الاثنين، 6 يوليو، 2009

بيقولوا : الستات فى مصر واكلينها والعة

ملحوظة: السى ان ان ارابيا تذكر التدوينة فى اللينك التالى

http://arabic.cnn.com/2009/entertainment/7/8/blogs.8july/index.html


أوضاع المرأة المصرية بالأرقام والإحصائيات من الجهاز المركزى للتعبئة والاحصاء - سبتمبر 2008

- بلغت نسبة الذكور 51,1% فى تعداد 2006 من عدد السكان ونسبة الإناث 48,88% وانخفاض متوسط عدد أفراد الأسرة فوصل إلي 4,18%
السنة
2007
الذكور
37097
الاناث
35635
الاتعداد الكلى
7273

مما يفهم منه ان الإناث فى مصر عددهم اقل من الذكور ... المعلومة لمن يقولون ان التعدد واجب لأن عدد النساء أكتر من عدد الرجال

بلغ عدد المتزوجين 29,189,966 في تعداد 2006 بنسبة 62.69 من السكان في سن الزواج وبلغ عدد حالات الطلاق 437,953 وبلغ عدد حالات الترمل 2,942,709 بنسبة 6.32 % من السكان في سن الزواج.

ردا على من يتقولون بأن تحرر المرأة وخروجها للعمل وقانون الخلع ضاعف حالات الطلاق

بلغت قوة العمل بلغ 246 مليون فرد خلال الربع الثانى من العام الحالى بزيادة قدرها مليون و119 الف فرد على نفس الفترة من عام 2007 . كما بلغ حجم قوة العمل بين الذكور خلال تلك الفترة 19.172 مليون فرد بزيادة قدرها 762 الف فرد بزيادة قدرها 4.1% وحجم قوة العمل بين الاناث 5.461 مليون فرد بزيادة 257 الف فرد عن نفس الفترة من عام 2007 بنسبة 4.9% حيث وصل معدل المساهمة فى قوة العمل بين الذكور بلغ 72% ومعدل المساهمة فى قوة العمل بين الاناث بلغ 21.4% مقابل 71.5% للذكور 21.1% للاناث عن نفس الفترة


الفقرة دى للى بيقولوا ان خروج المرأة للعمل يضيع فرص الذكور فى الحصول على وضائف

- نسبة النساء المشاركات في سوق العمل تصل الى ما يزيد على 3 ملايين امرأة، أي ما يزيد على 20% من قوة العمل في المجتمع، والتي تزيد على 16 مليون عامل.تعداد الإناث يقبل عن تعداد الذكور منذ عام 1997فى جميع الأعمار ... سواء فى سن الزواج أو فى الطفولة أو فى الشيخوخة

ردا على من يتقولون ان النساء عمرهم أطول فان متوسط عمر النساء يزيد عن متوسط عمر الذكور بمعدل5%وهى من أقل النسب فى العالم

-واحدة من بين كل 3نساء تتعرض للعنف الأسرى ،غالبية مرتكبى العنف ضد المرأة من الأزواج

- النساء خارج قوة العمل (الرسمية) يقترب عددهن من 20 مليون امرأة.

- نصف هذا العدد (حوالي 10 ملايين امرأة) يعملن أعمالاً غير منظورة في القطاع الهامشي (المشاغل، الزراعة، البائعات الجائلات، الشغالات .. إلخ).

- يقترب عدد الفلاحات المصريات من 8 ملايين فلاحة يسهمن بما هو أكثر من 40% من إنتاج الحاصلات الزراعية.

- ارتفعت نسبة الأسر التي تعولها النساء من 225% من الأسرة المصرية إلى 315% أي أن ثلث الأسر المصرية تقريباً تعولها النساء بخلاف اناث تشارك الرجل فى الإعالة

انا بقول تقعدوهم فى البيوت وتريحهوم وتصرفوا عليهم بنفسكوا

- نسبة الأمية لدى النساء تصل إلى 62.5% من إجمالي عدد النساء في مصر.

- نسبة النساء المصابات بالأنيميا تتراوح بين 17% و63% حسب درجة خطورة المرض.

- إن نسبة النساء المعرضة للإصابة بالاكتئاب تبلغ 76% (بينما النسبة عند الرجال 24%).

الاناث تهمل فى العناية الصحية والنتيجة انيميا ... عبارة غبية بتتقال للمرأة الحامل ،ما كل الستات بتحمل من زمان اشمعنى انتى اللى تعبانة

احب اقولكوا ان كل الستات بتتعب فى الحمل ، حملته أمه وهنا على وهن

الإكتئاب سيطر على اغلبية الإناث نتيجة المعاملة السيئة والعنف الذى تتعرضن له

مايقرب من70%من الفقراء فى العالم اناث ... لأ صحيح واكلينها والعة و مخلصين على فلوس الرجالة



هناك 85 تعليقًا:

magi يقول...

بصراحه ارقام تخض 62% نسبه الاميه فى الستات صعبه اوى ده معناه ان اقل من 40% متعلمات ومبتكلمش هنا عن الشهاده الجامعيه ده اى تعليم ولو حتى القراءه والكتابه
جاتلى حاله اكتئاب بجد

أسوور يقول...

طبعا يا ماجى احنا هنا بنتكلم على القراية والكتابة اصلا

واديكى اصبحتى من ضمن النساء المعرضات للإكتئاب ... كلنا بصراحة

:)))

الإحصائيات من جهة حكومية

وعجبنى قوى ان الرجالة اكتر من الستات عشان كل اللى عايز يتجوز على مراته يقولك اصلى بشارك فى حل مشكلة العنوسة

تحياتى يا سكرة التدوين

beautiful mind يقول...

استذه اسر
ازي حضرتك
بالله عليكي بلاش تغيبي عننا كتير كدا

فعلا زي ما قولتي الستات واكلينها والعه

والاحصائيات خير دليل

احنا خلاص هنقعد في البيوت قريب

يارب يدخلوا البنات الجيش زينا كدا هههه

عموما متميزة والله دايما والموضوع في غاية التميز سلمت يداك

تقبلي مني خالص التحيات

قبل الختام بسطر

طلب صغنون يا استاذه اسر

ياريت حضرتك بس تلغي تدقيق الحروف في التعليقات

علشان بيضيع منا وقت واعتقد انه ملوش لازمه

يلا في رعاية الله دايما

أسوور يقول...

beautiful mind

طلبك مجاب يا باشا

بلاش فضايح يقول...

الستات فى مصر مظلومين والله
دى حتى محصلتش نص المجتمع زى مبيتقال عليها
الرجالة اكتر حتى فى العدد
أتاريهم عمالين يتأنتكوا على كل عروسة شوية
عارفين ان الأحوال بقت سيئة

تحياتى

micheal يقول...

دائما يا اسر بحب لغلة الأرقام وأحترمها لانها لا تعرف الكذب
ودايما بتدعن أي موضوع وعشان كده بهتم بالاحصائيات والأرقام جدا في مجالات الرياضة وبالتأكيد أرقامك هنا كشفت الكثير من الأقاويل والادعائات
تحياتي

أسوور يقول...

بلاش فضايح

ايوة الرجالة عددهم اكبر وهيعنسوا لأن مفيش ستات للعدد دة ... يبقوا لازم نتعدد بقى

انا هأساهم فى حل مشكلة العنوسة الذكورية وهأتجوز واحد كمان ... مساهمة يعنى فى حل مشاكل المجتمع

:))))))))))

تحياتى ... نورتى

أسوور يقول...

مايكل

انا لما قريت الإحصائية اتفاجئت وبعدين دى من مركو التعبئة والإحصاء ... يعنى معلومات حكومية

وانا اصلى زيك كدة بحب الأرقام برضه ويمكن دة اللى بيعجبنى فى تحليلاتك الكروية

قلت يبقى لازم انشرها ولازم الناس تعرف الحقايق دى يمكن تغير بعض المفاهيم او على الأقل تساعدنا فى اللى بنحاول نعمله من توعية للمجتمع

شكرا يا صديقى العزيز مايكل

mohamed ghalia يقول...

الأرقام فعلا صدمتنى فى حاجات كتير
بس عامة البوست هايل
والمعلومات جديدة
دمتِ فى سعادة

أسوور يقول...

غالى

صدمتنى انا كمان ... عشان كدة قلت انشرها ... مش عارفة ليه الأرقام دة متتنشرش فى وسائل الإعلام

لو اطول انشرها فى مصر كلها كنت عملت كدة

نورتنى يا غالى

فتاه من الصعيد يقول...

ارقام صادمه ....... بس موش مفجأه لان فعلا الستات نسبتهم في العماله الهامشيه كتير ..... اما الوظائف فدايما بيفضلو الرجال في القطاع الخاص بسبب ظروف الستات من زواج وحمل وولاده وغيره ...... وده بيأثر بالسلب على وضع المرأه
شكرا للمعلومات ...... بوست رائع

blue-wave يقول...

طبعا واكلينها والعه:))

أحساس لسه حى ...أنا مش موافق يقول...

عزيزتى

انا عاوز اسالك هو التعددية فرض على المراه وبتفرض عليها ولا هى اللى بتختارها بمزاجها

اظن هى اللى بتختارها لاسباب تخصها بس

وكل انسان حر وكل واحده حرة

واللى بيطالبوا بكده علشان العنوسة لان الراجل العانس هو اللى بيختار كده لنفسه بمزاجه لاكن المراه مش بتختار عنوستها

وفيه بتفضل تكون زوجه تانيه عن كونها عانس والواقع بيقول كده

اما الارقام بتاعت العمل واسباب الطلاق فالارقام لا تنفى السبب برضوا حتى لو فيه اسباب اخرى


الفقرة دى للى بيقولوا ان خروج المرأة للعمل يضيع فرص الذكور فى الحصول على وضائف


برضوا الارقام مش بتبين ان بعض الفرص بتضيع بسبب خروج المراه للعمل وانا مش ضد ان المراه تعمل بس انا بتكلم عن تحيل الارقام ما اكيد لو مفيش امراه فى شغل معين هيكون مكانها رجل هو فى جنس تالت

والرقم ده دليل اللى حطاه

النساء خارج قوة العمل (الرسمية) يقترب عددهن من 20 مليون امرأة

بس معاكى حق كل شوية بتزيد الستات اللتى تعول الاسرة

وبقه فى رجاله كتير بتستهبل وترمى الحمل على الست

بس معظم ده فى شريحة معينة من الاسر

والاكتئاب على كل الناس ويمكن اللى النسبة عاليه من الستات علشان العنوسة اللى بقيت حمل على المراه والام المصرية

اتكلمت على البوست بس مخرجتش عن الموضوع اهو

سلام

kareem يقول...

اسر

انا اول واحد راضي اني اعنس طالما عددكم اقل بالشكل ده

أسوور يقول...

فتاة من الصعيد

واضح انك قريتى التقرير بتمعن

الستات اقل فى كل شىء حتى فى العدد

وبرضه لسة بيقولوا اننا واكلينها والعة

نورتينى يا عزيزتى

أسوور يقول...

blue-wave

شكلك مقريتش التدوينة وعلقت على العنوان

شكرا

أسوور يقول...

احساس لسة حى

شكرا لتعليقك المبذول فيه جهد

هأنتظر موضوع نتفق فيه

شكرا لك

kareem يقول...

65كرسي في مجلس الشعب و خلع و اسيمه طلاق مشروطه و قاضيه و نايبه و ماذونه ايه كل ده مش عاجبكوا

طب نخلف احنا عشان نريحكوا من دي كمان ولا ايه

محمود المصرى يقول...

بسم الله الرحمن الرحيم

هو حضرتك معترضة على التعدد ؟ التعدد مباح بنص شرعى وهو الاصل فى الزواج ولا علاقة له بالاحصاءات او النسب المئوية , ولم يقل احد انه واجب لكن مباح بغض النظر عن رأى الجهلاء الذين يضعون له شروط من خيالهم .

محمود المصرى يقول...

انا هأساهم فى حل مشكلة العنوسة الذكورية وهأتجوز واحد كمان ... مساهمة يعنى فى حل مشاكل المجتمع


كلام فى منتهى الاستهزاء بالشرع والقران ياريت تحاسبى شوية فى كلامك وتعقلى ما تقولى يا استاذة

أسوور يقول...

كريم

والله فكرة ... بس متنساش ان لك بنت

تحياتى

أسوور يقول...

محمود المصرى

شكرا للتوضيح .. وشكرا للاسلوب الراقى فى عرض الرأى

وان كنت فظا غليظ القلب لانفضوا من حولك

نورت المدونة

محمود المصرى يقول...

بسم الله الرحمن الرحيم

وطبعا لما حضرتك تسته.ئى بالشرع دى من رقة قلبك ورقى اسلوبك؟
حضرتك لم تكلفى نفسك حتى بالتراجع عن الخطأ فقط حولتيها لحرب بينك وبين الارهابى المتطرف اللى اسلوبه وحش .
ماشى ربنا يهدى الجميع انا لله وانا اليه راجعون

أسوور يقول...

محمود المصرى

انا رديت عليك بمنتهى الذوق رغم انك هاجمتنى باسلوب مش حلو ولا حتى الاسلام بيعلمنا كدة

وقلت لنفسى انك فى النهاية راجل ومش هتفهم احساس الست اللى جوزها بيتجوز عليها ... ولقيتك عصبى فمحبتش اجادلك

واكيد هيكون فى نقاط نتلاقى فيها

على فكرة انا عمرى ما قلت على اى حد له رأى انه ارهابى .... ارهابى ليه يعنى هو انت ماسك سكينة على رقبتى وبجبرنى على رأيك؟؟؟

صحيح اتكلمت بعصبية لكن مقلتش لفظ خارج ولا وجهت لى سباب زى ما البعض بيعمل

انت زعلان ليه يا محمود ... كلنا فى نفس البوتقة ... وكلنا من نفس البلد ... وانا وانت على نفس الدين

تأكد ان فى حاجات كتير بتجمعنا رغم اننا اختلفنا فى النوع ... فأنت ذكر ... وانا أنثى

بجد نورت المدونة وبدون اى سخرية زى ما انت فكرت ... يا اخى انت ضيفى ولا يمكن ان اهين ضيفا مهما فعل ... الشخص الوحيد اللى طردته من المدونة وطلبت منه ميجيش تانى من 5 سنين تدوين .. هو شخص يدعى بسطاويسى ... لأنه كان بيشتمنى وبيشتم ناس من زوار المدونة

تحياتى

محمود المصرى يقول...

بسم الله الرحمن الرحيم

طيب خلينا ناخد الموضوع بالعقل
هو الراجل لما يتجوز على مراته مش هايتجوز واحدة ست برضه؟ ياترى احساسها بيكون ايه وهى بتتجوز ؟اكيد بتكون مبسوطة وفرحانة , رغم انها فى زواجها دا قبلت بالتعدد بدون اى غضاضة , يبقى التعدد فى ذاته مش مخالف ولا مناقض لطبيعة المرأة لكن اللى بيضايق المرأة هو ان زوجها بيتجوز عليها مش التعدد اتمنى ان النقطة دى تكون واضحه .
هل هذا الشعور بالغيرة طبيعى ؟ ايوة طبيعى لكن هل هو سبب لتحريم التعدد ؟ لا طبعا بدليل - وحضرتك ام واكيد لاحظتى الحكاية دى - الطفل الاول بيغير من اخوه اللى اصغر منه لانه بيحظى باهتمام اكتر او الاهتمام به كطفل اكبر بيقل بالتدريج , هل دا سبب كافى لمنع الانجاب اكتر من طفل ؟ اكيد لا .
نقطة تالتة وهى الاهم احنا مسلمين يبقى لما نتكلم عن الحلال والحرام مرجعنا الكتاب والسنة مش مرجعنا الاهواء والرغبات الشخصية والمزاج , لأن اكيد ربنا يعلم من خير البشرية مالا نعلمه يبقى ما دام ربنا اباح شىء لا يصح اننا نحرمه بقياس حتى لو كان هذا القياس حضرتك تظنى انه قياس عقلى لأن صحيح النقل لا يتعارض مع صريح العقل .
طيب ممكن حضرتك او غيرك تعترضوا وتقولوا انا مش عاوزة زوجى يتزوج عليا نقول وماله فى حاجة اسمها اشتراط على الزوج فى العقد انه لا يتزوج عليها ودا على مذهب الامام احمد شرط صحيح .
لكن لى رجاء بس عند تناول الامور الشرعية نتحرى انتقاء الالفاظ والتشبيهات وايضا من الافضل مراجعة المصادر الشرعية وياريت مانستكبرش اننا نقرأ لعلماء الفقه زى بالظبط ما حضرتك لا تستكبرى انك تراجعى دكتور فى اى امر طبى اشمعنى الدين لا نؤمن بأن فيه علماء ؟
تحياتى

غير معرف يقول...

انت غريب قوى طب ما تجيب عدد الستات الى من سن 18 الى ما فوق سن التلاتين الى متجوزوش عشان نعرف يا ذكى ينفع التعدد ولا لأ

غير معرف يقول...

مبترديش ليه يا استاذه اسوور

أسوور يقول...

محمود

ممكن تدينى الإيميل بتاعك؟

أسوور يقول...

غير معرف

للأسف الاناث فى سن الزواج اقل عددا برضه

وبعدين فى كذا احصائية ... مهتمين ليه الرجالة بالنقطة بتاعة التعدد على الخصوص؟؟

اطيب التحيات

محمود المصرى يقول...

thelethal2@yahoo.com

Bella يقول...

يعني لازم تقلبي على المواجع وتنكشيني وانا بقالي فترة ماليش مزاج ادون

تصوري بعد كل الارقام المذكورة دي وفيه ناس مازالت بتطالب المرأة بالعةودة للبيت لتوفير فرصة عمل لرجل مكانها

مش عارفة اقول ايه صراحة

المؤسف ليس المجتمع الذكوري فقط ولكن نساء هذا المجتمع الذكوريات اكثر من الذكور بمراحل

تحياتي

أسوور يقول...

محمود المصرى

كيف لأم تشعر بالقلة والدونية ان تربى اطفالا اصحاء

المثل اللى انت بتضربه للأخوات مثل بعيد لأن صلة الدم والجينات برضه بتفرق ورغم ذلك اعرف اخوات قتلوا بعض بسبب التفرقة والغيرة

الأسرة فى الإسلام هى نواة المجتمع واكثر ما اهتم به الإسلام هو تربية النشء على العدل والحب والتسامح والإخاء

الزوجة ... الأم ... هى امرأة وليس امامها فرصة للحصول على رجل الا زوجها بينما الزوجة الأخرى عادة ما تكون بلا زوج وأمامها كل رجال العالم

والمطلقون كثيرون والأرامل كثيرون ... اذا كانت مطلقة او أرملة .. وامامها كل رجال المسلمون ان كانت لم يسبق لها الزواج ... فلماذا تختار رجلا هو رب لأسرة وزوج لأخرى وأب لأبناء ؟؟؟ لتأخذ من وقته وجهده وماله ما يمكن ان يفيد اسرته وأبناؤه

هقولك حاجة يا محمود بعيد عن الفلسفة والكلام دة ... الزوجة الثانية تندم لا محالة على زواجها من رجل متزوج ... الكلام عن خبرة

تحياتى

أسوور يقول...

بيللا

وحشااااااااااااااااانى جدا يا ست الكل

مش عارفة اقول ايه بعد تعليقك اللى بيقطر ألما

وحشتنا تدويناتك الجريئة

تحياتى

Bella يقول...

والله ياآسر الواحد زهقان من هذه العقليات المتعفنة مش فاهمة يعني ايه المطلوب من المرأة المصرية رغم انها مقارنة بالنساء العربيات تعتبر اقلهن تمتعا باي امتيازات وكل شوية والتانية نسمع تعليقات من عينة واخدين حقكم وزيادة والواحد يتلفت حواليه علشان يشوف فين الزيادة دي ويحاول يتصور امال لو مش وزيادة كان حالنا اصبح ازاي

واللى فارسني بقى حكاية جروب اقعدي في البيت وافسحي مجال للذكر ليعمل

وكأن ترك النساء للعمل هو الحل الوحيد لمشكلة البطالة في مجتمع لايريد ذكوره تنمية مهاراتهم اصلا ويتصورون ان خلو الساحة من النساء هو من سيجعل فرصة العمل ترتمي تحت اقدامهم

باين على ح ارجع اكتب عن الموضوع ده بالتحديد لاني مفروسة ع الآخر

القائد العام يقول...

-----------------------------------
المرأة ما خلقت الا من اجل الرجل ؛ ولما خرجت المرأة بسفورها وتزينها غضب الله على شعب مصر .
فتجد البطالة والتى لم نكن نسمع بها فى ايام الملكية المصرية .
تجدي الطلاق والفقر وكله سببه ان الرجل الجاهل يسمح لزوجته للخروج للعمل فظنا منه انها ستجلب له مال يساعده فى المعيشة . ولكن يفاجئ هذا الزنديق بان مرتبه ومرتب مراته بردة مش معيشينه بكرامة ويضرب كف على كف ليه ليه .
نسى هذا الزنديق ان الله رب العرش غاضب عليه لسماحة بخروج امراته للعمل .
بسماحة لزوجته بالعمل اضاع فرصة شاب فى ان يتزوج ويفتح بيت ويعف بنت من بنات المسلمين .
بسماحة لزوجتة للخروج للعمل فقد اباح فتنه تسير على الارض يفتتن بيها الشباب المتعطش للجنس .
ان غضب الله منزل عليكم لانكم سمحتم للمراة "الفتنة" للخروج للتعليم فى الجامعات وللعمل .
اسال الله رب الكون ان يهديكم يا شعب مصر وتكبتوا جماح شيطان المراة ذلك المخلوق الفاتن .
يارب تفهمي يا صاحبة الموضوع ...
ودة اميلي yourfreeman2006@yahoo.comاذا كنتى تريدين ان نتناقش فى هذا الامر واثبت لكي بالادلة القاطعة ومن الواقع صدق كلامى الشريف

Bella يقول...

المرأة ماخلقت الا من اجل الرجل

خروج المرأة للعمل هو سبب مصائب مصر؟؟

يعني الفساد المنتشر والسرقة والنهب وغيرها من المصائب المتغلغلة في جذور المجتمع لم تساهم في هذه المصائب ووحده عمل المرأة هو السبب

لاحول ولا قوة الا بالله

محمود المصرى يقول...

بسم الله الرحمن الرحيم

تعليقا على رد حضرتك الاخير

حضرتك بنفسك قلتى ان الاخوة قد يقتلوا بعض بسبب الغيرة والتفرقة رغم الدم الذى بينهم ,فهذا القول يؤكد منطقى ان كانت الغيرة لا تعد سببا لمنع الانجاب فكذلك لا تعد سببا لمنع تعدد الزوجات هذا ليس مثل بعيد لكن ان كانت الغيرة تفسد علاقة الاخوة وتغلب الدم فطبيعى ان تلعب دورها فى مسألة تعدد الزوجات ايضا .
بالنسبة لمسألة الدونية انا طبعا اتفق مع حضرتك ان المرأة ان شعرت بالدونية لن تقيم نشء صالح لكن اين هى الدونية فى التعدد ؟ او اين الدونية فى ان تطيع المرأة زوجها ؟ او اين الدونية فى ان تقبل المرأة بشرع الله ؟ بصراحة لا اقدر ان اربط بين الدونية وبين اى من الاشياء السابقة .
بالنسبة لقول حضرتك :
الأسرة فى الإسلام هى نواة المجتمع واكثر ما اهتم به الإسلام هو تربية النشء على العدل والحب والتسامح والإخاء

اتفق على ما قلتى حضرتك واضيف ان الاسلام يربى النشء على امور اخرى اضافة الى ما ذكرتيه حضرتك
لكن بما اننا وصلنا لنقطة التقاء نسأل انفسنا هل كان النشء الاسلامى فاسدا فى عهد رسول الله وقد كان التعدد هو الاصل عن الرسول وعند الصحابة ؟ او هل كان النشء ضعيفا فى القرون التى تلته وكان التعدد هو السائد فيها ؟ الاجابة بدون خلاف هى لا فلا علاقة بين التعدد وضعف النشء .
بالنسبة لنقطة ان الزوجة الثانية امامها كل رجال العالم والله انا متأكد ان كل من قرأ كلام حضرتك يعلم ان هذه الكلمة ليست موجودة فى الواقع حتى الرجل ولو كان شابا ووسيما وميسورا لا تتاح له كل نساء العالم ولا نصفهن ولا عشرهن والخيارات بتكون ضيقة جدا ولا يجد الا ما كتبه الله له .
وبعدين مين قال انها بتاخده من اسرته وما الى ذلك ؟
بس انا احب اوضح نقطة ان مجتمعنا المصرى لا ينتشر فيه التعدد وليس هو النظام الاجتماعى الغالب فلذلك نشعر فيه بغرابة .
بالنسبة لموضوع التدوينة الاصلى بعيدا عن هذه النقطة التى طال الحديث عنها انا اتمنى ان نحدد ما هى الحقوق التى يرى البعض ان الستات واخدين زيادة عنها او اللى شايفين بعض السيدات انهم مش طايلينها ؟ يعنى عاوزين نعرف اين الحد الفاصل بين النقصان والزيادة او حد التمام كما يقولون ؟ ولو تكرمتم ماحدش يقولى ان الحد دا يساوى حقوق الرجال اصل انا بكره كلمة المساواة بين الرجل والمرأة بصراحة خصوصا لما يكون الراجل حاله زى حال الرجالة فى مصر .
تحياتى للجميع

أسوور يقول...

محمود المصرى

سعيدة جدا بالمناقشة معك على فكرة رغم اختلافنا فى بعض النقاط

نظام التعدد كان موجودا قبل الإسلام وفى الجاهلية ايضا .. اذن التعدد ليس عادة اسلامية وليس شيئا فرضه الإسلام وانما جاءت آيات الله سبحانه وتعالى لتقننه وتلفت نظر الرجل لمسألة العدل واليتامى وهكذا ... حيث انهم كانوا قبل الإسلام يتزوجون بلا عدد وحددها الله فى كتابه الكريم بألا يزيد العدد عن 4 نساء ... وهو تعالى العليم الحكيم ببواطن الأمور ...

لاحظ الآيات الأولى من سورة النساء،قوله تعالى: { فانكحوا ما طاب لكم من النساء مثنى وثلاث ورباع فإن خفتم ألا تعدلوا فواحدة } (النساء:3)

وفي السورة نفسها في موضع آخر، نقرأ قوله سبحانه: { ولن تستطيعوا أن تعدلوا بين النساء ولو حرصتم } (النساء:129)
اذن فالآية الأولى تدل على أن العدل بين الزوجات أمر ممكن ومستطاع ولكن يأمر الرجال أن يمتنعوا ان وجدوا فى أنفسهم خوف من الظلم للزوجة.. في حين أن الآية الثانية، تنفي إمكانية العدل بين النساء، وتقرر بنصها أن العدل بين الزوجات أمر خارج عن مقدور البشر

لذلك انا اصرح لكل من يناقشنى من الأجانب ان الإسلام قنن التعدد ولم يكن هو الدين الذى يبيحه ولا هو من اختراع المسلمين ... وانما قيده الله بشروط حتى لا يكون هو الأساس فى الزواج كما كان فى الجاهلية

لما بنكتب يا محمود عن حقوق المرأة ... مش بنتكلم عن نفسنا على فكرة .. يعنى انا مثلا تركت عملى بمحض ارادتى من اجل بناتى رغم اصرار زوجى حتى الإن على نزولى للعمل ... الا اننى لم استطع ان اترك زهرتين بلا اب او ام طوال اليوم ... ولما التحقتا بالمدرسة قال لى زوجى انزلى الشغل بقى ... قلتله لازم البنات ترجع تلاقى حد مننا فى البيت وعمرى ما هأسيبهم للدادة تربيهم على الجهل والتخلف

انا بأتكلم عن نساء مهضومات الحق فعلا ... اعرف نماذج كتيرة ... ان الرسول امر بالرفق بالقوارير .. فهل هذا ما يحدث فى مجتمعنا الآن؟؟

على فكرة انا برضه بكره كلمة المساواه دى ... خلينا نقول مظلوم وظالم ... اغلب رجال مصر زى ما انت شايف مش متعلمين ... قاعدين طول النهار فى البيوت والستات بتطلع تصرف على العيال ... الخادمات وبائعات الخضر واللى بيسرحوا بمناديل

غير استغلال المرأة فى الدعارة والقرف اللى انت عارفه ... والعاملات واللى بيتعرضوله فى المصانع

التحرشات وعدم وجود حرمة للمرأة وكأنها كتب عليها الشقاء برة البيت وفى الشغل وفى الشارع

اعرف ستات كتير نفسها تقعد فى البيت من التعب والشقا .. واعرف ستات نفسها تشتغل من الزهق وقلة الفلوس

انا هنا بأتكلم ان المرأة خلقها الله مخلوق كامل الأهلية ... خلق له عقل وميزه كالرجل تماما عن بقية المخلوقات ... الست لازم يكون لها حق الإختيار

فى الشغل فى الزواج فى الفكر ... فى الإنجاب ... فى رفض ان يتعدد زوجها عليها .. حتى دى ربنا صرح للست بيها لكن انت بنفسك حطيت ايدك على الوجع لما اتكلمت عن المجتمع وان مش متعود على التعدد وربنا امر ان تعاشر الزوجة بالمعروف ... والمعروف هو ما عرف فى الدين وفى المجتمع ايضا ... يعنى مش كفاية انك تقول اصل ربنا اجاز ومتنساش ان عمر ابن الخطاب منع حاجات رأى انها تضر بالمجتمع وللحاكم ان يفعل ذلك فى الشرع ... له ان يمنع المباح وليس له ان يمنع الفرض .. والتعدد ليس فرض وابتعد المجتمع المصرى عن التعدد لما فيه من اضرار وعاد به من عادوا من الخليج بعد سنوات طويلة من الإختلاط بتلك الثقافة

المجتمع يا محمود ... المجتمع الآن اصبح اشبه بالمجتمعات البدوية وفى فجوة كبيرة .. وعجيبة

البنت بقت مصدر رزق للفقراء اكتر من الولد ... انا بأتكلم عن عالم خفى قد تكون محظوظ انك مشفتهوش

حاجة بقى كمان ... اكتر حاجة خانقانى

قليل لما تلاقى راجل بيتعامل مع مراته بشكل جيد ... غالبا شخط ونطر واوامر واعراض وتجاهل لمشاعرها وانسانيتها ... ودة فى كل الطبقات
تبقى الست بتخدمه فى مرضه ويرمى كوباية المية فى وشها ولا وابور الجاز عشان اتأخرت فى الطبيخ

بتتعامل كالخادمة والجارية والمحظية احيانا

لى ابنتين ونفسى يعيشوا فى مجتمع سوى ويتجوزوا رجال يعترفون بحقوقهن كبشر

سعدت بحوارنا للغاية

واطيب التحيات لاسلوبك الراقى فى الحوار والذى قلما اجده من رجل يحاور امرأة

شكرا لك

محمود المصرى يقول...

بسم الله الرحمن الرحيم

بالنسبة للاية الكريمة الثانية لها تكملة تغير المعنى الذى توصلتى له حضرتك وهو :
ولن تستطيعوا ان تعدلوا بين النساء ولو حرصتم فلا تميلوا كل الميل فتذروها كالمعلقة وان تصلحوا وتتقوا فان الله كان غفورا رحيما
اى ان المأمور به عند التعدد ليس العدل المطلق فهذا ليس فى طاقة البشر لكن عدم الميل اى التوفيق حتى لا تكون احد الزوجات مهملة .
عموما بالنسبة لكلام حضرتك بخصوص الشغل دا افضل ما سمعت من ام تحرص على حسن تربية بناتها بحق .
وبالفعل اغلب النساء العاملات فى مصر يتمنين لو تركن العمل واسترحن لأن العمل للمرأة يحملها مالا تطيق وانا لا اتكلم عن الحلال والحرام طبعا فى مسألة العمل .
بالنسبة لحقوق المرأة المهضومة ايوة فى حقوق مهضومة وعلى رأسها ما امر الله به زى الميراث مثلا ودا سائد جدا فى الارياف وشبه روتينى ويكاد يكون القاعدة وزى سوء معاملة المرأة وسوء النظر لها تلاقى الواحد عمال يحكى انه كان مع زوجته امبارح وعمل كذا وكذا ودا شبهه الرسول بالشيطان , وغيرها كتير من الحقوق المهضومة التى لا خلاف عليها لكن انا قصدى اقول اننا عاوزين نضع تعريف واضح لحقوق المرأة بما ان حضرتك لا تؤمنى بالمساواه بين الرجل والمرأة لكن تؤمنى بالعدل , انا اتصور واؤمن ان هذا الحد هو فيما شرع الله يعنى لو المرأة اخدت كل حقوقها فى الاسلام فلا حقوق لها بعد ذلك وما فوقه فهو ظلم للرجل والعكس صحيح ايضا .
تحياتى لحضرتك وشكرا للاستضافة واسف للاطالة والالحاح

Ahmed Shokeir يقول...

آسر .. موقع السي إن إن العربي كتب عن التدوينة دي والعنوان كمان بتاع الخبر

http://arabic.cnn.com/2009/entertainment/7/8/blogs.8july/index.html

أسوور يقول...

بيللا

هأستنى التدوينة اللى بتقولى عليها ... الموضوع دة فعلا محتاج مناقشة

أسوور يقول...

القائد العام

تفكير صائب لا يحتاج الى مناقشة ... احتفظ بالإيميل بتاعك فلست فى حاجة اليه ... انا موافقة على اى حاجة انت هتختارها اسلوب لحياتك

مع تمنياتى لك بكل نجاح انشاء الله

القائد العام يقول...

ردا على الرد المبتذل من الكاتبة .
"احتفظ بالإيميل بتاعك فلست فى حاجة اليه " والله ما اتشرف باني اعطيكي اياه على شو انتى مغروره بحالك.
" انا موافقة على اى حاجة انت هتختارها اسلوب لحياتك" هاد مو بمزاجك ترى امثالج ما لهم غير الضرب ليستحو.
-----------------------------------
الله يهديكم يا مصريين اشتريت الدنيا وبعتم الاخر واغضبتم عليك الله رب العالمين .
حسبي الله ونعم الوكيل فى امثالك .حسبي الله ونعم الوكيل فى امثالك.
-----------------------------------

أسوور يقول...

القائد العام

شكرا لك رغم افتراضك سوء النية منى

سامحك الله فهو المطلع

أسوور يقول...

القائد العام

ارجو ان تقرأ الحوار بينى وبين الزميل محمود المصرى لتعلم اننا قد نختلف ولكننا ابدا لا نسفه من رأى الآخر

على العموم مرحبا بك فى كل وقت لتعلم ان مصر مضيافة دائما وترحب بكل الإخوة العرب فى المدونات او فى شارع جامعة الدول العربية

اطيب التحيات

غير معرف يقول...

أين ذهب هذا المبلغ الضخم وهو " 130 مليار دولار" ؟.....؟

فى حديثه بقناة الجزيرة فى سبتمبر 2004 قال الأستاذ محمد حسنين هيكل أنه خلال الثلاثين سنة الأخيرة حصلت مصر على 150 مليار دولارعلى شكل منح وقروض وهبات .. صرف منها حوالى 12 مليار دولارعلى مشاريع البنية الأساسية وستة مليارات دولارعلى مشروع مترو الأنفاق .. ومصيرالمبلغ الباقى غير واضح !!!! أين ذهب هذا المبلغ الضخم وهو " 130 مليار دولار" ؟.....؟ و لمزيد من التفاصيل أذهب إلى مجموعة مقالات ثقافة الهزيمة فى هذا الرابط:

www.ouregypt.us

أسوور يقول...

ال 130 مليار عملنا بيهم عمل عشان نطرد الشر والحسد
:)

اقولك ايه بس؟؟؟ جابوا حشيش ووزعوه؟؟

بس هو دة له علاقة بموضوع التدوينة؟

تحياتى

محمود عرفات يقول...

الأستاذ محمود المصرى مصر على التعامل مع آسور كأنها كافره
و آسور مصره على الحديث كأن الأستاذ المصرى مهتم بالحوار أصلاً
النتيجه عدم فهم منه و إهانه لها
يا ساده من يريد أن يتحاور فليشترك..نحن مسلمون و مسيحيون مؤمنون و لا نريد إيذاء أحد..
من أرادالتعامل هكذا فليكن و من لا يريد فلا يرهض نفسه و يرهقنا

أسوور يقول...

محمود عرفات

نورت المدونة وبانسبة لمحمود المصرى ... هو له رايه وفكره وانا باحترم راى وفكر اى حد فى الدنيا ... خليه يتجوز اتنين وهو هيقول ان الله حق

:))))))))))))

فاكرين ان الموضوع سهل واغلبهم شباب صغير لم تعتركه الحياة بعد

ربنا مع الجميع

نورت المدونة يا محمود

اعتقد ان اسلوب الحوار هو المهم مهما اختلفنا

بهجت الاباصيري يقول...

مع اني ما بحبش لغة الارقام وخصوصا لما تطلع من الحكومة .... بس نقدر نقول الستات مش واكلينها والعة فعلا .... وبيستنوا شوية لحد ما تبرد بدليل :
- ان المراة بتترفع عن معظم الوظائف اللي موجودة في انتظار العريس المناسب .... اللي يصرف علي الست مرجانة , ومدام شهر زاد والاخت عبلة والانسة حنفي
- اما بالنسبة للعنوسة ... فدا لان المراة بقت بتترفع كمان عن معظم الرجالة .... وبتقضي معظم وقتها في المول والمانيكيير والباديكيير لحد ما تلاقي العريس الاستايل اللي يصرف عليها بضمير
- اما بالنسبة لامية المراة ... فدا لان المراة المصرية مش محتاجه مستوي ثقافي عالي عشان توقع الرجل المناسب ..... لان معظم الرجالة المصريين بيشتركوا في برج الدلو ..... دا غير ان كلنا في الامية شرق... يبقي تتعب نفسها ليه

- اما حكاية الفقر المتفشي في الاوساط النسائية .... فدا طبيعي لانها غير مطلوبة في سوق العمل .... لاسباب اجتماعية وثقافية واسباب تتعلق بالكفاءة .... لما تتعلم المراة انها تبقي سباك , وسواق تاكس , ونجار مسلح , ومبلط , والمحارة وميكانيكي ...... مش هاتبقي عندهم بطالة , لكنها طول ماهي عايشة في دور سندريلا يبقي خليها تستحمل ....... لما تتخلص من احتكارها لالقاب بعينها مش هايبقي عندها مشكلة ..... وهانشوف بائعة الخبر , والانسة بلية , والمعلمة فتكات وهنا يتحقق حلم المساواة

لكن طول ما كل واحد ساكنه تحتيه راقصة هايعزل , يبقي كلنا هانبات في الشارع بصراحة ياعني

أسوور يقول...

بهجت الإباصيرى

انت بتتكلم طبعا عن نسبة ال 3%اللى عايشين فى المستوى اللى بتتكلم عنه

تخيل كلهم على بعض 3% فقط

نسبة التعليم اقل لأنهم بيطلعوهم من المدارس او مش بيعلموهم من اصله وبيجوزوهم بعد ما يسننوهم وهمة عندهم 13و14 سنة وبيتباعوا للعواجيز العرب

دة غير ان الغنى فى الريف هو اللى عنده بنات بيشتغلوا فى خدمة البيوت لأن مرتب الشغالة دلوقتى بيتراوح ما بين 400 جنيه وانت طالع والسعر متثبت على الشغالات العاديات من سنة ... 800 جنيه فى الشهر غير الأكل والشرب
بييجى يستلمهم الأب عشان يصرفهم على اخواتها الصبيان وعلى نفسه

دة غير الإستغلال الجنسى فى الدعارة ... والتحرش بالعاملات ... يا اما كدة يا اما تطرد من الشغل

ولا زوجات البوابين اللى بيعملوا كل الشغل فى العمارة وبيراعوا عيالهم وكمان بيروحوا ينضفوا للسكان فى مقابل بياخده الزوج بالكامل ويشترى بيه حشيش ... غير الإهانات والضرب يا بهجت

مانيكير وباديكير ايه بس ... دة انا نفسى مش بأروح أعملهم الا فى المناسبات كل سنة مرة

انت فى عالم آخر يا بهجت ... انا بأتكلم عن مصر الحقيقية وستاتها الغلابة

مش عارفة ليه كل ما اكتب عن حاجة تعلقوا وكأنى باكتب عن نفسى

عموما انت نورتنى ... تحياتى

أحساس لسه حى ...أنا مش موافق يقول...

عزيزتى

انا شايف بينك وبين محمود المصرى حوار محترم

وزى ما قال التعددية فى الاخر فى مصلحة المراه بتستخدمها لما تحتاجها

يعنى حضرتك مستخدمتهاش لانك مش محتجاها

بس ممكن لو

مطلقه وعند اولاد تستخدميها

لو ارملة تستخدميها

لو عانس وعديتى ال30 تستخدميها

لو عندك ملقتيش اللى يصرف عليكى تستخدميها

لو متعرفيش تشتغلى وبلا زوج هتستخدميها

يعنى لازم تعرفى مين من الستات بتتجوز واحد متجوز وبترضى بكدة بمزاجها

ومتقسيش الاشياء على حالتك ومستواكى

تحياتى

سلام

بهجت الاباصيري يقول...

مبدئيا انا فعلا عايش في عالم تاني ..... عايش في عالم سمسم وياريت تاخدي كلامي علي هذا المستوي ........ دا غير اني ما بعملش اسقاط علي حضرتك اطلاقا , وكنت بقصد ال 97% الباقي ....... بمعني ان المراة بتطلب المساواة بس في الوظايف القيادية وانها تكون نائبة والبيه المدير , بمعني ان المراة موجودة فقط في قطاع الخدمات صحة تعليم , سياحة , حظ وفرفشة واستغلال حنسي زي ما حضرتك بتقولي ...... اما باقي القطاعات هيا مش موجودة سواء قطاع التصنيع او العقارات الا في الاطار الخدمي فقط ...... وبما اننا مش هنلاقي وظايف معينه لكل الستات ومكاتب وتكييف ....... فا اكيد هايكون في بطالة عند النساء , او انها تفضل القطاع الخدمي الحر الا وهو انها تكون ربة منزل


- تاني حاجة ليه الاسراف في استخدام ضمير الغائب ..... هو وهم .... هما مين اللي بيطلعوهم من المدرسة , ودا بيحصل بس مش علي النساء فقط الذكور برضه بيتم استغلالهم في عمالة الاطفال وحرمانهم من التعليم ...... دا غير حضرتك بتكلميني علي مرات البواب علي انها في الدرك الاسفل من المجتمع ...... لكن البواب دا باشا والسيجار في بقه ولابس مايوه وقاعد علي الدكة اللي قدام العمارة بيشرب جريب فروت

عموما وعلي الرغم اني من سكان عالم سمسم الا اني اعرف عالم سمسم بس اعرف مصر الحقيقية كويس ..... مش ببني وجهة نظري علي افلام بشوفها ....... لان لو كل الرجاله لو حشاشين وعاملين دماغ ...... يبقي احسن حاجة الستات يشتغلوا تجار مخدرات ويبقوا ضربوا عصفورين بحجر واحد ..... عملوا فلوس واتحكموا في الرجل
ويبقي شعار المرأة
another stone ya me3alem
والجريمة دائما لاتفيد

أسوور يقول...

احساس لسة حى

جايز برضه

تحياتى

أسوور يقول...

بهجت

هو مش برضه انت زى كل الناس لك ام والمفروض انك شايف تعبت عشانك قد ايه

!!!!!!!!!!!!!!!

ايه سبب هجومك على المرأة؟؟؟؟

تحياتى

بهجت الاباصيري يقول...

يااااااااااااااا ربنا دايما اتفهم غلط كده ..... انا اهاجم المرأة ؟ حد يقدر يهاجم اللطافة والظرافة , حد يعادي الميه والهواء ...... كلا البته .... لست انا هذا الرجل مطلقا .

دا انا عمال اقول يارب المرأة تبقي رئيس جمهورية ووزير ومدير وسباك وسواق تاكس واستاذة وميكانيكي ...... كل ده وبهاجمها ...... وعمال اقول تفكها من دور سندريلا وشهر زاد وريا وسكينه .... وتخش في معترك الحياة بجد .... وتشمر دراعتها وتورينا الهمة .
بصي كل المثقفين والعظماء اللي كان بيتقال انهم اعداء المرأة .... كانوا بيموتوا في المراة ... بس كانوا بيبحثوا عن مراة افضل .

عموما انا لاعدو للمراة ولا نصير للرجل ..... انا بتاع الاسر المنتجة

وياستي ماتزعليش ....... وسونة اجدع ناس

ملحوظة خاصة وعامة :

بلاش سيرة الامهات في المواضيع دي .... لانهن ملائكة وليسوا من جنس البشر

أسوور يقول...

بهجت الأباصيرى

انت انسان غريب بجد .. انت من ذاك النوع من الرجال الذين ينظرون للأم كأم وليس كامرأة

:)))))))))))))))

انا فاكرة انى لما كنت حامل فى بنتى الكبيرة حسيت ان جوزى متغير معايا وكأنه خايف منى او مخضوض كدة وحسيت انى مبقتش المزة بتاعته يعنى :)))

سألته عن السبب ... فقالى بعد مراوغات طبعا ... انه مش فاهم انا المزة بتاعته ولا أم ... وان فكرة انى أم مخلياه متلبش ومش عارف ياخد راحته فى الهزار والدلع لأنه بيحترم الأمومة جدا وشايف انها اعظم شىء على وجه الأرض وان الأمهات زى الملائكة

فكرتنى بما قالى زوجى لى فى اليوم دة

لكن انا برضه هقولك اللى قلتهوله يا بهجت ... قلتله الامهات مش ملايكة ... الأم امرأة بتحب وبتكره وبتغير وبتتخانق وبتغضب وعندها رغبات خاصة وعامة ... لكنها بتدى دايما ... لازم تدى ... بتدى بدون حساب ... تعب وسهر وقلق وحب وحنان واهتمام ورعاية .... الخ كل دة بتديه الأم لولادها وجوزها برضه على فكرة ... فكر فى امك هتلاقيها ام لأبوك برضه

انا نفسى بحس ان عندى 3 عيال فى البيت

لكن

هى امرأة تحتاج لأى حد يهتم بيها ويقولها كلمة حلوة ويشكرها على دورها وعلى قد فرحتها بأبنائها فى حتة بتزعل جواها انها ام فقط ولم تعد امرأة فى نظر زوجها وابنائها والدليل على كدة ان لما ست جوزها بيموت وتتجوز عيالها بيزعلوا وكأنها لازم تكون ملاك ملهوش طلبات ولا رغبات ... وساعات مبتلاقيش غير مدونة تنفس فيها عن مشاعرها ورغباتها وتصوراتها فى الحياة وآمالها التى لم تتحقق .. من اجل زوجها واطفالها ...

يمكنك الرجوع للبوستات اللى مالية المدونة عن بناتى الجميلات واللى لو قعد اقول فيهم لحد ما أموت مش هأعرف اقول بحبهم قد ايه .... بمكنك الرجوع لتتأكد انى .. انا ... نفسى ... أم

الأم امرأة تكتم مشاعرها ورغباتها ليس لسبب غير ان المجتمع يضعها فى مصاف الملائكة....

تحياتى

نبراس العتمة يقول...

العزيزة أسوور
معطيات دقيقة تفضح المتمعشين باللغة الأرجوحة المستريحين إلى حذلقة تعويم النقاشات، المستثمرين لمسارح اللغة

لغة الأرقام أعتقد أنها تفقأ أي لغة..

أضيف الوضع بالمغرب العميق حيث أتواجد، خاصة أني أتوغل في الأرياف المغربية لأجد أن المرأة في منطقة طاطا مثلا هي بستين رجل، قوة جسمانية، إرادة، قوة اقتراحية..
على الرابط التالي حضورها النضالي أيضا:
http://matarmatar.blogspot.com/2008/07/blog-post.html
وفي الرابط حوار مع واحدة من أهم المناضلات:
http://matarmatar.blogspot.com/2009/06/blog-post_17.html

كثيرا ما أتأسف لمظهر المرأة البورجوازية المتناضلة التي تتزيى بقناع التحضر..
أعتقد أن بالامكان تحقيق طفرة نضالية نوعية، لأن إخراج المرأة من ثقل عصور مضت من شأنه أن يؤهل الرجل أيضا..

متفائل بمجهوداتك سيدتي

مودتي المنحفرة في جذور انسانية راسخة

بهجت الاباصيري يقول...

انا برضه اللي غريب ولا حضرتك اللي مصرة انك تفهميني غلط ..... انا بقول بلاش نخش في سكة الامهات واللي ربتك واللي تعبت فيك ........ لان الكلام هايخد شكل عاطفي وهايبعد كل البعد عن الموضوعية .
مش معقول تحلفيني بالغالية وبعدين اعارضك ..... طبعا صعب جدا ..... دا لو حلفتيني بامينه رزق او كريمة مختار مش هاقدر اعارضك ..... اشحال بقي الام .

لكن انا عارف ان الام ..... امراة وانسانه ولها رغبات وقدرات وطموحات وافكار واحزان وافراح زيها زي غيرها ....... ولكن مهما كان مستواها سواء الثقافي او الاجتماعي فهي في نظر ابنائها سيدة العالم الاولي بلا منازع ..... بمعني اني كنت بقصد بلاش كلام عن الامهات طلبا للموضوعية لا اكثر ولا اقل .......لكن واضح انك واخدة فكرة وحشة عن الرجالة وعن طريقة تفكيرهم.

وعلي فكرة انا مختلف معاك ان المجتمع هو اللي بيضع الام في مصاف الملائكة ويتسبب في قهرها ........والي كانت افعال الام واقوالها وتضحياتها من قبيل النفاق الاجتماعي وحكم المضر .... الام ملاك حقيقي بحكم التكوين والغريزة ومشيئة الله عز وجل .....شاءت ام ابت

والرجل لازم يفرق بين الام واي امراءة اخري زي الست برضه ..... لانه لا بديل عن الام حتي ولو كان ملاك بجد .

وكفاية كلام دلوقتي ..... وناجل بقيت المناقشة ليوم 21 مارس .

والفاتحة لروح مصطفي بيه امين ..... صاحب الفكرة علي الرغم من انه رجل
سلااااااااااااااااااااام

القائد العام يقول...

لا سلام عليكي من الله ...
لقد فهمت الان ماذا تريدين لبنات جنسك ؛ تريدين النساء ان تخرج للعمل وليس اى عمل بل يجب ان يكون فى مكتب وبالتكييف وامامها اللاب توب .
- النساء التى تنادى بحرية المراة هل وجدتى منهم امراة تعمل كناسه او زباله او حتى تقف فى مصنع او سباكه لا حاشا لله فان المراه ذلك الجنس اللطيف والذى لا بد ان يكون فى التكييف حفاظا عليه من التراب والاوسخه بالشارع .
اتقى الله فى بناتك التى تتباهين بهن وتذكرى انك ان شرعتي شريعة فى المسلمين فلكي اجرها ((السئ بالطبع )) الى يوم الدين .
- اجلسوا المراة فى البيت وانظروا الى الحياة كم سيرضى عنا الله وعن ارزاقنا .
وتذكرى قول الله ان كنتى تعبدينه " إِنَّ الَّذِينَ يُحِبُّونَ أَنْ تَشِيعَ الْفَاحِشَةُ فِي الَّذِينَ آمَنُوا لَهُمْ عَذَابٌ أَلِيمٌ فِي الدُّنْيَا وَالْآخِرَةِ وَاللَّهُ يَعْلَمُ وَأَنْتُمْ لَا تَعْلَمُون " صدق الله العظيم .
وحسبي الله ونعم الوكيل فيكي.

القائد العام يقول...

أعتذر عن ما قلت أعلاه

العمل للمرأة في مكتب بمكيفات أو في مزرعة يرفع رأسها عاليا..

ما أكذبني حين قلت أن المرأة يجب أن تكون في البيت وكنت أقصد أن تكون في غرفة النوم، وأن تبتعد عن الأوساخ والشوارع لأن رأسي فيه فكرة واحدة ضخمة أكبر مما تتصورون..فكرة واحدة مسيطرة وكنت أتحدى أي واحد أن يتبث العكس..فكرة الجنس بدون لجام

أستغفر الله ما أكذبني وما أوقحني خاصة حين استكثرت عليك أن تتباهي بانتك الصغيرة، فكل ما يؤنث عندي عورة/عجوزا كانت أو رضيعة أعوذ بالله مني.
المتزمتين مثلي المستمرئين للعادة السرية التي ما عادت كذلك هم الذين قال فيهم الباري عز وجل:
" إِنَّ الَّذِينَ يُحِبُّونَ أَنْ تَشِيعَ الْفَاحِشَةُ فِي الَّذِينَ آمَنُوا لَهُمْ عَذَابٌ أَلِيمٌ فِي الدُّنْيَا وَالْآخِرَةِ وَاللَّهُ يَعْلَمُ وَأَنْتُمْ لَا تَعْلَمُون " صدق الله العظيم .
وحسبي الله ونعم الوكيل في نفسي

أكرر اعتذاري
فقد كنت أنتظر منك أن تذعني مع القطيع، وقدري موقفي إذ كيف يمكن أن أخرج من جلباب سي السيد في لحظات أنترنيتية..
أعدك أن أقرأ جيدا..وأثقف نفسي بما فيه الكفاية قبل أن أعود
وإذا عدت بسباب أو هراء..فأرجو أن لا يرد علي أحد..
معذور من عاش مثلي في زمن الفنكوش
مودتي

القائد العام (( الحقيق)) يقول...

الى الشخص الذى انتحل اسمي وقام بالرد بوقاحة على تعليقي اقول له اتقى الله فى اتهاماتك المشينة فى حق رجل قال ربي الله .
اقول لمن قرا هذا التعليق المعلن بتوقيت يوليو 14, 2009 3:19 م هو تعليق لا يمت لى باي صله .
واخر دعواى على شعب مصر الله يهديكم اذا قدر لكم والله يزيدكم ضلال اذا ظللتم .
عروا نسائكم كيفما تريدون فان ربك لبالمرصاد
وحسبي الله ونعم الوكيل فى كل المصريين وفى نسائهم

أسوور يقول...

القائد العام

تعرف انى دائما التزم حدود الأداب العامة فى الحوار حتى مع من يختلفون معى

الا انك اكثر وقاحة من اى شخص قابلته فى حياتى

سامحك الله ... اما أنا فلا

وحسبى الله ونعم الوكيل ... يا رب انت خلقتنى ... وخلقت الجهل والجهلاء ... فأعنى على الجهلاء وجهلهم

micheal يقول...

طب إيه رأيك يا اسر..تأخدي فاصل من الصراعات اللي هنا وتيجي تشوفي اخر بوست عندي من اللي قلبك يحبه
:)
تحياتي وفي إنتظار جديدك دوما

عمادخلاف يقول...

سعيد جدا بزيارتى اولى للمدونة الخاصة بيكى وبجد بها الكثير من المعلومات الشيقة والرائعة وسوف اتابع كل مايكتب من خلال حضرتك
ارجو التواصل انا لدى مدونتين واحدة للقصة والتاينة للمقالات بحلم ببكرة
وشكرا

غير معرف يقول...

مصر تخسر 13.5 مليون دولار يوميا جراء بيع الغاز لإسرائيل

قال السفير المصرى السابق المحامي إبراهيم يسرى أن القاهرة تخسر من جراء هذه الصفقة مع تل أبيب حوالي 13.5 مليون دولار في اليوم الواحد ولهذا لا يمكن تبرير هذه الخسارة لا بوجود معاهدة سلام مع إسرائيل ولا بحقوق السيادة ولا بأي شيء آخر

و أضاف يسرى " لا علاقة بين اتفاقية السلام وصفقة تصدير الغاز المصري لإسرائيل ، ولهذا نحن طالبنا بإلغاء الصفقة لكونها مجحفة بحق مصر وتمثل اهداراً للثروة المصرية خاصة وإننا دولة نامية تحتاج الكثير من الأموال للإصلاح الإقتصادي ولذا لا يجوز أن ندعم إسرائيل بهذا الشكل خاصة ونحن لسنا دولة غنية لكي نبذر أموالنا يميناً وشمالاً".

ونفى ما تدعيه الحكومة المصرية من أن إسرائيل حصلت على هذا العقد من خلال مناقصة دولية مثلها مثل الدول الأخرى ، مؤكدا أن هذا غير صحيح وإن صح ذلك لكان سعر الغاز المصري المصدر لإسرائيل 16 دولاراً الآن.

وتابع " نريد كما فعل رئيس الوزراء الروسي بوتين أن يكون تسعير الغاز حسب سعر السوق العالمية في حين أن اتفاقية الغاز "المصرية- الإسرائيلية" التي يمتد مفعولها لعشرين عاماً يمنع فيها تغيير السعر طيلة هذه المدة وهذا السعر يبدو الآن مضحكاً لأنه مثبت بدولار وربع الدولار في حين أن السعر العالمي الآن يتراوح بين 12 -16 دولاراً لوحدة القياس".

Fadya يقول...

طيب تصدقى والله انا كنت فاكره ان الرجاله اقل من كده كتير
دول اكيد حاطين اشباه الرجاله مع الرجاله فى التعداد
بيتهيألى لو احصوا الرجاله بس حيطلع لكل 100 ست راجل واحد

راجعى كده التعليقات اللى بتجيلك وعدى اللى ينفع يتقال عليه راجل

أحساس لسه حى...كلام من جوه روح لكل روح يقول...

عزيزتى

شوفتى ازاى انك مش مختلفه معايا

وانتى بتقولى جايز برضوا

طيب ما تتكتبى عن الحالات الجايزه دى وتشجعى الزواج باكثر من واحده

بدل الموضوع ده جايز فى نظرك

وبلاش تتكلمى عن اللى مش بيحتاجوا الجايز لغيرهم وعاوزنها تتقفل عليهم

تحياتى

سلام

ابو المفاصل الواصل يقول...

مفيش ست وراجل
كلنا بشر
كلنا نفخة ربانية
تحياتى

Khaled Khalil يقول...

أولاً, نسبة الولادة الطبيعية معروفة و هي تقريباً 105 ولد لكل 100 بنت, و مصر في النقطة دي ماشية زي الكتاب ما بيقول, يعني 1.05 عند الولادة, و حتى بين سن 15 ل 65 سنة النسبة بتبقى 1.02 يعني أكتر من 1 (فرق النقصان بسبب الهجرة و معدلات الوفاة, و اللتنين الذكور متفوقين فيهم على الإناث).
http://en.wikipedia.org/wiki/Human_sex_ratio
http://en.wikipedia.org/wiki/List_of_countries_by_sex_ratio

ثانياً, بالنسبة لمعدل الوفيات, ففي دي واكلينها والعة :) (لسوء حظهم) الطبيعي برضه إن معدل الوفاة للذكور أعلى من الإناث
http://en.wikipedia.org/wiki/Life_expectancy#Sex_differences
(ده طبعاً لأنهم أكثر حساسية من الناحية النفسية و العصبية و العاطفية, و المفاجئة الفزيائية كمان)
معدل وفاة المصريين الذكور 69.04 سنة مقابل 74.22 عند المصريات, و ده يعتبر فرق طبيعي
http://en.wikipedia.org/wiki/List_of_countries_by_life_expectancy

أخيراً, بالنسبة للاكتآب, مش هتكلم عنه هو شخصياً, بس كفاية مقارنة نسب إنتحار الذكور لنسب انحار الإناث في العالم كله, يمكن نكون ظالمين حد
http://en.wikipedia.org/wiki/List_of_countries_by_suicide_rate

Israa El-sakka يقول...

بجد حضرتك مسبتلهمش حاجة هيه كلها حجج و خلاص

micheal يقول...

http://strugglingmichealitoo.blogspot.com/2009/08/blog-post_16.html
سايبلك حاجة يمكن تعجبك هنا
:)

غير معرف يقول...

اقترح مسؤولو الصحة العامة في الولايات المتحدة ختان جميع الأطفال الذكور لمواجهة انتشار فيروس الايدز في بلادهم.

وكشفت صحيفة "نيويورك تايمز"، على موقعها الالكتروني الاثنين 24-8-2009 ، عن نسخة رسمية أقرتها المراكز الأمريكية للوقاية ومكافحة الأمراض، ومن المقرر أن تصدرها نهاية العام.

ويأخذ الباحثون في عين الاعتبار فيما إذا كانت الجراحة ستشمل الذكور الذين يميلون للجنس الآخر إي الإناث، ولكن من غير المتوقع أن يترك الختان أثرا على الميالين للجنس المشابه اي الذكور وذلك لأنهم الأكثر عرضة للمرض خلال ممارساتهم.


وكانت أظهرت دراسات في القارة الإفريقية أن ختان الذكور يؤدي إلى تقليل المرض إلى النصف، ولكن الباحثين ركزوا في اختياراتهم على الجنس الذي يميل للآخر وهؤلاء عرضة لتلقي الفيروس من الاناث حصرا.

ويبدو - كما تقول الصحيفة- إن توصية مراكز وقاية ومكافحة الأمراض الأمريكية تدعو لختان الأطفال حديثي الولادة وذلك كنوع من "استراتيجية الوقاية".

ويقول الطبيب بيتر كيلمركس رئيس قسم الأوبئة والوقاية من الايدز في المركز الأمريكي لمكافحة الامراض أن ختان الأطفال له فوائد عديدة في مواجهة الايدز وقد تفوق مخاطره.

وكانت ثلاث دراسات اعدت في افريقيا (كينيا واوغندا وافريقيا الجنوبية) في عامي 2005 و2007 اظهرت ان ختان الرجال غير الحاملين للفيروس يقلص نسبة الاصابة به من 50 الى 60%.

ودفعت هذه النتائج بمنظمة الصحة العالمية الى التوصية بادراج ختان الذكور على قائمة الاستراتيجيات المتبعة للحماية من التقاط فيروس نقص المناعة وتقليص انتقاله من النساء الى الرجال عبر الاتصال الجنسي.

وتقول المراكز الصحية الأمريكية إن 79% من الأمريكيين البالغين خضعوا للختان، لكن نسبة إخضاع الاطفال حديثي الولادة للختان تراجعت في البلاد إلى 65 عام 1999 بعد أن كانت 80 % خلال الحرب العالمية الثانية

assafo anaroze يقول...

اسور
ارقام مهولة جدا خصوصا المتعلقة بمرض الانيميا و الامية
عندك صح على النساء اللي بتعول ثلث المجتمع المصري انهم يتوقفوا عن العمل علشان ياكل رجالتهم الزلط
النساء يعانين بشكل كبير في مجتمعاتنا الذكورية بس تحريرهن لازم يكون منهن
انعتاق النساء من صنع النساء انفسهن
مودتي
دعوة للتواصل مع مدونتي

Sharm يقول...

ياساتر يا رب

Mohamed.L يقول...

انا عايز اقول راييى فى الموضوع ده وهو ان خروج المرأه للعمل من اهم اسباب معظم الفساد فى المجتمع وانا بتكلم عن مصر خصوصا حيث اصبح القاعده السائده هو خروجها للعمل والامر الشاذ عن القاعده هو جلوسها فى البيت لتربية ابنائها تربيه دينيه سليمه مع الاب واكيد الكل عارف ايه هى نتائج خروج المرأه للعمل من فساد فى العمل وفى السارع وفى البيت لعدم الاهتمام بالابناء والزوج وبعد ده كله جايين النساء يقولوا نطالب بالمساواه انا مش هقول غير ربنا يهديكن كده وتبطلوا كلامكوا الكتير ده على الفاضى والمليان وشكرا

غاوي مدونات يقول...

إقرأوا هذه المدونة
http://beware-of-egyptian-woman.blogspot.com

مصر النهاردة يقول...

تابع اخر الاخبار المصرية و العربية و العالمية من على :

مصر النهاردة

http://masrenhrda.blogspot.com/

Entrümpelung wien يقول...

شكرا لكم ..))

Wohnungsräumung Wien يقول...

شكرا لكم ..دائما موفقين..))


Wohnungsräumung
Wohnungsräumung Wien

entrümpelung wien يقول...

شكرا على الموضوع
entrümpelung
entrümpelung
entrümpelung wien

الربح من الانترنت يقول...

الف شكر على الموضوع الرائع
التسويق الالكتروني
bookmarks

luxusumzug يقول...

Thanks for the blog
umzug wien
umzug wien
umzug
umzug-umzug
Wohnungsräumung

Wohnungsräumung wien يقول...

تسلم ايديك على الموضوع الممتاز
Wohnungsräumung
Wohnungsräumung
Wohnungsräumung wien
Wohnungsräumung wien
Wohnungsräumung wein

ريوبى يقول...

موضوع ممتاز
ryobi