لماذا لن أعط صوتى للإخوان؟؟؟
الإخوان المسلمون .. انتهازيين على أعلى مستوى .. وعلى فكرة مفيش بينى وبينهم حاجة وشبابهم زى الفل انما بيستبعد رأيهم .. والرأى رأى مكتب الإرشاد .. والشورى شورة مكتب الإرشاد والمرشد العام
الشباب كانوا عايزين ينزلوا معانا يوم 25 يناير .. ورفضت الجماعة المشاركة .. ولما نزل الشباب يوم 28 يناير وبدأت الثورة تنجح ... أعلن مكتب الإرشاد ان الجماعة شاركت بينما لم ينضم الإخوان رسميا الى التحرير الا فى الثلاثاء الأول من بدء الثورة .. دة اول شىء ضايقنى منهم
.. قلنا مش مشكلة يمكن حسوا بالندم .. ثم بدأوا استغلال الدين فى الإستفتاء الذى اقره المجلس العسكرى وفهموا الناس ان الإستفتاء هيجيب لهم الإستقرار وشجعوهم يقولوا نعم .. والناس صدقت بتوع الدين ولم تصدق شباب الثورة ساعتها وكلكوا قلتوا "نعم" لفخ المجلس الذى دعمه طبعا الإخوان
بدأوا يقولوا للناس ان الليبرالية كفر بينما هى ليست كذلك وكلنا مؤمون والحمد لله وانما الليبرالية هى "" حماية حقوق الأقلية تحت ظل حكم الأغلبية .. فقط .. حتى لا يظلمهم الأغلبية ويجورون عليهم ..
واننا عايزين نغير المادة التانية عشان نخلى البلد فاسقة !!!!!!!!!!!!!!!!!!!!!
وعشان نجيب رئيس مسيحى .. بينما المصريين 85 % منهم مسلمين .. يعنى حتى لو رشح نفسه رئيس مسيحى مش هينجح .. ولو نجح واعطى له المسلمين اصواته يبقى ساعتها اكيد راجل كويس فعلا ..
لم يخطر فى بالنا الموضوع من اصله .. انما هم من اثاروه ..
وبدأوا يحقنوا المصريين بكلام مالوش لازمة يؤجج النفوس .. ولم يعد يرغب المجلس العسكرى فى مقابلة شباب الثورة أو أخذ رأيهم .. مستبعدين أغلب الإئتلافات والأحزاب
حاولوا يستغلوا زيارة أردوغان فى الدعاية لأنفسهم ثم خذلهم أردوغان وصرح ان الدولة تكون علمانية بينما المواطن يكون له دين
عقدوا تحالف مع حزب النور ومع الوفد .. وساعة الإنتخابات فضوا التحالفات وخليوا بالوفد والنور معا واعلنوا الحرب على حزب النور
قالوا هننزل على 30 % فقط من مقاعد المجلس .. ودلوقتى نازلين على 100 % من دوائر مصر .. وعايزين يبقوا أغلبية .. ليه ؟؟ عشان همة اللى يحطوا الدستور!!!!!!!!!!!!!!!!!!
يعنى ديكتاتور جديد عايز يستبعد بقية التوجهات السياسية من صياغة عقد يحكم العلاقة بين الشعب والنظام .. يعنى تبقى انت النظام وكمان تتحكم فى انك تعمل العقد بمزاجك وتقول موافقة فى مجلس الشعب زى الحزب اللى قبله .. الظاهر مايعرفوش نظام غيره .!!!!!!!!!!!!!
وييجى ماسبيرو .. مجزرة للأقباط .. أو وقيعة أو أيا كان .. فلا يقدم الإخوان سوى تعازيهم بدون أى رد فعل .. كأنه بيطبطب على المجلس طول الوقت
قدم د . البرادعى وثيقة مبادىء أساسية لفظ حقوق الأقليات .. سواء كانوا اقلية فى الديانة أو من المعارضة .. رفضوا الوثيقة .. قدم البسطاويسى اخرى .. واجتمعنا كلنا حول وثيقة الأزهر فى النهاية .. ومع ذلك رفضوها برضه
وييجى المجلس يحضر خازوق .. وهو وثيقة السلمى .. يعنى المجلس هيديهم حكم البلاد ببلاش كدة ؟؟؟ .. يقدم وثيقة السلمى .. وفيها تلاقى انك هيتحكم فيك العسكر تانى فى مقابل انه يدينا حقوق انسان .. ههههه .. وكمان بيقولك مش عايزين حد يسألنا صرفنا فلوسنا فى ايه .. لا برمان ولا رئيس ولا غيره
وطبعا ما يعجبش الإخوان والسلفيين اللى افتكروا انهم هياكلوا الكعكة وحدهم
فصلوا ابو الفتوح لمعارضته لهم .. والراجل بصراحة زى الفل ... حاجة كدة ضمير ايه واخلاق ايه .. وحط ايده فى ايد البرادعى من أجل مصلحة مصر رغم ترشحهم ضد بعض فى سباق الرئاسة .. لأ وشوف الندالة .. يدعموا العوا ضده :)))))))
تقرب الإنتخابات ويدعوا السلفيين الى مليونية التحرير ضد وثيقة السلمى .. ولتحديد موعد غايته 30 ابريل لتسليم السلطة .. نزلنا معاهم عادى لأن دة مطلب لينا برضه منذ البداية ..وروحنا بيوتنا باليل حتى شباب 6 ابريل روحوا
ويبقى بعض أهالى الشهدا اللى كانوا قاعدين من قبل كدة اصلا .. ودخل الأمن حرق الخيم وضرب أهالى الشهداء ضرب مبرح وبهدلهم صباح السبت
طبعا نزلنا كلنا نحمى الناس دى ..لدرجة فى ناس مانزلتش فى يناير ومع ذلك نزلت فى نوفمبر
وبدأت المجزرة .. وكل الشعب شاف الصور والفيديوهات والمباشر فى القنوات الفضائية او على النت .. وحتى التليفزيون المصرى ذاع
ومع ذلك لا ينطق الإخوان .. بالكتير يقدموا تعازيهم كالمعتاد
ساعتها بقى ماقدرتش اتحمل .. هو يا ناس القتل فى الأشهر الحرم مش حرام؟؟ .. دم الشهيد كدة عادى ومشغولين بالإنتخابات ؟؟؟
فى الميدان .. قابلت أصدقائى من شباب الثورة تاركين دوائرهم غير عابئين الا بدم الشهداء وتحديد موعد لرحيل المجلس .. ولما لم يستجيب .. طلبنا رحيله .. وكالمعتاد .. الإخوان صامتون .. والمجلس بيتفرج على قتل الشباب بالغاز والرصاص فى التحرير
مش فاضيين .. مشغولين بالإنتخابات .. يا جماعة عندهم شغل .. انتوا هتقرفونا بالشهدا بقى كل شوية
فى المناطق الشعبية .. وزعوا البطاطين والسمن والارز وحتى الطماطم والخيار .. على الناس
أخدوا صورة بطاقة المواطنين فى المناطق العشوائية ويدوهم 150 جنيه .. يااااااااااااااا بلاش
وفى أول أيام الإنتخابات يخالفون القانون بشراسة واصرار .. ويوزعون دعايتهم أمام اللجان عينى عينك وتحت سمع وبصر الشرطة والجيش .. صحيح مش همة بس اللى عملوا كدة .. لكن فين بقى الضمير وربنا اللى بتتكلموا عنه طول الوقت .. ومين اللى جعلكم وكلاء عن الله من أصله؟؟؟
كل ما سبق من عمايل الإخوان السودا يأخذنى إلى كلمة واحدة " الإنتهازية"لو عايز تعرف حجم الإخوان الحقيقى .. علم الشعب حكمة يضع العبارة الآتية حلقة فى أذنه
الحكومة ليس من مهامها أن تدخلنا الجنة .. الحكومة مهمتها الأولى هى .. أن تجعل مصرنا للمواطن جنة
آسور ياسر
7 التعليقات:
للأسف الشديد
مصر ستعاني بشدة في ظل الحكم الديني
ربنا يستر على البلد دي
اولا اسمحيلي انشر المقال دى في جروب مساحة حرية..ثانياً حقاً ما كتبتي..الاخوان متلونون لا يفكرون الا في اجندتهم الخارجية..حقيقا انا انتخبت الكتلة المصرية..ربنا يستر..انا اخشى على مصر من الفترة القادمة..!!
تحياتي..والى الامام
أحمد
وحياتك لنخليهم همة اللى يعانوا :)
فرحات
دة شىء يشرفنى انك تنشرها .. ارجوك انشرها .. انشرها فى كل مكان عشان الناس تعرف ندالتهم .. وانا كمان اخترت الكتلة زيك .. وكرسى المعارضة مش وحش برضه
اتأثرت انا بقى كده والدمعة فرت من عينى
احه يا عم :D
ربنا يكرم مصر برئيس كويس مش مهم ينتسب لاي تيار
بسم الله الرحمن الرحيم
هو صحيح الانتخابات خلصت والنتائج ظهرت والحمد لله وانا وان كنت من حزب النور بس انتخبت الاخوان فى الاعادة بس مافيش مانع انى ارد بعض الاتهامات التى اراها ظالمة فى حق الاخوان :
اولا فكرة ان الاخوان لم يشاركوا فى الثورة من اول يوم هذا ظلم كبير وانكار لواقع شاهدناه جميعا , ان كان على مشاركة الرموز فواحد زى الدكتور البلتاجى كان من اول يوم فى الميدان واسامة ياسين وغيره , اما الشباب فشاركوا من اول يوم مش فى القاهرة بس لكن فى المحافظات يعنى مثلا فى كفر الشيخ كانوا من اول الناس اللى حاصرت مبنى امن الدولة واقتحمته وفى محافظات كتير , وان كانوا لم يعلنوا المشاركة رسميا من اول يوم فدا افضل قرار اتخذوه لعدم محاصرة الثورة اعلاميا .
ثانيا الاستفتاء كان حول نقطة خلاف رئيسية من يكتب الدستور ؟ نواب الشعب ام نخب تليفزيونية لا تمثل الا نفسها ؟ والكلام عن المادة التانية لم يكن الاخوان اول من اثاره بل اثاره العالمانيون مثل عماد جاد والبرادعى وساويرس واسامة الغزالى حرب وغيره , ولو كنا مشينا على الخطة الى اقرها الاستفتاء كان زمانا خلصنا من حكم العسكر فى سبتمبر اللى فات لكن طبعا العالمانيين ومن يسمون بشباب الثورة طلعوا يقولوا احنا مش مستعدين واصبروا علينا وادونا فرصة وناخد وقتنا لغاية ما العسكر خدوا راحتهم , فلو عاوزة تلومى حد لومى الطرف الاخر.
ثالثا ترشيح مسيحى للرئاسة انا مقتنع انه لا يجوز شرعا فلا ولاية لكافر على مسلم .
رابعا الاخوان مش محتاجين زيارة اردوغان للدعاية لأنفسهم مطلقا وكلمة عالمانية الدولة اللى قالها اردوغان دى محكومة بموقفه الدستورى فى بلده والا فموقفه من العالمانية معروف منذ التسعينات ويعتبرها كذب ودجل .
خامسا لم يكن هناك تحالف بين الاخوان وحزب النور انتخابيا , والتحالف مع الوفد اخل به الوفد بعد وعد من الكنيسة بأنهم هايدوله اصوات النصارى ولما انسحب من التحالف الديمقراطى الكنيسة ضحكت عليه ووجهت النصارى للكتلة فأين اخلاف الوعد؟
سادسا حتى لو كانوا عاوزين هما اللى يحطوا الدستور فدا حقهم مادام الشعب انتخابهم , والان الاسلاميين ثلاثة ارباع البرلمان وان شاء الله النسبة ستصل الى 80% بعد انتخابات الشورى ولنا كامل الحق فى وضح الدستور وفى النهاية الدستور سيعرض على استفتاء شعبى .
سابعا وثيقة البرادعى لا تقدم اى جديد عن دستور 71 ووثيقة البسطويسى تعطى للعسكر صلاحيات لكى يفرضوا ارادتهم فوق ارادة الشعب اما وثيقة الازهر فقبلت من الاخوان وقبلها السلفيون بتحفظات ولكن لا يقبل الاسلاميون فرض اى وثيقة على نواب الشعب , اما حقوق الاقليات فأنا اسأل حضرتك هل الاسلام يحمى حقوق الاقليات ام يظلمهم ؟ لو حضرتك قلت نعم يحميها يبقى لا حاجة لنا بأى وثيقة ونكتفى بالاحتكام للشريعة الاسلامية واذا قلتى ان الاسلام يظلم الاقليات يبقى لا مجال للنقاش .
ثامنا لو لم يفصل الاخوان عبد المنعم ابو الفتوح فى وقتها كنتى حضرتك هاتكتبى فى البوست دا ان الاخوان وعدوا بعدم الترشح للرئاسة وقدموا ابو الفتوح للرئاسة فى لعبة سياسية , كده مش نافع وكده مش نافع .
تاسعا السلفيين نزلوا يوم 19 نوفمبر وقيادات حزب النور نزلت والمشايخ نزلوا فى كل المحافظات فلماذا الانكار علينا؟ اما الاخوان فكانوا متخوفين من ان يكون الامر كمين من العسكر لتأجيل الانتخابات خصوصا ان العالمانيين كانوا بيلحوا فى مطلب تأجيل الانتخابات .
لكن بالمناسبة ليه حضرتك لم تتكلمى عن الموقف الرخيص المخزى الانتهازى لحملة البرادعى الذى اراد ان يقفز على الحراك الشعبى يومها ويصبح رئيس وزراء ؟ هل هذا ما اتفق عليه من نزلوا للميدان ؟
عاشرا موضوع البطاطين دا غير مرتبط بالانتخابات بل امر مستمر قبل واثناء وبعد الانتخابات ومن عقود مضت وتحملوا فى سبيل ذلك المشاق الكثير فلا تظلمى اخوانك .
تحياتى
إرسال تعليق