الأحد، 26 أبريل، 2009

مطلوب متطوعات

بنعمل فيلم تسجيلى إستقصائى بالجهود الذاتية يهدف لرصد ظاهرة التحرشات فى الشارع المصرى
الفيلم لا يتبع أى جهة رسمية أو قناة فضائية أو محلية ولا أى مركز ابحاث
*******
طبيعة الفيلم تقوم على متابعة عدد من الفتيات والسيدات على الطبيعة أثناء سيرهم فى الشارع بالكاميرا
لمدة 5 دقائق .. وتصوير المضايقات التى يمكن أن يتعرضن أثناء سيرهن فى الشارع على الطبيعة
ثم يتم حصر عدد المضايقات بالنسبة لعدد الفتيات أو السيدات محل الدراسة
*******
مطلوب متطوعات لتصوير الفيلم
*******

الثلاثاء، 21 أبريل، 2009

تفاصيل يوم 18 ابريل - يوم أن قلنا لا للتحرش






فى تمام الساعة الثالثة والنصف بدأت سيارات الأمن فى الحضور
وكانت هناك سيارتان كبيرتان محملتان برجال الأمن المركزى

وسيارتان بوكس بيلفوا حوالين الجنينة خلف خلاف وبعد شوية وقفوا
ونزل منهم شوية شباب معاهم كورة وبدأو يلعبوا كورة فى جنينة الخزان
تمويه يعنى .. هاهاها
وعدة سيارات اتارى تدور حول الحديقة طوال الوقت
المكان مرشق أمن على الآخر .. ظباط كتيييييييير .. ومعاهم لاسلكى
دة طبعا غير ماتشين كرة القدم اللى كانوا شغالين فى جهتين مختلفتين من الحديقة
*******************
كان أول الحضور الدكتور شريف حافظ مؤسس حركة 14 فبراير
وهى حركة اجتماعية تنموية تهدف الى تقويم السلوكيات الغير مقبولة فى المجتمع المصرى
وتحارب العنصرية بشتى صورها
ثم توالى حضور الآخرين - مجدى وسامح سمير وهو منشىء جروب
معا نمنع المعاكسات - حملة احمى اختك
********************
بدأت الوقفة فى الموعد المحدد فى تمام الخامسة مساءا
وفى المكان المحدد وهو حديقة الخزان بالمقطم
*********************
حضر الوقفة العديد من المدونين والفيسبوكيين
بالإضافة الى أبى وزوجى وأخى
شارك بعض الاجانب فى الوقفة الإحتجاجية
شاركت فى الإحتجاج مندوبة من مركز دراسات المرأة الجديدة
حضر الوقفة محمد عمر من المنوفية وهو الذى تبرع لنا بتصميم لوجو الحملة
حضرت حنان الشريف من الشرقية خصيصا للمشاركة
********************
وزعت البوسترات على الحضور مع العلم انى قمت بطباعتها فى شركتى الخاصة
وهى شركة برينتنس للطباعة الدجيتال
وكان عددهم 40 بوستر وزعت جميعها ولم تكفى الحضور
فقام الزميل سامح سمير وهو رسام كايكاتير
بعمل عدة بوسترات يدوية لتوزع على البقية من الحضور
وقام برفع علم مصر مكتوب عليه - احمينى يا بلدى
**********************
حملت البوسترات شعارات مختلفة تناهض التحرش
لا للعنف لا للتمييز الجنسى
No to violence, of sexual discrimination
الإنتماء هو الحل
we all are Egyptians
انا مش سلعة .. انا انسان
كلنا نهى رشدى .. كلنا آسر ياسر
المتحرش مش انسان
the harasser is not a human
احمى اختك
اوقفوا التحرش
stop harassing me
يوم 18 ابريل اليوم المصرى لمواجهة التحرش
احمينى يا ابن بلدى
مش هأسيب حقى
النهاردة بتقول انا مالى .. بكرة يحصل لأمى واختى وعيالى
احمينى يا بلدى
*******************
تابع الوقفة الإحتجاجية لفيف من الإعلاميين
مثلول العديد من وسائل الإعلام
صحف - مجلات - قنوات فضائية ومحلية - مصرية .. عربية وأجنبية
********************
انضم للوقفة الإحتجاجية بعض المارة
بعضا من سكان المنطقة اصطحبوا اطفالهم للمشاركة
واذكر منهم سيدة شاركت وبناتها الثلاث محتجة
وذكرت انها تتعرض هى وبناتها تتعرضن للتحرش فى كل مرة يخرجن للجامعة او المدرسة
واشادت بمنظمى الوقفة ولم تذكر اسمها
شارك بعض شباب المنطقة فى الوقفة ووعدوا بحماية اية فتاه من التعرض للتحرش
اعتراضا ومشاركة منهم فى الحملة ضد التحرش
*******************
جدير بالذكر انه تقدم شاب الى مندوبة مركز دراسات المرأة الجديدة
طالبا منها ان تساعده على الإعتذار لإحدى الفتيات المشاركات فى الوقفة من سكان المنطقة
لأنه تحرش بها فى احدى المرات
فحيناه جميعا وهو يقول لها
ارجو ان تقبلى اعتذارى ومن هنا ورايح اى هشوفه بيضايق بنت هوقفه عند حده
وصفق له الحاضرون
*******************
لم تحدث أية قلاقل واستمرت الوقفة الصامتة لمدة ساعتين
*******************
من القنوات الفضائية البارزة
المحور - برنامج 90 دقيقة
الحياة - برنامج الحياه اليوم
الأوربيت - برنامج القاهرة اليوم
دريم - الطبعة الأولى
النيل - الساعة - الانسانية
الأهرام -الشروق - روزاليوسف - اليوم السابع - لها
وغيرهم العديد من القنوات والصحف والمجلات والمواقع الإخبارية على شبكة الإنترنت
*******************
لم يحضر الوقفة أحدا من المصرى اليوم
لذلك فقد ارسلت لهم ردا على ما نشرته الصحفية بالجريدة هدى رشوان
بخصوص الوقفة الإحتجاجية من معلومات مغلوطة
سوف ينشر على صفحات الجريدة قريبا
مع العلم ان الصحفية هبة عبد الحميد هى التى كانت تتابع الموضوع منذ بدايته
********************
اصدرت السفيرة مشيرة خطاب بيانا يوم الوقفة الإحتجاجية
تعلن فيه رفضها لظاهرة التحرش التى انتشرت اخيرا وانها ظاهرة دخيلة على مجتمعنا
********************
تحية لكل من شارك بالتواجد او شارك بقلمه او حتى بقلبه
*******************
أما عن الناقدين والحاقدين فأقول لهم
احنا عملنا حاجة كويسة .. حقيقى ايه اللى مضايقكوا؟؟؟؟




الاثنين، 20 أبريل، 2009

الوقفة الإحتجاجية يوم 18 ابريل - حققنا نجاح والناس سمعت شكوتنا



لينك فيديو مصراوى ضد التحرشات

http://videohat.masrawy.com/view_video.php?viewkey=e9e28952b11b1affb9ec

*****

موقع محيط يذكر الخبر

http://moheet.com/show_news.aspx?nid=246807&pg=19
http://moheet.com/show_news.aspx?nid=247280&pg=19
*****************

اليوم السابع

http://www.youm7.com/News.asp?NewsID=90558

***********

الزوى للأخبار

http://www.alzoa.com/docView.php?con=40&docID=18985

وقد عج المكان بوكالات أنباء من جميع انحاء العالم


الاثنين، 13 أبريل، 2009

وقفة احتجاجية فى جميع محافظات مصر يوم السبت 18 ابريل لكل المحتجين على التحرشات فى الشارع المصرى

قررت ان ادعو لوقفة احتجاجية فى جميع محافظات مصر
يوم السبت 18 ابريل لكل المحتجين على التحرشات فى الشارع المصرى

دة لينك الجروب على الفيس بوك

من أجل شارع آمن 18 ابريل اليوم المصرى لمواجهة التحرش -حملة مش هأسيب حقى

الهــــــــــــــــدف

ان يوافق مجلس الشعب على قانون تجريم التحرش الجنسى

ألا يكون على المدعية فى قضايا التحرش ان تقدم دليلا على واقعة التحرش
التى عادة ما تحدث فى الخفاء وينفيها المتحرش
فى حين ان اثبات عدم التحرش يكون على المدعى عليه

لأنه يسهل اثبات الصلة ان وجدت بين المدعية والمدعى عليه
فى حين يستحيل احيانا اثبات واقعة التحرش فى أغلب الآحيان

نشر الوعى

بان تتقدم اى سيدة او فتاه ببلاغ فور تعرضها للتحرش

ان يتعاون الرجال المحترون مع أى سيدة او فتاه تتعرض للتحرش بالمساعدة
سواء كانت لمنع المتحرش او للشهادة ضده

تنبيه المتحرش بحجم الإيذاء النفسى الذى يقع على الضحية من جراء التحرش
*****
لو ليكم مطالب أخرى نتمنى المشاركة

الوقفة ستكون فى المقطم حديقة الخزان بجوار حديقة الأندلس
اى ميكروباص من السيدة عائشة - تنزل عند حديقة الأندلس فى شارع 9

التجمع عند حديقة الأندلس الساعة 5 مساءا

الوقفة اجتماعية بحتة ولا تمت للسياسة بصلة ولا نتبع اى حركة سياسية معارضة

نتمنى المشاركة


الخميس، 9 أبريل، 2009

تم رفض سماع اقول الشهود بتوعى واصدر القاضى حكمه ببراءة المتهمين
**************
اشكر كل الناس اللى اتصلت بية عشان تتطمن
اشكر كل الناس اللى وقفت جنبى
اشكر كل صحفى كتب عن القضية
اشكر الأستاذ زياد العليمى على رفضه تقاضى اى اتعاب
اشكر مركز دراسات المرأة الجديدة والمركز المصرى لحقوق المرأة لتأييدهم الكامل لموقفى
أشكر المدون العزيز أحمد شقير صاحب مدونة حكاوى آخر الليل
على اثارته القضية ودعوته لحملة فى المدونات
أشكر المدون الصديق محمد حمدى صاحب مدونة
دماغى على الجروب الذى انشأه للتضامن معى على الفيس بوك
هأكتب بوست شكر خاص موجه للمدونين والفيس بوكيين اللى ساندونى قريبا
***********************
أشكر الصحفى الكبير والصديق الدكتور ياسر ايوب على قلمه الذى لم يكل ولم يمل من الكتابة عن القضية وعلى سؤاله الدئم على سير الأمور
أشكر الرائعة بلا منافس الكاتبة المحاربة الأستاذة سحر الجعارة لأنها اول من اهتم وكتب عن القضية
أشكر الفنان المبدع مودى الإمام لموقفه الواضح من التحرشات عموما وتأييده التام للقضية عامة حتى تلك اللحظة
أشكر الصحفية الجميلة ايمان القصاص على تحقيقاتها الرائعة بمجلة نصف الدنيا عن الموضوع وعلى متابعتها واتصالها الذى لم ينقطع
أشكر كل من كتب عن القضية وتحمس لها سواء كتب فى المدونات او على الفيس بوك او فى الصحف والمجلات
أشكر الانسان خيرى رمضان على تأييده للقضية ومتابعته
***************

أشكر كل فرد من افراد عائلتى واخص بالشكر أختى الجميلة سوسو صاحبة مدونة خرابيش القطة سوسو للمجهود الكبير الذى قامت به فى المدونات او على ا لفيس بوك
أشكر اصدقائى جميعا .. وأخص بالشكر أمانى سهر الليالى على ايمانها الشديد بقضيتى من اللحظة الأولى
**********
أشكر و للأبد .. زوجى الحبيب على ثقته الشديدة فى قرارى .. وعلى محبته واحتوائه الدائمين .. وايمانه بأنى .. أنا فقط .. صاحبة الحق فى هذا القرار .. وعلى تأييده ودعمه بشتى الوسائل رغم الحملات التى شنت ضدى وضد اسرته .. الا أن ايمانه بى لم يخفت قط .. ولم يقابل أيا من تلك الحملات الا بكل التأييد لى والإصرار على الإستمرار مهما قالوا .. وفى كل مرة كان يقولها واضحة .. دول شوية متحرشين خايفين منك أحسن البنات تعمل زيك
زوجى الحبيب .. أحبك إلى الأبد
اشكر بناتى الحلوين .. نور وسما .. عشان همة فخورين بمامى
وبقولهم .. انا عملت كدة عشانكوا
وعشانكوا انتوا وكل البنات.. مش هتبقى دى النهاية
دى يادوبك أول طلقة فى الحرب ضد التحرش

الخميس، 2 أبريل، 2009

انا بخون مراتى .. طب أعمل ايه فى حياتى؟؟؟




رغم ان الخيانة هى فعل يدمر الحياة بين اى اتنين .. متجوزين او مخطوبين او حتى بيحبوا بعض وبينهم وعود
الا ان كتير من الرجال ما زالوا يخونون .. والحقيقة اننى رايت بيوتا تنهار بسبب الخيانة
تنهار العلاقة .. حتى وان لم يحدث الطلاق .. لذلك قررت ان اكتب هذا البوست
********
بتخون مراتك .. صح؟؟ .. طيب يبقى لازم تاخد احتياطاتك .. ازااااااااااى؟؟؟
اقولك
الكمبيوتر الشخصى بيتقلب .. والباصوورد فى برامج بتكشفها
بلاش حداقة وتعمل نفسك خبير كمبيوتر لأن الخبرا كتير
وتخلى بالك كويس من الموبايل لأنه أول حاجة بتتفتش
تمسح كل الماسيدجات والميسدات والتليفونات الواردة والصادرة من الحبوبة بتاعتك
وبلاش تستخدم موبايل نوكيا لأنه بيسجل على اللوج كل حاجة
ولو مسحت اللوج .. مراتك هتشوفه ممسوح .. وهتتأكد انك بتخونها على طول

ولو عملتله لوك على الكمبيوتر او الموبايل هتبقى موضع شك بقية عمرك

الأفضل انك تستخدم سامسونج وتريح نفسك ..او ممكن تشترى تليفون تانى خالص وتسيبه فى مكان آمن
الشغل مثلا .. وبلاش العربية لأن العربية بتتفتش برضه
*******
أما بالنسبة للعربية بقى
تخلى بالك من شعر الحبوبة اللى ممكن يكون على الكرسى
وتفتش كويس فى الطفاية عشان الروج والسجاير او أى حتى ورقة لبان
اللبان دة معناه انك عايز تعطر بقك النونو عشان البوسة تبقى معطرة
ويا لهوى بقى لو حاطط فى العربية برفان ولا مضمضة بالنعناع
تبقى رحت فى خبر كان لأن دة معناه انك مهتم تبقى ريحتك مفحفة طول اليوم
تبقى يا اما بتخون . . أو بترسم على خيانة
وخلى بالك من الحاجات اللى بتقع من الحبوبة ساعات .. بقصد .. او من غير قصد ..ماتسيبش مصيرك تحدده الحبوبة
قلم روج .. قلم كحل .. فردة حلق .. عقد اتفرط من فرط المحبة ونسيت منه حبة
منديل عليه ماكياج سواء فى العربية او فى جيبك
******
نيجى بقى لجيبك
اياك تنسى فى جيبك فاتورة شراء هدية للحبوبة .. او ريسيت من مطعم اتغديتوا فيه
أو حتى وصل من اجزخانة مكتوب فيه .. فياجرا او ساعات كاندوم
وتبقى مصيبة لو لقت مراتك فى جيبك الكاندوم أو الفياجرا..لأنها هتفهم على طول انك على علاقة جنسية بواحدة تانية
********
نيجى للعلاقة الجنسية
اياك .. اياك .. اياك ترجع البيت حاسس بالذنب
تقوم تحب توجب مع المدام عشان تسمع لنفسك العبارة الشهيرة اللى بيقلها كل خائن
أنا مراتى واخدة حقها فى السرير وزيادة .. زى ما ربنا قال تمام .. انفاق وفراش
لا ايها الزوج الخائن .. أنصحك نصيحة نصوحة بلااااااااااااااااش
اى زوجة بتعرف ببساطة شديدة ان جوزها مش بكامل طاقته .. وطبعا دة معناه انه بدد طاقته فى حتة تانية
اوعى تقولى .. انا جامد .. انا جدع .. انا راجل قوى .. سيبك من الكلام الفارغ دة .. مكانش حد غلب
مراتك هتلاحظ فورا التغيير .. هتقول دة خسع .. او مبقاش عنده رغبة فية
دة لو انت ما اتقفشتش اصلا .. ودى حاجة نادرة جدا
********
طيب اتقفشت .. تعمل ايه؟؟؟
الغالبية بينكروا ويتشالوا ويتحطوا ويتهموا الزوجة بالوسوسة والشك والبارانويا
بلالالالالالالالالالالالالالالاش
هتحاول على طول تثبتلك انها على حق وانك خاين .. كذاب .. مخادع
واى ست فى الدنيا سهل قوى تثبت ان جوزها خاين
نصيحتى لك.. اعترف على طول .. اعترف وانت راكع على ركبتك وبتبوس ايديها
قلها انها غلطة ومش هتتكرر .. واطلب السماح ويا ريت شوية دموع
الست ضعيفة قدام الراجل الضعيف .. وجبروتك هيوصلها للحبوبة وعنوانها ونمرة تليفونها كمان
***********
الحبوبة بقى .. تعمل فيها ايه؟؟؟
تقطع علاقتك بيها فورا وتستنى فترة لحد ما مراتك تطمن وابقى شوف غيرها
وبلاش تقولها ان مراتك قفشتك .. عشان ما تحاولش ابتزازك
قل ادبك عليها وافتعل خناقة وارمى كارت الموبايل السرى فى النيل
وطبعا مش هأوصيك انك اوعى تكون معرف الحبوبة تليفون
أوعنوان بيتك ولا شغلك
ان كيدهن عظيم
*************
بالنسبة لكيدهن
خلى بالك ان مراتك هتعمل نفسها سامحتك بعد ما تقطمك شهر او سنة
اسمع كل كلمة تقولها وانت لابس وش عم الندمان .. وكل كلمة تقولها ترد تقول
عندك حق .. انا ما استاهلكيش .. انا ندل .. انا وغد .. انا عيل .. انا بحبك .. وكتر من حكاية بحبك دى
والأهم من دة كله انك تأكد فى كلامك طول الوقت على انك غلطت غلطة كبييييييييييرة
فى حقها وحق نفسك وانها مش هتتكرر ابدا
وانك بتدعى ربنا انه يسامحك على النزوة اللى كان وراها شيطان معندهوش ضمير
**********
بالنسبة لموضوع النزوة
مراتك مش هتصدقك .. ومش هتهمد .. هتفضل تفتش وراك برضه .. وتشك فيك
موبايلك اوعى تقفله .. تقولها انت رايح فين وجاى منين
مش من نفسك كدة .. هتفهم انك مبالغ حبتين .. لما هى تسأل تجاوب .. من غير اى عصبية او نرفزة
النرفزة معناها انك مزنوق ومش عارف تتصرف وتلاقى رد مناسب

اوعى تقول لنفسك .. انا زهقت.. او تحسسها انك مخنوق منها
بالعكس كل ما تحاول تفلفص هتتمسك اكتر وهتطول فترة الشك
.. اللى مابيعملش حاجة غلط مش بيتنرفز
طمنها على قد ما تقدر .. خليها تحس انك كتاب مفتوح وان مفيش اى سر جواك
وتقبل بقى شكوكها وانت لسان حالك بيقول .. عندك حق .. انا اللى جبت دة كله لنفسى
*******
نيجى لنفسك .. نفسك الأمارة بالسوء
انت عايز تخلص بقى .. تقوم قايلها بحزم ورجولة .. انا راجل .. انا حر
انا اعمل اللى يعجبنى وهو كدة واذا كان عاجبك
ايااااااااااااااااااااااااااااااااااااااااااااااااااااك
لأنها هيبقى قدامها اختيارين .. تعمل خلع وتسيبك ..او تعيش معاك وهى مجبرة ايا كان السبب
وعيشة الست المجبرة بقى مقولكش عليها .. نكد فى نكد
هتفضل متنكدة .. وتصب عليك من النكد اللى هيبقى فايض عندها
وخلى بالك هيبقى كتير .. قصدى الفائض فى ميزانية النكد هيبقى كتير
وفى النهاية يا هتموتوا بعض يا هطلقوا
فى اختيار تالت هقولهولك .. بس هات ودنك
هتخونك وهتستمتع بانها بتستغفلك ومابتتقفش.. وانك الغبى اللى اتقفش
*********
ايها الزوج الخائن .. لا تنسى الوصايا الهامة دى
تخلى بالك .. تعترف لو اتقفشت .. تطلب السماح .. تقطع العلاقة فورا
ماتقولش هو كدة واذا كان عاجبك .. لأن دى اخطر حاجة على حياتك الزوجية
ولو حاسس انك ماتعرفش تنفذ اى نصيحة واحدة من النصايح اللى فاتت

يبقى احسن لك تكون زوج مخلص