الأربعاء، 20 يونيو، 2007

لفت نظرى الزميل المدون إيلارى صاحب مدونة
إلى خبر منشور فى جريدة المصرى اليوم بتاريخ
17/6/2007
يشير الى جمعية التدوين المصرية التى ناقشنا فكرة انشاءها فى لقاءاتنا الشهرية
ولكن ضم المقال بعض الأسماء اللامعة فى عالم التدوين وهم
مـــالك و علاء و منال و بهيــه و الوعى المصرى وائل عباس والذين لم اتشرف بمقابلتهم قط من قبل
وانا اكتب هذا البوست لتوضيح ما يلى
اولا لرغبتى فى توجيه الشكر للزميل صاحب مدونة حد فاهم حاجة
ثانيا لتوضيح اننى لم يحدث أن قابلت فاروق الجمل وهو صحفى فى المصرى اليوم وهو مدون صاحب مدونة
خواطر شاب غاضب من قبل ولا كنت مصدره فى هذا المقال ولا أى مقال نشر له
ثالثا لم يحضر اى من المدونين الذين ذكرهم فى المقال أى من لقاءاتنا فيما عدا
الزميلة والصديقة المدونة أمانى سهر الليالى
والزميل والصديق المدون طارق واحد من الناس
ورغم ان الزميلة شيماء الجيزى صاحبة مدونة صحفية مع ايقاف التنفيذ لم تحضر أى من اللقاءات
الا انها أجرت معى حوار نشر على مدونتها
وكان أول حوار فى سلسلة المدونون يتكلمون التى بدأت فى نشرها على مدونتها وهى مشكورة لهذا الجهد
لقـــــــــــاء الأوبـــــــــــــرا
حضر حوالى 60 مدون ومدونة - لا يسعنى ذكرهم جميعا الآن- اللقاء الأخير فى الأوبرا
وكان الحديث عن الجمعية المصرية للتدوين قائم وقد أيد الغالبية الفكرة
واسمح لى يا ايلارى ان آخذ من بوستك بعض الجمل التى توضح الأمر
قال ايلارى عن المدونين الذكورين فى المقال
ان هؤلاء المدونون اللامعون المذكورون فى بداية البوست مسلكهم سياسى
بحت يمثل جانب معارض للحكومه و نحن معهم فى اغلبية مقالاتهم
ولكن نحن مسلكنا اجتماعى انسانى بحت يؤمن بأن التغيير يجب ان يكون من داخلنا اولاً
لقد خلقنا لانفسنا مجتمع جميل صغير بنيت أسسه على كل ما هو انسانى بعيداً عن اى تشوهات او ثقافه ملوثه
ثم أردف قائلا
انا لست سلبى او انهزامى بخوفى هذا و لكنى واقعى و برغم كل شئ سوف استمر ايضاً فى تكملة الحلم
وسواء تحقق ام لا و سواء احبطنا او نجحنا يكفينا شرف الحــــــــــــــلم
أنا ايضا لست سلبية أو انهزامية ولكننى بالفعل أؤمن بما قاله ايلارى وجميعنا كذلك
لذلك نحن نبدأ بأنفسنا
تحياتى لكل من اتصل بى أو حاول اعلامى وابلاغى بالموضوع واخص بالذكر الزميل
الذى كتب بوسته الأخير عن الموضوع تحت عنوان
والزميل العزيز المدون
الذى أثار الموضوع على
والزميل والصديق العزيز محمد حمدى
صاحب مدونة دماغى
والذى أرسل لى ايميل به لينك المقال

هناك 83 تعليقًا:

أبو ضحى يقول...

ياسمين
صباح الخير
من حسن حظى انى دخلت على النت قبل ما اروح الشغل عشان اشوف البوست الجديد و اكون اول واحد يعلق عليه

انا قريت بوست ايلارى بعد لما قريت بوستك دلوقتى
انا مش عارف هو بيهزر و لا بيتكلم جد لما بيقول هتوحشينا يا ياسمين
تقريبا بيهزر

المهم هما لما ينشئوا جمعية باسم المدونين المصريين و يكون اتجاههم سياسى معارض بحت كما قال ايلارى فده مش معناه انها جمعية بتمثل كل المدونين المصريين

ياسمين انتى كنتى ماشية بخطوات واسعة و لما كنا بنقول عليكى زعيمة المدونين ده لأنك تستحقى اللقب ده لأنك قدرتى تجمعى المدونين و تربطى ما بينهم على ارض الواقع كما هو الحال على الصفحات الرقمية..لكن انتى اتعطلتى فى النص شوية يا ياسمين..انتى فاكرة اخر لقاء مثلا كان امتى؟
ليه احنا ميبقاش لينا اتحاد يمثل اتجاهنا فى الكتابة؟

اوعى تكونى فاكرة انى بعاتبك بكلامى ده ..لأ و الله أنا عاوزك تفضلى دايما فى المكان اللى تستحقيه و كمان عاوزك تجمعينا و تلمينا تانى
ياسمين ..لازم نتحرك شوية..مش انتى لوحدك ..احنا كمان معاكى
و مش بالكلام و بس

تحياتى

عبدالله يقول...

ازيك يا ياسمين
عادي المقال الي اتكتب ده مجتش يعني علي شويه كلام اهبل ياخد عليه شويه فلوس هبله و خلاص مش مشكله مين جاب سيرته
انا بصيت علي البلوج بتاعه و من طريقته عادي يعني ممكن كام يكتب اكتر من كده و نلاقيكي في الاخر تبع حماس و متنكره و كان اسامه بن لادن معاكوا في الاجتماع
انا راي تشيلي رابط مدونه الشخص ده مش يستحق انك تشاوري عليها الناس تعرفها

واخيرا انا حطيت علي البلوج عندي كتاب الرجال من المريخ النساء من الزهره انا عارف انك بتحبي الكتاب ده كتير و في كتير كانوا عاوزين يقروه

تحياتي

The Alien يقول...

يا ست الكل كبري دماغك
ياما دقت ع الراس طبول
ودا مجرد مقال لواحد محدش عارفه
يقول اللي يقوله

أنا بس عايز أوضح حاجة
إن التدوين مش بس سياسة
ومش لازم يتربط بالسياسة

لازم نتقابل قريب ونتكلم ف الموضوع ونشوف هنعمل إيه
علي فكرة
بكرة فيه حفلة قوية ف جنينة اﻷورمان الساعة 7
هيكون فيه كذا فرقة
وسط البلد وصحرا وبلاك تيما
أتمني أشوفك هناك

تحياتي

Shreif fahmy يقول...

الجزء الثاني من عفوا حبيبي متقدرش ومتعرفش
http://sfahmy78.blogspot.com/2007/06/blog-post_19.html

منتظر تعليقك

whyme يقول...

بتشكرينى على ايه احنا كلنا واحد وا نتى بجد بتمثلينا كلنا و احنا قدرنا نعمل مجتمع جميل اوى و بنخاف على بعض اوى و من غير اى غرض
انا مكدبش عليكى اتبسطت اول ما شفت عنوان المقال
بس خفت عليكى جداً لما قريت المقال نفسه لانى حسيت ان صاحب المقال بيقحمك بالعافيه وسط كادر انتى مش منه و بيديلك صوره تانيه مش بتاعتك او بتاعتنا

و كمان انا مش محتاج اقولك انتى بالنسبه لنا ايه
من غير نفاق او مجاملات بجد انتى قيمه غاليه اوى عندنا

بس مش عايزك تقلقى لان انا عند وعدى و العيش والحلاوه و كمان السجاير عندى و من حيث العيال متقلقيش هيدخلوا احسن مدارس اما من حيث المدونه فدى اكيد مش هنعتبها لانها هتكون متراقبه


تحياتى يا صديقتى العزيزه و ربنا معاكى و يكمل حلمك و حلمنا من غير اى تشويهات او تدخلات او فروضات

أنا يقول...

تحياتي للجيل الثاني من المدونيين
...
فكرة الجمعية رغم انها قديمة شوية لكن بجد اتمني انها تفرز كيان ما ....حديثكم عن التدوين السياسي وطموحات التغيير الأجتماعي ..كلام شخصيًا انا معجب جدًا بيه ولو أنه كلام عام ومحتاج شوية توضيح
مثلاً هتفرق أيه الجمعية ديه عن اي جمعية اهلية اخرا وخصوصا وان اعضائها هيحملوا صفة التدوين - اللي هي مش صفة اساسا-
مش قادر احط نقط تفسيرية ..لكن الغرض من تعليقي اساساً ..اقتراح انكم فعلا لو فكرتوا واجتمعتوا واتفقتوا فاستغلوا حالة الزخم الاعلامي ده واعلنوا علي الاقل عن المبادئ والاهداف بشكل مفصل
سواء علي مدوناتكم او علي مجموعة البريد
ومفيش مانع كمان تطلبوا من الاخ الصحفي ده يعمل معاكم حوار عن فكرة الجمعية

أنا يقول...

بس هو انا نسيت حاجة
..
يعني ايه مدونين من النوع الثقيل من اللي بيخشوا وراء قضبان الحلم

يطلع ايه قضبان الحلم ده !!؟
:)

عصفور المدينة يقول...

ماهو عشان كدة بنقول تحديد المسلك لازم يكون بعبارات محددة مش نسيب الناس تستشفه

Reemo يقول...

أنا قريت المقال يا ياسمين
وبصراحه استغربت جدا من اللى كتبه الشخص ده
أولا لانى متحفظه على الشخصيه دى وعلى افكارها ونوعيه الكتابات اللى بتتضمنها مدونته
ثانيا لانى شايفه انه خلط الأوراق ببعض
جعل الانطباع العام عن فكره التدوين وعن المدونات على انها قايمه على اساس سياسى وده غلط تمام وخاصه ان مدونتك تصنف على انها مدونه اجتماعيه وليست سياسيه
هو باللى كتبه ده خلط كل الناس ببعض ووضح ان فكره الجمعيه اللى سبق واتكلمتى عنها دى هتقوم كنشاط سياسى معارض للحكومه وده ظلم للفكره وللمدونين والمدونات اللى هتشترك فيها
كمان ده هيلغى الفكره الاساسيه للجمعيه فى تجميع كل المدونين باختلاف نوعيه تدونيهم
كده هو بيقول ان الجمعيه دى سياسيه
يعنى اصحاب المدونات الاجتماعيه والادبيه والشخصيه يتنحو جانبا
أنا شايفه بجد انه مش فاهم حاجه فى اى حاجه وكتب مقال وخلاص بيعمل بيه ضجه وخلاص بانه من ضمن المدونين وفاهم وكده
بدليل انه جمع بين مدونات مفيش بينها عامل مشترك غير انه مدونون لكن كل واحد ليهم ليه اتجاهه

أنا شايفه يا ياسمين انك تتجاهلى المقال تماما
وتكملى فى فكره الجمعيه اللى بدأتيها واللى بجد هتجمع كل المدونين باختلاف ميولهم
انتى بدايتك صح اوى وانا سبق وقلتلك انك بجد تعتبرى مثال لبنات كتير جدا بأفكارك وانسانيتك واتجاهاتك
ربنا يوفقك يارب
تحياتى

IRC President يقول...

تصحيح بس أنا حاولت أصحح الموضوع على الجروب

إللي أثاره المدون عمر عزت

http://mabadali.blogspot.com/

أنا مش عارف إيه ولعكم يا جماعة بالتصنيف، هل هو غريزة إنسانية للتقييد مثلا؟

جيل ثاني وإجتماعية وتدبير منزلي

يا جماعة التدوين وسط حررررر

أنا شايف موضوع الجمعية ده زي تنظيم حركة كفاية إنه يضم كل التيارات السياسية والفكرية بدون أي تصنيف أو تضييق أو خلط للأوراق

ولو إتخذ أي وضع غير كده هيكون قتل لفكرة التدوين من أساسها لإنه كده هيكرس فكرة الفصل العنصري بين التيارات الفكرية المختلفة، سياسية كانت أو لم تكن

بالنسبة للصحفي ده أنا لا أفضل موضوع التجاهل لإنه ليه أكثر من سابقة - صحفي سوابق يعني - بما يتصل بموضوع التدوين. فالنوع ده مينفعش معاه غير التجريس لردع أي حد ثاني إته يزايد

Mohamed Hamdy يقول...

هاى ياسمين

اولا ميرسى ليكى على التنويه بتاعك عن الإييميل .. انا بحسب انى اول واحد انبهك للمقال لكن واضح ان حبايبك كتير :)

اما عن المقال الصحفى المكتوب فكان كل ما اتمناه هو شويه دقه موضوعيه فى كتابته , بحيث منخلطش كل الاوراق , وندخل التدوين السياسى بالإجتماعى , وتتحول الجمعيه الإجتماعيه للمدونين لحركه سياسيه ...

بصراحه كدة الكلام بقا ملخبط ومش منظم .. والسبب ؟ واحد كتب موضوع منغير ميتاكد , مع ان النت قدامه يتاكد برحته , لكن متهيالى هو حب يضفى اهميه على الموضوع فاتجه للشق السياسى ...

وانا مع راى صديقى العزيز

IRC president

ان التدوين وسط حر , لامكان فيه للتصنيفات , لان حتى منال وعلاء او الوعى المصرى بيحطوا مواضيع شخصيه واجتماعيه وحتى تكنولوجيه من وقت لأخر

بس كدة .. وميرسى تانى ليكى يا ياسمين

دنـــيـــا يقول...

عزيزتي ياسمين بدايه انا مدونه جديده بقالي 3 شهور بين القراءه المدونات ثم قرار انشاء المدونه ثم الكتابه الفعليه ثانيا انا قرايت المقال اول ما اتنشر في الجريده و عرفت مدونتك و دخلت و قعدت ابحر في مدونتك فكان لها اجمل صدي بداخلي و احسست ان مدونتك اقرب الي المدونات ذات الطابع الاجتماعي بجانب همومك السياسيه التي تنتاب كل شباب مصر الان -فلا تتضيق من تصنيف صاحب المقال فكلنا مهمومين باحوال البلد و حتي اجتماعياتنا ليست ببعيده عن السياسيه فالكل في واحد و وكتابات المدونين هي حلفات متصله لا يمكن الفصل بينهم حتي وان اختلف مضمونها و موضوعها فجمعيا نشترك في نفس الهموم و الامال فانا عن نفسي ضد التصنيف لاننا نصب في بوتقه واحده
اما بالنسبه لفكره الجمعيه فانا اؤيدها و لكن بشرط عدم التصنيف و لكن ليكون هدفها هو تجميع المدونون باختلاف ارائهم و افكارهم و اتجاهم و يجب ان تكون لها سياسه جاده وواضحه و اهداف شامله كل شيء ده رؤيتي المتواضعه كمبتديء في هذا العالم الجديد اتمني لك التوفيق و التمهل في خروج الجمعيه فالتمهل يجعل الامر اكثر وضوح و يحمل اهداف مركزه
تحياتي

Iron Cobra يقول...

على فكرة وائل عباس كتب عن الموضوع دة في مدونتة جريدة الوعي المصري و نفى الخبر جملةً و تفصيلا و نفى أيضاً أنة يكون أدلى بأي حوار لصحيفة الوعي المصري.

Iron Cobra يقول...

أنا أسف أقصد يكون أدلى بحوار لصحيفة المصري اليوم.

nadine يقول...

لأ يا ياسمين
متخافيييييييييش
وراكى رجالة
و زى ما عبدالله و ايليان و ريمو ما قالوا
تجاهلى المقال لآنه فعلا مالوش اى اهمية
انا مش بقول الكلام ده عشان اطمنك
لكن لو امعنتى القراءة هتلاقى انه فعلا مش موضوع يلفت اليه الأنظار و الكلام ده

بجد مش عايزين ندى الموضوع اكتر من حجمه
كلام مالوش اى لزمة
و انتِ يا ياسمين اتصرفى عادى و اتعاملى عادى
انت مش يتعملى حاجة غلط او حتى بتشتمى فى حد ولا عايزة تعملى انقلاب لاسمح الله

ربنا يحفظك و يخليكى لبناتك

Sharm يقول...

مفيش حد ادلى بحوار للصحفى اليوم ولا ال mbc

و الصحفية ميادة مدكور قدمت اعتذارها للمدونين و لكن لم اسمع ان الجمل قدم اعتذارا مشابها

محمد الجرايحى يقول...

الأخت الفاضلة : ياسمين
السلام عليكم ورحمة الله وبركاته
أحيى هذا الجهد الطيب
وأتمنى لكم كل التوفيق فى مسعاكم الكريم
وفقكم الله وسدد خطاكم

تقديرى واحترامى
أخوك
محمد

micheal يقول...

أنا اتخضيت عليكي لاني دخلت مدونه ايلاري في لاول و شفت صوره القضبان و مكتوب تحتها مدونه ياسمين سكاي لايت فافتكرت أن اتقبض عليكي بعد الشر
:)
تحياتي لكي

Nohaz يقول...

وائل عباس كاتب في نفس الموضوع
صراحة من اول يوم دخلت مدونة الشخص ده قرفت كان سايب تعليق عندي فتحت مدونته لقيت صورة بنت وعورتها باينة بكل وضوح
بقيت امسح تعليقه لاني مش عايزة اتحمل ذنب الي يروح عنده و يتفرج كفاية علي ذنوبي الكتير قوي
وحتي استغربت انك حطيتي وصلة لمدونته
مع اني شايفاه مش عارف يكتب ولا يعمل بوست عليه القيمة

عموما متزعليش بس صراحة يا ياسو انت احيانا مش بتحبي تزعلي حد منك و بعض الناس دي بتكون مينفعش تعرفيهم اساسا
زي شخصية قلت لك ازاي بتعرفيها قلتي لي بتعامل مع الشخصية دي انه مدون مش اكتر.... ربنا معاكي وعموما حصل خير

مدونة كسبان يقول...

بصراحه
وبدون زعل
انتوا مكبرين الموضوع
اه والله
اديتوا الموضوع اكبر من حجمه
وانا شايف ان الموضوع
مش مستاهل كل ده
اللى يكتب يكتب
واللى يعمل يعمل
مواضيع هنا
ومواضيع هناك
وانا شايف ان الموضوع مش مستاهل كل ده

اما عن اللقاء الجاى
ان شاء الله تدعونى
ضرورى
بدل ما والله الخبط لكم المدونات
واضيعكم
واضيع التصميمات بتاعة مدوناتكم

انا بلغت اهو
علشان محدش يزعل بقى منى فى الأخر

واخر كلامى...سلامى

.:.-=- ELGaZaLy-=-.:. يقول...

تقريبا جيت هنا وهناك كذا مرة...

ومش عارف او مش عايز اعلق

المهم ان فى ناس ااقل من اننا نهتم بيهم ....

غمض عينيك يقول...

ياسمين
دي اول زيارة ليا
مدونتك جميلة اوي ولذيذة فعلا
بالمناسبة انا عرفت البلوج بتاعك من المقالة بتاعه فاروق الجمل...اهواستفدت منه بحاجه جميلة زي المدونة بتاعتك

تحياتي ليكي

محمد سمير

ياسمين يقول...

ابو ضحى
انت عندك حق فعلا انا اتعطلت فى النص شوية لكن كل ما أقول للناس لقاءات يقولوا .. أعياد .. أجازات .. امتحانات وهكذا لحد ما اتأخر اللقاء فعلا
عموما احنا فيها واللقاء هأعلن عنه قريبا بس يا رب ما يكونوش بيصيفوا
:)
انا كل اللى ضايقنى فى المقال انه زج بإسمى فى وسط اسماء ناس لامعة جدا ومشهورين عند الحكومة واتقبض عليهم جميعا وكأنى فى خلية سرية معهم نقرر انشاء الجمعية
هى دى كل الحكاية
نورتنى يا ابو ضحى
وشكرا لإهتمامك الدائم

ياسمين يقول...

عبد الله
انت كلامك صح فعلا شوية كلام يجيب شوية فلوس وخلاص
بس ربنا يستر ومحدش يفكر انى عاملة تنظيم سرى مع الأسماء المذكورة المشهورة اللى فى مقاله
بجد أشكرك على اهتمامك بموضوع الكتاب الجميل دة لإنه يستحق القراءة
تحياتى لصديقى العزيز

safa7_karmooz يقول...

اوبس...ايه ده...

طب...هوا ليه لازم نحشر كلمة سياسة فى اى حاجه ؟؟؟

بيفكرنى بالوفد مرة لقطت عربية ترحيلات عندنا فى الكلية...نزلوا الخبر تانى يوم ان الامن المركزى اقتحم جامعة القاهرة...واصلا كان مسجون سياسى ...جاى يمتحن الماجستير تقريبا :D

باى حال...جمعية المدونين لو ظهرت على وجه الحياة...اكيد هيبقى عليها رقابات كتيرة ...

بس لو ظهرت واتجاهها سياسى ...مش هنضم ليها وهعارضها

انا عندى حتى مش بتكلم فى السياسة...رغم اصلا اغلب نشاطاتى فى الكلية ...او برا سياسة ...والنماذج اللى بنضم ليها سياسة ...

بس سياسة عن سياسة تفرق...وفيه عك دايما بيحصل فى النص...وفيه ناس مش بتتقبل ان حد يخالفها فى رايها ...ومقصدش بكده انظمة...تؤ...دول افراد....زيى وزيك وزى اى حد تانى ...للاسف...تفكير ضيق

فالاخ اللى زق اسمك فى النص...عامل زى الراجل بتاع جرنال الوفد اللى تقريبا كان هينطرد...وعاوزين يوزعوا نسخ وخلاص...فزق حاجه ...بيسموها الفلفل الصحفى ...

anyway

متخافيييييييييييييييييش ...

بس لو فيه اى حاجه قولى بجد...احنا برضه مسنودين ....مش هما بس يعنى ...

واللقاء الرابع بحاول ااكلم استاد الكلية الحربية او المقاولين يستضفونا فيه...بس بيقولوا هيغلوا التذاكر :D

ااجبلك لب معايا وانا نازل ؟؟؟ :p

ياسمين يقول...

The Alien
احنا فعلا لازم نتقابل عشان نكمل ما بدأناه معا
وكمان عشان انتوا وحشتونى قوى

هأحاول أروح الحفلة رغم ان يوم الخميس دة دايما بيبقى بتاع ماما الحبيبة

نورت يا بيشو

ياسمين يقول...

whyme
هو دة بالظبط اللى قلقنى برضه لما قريت المقال

هو زج بإسمى وسط بعض الإسماء التى تكتب فى السياسة بمعارضة شديدة وكاننا نكون خلية سرية تسعى لقلب نظام الحكم

عموما ما دام العيش والحلاوة والسجاير عليك يبقى مافيش مشكلة
وكمان مدارس البنات
يا سلام على كدة يا سلام
انا بأفكر ابلغ عن نفسى بقى
بس هو ينفع بدل الحلاوة بطرمان نوتيللا ..أحسن بحبها قوى
:))
شكرا لك يا صديقى العزيز

Shreif fahmy يقول...

تعرفين تقديري واحترامي الشديد لرأيك فيما أكتبه ولن يكون هناك مبرر مني لهذه الغلطة ولكن أقدم لكي إعتذاري وأرجو ان يكون هذا الاعتذار بمثابة الفرصة الأخيرة لعدم تكرار هذا الخطأ
ها نقول صافية لبن

ياسمين يقول...

أنا
نورتنى فى مدونتى المتواضعة
وقريبا سوف يكون لنا لقاء جديد نجتمع فيه لنقرر معا الخطوات القادمة
كل شىء ينشر على مدونات اللذين يحضرون اللقاءات
احنا مجموعة كبيرة وأعتقد اننا ممكن نغير كتير فى مجتمعنا
من ضمن أهدافنا القيام بحملات جماعية على مدوناتنا تنادى بتغيير معين معا وفى وقت واحد
سواء كان التغيير اجتماعى او سياسى مش هتفرق
لكن احنا شايفين ان تغيير سلوك المصريين هو شغلنا الشاغل
ونرفع شعار ابدأ بنفسك
والأسرة السوية نواة الديمقراطية
كيف بالله عليك يرفع شخص صوته بكلمة لا وهو لم يتعلمها بل ويقهر كلما ينطق بها

حاجات كتير وكلام كتير وخطط كتير بس التنفيذ هو اللى محتاج وقت شوية

نورتنى بجد وفخورة بإن مدون عظيم زيك زار مدونتى
تحياتى

ياسمين يقول...

أنا
يقى كدة على حظى صحيح يوم ما آجى ألاقيك عزلت

معلش يا زهر

ياسمين يقول...

عصفور المدينة

ما هو المقصود بالمسلك؟ واى مسلك بالظبط تقصد؟؟

عصفور المدينة يقول...


ان هؤلاء المدونون اللامعون المذكورون فى بداية البوست مسلكهم سياسى
بحت يمثل جانب معارض للحكومه و نحن معهم فى اغلبية مقالاتهم
ولكن نحن مسلكنا اجتماعى انسانى


هذه عبارة حضرتك
والذي دائما أطالب به هو صياغة الأهداف التدوينة بشكل معلن بحيث تتلافى مثل هذه السلبيات وغيرها الكثير من الفوائد

ياسمين يقول...

ريمو الجميلة
انتى كلامك كله مظبوط هو خلط الأوراق و وضع المدونات كلها تحت بند سياسة ومعارضة
انما احنا ممكن نكون معارضة برضه لكن هدفنا هو الأسرة والمجتمع كنواة لكل بلد ديمقراطى

شكرا لتعليقك العميق يا ست الكل

ياسمين يقول...

IRC President
التصنيف انا مش بحبه برضه وكلنا نندرج تحت صفة مدون

لكن كل مدون بيبقى له اتجاه معين غالب على المدونة بتاعته زى بالظبط لما تقول على حد انه بيلبس كاجوال
هل دة يمنعه انه يلبس بدلة مثلا؟؟
لأ طبعا .. بس السمة العامة لملابسه الكاجوال

نفس الشىء فى التدوين تلاقى ناس تغلب السمة الأدبية على مدوناتها من قصة وشعر وخلافه

وكمان فى مدونات تغلب عليها الطابع السياسى المعتدل أو المعارض أو الناقد

وفى من يغلب عليها الطابع الإجتماعى وبتحكى عن مشاكل الآباء والأبناء والزواج والتعامل بين البشر

وفى مدونات فنية بتقدم صور فوتوغرافية أو لوحات

وبعدين التدوين احنا ما اخترعناهوش
التدوين موجود منذ الأزل وكل اللى حصل ان التدوين انتقل من الصفحات الورقية الى الصفحات الألكترونية

الكتابة نفسها والصحافة مصنفة
فى كتابات أدبية وكتابات سياسية وكتابات اجتماعية وكتابات علمية وكتابات ناقدة .. الخ
وتحت كل دة هتلاقى مليون تصنيف كل نوع من دة تحته عدة انواع اخرى

دة اللى أنا درسته فى كلية الأعلام

لكن دة عمره ما منع كاتب أدبى زى احسان عبد القدوس مثلا من انه يكتب مقال على المقهى فى الشارع السياسى
وكانت مقالات سياسية
ولم يمنع مصطفى أمين الناقد المعارض من انه يصدر قصص حب وغرام

التصنيف موجود لكن التدوين هو اللى حر

وعلى فكرة صحيح انا اقترحت انشاء جمعية مش نقابة لكن انا برضه هأرجع واقول ان أى حد هينفذ الفكرة انا هبقى معاه

تحياتى

ياسمين يقول...

محمد حمدى
ما دمت بقى مع صديقك العزيز فى رايك

روح اقرا تعليقى على كلامه
دة أولا

اما عن الصحفى المذكور فهو بصراحة فعلا جدير بالتجاهل
تحياتى

ياسمين يقول...

دنيا
نورتى عالم التدوين يا عزيزتى

الجمعية هيعلن قريب عن اهدافها بس أول حاجة احنا عارفينها ان كل مدون مهما كانت اتجاهاته له الحق فى الإشتراك فى الجمعية
وكل مدون برضه له الحق فى الإمتناع عن الإشتراك أو حتى عدم الإعتراف بها أو الإنسحاب منها وقتما يشاء
ومبسوطة انك زرتينى
تحياتى

ياسمين يقول...

Iron Cobra
رحت قريت الوست عند وائل

أشكرك فعلا

ياسمين يقول...

نادين
سعدت جدا بإهتمامك وتعليقك
وانتى فعلا عندك حق
هذا الشخص لا يستحق سوى التجاهل
ومدونتى عنوان الإعتدال فى كل شىء

نورتنيى يا قمر

ياسمين يقول...

شارم
الجمل لم يعتذر طبعا رغم ان كل كلامه مفبرك

دى طبيعة
تحياتى

ياسمين يقول...

محمد الجرايحى
اشكرك جدا
نورت المدونة
وأرجو ما تكونش الزيارة الأخيرة

تحياتى

ياسمين يقول...

مايكل
ماتخافش علية يا مايكل
عمر الشقى .. بقى
:)
بس تعرف بينى وبين نفسى مبسوطة ان لية اصحاب حلوين زيكو
الواحد مش ممكن يخاف وحواليه ناس حلوة بتحبه

تحياتى لك يا صديقى

ياسمين يقول...

نوهاز
انتى عندك حق انا لازم امسح اللينك بتاعه من عندى

تحياتى لك يا صديقتى العزيزة

انا عارفة انتى تقصدى مين

كلهم مدونين يا عزيزتى وفيهم الحلو وفيهم الوحش
ليه؟
عشان احنا بشر

ياسمين يقول...

مدونة كسبان
يعنى لو اتقبض علية مش هيهمك
طيب
وكمان هتبوظ المدونات
طيب
:)))
نورتنى

ياسمين يقول...

غزالى
انت تنور يا باشا فى اى وقت
تقول ما تقولشى
برضه منور

ياسمين يقول...

محمد سمير
طب تصدق بدأت اسامحه خلاص لما عرفت انك جيت عن طريق المقال بتاعه
نورت المدونة ويارب ما تكونش دى آخر مرة

تحياتى

ياسمين يقول...

سفاح كرموز
صديقى العزيز
واحشنى

انت جبت المفيد
احنا مش مدونين سياسيين ومش دى سكتنا لكن دة لا يمنع ان لنا رأى
الجمعية لازم تكون للجميع ومش مفروض تبقى لها صفة سياسية

وكمان عندك حق فى موضوع الفلفل
تحياتى

حسن توفيق يقول...

العزيزة ياسمين
كل الشكر على هذه المدونة الرائعة والتى شعرت اننى لست من مصر
اين نحن من هذا العالم لماذا لايكون هناك رابط بين المدونين المصريين ربما هذا تقصير منى ولكنى مشترك فى مجموعة المدونيين العرب مثلا فلماذا لا تصل رسائل عبرها مثلا للمشاركة مثلما يفعل الاخوة فى الاردن
كل الشكر وارجو دوام التواصل وادعوك لزيارة مدونتى وكل من يزور مدونتك لكم منى كل الشكر على الزيارة التى امل ان تتم فى اقرب وقت وربما تجدوا فيها ما يدعم افكاركم
واطلب منكم الدعم فى سباق افضل 100مدونة فانا الان رقم 10
وطبعا لو ساعدتونى مثلما يساعد الاخوة المغاربة بعضهم البعض سوف نصل الى ما هو افضل
كل المطلوب اضغطى على الايقونة فى كل زيارة ولك كل الشكر

bos bos يقول...

عزيزتى يا سمين أنا فعلا شفت المقال ده وتخيلت أنك شفتيه وشايفة أنك تتجاهلى الموضوع لأن اللى كتب الكلام مش عارف أصلا هو بيتكلم عن أيه ولا بيكتب أيه
فالأحسن أننا ما نديش له أهميه
تحياتى لكى

مـحـمـد مـفـيـد يقول...

العزيزه ياسمين

استغربت جدا لما كتبه هذا الشخص
ومن الواضح انه حب يلفت الانتباه له ولمدونته وقال اقول واجيب سيره مدونين معروفين ولهم وزنهم علشان الناس تقرأ مققالي
فطبعا ازاي تفوتوا ياسمين

تحياتي

ياسمين يقول...

شريف
انت مش ملاحظ انك برضه مارديتش على البوست
:))))

ياسمين يقول...

عصفور المدينة
فهمتك
لكن الموضوع مش محتاج صياغة
لو دخلت مدونة أى حد من اللى أسماءهم ذكرت فى المقال هتعرف على طول انها مدونة سياسية معارضة بحتة

ولما تدخل عندى مش هتلاقى كلمة واحدة فيها سياسة

وعموما آدينى وضحت
تحياتى

ياسمين يقول...

حسن توفيق
سوف نناصرك طبعا بكل ما فينا من عزم بس ممكن تدينى اللينك اللى فيه التصويت عشان أنشره عندى؟

تحياتى

ياسمين يقول...

بوس بوس
شكرا لإهتمامك يا سكرة
تحياتى

ياسمين يقول...

محمد مفيد
تعليقك جميل زيك والله
تفتكر هو كتب اسمى عشان كدة؟
اشك
هو عارف كويس ان فكرة الجمعية هى فكرتى
وهو عارفنى كويس
وعارف كمان ان الأسماء الأخرى التى وردت فى المقال هم من المعارضين لفكرة الجمعية
وكل ما يميزهم أنهم تم القبض عليهم او تحت الطلب
تفتكر ايه قصده؟
كأنه عايز يقول ان فى خلية سرية احنا مشتركين فيها وعاوزين نعمل انشطة سياسية
مع انى لا اكتب فى السياسة وان كنت مارستها خارج حدود المدونة وعلى ارض الواقع
تحياتى

IRC President يقول...

أنا مقولتش لو كانت نقابة أو جمعية أو رابطة، أنا قصدي عدم التصنيف تحت الإطار المنظم

يعني التصنيف الوحيد يكون مدون

إنما أي حاجة فرعية في هذا التنظيم هيأدي إلى التشرذم أو المتاجرة والمزايدة بالتدوين وما إلى ذلك من وسائل البشر الهدامة لكل شئ ناجح

loumi يقول...

العزيزة ياسمين
ده مجرد
اثبات متابعه
بس بجد فى ناس ما تستاهلش ان الواحد يوجع دماغه بيهم
زى ما قلت كل انسان توجهاته باينه من كتاباته
وربنا معاك
تحياتى

look_do يقول...

ازيك ياسمين
ماتزعليش نفسك
ومتخافيش
احنا كلنا معاكي

بس انا شايف ان ذكره لمدونتك
بيحقق معرفة اكتر لمدونتك
وفيه ناس دخلت من
خلال مقاله
وشافت المدونة بتاعتك
وشافت اتجاهها

حاجة كمان
فاروق
مش بس صاحب
خواطر شاب غاضب
ده كمان
صاحب مدونه
الشيطان يعظ
ومش عارف ليه هو انكر مدونته
مادام مش مقتنع بأفكارة ولا باللي بيكتبه
يالا ماعلينا

حاجة اخيرة
ما اعتقدش ان فاروق
يقصد انه يضايقك
أو يسبب ليكي ازعاج
هو ممكن يكون افتكر انه كده بيخدمك
يعنى عشان بيكتب عن مدونتك
أنا فعلا متأكد من فاروق ما يقصدش انه يسبب ليكي قلق
وخاصة انك حاطة لينك المدونة بتاعته عندك
وكنتي بتزوريه في المدونة
فعلا مااعتقدش انه قاصد يسبب قلق أو ازعاج

يالا بقى
ربنا يهديه ويهدي الجميع
وماتزعليش

Hannoda يقول...

بصراحة يا ياسمين أنا بقى من يوم ما بطّلت أقرى أي أخبار عن اللقاءات حسيت بالإنهزام .. مش عارفة مصيرها بقى ايه.. وليه إتوقّفتوا عنها.. لإنها بجد كانت مظهر يفرّح و وحتى إن كان فيه بعض العثرات فأكيد التجارب بتاخد وقتها لحد ما تنجح

أنا مالحقتش أدخل على اللي نكات اللي حاظاها.. لما أدخل حاجيلك تاني

بس أنا كان نفسي بجد من فترة أسأل عن مصير اللقاءات و البوست ده زقّني

أحمد سلامة يقول...

انا قريت البوست ده من يومين كده وعلى ما اجريت اتصالاتي السلكية واللا سلكية وفحصت واستمحصت تبين لي الاتي
ولا يهمك يا سكاي
اللايت جاي جاي غصب عن الجميع
اتجاهات انسانية اتجاهات سياسية يعملوا اللي يعملوه
بدأ الطوفان
واللي مبيعرفش يعوم
يتعلم
واللي ممعهوش مايوه
يستلف
والمصري اليوم
تمسك نفسها شوية عشان ماتحصلش اللي قبلها
---------------

reri يقول...

هو طبعا غريبه إن ياسمين تتحط مع وائل عباس ومنال وعلاء ومالك والأسد لأنهم مدوناتهم سياسيه ... وأنا شخصيا بحب أتابعهم جدا وبحترم آرائهم وبحسها نبض الشارع
أما ياسمين فتحس إنها إتحططت غلط في المقال ولن أقول عن قصد لأن النوايا لا يعلمها إلا الله
يعني هي لون تاني خالص
وأمن الدوله مش عبط .. هم كده كده بيراقبوا المدونات ... يعني مش مقال هو اللي هيخليهم يأذوا لأنهم ببساطه لو شافوا مدونة ياسمين مش هيلاقوا غير مدونه إجتماعيه لها لون مختلف تماما عن المدونات الأخري

أما بقي الجمعيه فبرده أمن الدوله عارف عارف ومش محتاج برده مقال يعرفه

ياعم دول بيعرفوا دبة النمله
:)))))))))

أنا قلت الكلام ده عند إيلاري وبكرره ليكي يا يا سمين
وبعدين ما إنتي عارفه وأنا عارفه
إمتي اللقاء بقي

سلاماااااااااات يا جميل

IRC President يقول...

عموما لدعاة تجاهل

شوفو الصحيفة الجنائية يتاعت صحفي السوابق ده

http://resstlesswaves.blogspot.com/2007/04/blog-post_30.html


وبرده

http://www.almasry-alyoum.com/article.aspx?ArticleID=61938

ده ينفع معاه تجاهل؟ ولا الفضح والتجريس؟

AZ يقول...

سلاموز يا موداما
كيفك كده؟
بقال زمان مجيتش هنا
وللاسف انا داخله اعترض
مينفعش يبقى فى نقابة للمدونين احنا كمده بنعمل لنفسنا زمارة رقبة وبنديها للحكومه... يعنى انتوا عايزين تعملوها عشان تدافعوا عن حقوق املدونين لكن فى احيقه هى هتودى المدونين فى داهيه لان الجمعيه او النقابه دى هتعملهم كيان يمكن حكمهم من خلاله ومسائلتهم قانونيا ومواويل اغلب المدونين مالهمش فيها
انا واحده من الناس عامله بلوج عشان اشخبط فيها بدل الكشاكيل لا عشان اعترض ولا عشان اصلح الكون.. وفى زيى ناس كده كتير.. ومعتقدش ان اى حد من الناس الىل زيى هيحب يحط كشكوله فى نقابه
مفيش نقابات للكشاكيل

شيماء الجيزى يقول...

العزيزة ياسمين

طبعا انتى عارفه انى من اوائل الناس الى شافت المقال والى كمان شوفت ردك فى مدونتك والى احسنتى طبعا الصنع فى وضع الرد هنا ..لعل وعسى الناس تفهم ان ده كله من تأليف الكاتب
وبطن الشاعر هى الى اكلمت مش الحقيقه

...........

هاجى لتفسير المقال زى مقالت ياسمين وزى مقولتلها انا ..انه هو بكده وضح ان فكرة الجمعيه هى فكرة ذات إتجاة سياسى
او تشبيهها كأنها حركة سياسية او تنظيم سياسى
وانا بصراحه مش قادره اعرف او افهم ليه؟
هل لأن الآن الى بيتحدث عن السياسه بيكتسب شهرتها ؟
ام ماذا؟
ورغم الفكرة الى قمتى بطرحها كانت بغرض جعل للمدونين مجتمع اجتماعى يهتم بيهم
ويدعم تواصلهم
لكن فى هذا المقال تم تحريف الفكرة تماماً
...........
ثم انى لو وضعت نقد لما قدمه فى مقاله
مش عارفه اقول ايه؟
هعطيه نسبة مرضاش بيها ...وبالتالى مش هيكون فيه نسب
وللاحسن انى مذكرش
لكن الى اقوله ليكى
انه هنا فى خطأ كبير ..لازم يتم التعامل معاه
لأن المصرى اليوم كلنا ..(كنا) بنحبها
لكن ومش علشان المقال ده
فى غيره وقبله كتير
...................
اما ليكى يا ياسمين
انتى قويه قوى ولازم متتخليش عن فكرتك
ولا عن رأيك
تحياتى القلبيه
واسفه انى طولت

harmless يقول...

‏- من اين اتتك الحكمه يا ثعلب؟
‏- من رأس الذئب الطائر

حد برضو يزعل ياسمين المحبوبه صاحبة اكبر شعبية؟؟!!!!‏

يمكن غشوميه وما يقصدش؟
يمكن مبدأ ان الشهرة ما بتجيش الا من الخبط فى الكبير؟
يمكن حيحصلى ايه يعنى ماهى بايظه بايظه؟
يمكن حاحقق اهدافى وياسمين بتتصالح بكلمتين؟

على العموم
احنا مالناش دعوة باى حاجه تزعل ياسمين
احنا تبع الحكمه اللى فى اول الكلام
وادينا شوفنا اللى يزعلها بيحصل له ايه؟

sendbad يقول...

لك الله ياسيدتي
معلش كبري دماغك

بيجاسوس المصرى يقول...

اختى العزيزة ياسمين

قبل ان اترك تعليقى فكما قولت مرات ومرات ان لك الشكر والتقدير والتحية على كل ماتفعليه من اجل مجتمع التدوين

فلا يقدر احدا هذا المجهود الا عندما اخذتنى الفكرة لاعتزال التدوين فشعرت وقتها بقيمة ما تفعليه من اجل رقى و اخراج صورة اخرى للتدوين

فاتركى السفسطائية و الارهاصات جانبا و نحن معك فيما تفعلين و تقترحين فأنتى استطعتى ان تصنعى مجتمعا من المدونين يحملون جنين الامل و النور بين احضان الحياة

وشوشني يقول...

اهلا يا ياسمين اولا انا دخلت عند حد فاهم حاجه قبل هنا بس انا الحقيقه لسه مش فاهمه اوووي
بس اهم حاجه ان لازم يكون في اي حاجه قريبه نشوف بعض ان شاء الله قريب كده

gohayna يقول...

ياسمين انتي زعلانه ليه يا بنت الحلال

؟

بصي فيه حجات في الدنيا دي تستاهل ان الواحد يعملها وزن ويزعل عليها

وفيه هوامش وجودها او عدمه ميفرقش ابدا معانا

المشكله فيكي يا قمر

انتي بزعلك دا عملتي للهوامش قيمه

ودا الي كانت بتدور عليه

عشان تظهر

عارفه البلاب
اهي نفس الفكر التسلقي وباي طريقه

المهم الوصول

فيه ناسس بتوصل صح لقلوب الناس

وفيه ناس بجهلهم بقفلوا الابواب في وشوشهم


اوعي تقعي في الفخ ياسمسم هو دا الي عايزينه

انهم يضعفوا روحك المعنويه

كفايه جدا انك عندنا وعند الناس الي بيحبوكي رئيسه المدونين بالنتخاب والتزكيه وبكل حاجه

متزعليش نفسك يا قمر

والله
والله كمان مره مافيه حاجه ابدا تستاهل الواحد يزعل نفسه عليها

خليكي حلوه زي ما انتي واوعي اي حاجه عبيطه زي كدا تزعلك

انتي اكبر من كدا بكتيييير

ما تيجي تتغدي عندي

فركه كعب من مصر للكويت

ما تيجي

ياسمين يقول...

IRC President
أنا أوافقك تماما ان احنا جميعا بنتكلم وبنكتب تحت عنوان مدون
ومهما كانت اتجاهاتنا واساليبنا فى الكتابة برضه بيجمعنا التدوين

تحياتى لك واشكرك على المجهود اللى انت بذلته فى الموضوع دة

انحنى وارفع القبعة لزميل عزيز يهتم بزملائه

ياسمين يقول...

لومى
منورة البلوج يا سكرة التدوين كله

ومتابعتك وسام على صدر مدونتى

تحياتى

ياسمين يقول...

look_do

تصدق انى عرفت اول ما دخلت على مدونة الشيطان يعظ انه هو صاحبها برضه
وقلت الكلام دة لبعض المدونين بالفعل

نفس الأسلوب

هو مش ذكى كفاية على فكرة عشان بيستهتر بذكاء زملاءه

وعلى رايك ليه عمل مدونة جديدة؟؟
يمكن عشان ناس كتير قاطعت المدونة الأولى؟؟

نورت المكان
تحياتى

ياسمين يقول...

هنودة
اللقاءات تأجلت ولم تتوقف
لظروف الدراسة والأعياد والإمتحانات

أوعدك ان يبقى فى لقاء قريبا انشاء الله

تحياتى لصديقتى الحبيبة هنودة

ياسمين يقول...

AZ

نورتى المدونة
وارحب بكل رأى حتى لو مخالف
تحياتى

ياسمين يقول...

أحمد سلامة
عجبنى قوى كلامك الساخر اللاذع

بدأ الطوفان
واللي مبيعرفش يعوم
يتعلم
واللي ممعهوش مايوه
يستلف

:)))))

بجد ضحكتنى يا دكتور
ونورتنى يا دكتور

ياسمين يقول...

ريرى
كلامك كلع مظبوط
ايه اللى حطنى معاهم؟
صاحب المقال

هم طبعا مدونين لا غبار عليهم وماحدش يقدر يقول غيركدة
بس ايه علاقتى بيهم؟؟
كلنا مدونين

هل فى حاجة غير كدة تربطنا؟؟
لأ

هل بنتقابل وبنتفق على موضوع الجمعية؟؟
لأ

هل حضر أيا منهم اللقاءات؟؟
برضه لأ

طب أمال في ايه؟؟
مش عارفة

نورتينى يا سكر

ياسمين يقول...

شيماء الجيزى
انتى شرحتى الموضوع احسن منى والله يا شيماء

اشكرك يا صديقتى العزيزة
وربنا يخليكى لية
:)
انتى سكر

ياسمين يقول...

هارملس
مش عارفة اقولك ايه؟
كلام جميل وكلام معقول ما اقدرش اقول حاجة عنه

:)))
تحياتى

ياسمين يقول...

سندباد
شكرا لك يا عزيزى
تحياتى

ياسمين يقول...

بيجاسوس المصرى
أشكرك على تشجيعك لى
كلماتك المشجعة تركت أثرا كبيرا فى نفسى

وحقيقى انا بازعل قوى لما ألاقى مدون بيعتزل وبأحس ان اسرتى الجميلة نقصت فردا منها

تحياتى لك وشكرا لتشجيعك وربنا يكتر من اللى زيك

تحياتى

ياسمين يقول...

وشوشنى
نورتينى يا سكرة
ولو قريتى بعض التعليقات هتعرفى الحكاية

تحياتى

ياسمين يقول...

جهينة
وحشتينى قوى يا حبيبتى
بجد وحشتينى
رغم ان التدوين بيقربنا الا انى برضه بحس انك بعيدة عن ارض مصر الحبيبة
وبحس انك وحيدة
وبحس انك حاسة بالوحشة وانتى بعيد عن حضن البلد

كلامك حلو زيك
ربنا يخليكى لينا لكنا وما يحرمش التدوين من الناس الحلوة اللى زيك
انتى قلبك حلو قوى يا جهينة
بجد قلبك حلو قوى
تحياتى

The Groom يقول...


اعملي حسابي معاكم ان شاء الله

ellithy يقول...

nice blog
congratulations

MY blog is :


http://aglocohits.blogspot.com/


it contain :
-agloco updates in arabic
-instant answers about agloco in arabic
-detailed explanation of agloco
-explanation how to register
-translation of your images to arabic


please add it to your blog list and reply to me as soon as possible