفيش اى سر جواك
وتقبل بقى شكوكها وانت لسان حالك بيقول .. عندك حق .. انا اللى جبت دة كله لنفسى
*******
نيجى لنفسك .. نفسك الأمارة بالسوء
انت عايز تخلص بقى .. تقوم قايلها بحزم ورجولة .. انا راجل .. انا حر
انا اعمل اللى يعجبنى وهو كدة واذا كان عاجبك
ايااااااااااااااااااااااااااااااااااااااااااااااااااااك
لأنها هيبقى قدامها اختيارين .. تعمل خلع وتسيبك ..او تعيش معاك وهى مجبرة ايا كان السبب
وعيشة الست المجبرة بقى مقولكش عليها .. نكد فى نكد
هتفضل متنكدة .. وتصب عليك من النكد اللى هيبقى فايض عندها
وخلى بالك هيبقى كتير .. قصدى الفائض فى ميزانية النكد هيبقى كتير
وفى النهاية يا هتموتوا بعض يا هطلقوا
فى اختيار تالت هقولهولك .. بس هات ودنك
هتخونك وهتستمتع بانها بتستغفلك ومابتتقفش.. وانك الغبى اللى اتقفش
*********
ايها الزوج الخائن .. لا تنسى الوصايا الهامة دى
تخلى بالك .. تعترف لو اتقفشت .. تطلب السماح .. تقطع العلاقة فورا
ماتقولش هو كدة واذا كان عاجبك .. لأن دى اخطر حاجة على حياتك الزوجية
ولو حاسس انك ماتعرفش تنفذ اى نصيحة واحدة من النصايح اللى فاتت

يبقى احسن لك تكون زوج مخلص



هناك 80 تعليقًا:

Mohamed Hamdy يقول...

أسر انتى بجد تفوقتى على نفسك فى البوست ده

وبما انى مش متجوز ولا مرتبط فا كنت بحسب ان الخيانه الزوجيه دى حاجه سهله (سهله فى ارتكابها مش فى عقابها عند ربنا طبعا) لكن واضح ان الزوجه بالاضافه لمهامها الزوجيه بتقوم بدور ظابط مخابرات روسى يقظ بيدور ورا الزوج كأى ظابط مخابرات عارف مهام عمله كويس

تحياتى ليكى ... وياريت اى راجل بيخون يتعلم ويبطل خيانه

أسوور يقول...

محمد حمدى
دى حقيقة على فكرة .. الست بتكشف الراجل بسهولة وبانكاره بيزود رغبتها فى اثبات الخيانة
ولما تثبتها يقولها .. هو كدة واذا كان عاجبك
طب مش عاجبنى وهأطلق .. او مش عاجبنى وهأعيش اطين عيشتك
ماينفعش كدة بقى

بصراحة انا كتبت البوست دة للرجالة اللى فاكرين نفسهم حدقين قوى
والسبب الأهم انت قلته فى تعليقك

الخيانة صعبة .. وهتصعب حياتك

راجى يقول...

يا نهار اسود ، الدنيا اتغيرت يا جدعان

allfollowsome يقول...

هههههههههههههههههههه

الاعتراف بالحق فضيلة

ولكن مالعمل ان كانت الزوجة هى اللى بدأت الخيانة

!!!!!!!!!!!!!!!!!1

soly88 يقول...

اكتر الرجاله الخيانه فى طبعهم ولكن بدرجات متفاوته
ولكن تلك النصائح الذهبيه اعتقد انها موجهه للستات (كيف تعرفين ان زوجك بيخونك) واضيف الى نصائحك ان الزوج الخائن دائما ما يقع برجله من كتر ما بيكدب بأستمرار على مراته
ام المزه وانتقامها لو قرر الرجل هجرها فهو انتقام قد يصل الى الساطور او الأبتزاز المالى
استرها يارب

Desert cat يقول...

ههههههههه بوست جميل اوى يا آسر
انا الحمد لله مطمنة خالص لان شغله واخد كل وقته .. بس وحياتك بالرغم من انى عارفه كدا كويس الا انى بافاجعه من وقت للتانى بكبسات متتالية .. يعنى يبقى الراجل قاعد فى شغله فى امان الله تلاقينى بكلمه ايوا يا حبيبى انا فى الطريق .. الموبايل طبعا بتيقلب بس بطريقة لذيذه شوية ما تورينى ايه النغمات الجديدة اللى عندك .. او اسمع موبايله يرن ما تجيب الموبايل لما ابعت النغمة دى لنفسى بلوتوث .. علشان نغماتنا تبقى زى بعضها .. طبعا هو بيكون عارف الغرض بس بيطنش اصل ساعات نفس النغمة اللى انا عايزة ابعتها دى بيكون انا اللى بعتاها له قبل كدا بس علشان سوء النية بنسى هههههههه
العربية على طول انضف من الصينى بعد غسيله اصل عنده اللى بيغسلها له كل يوم .. نفسى فى يوم اقفش فيها ورقة ابدا مش بلاقى ..
هو انا مش بشك فيه والحمد لله لانى تقريبا عندى تقرير بكل حاجه بس لازم كل راجل يفهم ان زوجته او خطيبته صاحية يعنى وفاهمه اللى بيدور حواليها

بلوجاتي يقول...

بجد بجد بوست جامد جدا يا آسر

يفطس من الضحك هههههههههههههههه

دحنا بنتقلب يا جدعان !!!!!
هو انا نايم جنب مراتي و جنب ضابط أمن دولة !!!!
ههههههه

انا انصحك تسمي نفسك آسور كرومبو و تفتحي مكتب مباحث خاص زي امريكا و اكيد فيه ستات كتير شاكة في اجوازها هتستعين بيكي
هههههههه

بس انا عندي ملاحظات :
وجود الفياجرا في العربية - احيانا الرجالة بيستخدموها تخليص مصالح - زي علبة السجاير زمان - فبلاش تظلمي الرجالة في دي

و بخصوص الأعتراف - انا معترض تماما اوعى يا راجل تعترف ابدا و اوعى اوعى لما مراتك تقولك الصراحة و انا اسامحك دة فخ نسائي شهييييييييييييييييير
و طبعا مفيش مسامحة
انت تنكر بشدة و بعدين تحسن معاملتك معاها و هي هتحاول تصدق لأنها من جواها عاوزة متصدقش عشان تقدر تعيش معاك
- ودة طبعا لا قدر الله لو وقعت في خطأ كبير أو صغير -

و متصدقوش آسر في نقطة الاعتراف دي - هي بس عشان من برج الجدي - فممكن تسامح جوزها لكن فيه ابراج تانية مش ممكن ابدا تسامحه حتى و لو ركعلها او حتى بسبب العيال او اي سبب

تحياتي

محمد عتلم يقول...

الله الله الله
ينفع كده يا آسوور ؟؟
بتفتحى عنين الرجاله وتوعيهم كده ليه ؟؟
فيه منهم قطط مغمضه والله
انتى شكلك مش ناويه تجيبيها لبر
ولا انتى بتهدى النفوس ولا ايه ؟؟

مواطن مصري يقول...

الواحد يراجع نفسة قبل ما يتجوز او يرتبط بحد مالها عيشة الحرية

سهر الليالى يقول...

هههههه انت تقصدى تعملى انقلاب فى الحياه الاجتماعيه كده الستات هتعمل كل اللى قولتيله واكيد هيلاقوا بلاوى ورجالتهم كلهم هيتقفشوا ان شاء الله
وعلى فكره مهما نصحتيهم مش هيجيب نتيجه عارفه ليه اولا مش هيبطلوا يخونوا ثانياغرورهم و اعتقادهم ان الست غبيه وهو طبعا اذكى منها وما بتاخدش بالها هيوقعهم فى الغلط هههه
بس بصراحه البوست جامد جدااا :)

أسوور يقول...

راجى

اتغيرت ازاى يعنى؟؟؟

نورت المدونة يا راجى

أسوور يقول...

allfollowsome

اذا الزوجة هى اللى بدأت الخيانة .. وعادة بتكون دى حاجة نادرة .. هيبقى صعب على الراجل انه يعرف

لكن العرض المميز جدا لخيانة الزوجة هى نفورها الشديد من الزوج جنسيا

دة اول واهم عرض من اعراض خيانة الزوجات

تحياتى .. نورت المدونة

أسوور يقول...

soly88

اعجبنى تعليقك جدا .. ايوة البوست دة مكتوب للستات تحت عنوان مستعار
:)
وبالنسبة للرجال بقولهم انهم مهما كان بيحاول يخبى .. ففي الف طريقة عند الست تعرف بيها انه بيخونها حتى فى اكثر الاشياء خصوصية .. الست بيبقى عندها رادار بتعرف على طول منه ان جوزها مش فى الفورمة
ولو مش هيقدر يعمل بالنصايح دى يبقى احسنله يبقى مخلص
وهو دة لب القصيد .. الخيانة اصعب كتير من الإخلاص الخساير كتير من الجهتين سواء من الزوجة او من العشيقة او حتى خسارته لنفسه

تحياتى

أسوور يقول...

Desert cat

ايوة كدة .. تعجبينى .. لازم من أولها كدة عشان مايحصلش فى الأمور أمور

ولازم يبقى عارف من اولها موقفك من الخيانة بشكل مباشر

صدقينى عمرك ما هتعرفى تقرى المستقبل لذلك يجب وضع قواعد صارمة .. منها .. انك بترفضى الخيانة تماما

نورتى يا سكر

77Math. يقول...

...........................

آخر كلمة عجبتني، مش عشان تجنبا للي قبلها

لأ

كدا وخلاص.. عشان الإخلاص شيء جميل وراقي

أسوور يقول...

بلوجاتي

على فكرة الراجل بيتكشف سواء اعترف ولا ما اعترفش
وبحذر كل الرجالة وبقولهم ان الأسهل انه يعترف .. لأن اعترافه هيوقف التحريات فورا

ولو لم يعترف هتستمر التحريات واللى هيتعرف هيبقى اكتر بكتير من المستخبى بعد الإعتراف

الإعتراف هيتيح لك انك تظهر الندم .. وانك تحكى قصة مختلفة تحفظ ماء وجهك .. يعنى لو عارف واحدة بقالك سنة ممكن تقول لمراتك انك اتعرفت عليها من اسبوعين

لو ما اعترفتش هتتحرى وهتعرف هتعرف كل التفاصيل اللى انت احسنلك تخبيها

تحياتى

أسوور يقول...

محمد عتلم

نورتنى يا فندم

انا باحاول اعرف الراجل انه هيتكشف فى كل الأحوال فبلاش احسنلك

تحياتى

pure يقول...

بتهرجى يا ياسمين
وحياة ربنااااااااااا انتى فظيعة ايه ده
جامدة اخر حاجة اصلا


داللى هيتجوزنى هتبقى عيشته طين
بس انتى متفائلة قوى قوىىى

هو لسة فى راجل اصلا وهو بيخون بيحس انه بيخون
ده بيحس انه عادى يعنى
زى ما بيروح الشغل و يسهر مع اصحابه و يبوس ولاده قبل ما يناموا و عادى عادى يعنى

هو لسة فى راجل عنده حساسة اصلا
هو حصل تطور يعنى كانوا بيتكسفوا
و بعدين بقى بيطلب السماح و يحاول ميتقفش
و دلوقت اخر اصدار بقى اللى هو انه يقول عاجب اللى خلفوكى عاجبك مش عجبك انا راجل ديموقراطى
و ديموقراطيتى تخلينى اقولك يامراتى يا حبيبتى انتى حرة قدامك حيطة اتنين تلاتة اربعة اخبطى راسك فى اللى تعجبك فيهم
ده لو عامل على العشرة يعنى
انما لو راجل طبيعى
هيقول يروج كلب و ييجى 1000

لنا الله

Regards:
lojain :)

Ahmed Shokeir يقول...

الكلام ده كله صح مية في المية

أسوور يقول...

مواطن مصرى

ايون .. راجع نفسك .. يا اما تبقى تمشى على الكتالوج قصدى البوست

يا اما تبقى مخلص

يا اما ما تتجوزش وترحم واحدة من احساس الخيانة

نورت البلوج .. تحياتى

أسوور يقول...

سهر الليالى

انتى قلتى عبارة مهمة قوى .. وهو انهم بيعتبروا الست غبية

ودة سر ضعفهم وغبائهم الحقيقى واللى الستات بتستغله جدا

الراجل من غروره بيفكر انه عبقرينو وكدة يبقى بينصب اول فخ لنفسه

تحياتى لحبيبة قلبى مونى

أسوور يقول...

77Math

العبارة الأخيرة عجبتك لأنها جميلة زى اى حلم بنحلمه

للأسف

نورتينى يا قمر

أسوور يقول...

بيور لجين

ازيك يا ست البنات
والله يا بنتى صدقتى كل الصدق
هو فى حد بيحس ولا بيتكسف من النوع دة

طب يا ريت .. مكانش ست غلبت

نورتى المدونة يا سكر

أسوور يقول...

أحمد شقير

دى شهادة نعتز بيها يا فندم


انت عموما منور البلوجر من زمان يعنى

لكن برضه نورتنى

GHARAM يقول...

يخرب عقلك يا اسوور هلكتيني من الضحك فعلا موش قادره حتى اكتب التعليق


=============
نتكلم جد شويه


كده يا آسر تعرفيهم سر شويبس اهم حايخدوا أحتياطاتهم ومانعرفش نقفشهم
موش ممكن عرفتيهم كل السكك دلوقتي يغيروا كل الخطط بتاعتهم ، ويجددوا ويطوروا في الاعيبهم


بس نسيتي حاجه مهمه جدا


انت أتكلمتي عن خيانة الزوج خارج عش الزوجيه ، طيب ما تتحفينا بأى أزاي بنقفشهم إذا جابوا الهانم في البيت وعمل عمايله السوده في أوضة النوم ومراته غايبه ، أو مسافره، أو متنيله على عينها مش مديه خوانه


أقول لك من واقع تجربتي الخاصه


دايما الست بتسيب حاجه ذكرى علشان تفقع بيها مرارة الزوجه


تسيب قلم روج رخيص ابن ستين كلب


أو علبه فيها شوية روج جو محجرين


تلاقي الحاجات دي مرميه بطريقه مايعرفهاش البيه البرم


وياسلام بقى لو تحط لك الكلينكس المستخدم في كيس مخدتك






أو تسيب الكلوت بتاعها في الكومود بتاع حضرتك

أو


مثلا تسرح بالمشط أو فرشة الشعر بتاعتك والبيه موش واخد باله

فتلاقي ياحبيبتي شعر أصفر ، وانت شعرك مثلا أسود بلون الليل


،تسأليه الشعر الأصفر ده منين، وشه يحمر ويصفر ويبص لشعرك بطريقه غبيه وبعدين لما يكتشف فجأه أن لون شعرك أسود رغم أنك عايش معاكي من ميت سنه بنفس اللون وماغيرتهوش


يبقي حيران يقول لك ايه؟



وفجأه تدخل الخدامه فيقول لك دا شعر البت سناء مثلا يعني




فتقولي للبت سناء اخلعي يابت الحجاب فتقول لك يامدام البيه واقف، تزعقي وتصرخي زي المجنونه فيها



وتقولي لها أخلعي يابت، تقوم سناء من كتر الشرر الطالع من عنيك تقلع الحجاب فتلاقي شعرها بني، خلاص براءه سناء



فتلفي ليه تاني أنا عايزه أعرف الشعر الأصفر ده بتاع مين ؟




طبعا هو ساعتها حايكون واكل سد الحنك


والموضوع حتلاقيه مارحش بعيد إذا كان ليكي جاره بتشتغل مثلا في كباريه في شارع الهرم


طبعا هو لايمكن يعترف


فأنتي تسأليه ميت مره وانت متأكده أنه شعر الرقاصة جارتكم



تلاقيه بعد كده يقول لك دا شعر العروسه بتاعة بنتك


وطبعا علشان كرامتك بتنقح عليكي حاتعملي نفسك مصدقه



=========
كمان البيه لو حويط شويه، أو بعد حكايه الشعر دي حتلاقيه لو كنتي رجعتي بدري شويه جايب الهوفر وحاططها في اوضة النوم




طبعا حتسألي الهوفر دي هنا ليه؟



طبعا حايقول كلام كله كدب يعني لقيت السجاده موش عارف ايه ؟



والحقيقه أن بعد حكاية الشعر تلاقيه خد حذره فيقضي على أي شعر في السرير أو على الأرض بالهوفر



تقومي انت تعملي أيه؟



تأخدي الهوفر وتفرغي التراب اللي جواها



حتلاقي برضه الشعر الأصفر أياه



طبعا لو أتكلمتي تبقي أنت ست مجنونه ومصابه بالذهان، وممكن عندك فصام في الشخصيه





مع تحياتي لذوات الشعر الأصفر خاصة جارتي الحسناء

GHARAM يقول...

ونسيتي حاجه مهمه جدا جدا




الجليتر اللي بيلزق في جسمه ياحياتي



ولما تسأليه يرد ببلاهه موش عارف الزفت دا جالي منين يمكن لما كنت عند بتاع الهدايا مع واحد صاحبي كان بيجيب هديه والرجل صاحب المحل قعد يرش جليتر على العلبه


فتقولي له



اقلع هدومك



فتلاقي الجليتر منتر على كل جسمه




فتقولي له هو انت كنت واقف قدامه عريان





طبعا برضه حايقف ساكت وواكل سد الحنك







هههههههههههههه
بوست تحفه

أسوور يقول...

غرام

يا بنتى دة انتى اللى تحفة بجد
اقولك كمان
ولما ترجعى البيت تلاقى الدى فى دى فيه سى دى من اياهم
ويتهم القط بتاعك انه اكيد بصباص وبتاع قطط سلالم وبيجيب قطة من المنور فى البيت يفرجها على السى دى

ولا لما تلاقى ازازة برفان اختفت من على التسريحة ويتهم الجنية الشريرة بانها بتحب تسرق البرفانات

ما علينا

انتى سكر

soaad fakoory يقول...

بصراحه بلوج تحفه تحفه !والاحسن عودتك
للمواضيع المثيره ونسيانك المحاكم والوش..جميل يا آسر لعودتك لينا!!و

نظرة يقول...

نظرة
فى اللغة نظر إلى الشىء أى أبصره وتأمله بعينه ونظر فيه أى تدبر وفكر.
فهى مدونة جديدة بفكر جديد سنعرض من خلالها نظرة للمجتمع بوجه عام وإلى الشباب بوجه خاص.
ترى عندما تنظر إلى هذا المجتمع ماذا سترى؟!
هذه المدونة لن تنجح إلا بمشاركتكم والإستماع إلى الأراء كلها . فأنتم الشباب عماد الأمم وبكم تصنع الحضارات
وسأحاول أن تمثل الموضوعات أراء مجموعة من الشباب وليس رأى شخصى.
المدونين فى هذه المدونة :
http://batoot-haboob.blogspot.com/بطوط الحبوب
http://ghoneem.blogspot.com/ دكتور غنيم
modawen5ana.blogspot.comأسماء رمضان
محمد غالية

أسف لعدم ردى على الموضوع وخروجى عن اصل الموضوع

Bastawisi يقول...

هو صحيح جوزك مش بيقرا البلوج؟

*SosSoOo* l'o'l يقول...

الخيانة هي الاصل
هو ليه الاديان والقوانين دعت للاخلاص
لان الخيانة هي اقرب للطبيعة البشرية

ولا يخون الانسان اذا كان متأكد انه هيتقفش

ولو خان وهو متأكد انه هيتقفش يبقى مستبيع ومش هامه العواقب او مجهز لها

والحكاية دي تنطبق على الرجالة والستات لانهم بشر بغض النظر عن النوع

لكن الرجالة بيتهموا بالخيانة اكتير ببساطة لانهم بيتقفشوا اسهل

يبدو ان الرجال علشان عارفين انهم ممكن يطلعوا منها لو اتفقشوا مش بيهتموا قوي

والستات علشان عارفين انهم لو اتقفشوا هتبقى مصيبة كبيرة بياخدوا احتياطات جامدة

أسوور يقول...

سعاد

والله عندك حق يا سعاد القضية اخدت وقت ومجهود كبير منى

ان الأوان للعودة للكتابة

شكرا لتشجيعك

نورتينى

أسوور يقول...

بسطاويسى

ساعات بيقرا وساعات لأ
على حسب وقته

وساعات بيبص بشكل عام على العناوين والمواضيع ولو فى موضوع يستحق المناقشة بنتناقش فيه ولو له رأى بيقوله .. وانا باخد رأيه بعين الإعتبار

لكن هو ايه مناسبة السؤال يا بسطاويسى؟؟

نورت المدونة

أسوور يقول...

سوسو الجميلة

ايوة يا سوسو قوليلنا الخلاصة

الخيانة صحيح طبيعة بشرية لكن فى ناس بتخون عشان دة طبع متأصل فيهم .. يعنى بيخونوا وخلاص .. من الآخر طفسين

وناس بتخون وهى مضطرة وبعد مقاومة وجهاد مع النفس

وناس بتخون عشان ميبقوش شكلهم وحش فى وسط اصحابهم ويقولوله يا خيخة .. انت علاقتك بمراتك بس؟؟؟ فيضطر انه يثبت انه راجل

تحياتى للجميلة سوسو

Bastawisi يقول...

مناسبة السؤال بقى ان انتى فى مرة كتبتي عن انه بيخونك فاتسائلت ان كان ماتضايقش من انك تفضحيه عالملأ كده؟

أسوور يقول...

هاهاهاها

ضحكتنى بجد

يا بسطاويسى اللى مكتوب دة كل الرجال بيعملوه ومش شرط ان حد واحد عمل كل دة

انا بعمل موسوعة لتحركات الرجال فى الخيانة

اقرا تعليقات البنات وانت تفهم

mohamed ghalia يقول...

ههههههههههه
والله هكون زوج مخلص بسى هى الزوجة تيجى بس الأول هههههه
دمتِ بكل الود

أسوور يقول...

محمد غالية

جميل تعليقك جدا يا محمد
اجمل التعليقات

التعليق الذى انتظرته بالفعل

تحية وتقدير .. نورت المدونة

Bastawisi يقول...

يعني هو ماخانكيش ولا حاجة؟ ولا ايه؟ انا مش فاهم
عموما مين الاهبل ده اللى يخونك يامسمسم

أسوور يقول...

بسطاويسى

هو انت بتعلق على البوست ولا على حياتى الشخصية؟؟؟
انا جاوبتك على سؤالك الأول بخصوص ان جوزى بيقرا المدونة ولا لأ رغم انه مش موضوعنا
ورغم ذلك استمريت تسأل .. انا عندى اقتراح .. اعمل معايا حوار وانا اجاوبك

لكن

فين تعليقك على البوست؟؟

تحياتى

اصحى يا مصر : اسلام ديو يقول...

ههههههههههه
كرهتينى فى الجواز يا اسر
دانا كنت عايز اجوز نفسى افرح بالواد طروق وجى جى
هههههههههههههه بس متحمليش هم جى جى مش عايشة فى الواقع اصلاً ولا بتغير عليه
فعمره ما هيبقى مخلص خااااااااالص

لابس فعلاً كلامك جميل والبوست اجميل
والمدونة هايلة
وبشكرك على تشريفك مدونتى
تحياتى
ديو

Bastawisi يقول...

ولا انا فاهم حاجة بس فى الغالب مادام اتنرفزتي كده يبقى بيخونك

عموما ياستي ماتزعليش لو كنت ضايقتك

و تعليقي عالبوست اهو: يااااااااااه ايه خفة الدم دشي

راجى يقول...

انا معجب برأى سوسو لان له مضمون فلسفى

أسوور يقول...

بسطاويسى

انا جوزى ما بيخونيش ولا حاجة
تحب تاخد نمرة تليفونه؟؟؟

انا اتضايقت لأنك بتسأل أسئلة شخصية ودة غير مقبول

طب فرضا بيخونى .. المفروض اقولك ايوة بيخونى واشهر بيه؟؟

ولو مش بيخونى .. فى ناس هتقرا تعليقك وتقول اكيد جوزها بيخونها . . ودة يبقى تشهير بأسرة كاملة

تعليقك خارج عن حدود اللياقة وتوقعت منك اعتذار .. لكن عموما اشكرك

Bastawisi يقول...

ياستي بمنتهى السهولة كان ممكن تقولي لا مش بيخونني

كان يوم اسود لما طلعت لقيت نفسي عايش مع الشعب الخول ده

Bastawisi يقول...

و لو مش عاوزة تردي ماترديش
بسؤال هاتخليني بشهر بيكي؟؟ ده انتي برانويد و مجنونة فعلا

أسوور يقول...

اسلام ديو

انت اللى نورت المدونة
والجواز جميل مش وحش خالص بجد بس لو كل طرف التزم بوعوده قبل الجواز

ولو كل واحد حط نفسه مكان التانى برضه

تحياتى لك

أسوور يقول...

راجى

على فكرة رأى سوسو دايما بيبقى فيه فلسفة رغم اقترابه من الواقعية الشديدة

تحياتى لك ولسوسو

كلاكيت تانى وتانى يقول...

اسر يالهوى يابنتى انتى هتمنعى اى راجل هيقرا البوست من انة يرمش مش يفكر يخون انا كت بقرا وبتصور واحد خاين بيقراة ويتصبب العرق على جبينة زى افلم الرعب الامريكانى
جميل ورائع البوست
تحياتى

كلاكيت تانى وتانى يقول...

تسمحيلى يا اسر اعلق على كلام الاستاذ بسطاويسى اللى تبين انة فعلا بسطاويسى طحن وجة اللقب اللى بنطلقة على الاغبياء وقليلى الحيلة فى القرى المصرية
يا استاذ التعليق على اراء الاخرين يكون اما بالموافقة او الرفض اما اسلوب التبجح والتدخل فى الحياة الشخصية والاسئلة الشخصية اللى بتنم عن ضعف فى شخصية شيادتك ومحاولة لأظهار عيوبك بصورة فجة ورخيصة جدااااا وعلى فكرة المدونة دى تتبع السيدة اسر ولا تمت لسيادتك بصلة وعيب جدااااااااا جداا تدخل تتكلم عن زواجها وتشكل البوست على راحتك لأن حريتك الشخصية كدة بقت استباحة لحريات الاخرين واحمد ربنا ان أسر صاحبة المدونة مش انا كنت بجد عرفت اكيل لك الصاع صاعين
طريقتك ياعزيزى واسلوبك فالهجوم اثبت قلة حيلتك وضعف موقفك وخطأك فى حق صاحبة المدونة
يمكن انا مش هقولك اكتر من اتق الله فى نفسك وفلسانك ولو مش قادر تستوعب افكار الناس خليك فنفسك افضل وبلاش تهين نفسك بنفسك
تحياتى وشكرى العميق لأنك اديتنى الفرصة ارد على احد المتطفلين فى الحياة الفارغين من المحتوى

SaSo يقول...

مايطلقها أريح

انت تسال والكمبيوتر يجيب يقول...

دعوه
الأخت العزيزه
تحيه طيبه
برنامجنا الأذاعى عن النت والمدونات من الأذاعه الرئيسيه لمصر اى اذاعة البرنامج العام يذاع يوميا التاسعه وعشر دقائق صباحا عدا الجمعه
ندعوك لزيارة مدونتنا والتعليق على ما نطرحه من موضوعات وهذه التعليقات تذاع باسماء اصحابها فى حلقات برنامجنا

وبموقعنا رابط بالضغط عليه والأتنتظار قليلا وقت أذاعة البرنامج يمكنك الأستماع الينا
المدونه
http://netonradio.blogspot.com
الموقع
http://dear.to/cairo

77Math. يقول...

بجد كان المفروض تمسحي رده وما تعبريش من الأول

لا الرد عاجب ولا السكوت عاجب

ناس عاملة زي جهاز قياس درجة الحِلْم والصبر !

ياربي

nouna يقول...

اسور
جدتى بتقول يا مامنة للرجال يا

مامنة للمية فى الغربال
كدة طبع الرجل لو مش بالفعل يبقى بالنظر اوالتعليق
بس مافيش راجل حدق مية فى المية لان الست زكية ونكاشة بطبعها وحتكشفه على طول حتى لو لم تستخدم كل الطرق الخابراتية دى كلها
الشاطرة اللى متديلوش الفرصة للخيانة وتروشه على طول

momken يقول...

روعه بجد انتى اسلوبك روعه

بس فى حاجه

تصدقى ان عدد الخونه من الرجاله يتساوى مع عدد الخائنات من النساء

ماهو يا ستى كل راجل بيخون مراته بيخونه مع ست تانيه صح

الخيانه فيها راجل خائن وامرأه خائنه
اتنين اد بعض

الا بقى لو الرجاله بتخون مرتهم مع كائنات فضائيه

يبقى مافيش داعى نقول ان الخيانه من الراجل بس

الى عاوز يخون بيخون من الجنسين
البوست رائع يا اسور

تسلم ايدك

تحياتى

Bastawisi يقول...

@ momken
ليه بقى هو مفيش بنات مش متجوزة؟
لا انا مش متفق ان العدد يتساوى

ثانيا البوست ده مقتبس مش هي اللى مئلفاه

أسوور يقول...

كلاكيت تانى وتانى

ايون البوست دة مخصوص عشان يعرفوا انهم هيتكشفوا يعنى هيتكشفوا

الأحسن بقى يبقوا مخلصين

شكرا على ردك على التعليق العجيب من المدون العجيب بسطاويسى

نورتينى يا قمر

أسوور يقول...

saso

مكانش حد غلب يا ساسو

تحياتى

أسوور يقول...

77Math

فى ناس كدة تعامليهم باحترام يقلوا ادبهم

دة لأنهم ميعرفوش معنى الإحترام

معلش .. الصبر مفتاح الفرج

أسوور يقول...

نونة

ايوة .. هو كلام جدتك الصح

الناس دى فهمت الدنيا قبل ما احنا نتولد

نورتى يا نونة

ريمان يقول...

عندك حق

هو كده من الاحسن انه يكون مخلص من الاول

والله اليانه دى نهايتها مش كويسه خالص


وفعلا بيوت كتير تدمرت بسبب كده

ربتا يعافينا

momken يقول...

البنات الى مش متجوزة متتعبرش خيانه لكنهم بيخونوا راجل برضوا اخوهم او ابوهم

صح

كمان فى شباب كتير ولاد يعنى ومش متجوزين دول برضوا ميتحسبوش

والله لو ركزتى هتلاقيها متساويه


سواء كتباه او مقتبساه هو حلو اوى

اكذب يعنى؟


تحياتى

Bastawisi يقول...

@momken
لا مفيش حاجة طبعا اسمها واحدة تخون ابوها او اخوها

انا اسمع ان الخيانة اكتر عند الرجالةو ان الست زي الكلبة وفية بطبعها

GHARAM يقول...

عزيزتي آسر



لقد كنت أجرأ مني وظهرت للعلن بصورتك وأسمك الحقيقي ، لذلك عليك أن تسيري على نفس المنهاج ولايهمك من هؤلاء المرضي النفسيين، وأنت تعلمين ياعزيزتي ماحدث لي من أمثال هؤلاء،واقول لك دع الكلاب تنبح والقافلة تسير



مع كل الحب والأعجاب والتقدير

غير معرف يقول...

الرجل الخائن يري كل النساء خائنات , والمرأة الخائنة تري كل الرجال مغفلين
ومن ارتدي ثوب الناصح في امر من الامور لا يتخيل في يوم من الايام ان سيكون متلقيا لها
عافنا الله شر الخونة والمغفلين , ووقانا مشقة تلقي النصيحة
واخيرا شركة سامسونج تشكركم علي حسن تعاونكم معنا

it's me ahmed يقول...

أولاً بحييكي يا أستاذه البوست فعلاً جميل و شيق و من زمان مقرأتش تدوينات لحد الآخر و الأهم من كده إنه مفيد علشان نفكر في طرق جديدة :)

طبعاً آخر سطر هوا المفيد مش علشان خوف لأ علشان دا الصح و مفيش أفضل من إن الإنسان يعيش في حالة سلام إجتماعي مع نفسه و مع الآخرين

تحياتي و منتظرين تدوينة رائعة أخري

أسوور يقول...

ريمان

ايون ايون ايون
لازم يتعلم ان الإخلاص اسهل عليه وعلى الزوجة وعلى حياته الزوجية

وهنا انا بوضح ان الرجالة الخائنين اللى عاملين نفسهم عباقرة .. هم فى الحقيقة اغبى من انهم ياخدوا قرار صح بالإخلاص

تحياتى

أسوور يقول...

ممكن

معلش يعنى انا هنا بقصد الرجالة الخونة ومقصدتش الستات الخائنات
الست لما بتخون بتكون حريصة اكتر

ممكن تقرا تعليق المدونة الجميلة *SosSoOo* l'o'l

حقيقى تعليق جميل

تحياتى .. نورت المدونة

أسوور يقول...

غرام

اه يا بنتى .. انا مش عارفة الناس دى مستحملة نفسها ازاى

الله يكون فى عونهم بجد

أسوور يقول...

السيد مندوب شركة سامسونج

عايزة موبايل مقابل الدعاية

أسوور يقول...

it's me ahmed

نورت المدونة وشرفتنى بوجودك وبرأيك فيما كتبت

انت جبت المفيد يا احمد ..

البوست ساخر يدعو الى الإخلاص ويلوح من بعيد لمشاكل الخيانة

تحياتى

AhMeD NasR يقول...

تحفه بجد
اكتر من روعه البوست

*SosSoOo* l'o'l يقول...

اسوووور حبيبتي شكرا على مجاملتك

واكتر حاجة ضحكتني في التعليقات بصراحة تعليقات واحد مفروس
وباين قوي انه مفروس
ههههههههههههههههههه
هو شكله استفز الجميع
لكن انا بصراحة ضحكني موووت

تعليقاته كوميدية هزلية
وعمال يتشتم وعامل نفسه مش سامع
وبيكمل برضه تعليقاته
هههههههههههههههههه

طب لو انت مفترض ان الست دي جوزها خانها وانها كتبت البوست ده من واقع تجربتها الشخصية

تبقى ازاي مقتبساه

بجد كوميدي
ههههههههههههههه

*SosSoOo* l'o'l يقول...

الصفات البشرية مثل القتل والسرقة والخيانة والكدب هي اصل الطبيعة البشرية
وانظروا الي التاريخ من اول قابيل وهابيل

لكن هذه الصفات تمثل الانسان العاري
يعني اللي بيعملها يبقى كأنه خلع ملابسه

والاصل ايضا هو العري

ولكننا سعينا للتحضر كبشر وبدأنا نكافح كي نتخلص من العري

واللي بيعمل اي حاجة من الحاجات دي بيكون كل همه ان محدش يشوفه وهو عريان زي ما قلت قبل كده او مش هامه اصلا ان حد يشوفه وهو عريان

وصدقيني يا اسووور
حكاية انه يعمل الخطأ بسهولة او بصعوبة مش مرتبطة بانه انسان راقي او واطي

ابدا .... هو بس كل حاجة ليها اول مرة

واختلاف التفرعات المرتبطة بالشيء

يعني اللي بيخون وعنده اولاد غير اللي معندوش
واللي بيخون واحدة فيها عيوب غير اللي بيخون واحدة مفيهاش عيوب

واللي بيخون واحدة خانته غير اللي بيخون واحدة مخانتوش

واللي بيخون وهو لسه شاب غير الكبير في السن


صدقوني هي دي الاشياء اللي بتشكل تفكير الانسان ناحية اللي بيعمله اذا كان صح او خطأ

مش مجرد الفضيلة

حكاية الفضيلة دي وهم

غير معرف يقول...

نظرا للازمة العالمية الشركة قلصت ميزانية الدعاية المخصصة لمنتجات الشركة , ولكن بمجرد انتهاء الازمة مباشرة هايوصلك الموبايل علي 2050 باذن الله

- وعموما نحن نقدر دور المرأة بكل شدة لانها المستهلك الاول في العالم لاجهزة المحمول
والرجالة ايضا

وشكرا
رقم خدمة العملاء : زيرو زيرو تلات تزيار وقلة

E_Mersal يقول...

اولا احب اشكر السيد بسطاويسى عل تعليقاته الجميله اللى بتدل على ثقافة واسعة فى كيفية الحوار و احترام اراء الآخرين
و بجد انا ضد كل اللى بينادوا بمسح تعليقاته و ده بيدل على انحدار مستوى ثقافتهم (مقارنة بمستوى تفكير بسطاويشى باشا طبعا ) أو يمكن تكون مرارتهم اتفقعت بس ده اكيد عيب فيهم يمكن تكون مرارتهم بتتفقع بسرعة مثلا
عموما أحب اقولك حظك إنك فى بلوج بتاع واحدة محترمة و إلا كان حصلك حاجات كتير
نسيت اعرفك بنفسى
انا واحد من الناس اللى مرارتهم بتتفقع بسرعة برضه
الله يخرب بيت الشلل....يا شيخ

E_Mersal يقول...

تصدقوا نسيت انى كنت داخل اعلق على البوست , بجد بعد اللى قريته جاتلى حالة رعب شديدة من انى مراتى تعرف انى بخونها و اعدت افكر اخبى عليها ازاى و مطلعنيش من الحالة ديه الا لما افتكرت انى مش متجوز اساسا
بجد البوست مكتوب بطريقة هايلة جدا و كمان عجبنى الرد بتاع غرام
بجد اعدت ادبدب فى الارض و انا بقراه و بقرأ رد أسوور عليها و بتخيل منظر الزوج الغلبان
بس بجد مش حاسس ان الوصفات ديه هتنفع
اولا الخاين هيتكشف سواء مراته ذكية او لا , يعنى مهما كان ذكائه فممكن حد يشوفهم و يقولها , او حتى هى تقول لمراته لو بتحبه و عيزاه ليها لوحدها
كمان انتو بتفترضوا ان الزوج مغرور و متخيل ان مراته غبية عشان كدة هتتنتصر عليه , ممكن يكون صح بس برضه لو الست افترضت انها اذكى من جوزها يبقى راحت فى داهية و هيخونها مع نص ستات البلد.
كمان فى حاجة تانية مش عارف عندى انا بس ولا مع حد تانى , انى محبش حد يتذاكى عليا يعنى لو حسيت ان مراتى عملة عليا مخبر ممكن اخونها بالعند لمجرد اقولها اهو ادينى عملتها و انتى مش عارفة
او مثلا اجيبلها فاتورة مطعم مشهور فى القاهرة (انا اصلا فى اسكندرية) و اقولها انا رحت اتغدى فيه مخصوص النهاردة عشان اثبتلك انى مكنتش فى الشغل و كان ممكن اكون مع واحدة تانية عشان تهمد و تفكها منى شوية
فى النهاية محدش يفترض انه اذكى من حد تانى سواء الزوج او الزوجة
خصوصا لو الحد ده عايش معايا و عشرة سنين طويلة و يقدر يشم فى الهوا ريحة الكدب بتاعى
و آسف على الاطالة قوى

maha يقول...

سلام عليكي يا اسور
ههههههههههههههههه
البوست تحفه
طب ما بدل كل التعب ده ما بلاش منها الخيانه دي
مش هو حب واحده و ارتبط بيها
يا ريت قبل ما يفكر يعمل كده
يفكر ان ممكن في اللحظة نفسها تكون هي كمان بتخونه ..او علي الاقل حد ممكن يكون بيقرب منها
ساعتها هيفكر الف مرة بعد المليون
:)
ربنا يهديهم يا اسور
:)
سلام
مها

الشنكوتي الكبير يقول...

ههههههههههههههه
هههههههههههههههههه

بجد مش عارف اقولك ايه
نصايح هاااااااااايله
بس كده هيحسبوكي بتشجعيهم على الخيانه
معه ان اللي يقرى بجد الموضوع هيفهم انك بتقوليله يا حمار بتجيب لنفسك قلة القيمه وبتذل نفسك وتنزل من قيمتك وشخصيتك كراجل في بيتك لمجرد عيل غلطان بيحاول يمسح غلطته ويداري على كسوفه من نفسه

ربنا يصلح حال الجميع

تحياتي على البوست الفزيع ده

سلاااااااااااااااااااام

E_Mersal يقول...

بجد يا آسر لازم تمسحى كلام الناس اللزيزة ديه لان الموضوع بقى زيادة قوى