الاثنين، 4 يونيو 2007

اسعديه .. تسعدى به وبحبه

فى مصالحة مع الرجال الذين يعتقدون انى أعلن الحرب عليهم أكتب هذا البوست
كيف تسعدين نفسك؟؟
عشان تبقى سعيدة لازم تسعدى اللى حواليكى .. مافيش أى معنى اننا نقول نفسنا وبس
اتجوزتى راجل بتحبيه ومقتنعة بيه .. طيب نعمل ايه عشان نحصل على زوج سعيد وبالتالى على حياة سعيدة؟؟
ابتسامة رقيقة ترتسم على الوجه دائما .. مساحة خاصة لكل منا .. ان يكون هناك دائما خطط مستقبلية تجمعكما
أن يكون هناك من الأصدقاء ممن يهتمون لأمركما حتى يتدخلوا للصلح عند اللزوم
لا تصرى على التحدث حينما يرفض هو ذلك
لا تقدمى شىء تعتبريه تضحية ابدا مهما حدث فالرجال لا يفهمون هذا المعنى بفطرتهم
اهتمى به كطفل ..واحترميه كأب .. وحبيه كعشيق .. وعامليه كصديق
الرجل يبحث دائما عن امرأة يشعر انه مسئول عنها وأن له دور فى حياتها وليس العكس .. كونى تلك المرأة لأنه سيبحث عن أخرى ليهتم بها بدلا من امرأة تعطيه كل شىء وتدعمه فى كل شىء
هو لا يحتاج لدعمك .. هو يحتاج أن يدعمك
المرأة بالفعل تحقق أقصى سعادة لها من خلال شعورها بحب رجلها واهتمامه بها وتقديره لها
أما الرجل فيحقق اقصى سعادة بنجاحه فى العمل .. دى طبيعة زى ما بيطلع لهم دقن كدة
المهم ان كل طرف يفهم طبيعة الآخر
مش معنى ان الرجل بيهتم بعمله أو اصدقاءه وعائلته كدة يبقى مش بيحب
لأ .. هو بيحب برضه بس هو خلق لإهتمامات أخرى بجانب الحب
ولو قدرت المرأة ذلك لعرفت قيمتها لدى الرجل
الرجل يحب ان يشعر بالمسئولية تجاه المرأة .. بل أنه يحب أن يشعر بذلك واللى بيحصل العكس لما واحدة تحب واحد تقعد تهتم بكل كبيرة وصغيرة فى حياته وتديه اهتمام بالغ ونصائح عديدة كأنه ابن لها
بينما هو يبحث عن انسانة يكون مسئول عنها وتثق فى تصرفاته
الرجل يحتاج أن يبحث عن المرأة التى تثق فيه وليس العكس
لما تلاقى حبيبك بعيد شوية عنك .. مشغول فى أى حاجة .. شغله ؟ .. أصحابه؟ .. أو حتى الكمبيوتر بتاعه؟
سيبيه خاااااالص براحته وأوعى تقوليله أبدا ابدا العبارة الشهيرة بتاعة
انت مش بتحبنى .. انت مش بتهتم بيه .. لو كنت بتحبنى كنت تبقى معايا على طول
لا .. اتركيه براحته تماما واعدك انه يرد عليك بقوة .. يرجعلك بكل حب وشغف
كل الحكاية ان الرجال دائما ما يحتاجون مساحة خاصة بهم
انتظريه وسوف يعود
عاوزة تخلى راجل يحبك ؟
حبيه حتى النخاع .. اظهريله انه أفضل وأعظم الرجال .. دورى على كل حاجة حلوة فيه وقوليهاله
ما تنقديش أبدا .. وان اختلفتى فلا تجادلى ان أصر على رأيه .. ركزى على رغباته ولوحى بها من بعيد
لا تدعى أنك شخصا ليس أنتى .. يعنى أحرصى على التلقائية
حسسيه انه سيدك وانك محتاجة له .. وبرضه حسسيه انك ملكة وانك اخترتى انك تحطى عرشك تحت رجليه
ابتعدى عن المواضيع المأساوية وخليكى دايما بشوشة
خليه يتكلم ويحكى عن مشاكله وعن اللى جواه..احترمى أى شعور سلبى بيحسه ولا تسخرى منه أبدا
لا تنسى أن تخبريه أنه أجمل وأفضل ما حدث لك فى الحياة

للحديث بقية

هناك 113 تعليقًا:

محمد حمدي يقول...

لا بجد انتى محصلتيش يا ياسمين
بجد انتى قولتى مجموعه رائعه من النصايح , متهيالى لو كل ست نفذت ولو نص كلامك دة بيوت كتيرة هتعيش فى حب جامد جدا , لان الرجال مش هما سبب كل المشاكل برضو

منتظر منك البقيه على احر من الجمر , وياريت لو شويه نصايح للرجاله عشان يبقى فى الامور توازن .. احلى حته بتاعه مش بيقدروا التضحيه زى ما بيطلعلهم دقن .. بجد تحفه

تحياتى ليكى يا بروفيسيرة , ومنتظر جديدك

انا اول واحد هنا ؟

سندباد يقول...

ارفع القبعة وانحني امام عقليتك وفهمك الغير عادي لاحتياجات الراجل الطبيعي لانها دي فعلا احتياجات الراجل الطبيعي اللي بيحب فعلا احنا بنحب نهتم باللي بنحبهم وبنحس ان كل صغيرة وكبيرة في حياتهم ملكنا احنا تحياتي الخالصة لعقليتك الواعية وفي انتظار البقية الباقية ياقبلة المدونين

بسمه عبدالباسط يقول...

موضوع هايل يا ياسمين بجد النصايح دى مفيدة للمتزوجات والغير متزوجات
هايلة يا ياسمين
تحياتى

أسوور يقول...

محمد حمدى
بعد ما كتبت كتير عن احتياجات المرأة
لقيت هجوم من الكثيرين وكأنى عدوة للرجل

ارجو ان الناس تفهم انى عاوزة اساعد بجد
شكرا لك يا صديقى العزيز

مـحـمـد مـفـيـد يقول...

ياسمين
انكي تجبري من يقرأ كلماتك هذه ان يزداد اعجابا بسطورك المميزه

عصفور المدينة يقول...

السلام عليكم
شكرا على كثير من القواعد بس متحيزة بزيادة للرجالة هنا

معلهش بخصوص موضوع الحب في الله وعلى طاعة الله مش حاناقشك أثق في قدرتك على الوصول لحقيقة ذلك ببحثك الدقيق الحيادي بس ادي الموضوع وقت للبحث في مقومات ودوافع الحب ودوافع استمراريته والدوافع التي تكون خلف الدوافع خلف دوافع الاستمرار


أجمل نقطة عجبتني
لا تصرى على التحدث حينما يرفض هو ذلك
وأعتقد لو طبقت ستغني عن التي فوقها لأن وجود مساحة للصمت يعطي فرصة للتفكير والتروي وتقييم الأفعال مما يعطي المشاكل ذاتية الحل ويغني عن قوات الطواري
أعجبني أيضا
لا تقدمى شىء تعتبريه تضحية ابدا مهما حدث فالرجال لا يفهمون هذا المعنى بفطرتهم

وهي قاعدة عامة في التعامل مع البشر جميعا عدم تقديم تصحيات إلا لمن يطلبها على سبيل التضحية

ركزتي هنا جدا على أهمية إحساس الرجل
بأنه قيم مش دايما بيكون مطلوب كدة احيان كثيرة بيكون الرجل عايز يحس بأنه ليس وحده في حمل المسئولية واتخاذ القرار

مدونة كسبان يقول...

كلامك مهم
بس مين يسمع
المشكلة الوحيدة
ان انا
بيجيلى صداع من أى واحده
فى العربية
فى الميكروباص
فى الأتوبيس
أو حتى فى الشارع
يعنى فى رأيى
ان أصعب حاجه ممكن تدايق أى راجل
الجدال الكتير والمهاتيه ووجع القلب
والكلام اللى مالهوش لازمه
غير كده كله هيوبقا تمام

أسوور يقول...

سندباد

جميلة قوى عبارة قبلة المدونين منك

اتقالى كلام كتير بس بجد دى أجملها لأنها تحمل معنى العطاء .. أنا احب فعلا اكون يد ممدودة لكل من يطلب العون وأحب أن أكون قبلة كل قاصد نصح للإصلاح من حياته

شكرا لك يا سندباد

أسوور يقول...

بوس بوس
فعلا هى نصائح برضه تنفع لأى بنت مرتبطة أوحتى مش مرتبطة
لأن لو كل بنت حطت الكلام دة فى دماغها هتقدر تعيش حياة سعيدة
كل الناس يا اما مرتبط يا اما مشروع ارتباط مستقبلى

ربنا يسعدك

أسوور يقول...

محمد مفيد
يا رب بس الناس تفهم انى ماكنتش أقصد مهاجمة الرجل عموما انا كنت بأحاول الفت نظر الرجل لفجوات علاقته بالمرأة

قلت اكتب البوست دة عشان الناس اللى بتتهمنى انى ست وحشة ومش فاهمة الرجل وبأعاديه

أنا زوجة يا سيدى والبوست دة مش مجرد كلام دى حياتى فعلا
تحياتى

أسوور يقول...

عصفور المدينة
بالنسبة لنقطة الإصرار على مناقشة الموضوعات الشائكة عندما يرفض الرجل الحوار يفجر مشكلة أكبر
طبيعة الرجل انه يصمت كنوع من الهروب عندما يخطىء عشان كدة لازم نديله فرصة يتصالح مع نفسه ويحاكمها والا اصبح عنيدا ورفض الإعتراف بالخطأ

أما عن موضوع التضحية فدة عشان فى ستات كتير تقول انا عملت وضحيت واديت وكلام من دة .. المفروض ما تديش حاجة تحس انها تضحية حتى لا تعايره فى كل مشكلة بما فعلته من أجله

أما عن موضوع ان الرجل قيم
انا قصدت اقول ان الرجل يحب أن يشعر بمسئوليته تجاه المرأة والإحساس الجميل دة بيروح من عند الراجل لما الست تبدأ فى معاملته كأنه يحتاج الى شخص يرشده للصح .. كدة بتقل قيمته فى نظر نفسه
الرجل بطبيعته يحب ان يساند المرأة التى يحب ويدعمها فى الحياة
تحياتى لك

Carol يقول...

ملاحظة ان كل الرجال معجبين جدا بكلامك
و طبعا انا مش ضد كلامك ككل بس اختلف معك في بعض النقاط
!!"حسسيه انه سيدك وانك محتاجة له"
مش لازم احسس الرجل بانه اعلى مني و انا اتنزلت عن عرشي و اني سأكون دائما بشوشة
ببساطة انا انسان مثلي مثله
اريد من يتقبلني و يحبتني بكل مشاعري
يدرك انني انسان متقلب المشاعر احيانا اريده ان يفهمني ، ان يعرف كل تفاصيل ردود أفعالي
============================
طبعا فية نصائح جامدة جدا :)
فيه كتاب اسمه
men are from mars women are from venus
الكتاب ده حلو أوي لازم تشتريه
تحياتي لك

YHYيــوســف الـمصـرى يقول...

السلام عليكم
ايه الجمال ده كله نصايح 100% واخر جمال والله....
بس صعب ان الزوجات وقتنا الحالى يعملو كده ...بقى معقولة فى ست وبنت دلوقتى تحسس جوزها انه سيدها وانها محتاجة له!!
مظنش !!امال فين المساواه بقى !!
انا أشجب واعترض واحتج ..وعلى رأى الراحلة سعاد حسنى (الينت زى الولد..مهيش كمالة عدد) ههههه
وفى ست او بنت تسكت لما تحس ان جوزها مضايق او حاجة خنقاه ؟ يالهوى ده زن زن كل شوية مالك يا راجل قولى مالك يقلها تعبان شوية من الشغل قرفان من كذا تفضل برضه (لوك لوك) لا ده فيه حاجة تانية انت مخبيها عليا وهات بقى زن زن تخلى الراجل يطلع من فلنته ههههههه
نصايح هايلة والله يا ياسمين يا متألقة ومتهيقلى جملها انها خلاصة تجربة شخصية وتجارب اخرى لناس فعلا خلاصة مفيدة ويجعلها فى ميزان حسناتك :)
تحياتى وتمنياتى بمزيد من التألق
.............
ادعولى علشان بقالى كتير مش بكتب ومش جيلى نفس اكتب وفى حالة اكتأب شديدة يمكن الى بيهون عليا شوية تعليقاتى على اخواتى المدونين ...
يا ريت الكل يدعيلى بصلاح الحال والاحوال
سورى يا ياسمين على الاعلان ده هههه
تحياتى 2 مرة :)

Gid-Do - جدو يقول...

ياسمين

انا سبت الرد دة عند مدونة زنزانة وكنت ناوى اسيبة عند مدونة شهروزة لكن شهروزة كانت قامت بالواجب
ـ تحياتى
***
رندا

بما انك سبقتينى وردتى على المدعو ـ أم هانم الشغالة ـ اسمحيلى اقول لاخينا اللى لسانة فلت منه من فرط غيرتة على مصر ـ اختلاف الراى بين الناس شئ طبيعى ولازم يكون ـ لكن تجريح الناس بالشتيمة دة بيخلى الناس تتعاطف مع المشتوم وتنزل الشاتم من عنيها ـ والشتيمة اعتراف بالعجز من الشاتم تجاة حجة المشتوم

رندا

من فضلك احذفى التعليق يالشيمة اللى فية ـ والاخ الشاتم يجب الاعتزار لياسمين

وان رفض الاعتذار ارجو ان ياسمين تقبل اعتذارى انا نيابة عنة

June 5, 2007 4:04 AM

loumi يقول...

العزيزة ياسمين
دائما تتطرقين لمواضيع تهم
الرجل والمرأه على السواء
فلو صلحت هذه العلاقه لصلح المجتمع بأثره وانتج لنا اجيالا متوازنه قادرة على البناء والتطوير
فلقد خلق الله الانسان لاعمار الارض
وكلما كان هناك تناغما بين افراد الاسره كلما كانت الحياه اجمل والذ
اتفق معك فى بعض الامور واختلف فى بعضها
انا ضد فكرة ان يشرك الرجل وزوجته اى شخص مهما كان فى خلافاتهم
و مهما كان هذا الشخص مقربا ومحبا لهما
الحكمه تقتضى ان يحلا مشاكلهما بعيدا عن اى تدخل فكم من مشكله كانت ممكنه الحل بدون تدخل اى طرف تعقدت و تفاقمت بتدخل المحبين من الاصدقاء
وهذا واقع رأيته فى حالات كثيره
مسأله المساحه من الخصوصيه مطلوبه للطرفين مش بس للراجل
يعنى بشكل عام لازم الست والراجل يبقا عندهم من الذكاء انهم يقدروا يفهموا احتياجات بعض.
ياسمين
انا دايما ضد فكرة اطلاق احكام
على كل الرجال وكل النساء
انا دائما ابحث عن الانسان سواء كان رجل او امرأه
وعشان كده حاسألك
لو كنت سيده عاقله وحكيمه
وملتزمه بكل ما ورد فى كلامك من نصائح
وجيه جوزك وقالك انا
الحياه دى مش عاجبانى تعملى ايه؟
تحياتى ليك يا جميله

LOJAIN يقول...

اسمحيلى اتكلم نيابة عنك
يا جماعة هى مش متحاملة على الرجالة هى متحاملة على حالة بعينها


الغريب يااوختشى بقى لما انتو مش الحالة بعينها دى, واخدين الكلام على روحهم و بيقولوا لا مش كده ليه.. هه

كلام جميل جدا و مصيب للهدف كالعادة

بس تفتكرى انتى بطبيعتك الانثوية السوية لو لقيتى صاحب الملكات الكويسة
البنى ادم المعتدل , اللى فعلا يجبرك عن انك تتخلى عن تفكيرك فى مقابل تفكيره الاسمى , ترمى كل شىء تحت رجله عن طيب خاطر, يكون هو الملك المتوج لعرش القلب والعقل,, هتبقى ليه الشخصية النكدية عديمة الاحساس... الخ

عارفة يا ياسمين اللى بتقوليه ده انا واى بنى ادمة عندها استعداد تعمله من غير اى طلب او تلميح حتى مش صريح
بس الذوقيات مينفعش تتعامل معاملة الحق المكتسب فى وجهة نظرى

انا ممكن احط رقبتى تحت رجلين زوجى السوى بالكلمة الطيبة
لكن لو رقبتى تحت رحمة رجله عمرى ما اطاطى بقلة الذوق ابدا

اللى يستاهل كده راجل
وليس كل ذكر براجل

Regards:
Lojain :)

The Alien يقول...

حلوة نصايحك ومتفق مع كتير منها بس أنا مستغرب من كام حاجة

ليه الراجل دايما بيدور علي بنت يكون مسؤل عنها؟
ولو هو بيفكر كدا
ليه البنت دايما تدور علي راجل يكون مسؤل عنها؟
أنا مثلا بدور علي بنت تكون مستقلة تماما ومعتمدة علي نفسها مش بتمسك إيدي عشان أعديها الشارع
ليه الراجل مش محتاج دعم من حبيبته؟
كتير ممكن الراجل يعند وميبينش ضعفه
بس دايما بيبقي محتاج حد يفهم ويساعد
ودايما بيتوقع دا منها هي

ليه بتطلبي منها تحسسه إنه سيدها وإنها محتاجاله؟
إنتي بتطلبي منها تحسسه بكدا ولا تعتبره وتتعامل معاه فعلا كدا؟

متهيألي إن الطرفين محتاجين مساحة خاصة
محتاجين يكون لكل منهم حياة وإهتمامات مستقلة
دا هيكون مفيد جدا للعلاقة

تحياتي

سهر الليالى يقول...

ياسمين العزيزه
رائعه تلك النصائح لاى امرأه ترغب فى السعاده ...بس عندى سوال تفتكرى لو نفذت نصائحك هيقدرها ولا برضه مش هتعجب ويدور على غيرها؟؟؟؟؟ عايزه نصايح للرجاله بقى تفهميهم ازاى يسعدوا الست ومتهيالى ان ده اسهل بكتير بما ان الست بترضى ولو بكلمه كويسه او لمسه حنينه
بس ده بجد بقى نصائح قيمه جدا وعايزه ابدا فى تنفيذها يا سكر علشان اشوف النتائج وادعيلك ياسلام على كده يا سلام
سلام يا قمر

Xee يقول...

العزيزة ياسمين

مكنتش فاكر اني هتفق معاكي في رأي بصراحة

:)

و لكن فعلا ، لا فض فوكي يا أستاذة ياسمين و لاون تعبير "حسسيه انه سيدك" كان قوي شويه، و مظنش ان هوه ده اللي عايزه الراجل

بس بجد مقال قوي جدا أحييكي عليها
و ياريت ستات كتير يفهمو الكلام ده

تحياتي و احترامي
زي

أسوور يقول...

مدونة كسبان
أهلا بيك فى أول زيارة لمدونتى
بس طب يعنى انا اقولك ايه على الموضوع اللى مضايقك دة
يعنى نغلق فم كل امرأة بالضبة والمفتاح عشان الصداع يروح؟
أقولك
خد بانادول اكسترا
:)))
تحياتى

أسوور يقول...

كارول
على فكرة انا عندى الكتاب دة وهو كتاب عظيم فعلا بس عيبه ان لما امرأة بتقراه مش بتقرا اللى المفروض تعمله هى بتقرا نفسها وكمان الرجل لما بيقراه بيعمل كدة
الهدف من الكتاب اننا نفهم الطرف الآخر ويمكن اهداء نسخة للطرف الآخر حتى يعرف عنا أكثر

بالنسبة لجزئية ان تحسسيه انه سيدك
أنا أكملت الجملة لكن لم ينتبه لها أحد
قلت حسسيه انه سيدك وانك ملكة وقد وضعتى عرشك تحت قدميه
أى انك فى الأصل ملكة لكنك تخضعين له برغبتك
تحياتى

أسوور يقول...

يوسف المصرى
على فكرة الموضوع لا يتعارض مع المساواه على وجه الإطلاق
هو سيدها وهى ملكة متوجة على قلبه واختارت ان تضع عرشها تحت قدميه
حد فاهم حاجة

المرأة مش عاوزة راجل يغسل معاها الأطباق

هى عاوزة راجل يتعاطف معاها لما تشتكى ان ظهرها واجعها من غسيل الأطباق

مش يقولها طب ما تطلعى مرات البواب ولا يقولها طب ما كنتى تسيبيهم اغسلهملك
لأ
عاوزاه يقولها انت بتتعبى معانا قوى يا حبيبتى .. انا مش عارف كنت هأعمل ايه من غيرك
انتى اكيد تعبانة تعالى اعملك مساج
فهمتنى؟
تحياتى

أسوور يقول...

جدو
أنا مش عارفة اشكرك بجد ازاى
التعليق دة عمللى نوع من الإكتئاب فعلا وتعجبت ان ما حدش مسح التعليقات دى

وزى ما انت قلت المفروض اننا متحضرين كفاية عشان اختلاف الرأى لا يفسد للود بيننا قضية

اشكرك مرة أخرى لمقوفك النبيل
تحياتى

أسوور يقول...

جدو
كنت احب اسمع رأيك فى البوست
تحياتى

Masry يقول...

اهتمى به كطفل ..واحترميه كأب .. وحبيه كعشيق .. وعامليه كصديق

اعملي مدرسة يا ياسمين و هتغيري المجتمع

نصائح رائعة بس يا رب البنات يسمعوا

تحياتي

.:.-=- ELGaZaLy-=-.:. يقول...

لا تقدمى شىء تعتبريه تضحية ابدا مهما حدث فالرجال لا يفهمون هذا المعنى بفطرتهم

اهتمى به كطفل ..واحترميه كأب .. وحبيه كعشيق .. وعامليه كصديق

الرجل يبحث دائما عن امرأة يشعر انه مسئول عنها وأن له دور فى حياتها وليس العكس .. كونى تلك المرأة لأنه سيبحث عن أخرى ليهتم بها بدلا من امرأة تعطيه كل شىء وتدعمه فى كل شىء

هو لا يحتاج لدعمك .. هو يحتاج أن يدعمك
-----------------------------------
همممممممممممممممممم

عندما ينطق العقل يكون كما كتبتى

Mirage يقول...

ايه العقل ده كله بس ؟

المشكلة دايما ان النظرية حاجة والتطبيق العملى حاجة تانية خالص

أسوور يقول...

لومى
نورتينى يا لومى بجد
بأفرح لما الاقى تعليقك عندى
فكرة اشراك الأصدقاء بتبقى ضرورية فى بعض الاحيان
انا متزوجة وعارفة ان دة ساعات بيبقى ضرورى لتقريب وجهات النظر وشرح آراء الزوجين من ناس فى نفس السن ونفس المستوى والفكر
وبالنسبة لرجل يغدر بإمرأة تفعل كل ما ينبغى لإنجاح حياتها الزوجية
دة بيبقى عيب فى الرجل نفسه ولا يمكن ان نعمم شواذ القاعدة
تحياتى

أسوور يقول...

لجيـــــــن
انتى قلتى حكمة يا لجين
ليس كل ذكر برجل
دى حقيقة
لكن فعلا فى ستات مش فاهمة طبيعة الرجل وبتفكر انه مش بيحبها او مش مهتم بيها فى حين ان اكتر كلمة تضايق الراجل انه يتهم بعدم الإهتمام والحب
تفضل الست تقول كدة لجوزها لحد ما يقتنع فعلا بكلامها ويبدا ما يحبهاش
نوع من غسيل المخ يعنى

تحياتى لتعليقك الرائع
دة ينفع بوست لوحده

أسوور يقول...

The Alien
انا قلت مساحة من الخصوصية
وانا اقصد فعلا لكل منهما
أما بالنسبة لموضوع الدعم من المرأة فأنا بقصد حاجات معينة هاشرحها فى بوست مستقل .. لكن انا قصدت ان فى ستات بتعامل الرجل كأنه طفل طول الوقت ودة بيخنق الراجل فعلا
يعنى امشى من الشارع دة .. روح قول لمديرك كذا .. الفلوس مش كفاية هأروح أجيب من ابويا
الولاد عاوزين لبس وماما جابتلهم عشان اوفرلك
حاجات من دى يعنى
بعد شوية يبدا الرجل فى الشعور بأنه لا يستطيع ان يقوم بأى دور فى حياتها بالكامل فتتولد عنده لامبالاه نابعة من شعوره بالنقص فى دوره
أما بخصوص حسسيه انه سيدك
دى مافيهاش حاجة
فيها ايه لما يحس الراجل ان مراته بتطيعه وتتعامل معاه بإحترام وتقدير
ساعتها اضمنلك انه هو نفسه هيشيلها جوة عنيه
مش تحقر من نفسها .. لأ .. دة رفع من شأن زوجها اللى هينعكس عليها وعلى حياتها
لما الرجل بيحس بالمسئولية تجاه حد بيشيلها بجد وبيتحمل كتير عشان يثبت انه جدير بالمكانة دى
دى طبيعة الرجل الحقيقية
اقرا كتاب الرجال من المريخ والنساء من الزهرة وهو لكاتب ومحلل نفسى اسمه جون جراى
الراجل امريكى وبيتكلم عن الرجل والمرأة ولما تقرا الكتاب تحس ان الرجال لا يختلفون فى كل مكان فى العالم
تحياتى

أسوور يقول...

سهر الليالى
انتى بجد سكرة التدوين

والله النصايح دى بتنفع بجد لكن لو راجل بقى طلعت عينه زايغة وشافله شوفة يبقى دة عيبه هو مش عيب كل الرجالة

جربى النصايح وهأعرف منك النتايج بنفسى
:))))))))
تحياتى

الكلام نوعان :كلام فارغ وكلام مليان كلام فارغ يقول...

نصايحك اكتر من رائعه
بجد هايله جدا
ويارب تكون موجوده اللى تفهم الكلام ده
بس هل من الممكن انك تعملى نفس النصايح دي للرجال عشان تبقى الكفتين متوازنتين
تحياتى اول مره هنا في المدونه بس فعلا هااااااااااااااااااااااايله
اتمنى تشريفك لمدونتى
تحياتى

أسوور يقول...

Xee
والله بأفرح لما ألاقى تعليقك عندى
وفرحت أكتر انك اتفقت معايا فى بوست أخيرا

على فكرة دة مش مجرد بوست .. أنا مؤمنة بكل كلمة فيه وكنت ماشية على المنهج بصراحة بس تأتى الرياح بما لا تشتهى السفن احيانا

انا قلت حسسيه انه سيدك وحسسيه انك ملكة و اخترتى انك تحطى عرشك تحت رجليه
المعنى يبقى ناقص لو خدنا الجملة الأولى فقط

يعنى تحسسه بدون كلام انها عظيمة ورائعة وملكة فعلا لكنها اختارته دون العالم كله لتضع عرشها تحت قدميه

المعنى دة جميل فعلا وأى رجل سوف يقدره

تحياتى

أسوور يقول...

آخر من الآخرين
كالمعتاد .. اخترت بفطنتك أهم جرئية فى البوست
انا بأعتبر ان الجملة دى تشرح كل حاجة بجد وان باقى التفاصيل ليس لها أهمية لو فهمنا الجملة دى بجد ونفذناها

أرجو انك تكون فهمت انى غير متحاملة على كل الرجال بل على السلبيات فقط التى تحدث من البعض

تحياتى

أسوور يقول...

.:.-=- ELGaZaLy-=-.:.

صديقى العزيز
مبسوطة بتعليقك جدا
وعارفة انك عجبك البوست من قبل ما أكتبه
:)))))))))

ادينا بنحاول نسعد الناس رغم اننا بعيدين عن السعادة كل البعد
تحياتى لصديقى العزيز

أسوور يقول...

ميراج

انت عندك حق فعلا
التطبيق محتاج لتفكير عميق وأغلبنا بيتصرف طبقا لعواطفه
ينفعل ويتشاجر ويختلف ويصرخ ويبكى وينسى صوت العقل تماما فى وقت الإنفعال

تحياتى
نورتنى

أسوور يقول...

الكلام نوعان :كلام فارغ وكلام مليان كلام فارغ
نورتينى فى اول زيارة لمدونتى

ولو تصفحتى المدونة هتلاقى نصائح كتير للرجال

بس أوعدك انى أكتب بوست مماثل فعلا موجه للرجال

تحياتى وانتظرى زيارتى

Ezz يقول...

عزيزتي الجميلة و الرائعة ياسمين: تصدقي بالله أنا أفتكرتك بتتريقي!! والله ده كان شعوري أول 4 تسطر.. بس بعد كده.. إنتفخت أساريري.. و أرتسم على وجهي إبتسامة رضا و إرتياح.. إبتسامة المظلوم عندما يرفع عنه الظلم... إلهي و أنت جاهي ما حد يضيمك ولا يظلمك أبدا يا شيخة.. بيب ياسين..و حبيبيتكو مين ياسمين.. عز

غير معرف يقول...

ياسمينا الي بقالها كتير نسياني بس انا عمري ما بنساها موضوعك تحفة تحفة تحفة وياريت البنات والستات تعمل بيه علشان نفسي الاقي بيوتنا جنة على الارض نفسي

Masry يقول...

فاهم و الله يا ياسمين ..
بس انتي عارفة الرجالة و دماغهم الضغيرة بقي :)

بجد بوست رائع

تحياتي

ياسر سليم يقول...

عاوزة تخلى راجل يحبك ؟

حبيه حتى النخاع


وده على فكره مش مع الرجال بس ..

اى شخص هيحس اننا بنحبه بجد لازم يقابل الحب بحب ..

سواء ان الرجل فعل ذلك مع المرأه او هى التى فعلت ..

تدوينه جميلة

تحياتى

ابن مرّ يقول...

لا أعرف كيف أعلق هاهنا

أكتفي بالقراءة والصمت

محاولة للفهم

لست معقدا كما تبدو لغتي
لكني بكل تأكيد أكثر جنونا وطفولة

أحيانا أشعر وما شأن الذكورة والأنوثة بما يعتلي الروح؟؟؟
لماذا تخلطون الأوراق

"أنا مش ألعب معاكم عشان أنا مش فهمتكم"


ما علينا تقليب الأفكار في خزان الوجدان الجمعي برضه مش وحش

LOJAIN يقول...

فى ستات مبتفهمش اتفق معاكى
وييجى برده دور الراجل الفاهم المتعلم
الراقى اللى يقدر ذكاؤه بقدر ما يصل اليه من اشخاص
فى انه يقولها ان ده غلط

بس برده اللى هتقول كده هتقول كده ليه
مش من غلبها
مش احساسها بانها عاملة زى الكاسات فى النيش
بس هى بره النيش
مبنكرش انه فى ستات نكدية ولو حتى معاها رجل كويس

بس تفتكير الراجل انه اذا وجد نفسه مع حد بالشكل ده هو الاستبدال
في حين ان الست اذا وقعت فى نفس المشكلة لا تلجا للاستبدال كحل
بتبقى محاولات مضنية فى الاصلاح

وده بقى للست النكدية او غيرها
اصلا انا بلاحظ ان سبب نكدد الست النكدية فى كتير من الاحوال
برده اعوجاج حاله

ماعلينا

---------------------------
انا حلمت بيكى :))

Regards:
lojain :)

غير معرف يقول...

اجمل مافى البوست انه بيفكر كل انثى ان زى ماليها حقوق لازم عليها واجبات
وكلها حاجات مش وحشه ولا متعبه ولا هاتضايق الانثى اكتر ماهاتخليها سعيده
مش هاتعمل حاجه غصب عنها يعنى
اول مره اخد بالى من موضوع ان الانثى تسيب الفرصه للرجل انه يكون مسئول عنها وان ده شيئ بيحبه فيها
انا دايما باشوف الرجال اطفال كبار محتاجين اللى ياخد باله منهم باستمرار
انا كده اكتشفت مشكله كبيره فيا
انا عمرى ماتخيلت ان ممكن حد يكون مسئول عنى غيري
بالعكس انا المفروض انى اشيل مسئوليته
أشكرك انى صححتى المفهوم ده عندى
عشان ابقى مستعده لما تيجى لحظه التنفيذ
^^

reri يقول...

لأ بجد نصايح جامده
أنا ما أتجوزتش
بس إن شاء الله أكيد لو بحبه هلاقي نفسي بعامله كده
كالعاده يا ياسمين بتحطي إيدك علي المكان الصحيح في نفس الإنسان
بحييكي بحد
سلامااااااااااااات

مـحـمـد مـفـيـد يقول...

والله يا ياسمين انا عارف انك بتطرحي المشاكل علشان كل واحد يعرفها ويبدأ يتجنبها مش مجرد حياه وخلاص

تحياتي مره اخري

أحمد سلامــة يقول...

يعني مختلف معاكي في معظم اللي اختلف فيه الرجال اللي بيحترمو عقلهم وعقل نساؤهم في كومنتاتهم
واهمهم طبعا تعليق ألاين
بس اللي حسسني بعدم القدرة على بلع الفكرة
هي ان في نوع من المهاوده وتمشية الحال في الموضوع
وكأن العنوان :
اسعدية واشتري دماغك
في نوع من قتل عقل المرأة كده يا ياسمين بس بصورة جديدة
انتي قلتي في بوست قبل كده انك ترفضي معاملة الانثى على انها دمية
وبصراحه بكتير من النصايح دي
انا ارفض ان اعامل كمريض نفسي
أريد انثى مسؤلة عني بنفس قدر مسؤليتي عنها لست الها لكي أحكمني حكما مطلقا
اريد انثى تخبرني بمركزي الحقيقي بين الرجال مش تهاودني فيه
اريد انثى تختلف معي حين اختلف معها لا اريد تابعة
اريدها مفكرة وبناءة
--------------------------------
على الرغم من اختلاف الأفكار بينا المرة دي وان كنت اشك في انها كلها من تفكيرك الخاص
بس برضو تخللت البوست جملتين عبقريتين

أن يكون هناك من الأصدقاء ممن يهتمون لأمركما حتى يتدخلوا للصلح عند اللزوم

ان الرجال دائما ما يحتاجون مساحة خاصة بهم

بس الجملة الاخيرة طبعا مساحة مش فجوة
تحياتي لكي دائما

ابو العربى يقول...

ياسلام اهو دة الكلام
هو دة المطلوب اثباته ده لو فى كدة الحياه تبقى جميله ورائعه بس الاغلبيه مفيهاش الكلام دة نكد وهم وغم وبس

تحياتى

Unknown يقول...

آه يا سيدتي الجميلة يا سلام ده احلى كلام من امراة سمعته تريد التصالح مع نفسها قبل ان تتصالح مع الرجل وهو تصالح لا يكون على حسب الكرامة بل تصالح من اجل السعادة والسلام النفسي المفقود في قلوبنا و حياتنا وما خرج من القلب يصل الى القلب مباشرة من غبر استئذان.

نفسي يا ياسمينتي اجد توأم الروح الذي استطيع ان اطبق معه كلامك!

ونفسي لما الاقيه واطبق الكلام ده يفهمني صح ويحبني صح ويقدرني صح واجد منه استجابة تكون متوازية مع تعاملي وقلبي ومشاعري الطيبة!

نفسي اتصالح مع شخص الرجل فقد تعددت جراحي من غدرهم و خذلانهم وتقلباتهم!

الحمد لله لنا رب كريم ورحيم.

-_- يقول...

طب والله العظيم موضوع جامد

مدونتى فيها موضوع ريحته وحشة
اللى بيقرف ميدخلش عندي

:)))))))

عبدالله يقول...

ياسمين
الموضوع جميل فيه حاجات جميله و حاجات زياده شويه
:)
بس جزئيه مساحه خصوصيه اعتقد هي الجزئيه الي في ناس كتير مش بتفهمها بس الناهيه اقول الرجل بشر زي المراه ومفيش قواعد اكتر من الاحترام والتقدير المتبادل ده اساس كل حاجه

تحياتي

dr_lazeez يقول...

kalam gamel :)
bass 2aktar 7aga 3agbany 7ekayet el da2an deah 2ely 3and el regala .
law la2eaty wel set 2ely momken te3mel keda momken te3arafeha 3alaya .
:)
ya salam 3ala keda ya salaaaam

Ehab يقول...

بصي يا ستي انا هاجيب بابا واجي نتقدم للملاك اللي انتي بتكلمي عنه ده اما لو كان ده خيال شعراء فحرام عليكي قلبتي علينا المواجع
انتي قولتي حاجات كتير جميله بس خللي بالك ان الراجل كمان لازم يعمل حسابه انه متجوز بشريه مش ملاك من السماء يعني يراعي مشاعرها وضعفها وغيرتها ولهفتها عليه وقلقها الزايد وغلطاتها الغير مقصوده وساعات كمان المقصوده عشان لما هو يستحمل منها كل ده هي كمان بتبقى مستعده تستحمل منه عشر اضعاف اخطائه عشان بتحس انه بيصبر عليها وهي كمان لازم تصبر عليه يعني لازم المعادله من الطرفين
والف الف تحيه على الكلمات الجميله الحكيمه
سلاااااااااااااااااااام

أسوور يقول...

عــــــــز
دة انت شكلك مضايق مووووووووووت
ومتنكد عليك موووووووووووت
بس اسأل نفسك ليه؟ .. ليه وصلت للمرحلة دى؟؟
من خبرتى فى موضوع الجواز ومشاكله تبينت ان الرجل هو البادىء فى أغلب الإحيان .. مش بالمشاكل ؟؟ .. لأ .. بحاجة بتخلى الست زى المجنونة اسمها الإهمال
الإهمال لو حست بيه المرأة تصبح فورا مخلوق عدائى جدا جدا ويصعب السيطرة على نوبات غضبه
تحياتى

أسوور يقول...

قلوب حائرة
أعتذر عن تأخرى فى الزيارة بس المدونة والرد على الزملاء واخد منى وقت كبير
أعذرنى
أنا كمان اتمنى ان تكون الأسرة فى مصر سوية حتى تنتج ابناء أسوياء قادرين على النجاح فى المجتمع وبالتالى انجاح المجتمع الرفع من شأنه
تحياتى

أسوور يقول...

ياسر سليم
دى حقيقة على فكرة
لكن تايهة عن ناس كتير
نورتنى

أسوور يقول...

ابن مر
والله انت فاهم كل حاجة بس مخبى

تحياتى

أسوور يقول...

لجين
انتى عندك حق فعلا الست بتعشش زى ما بيقولوا والراجل بيطفش

وفعلا مافيش ست نكدية فى ست منكد عليها راجل فنكدت عليه

ارجع وأقول ان المرأة زى السفنجة تضخ كل ما تمتصه
حلمتى بإيه؟
:)

غير معرف يقول...

انا بعثت لك طلب فتعليق بموضوع الطلاق لو ممكن تقريه وتردي علي

وحده

أسوور يقول...

وينكى
فعلا فى بنات كثير كدة
بتفكر انها المفروض تبقى شايلة المسئولية على طول وبتعمل كدة مع الراجل اللى مرتبطة بيه
تسهله كل حاجة وتساعده فى كل حاجة .. ماديا أو معنويا .. تخرج معاه متحاسب هى .. تصلح كل حاجة فى البيت .. تاخد العيال للدكتور.. تساعد ماديا لو هو مزنوق.. تقوله أنا أقدر اعمل كل حاجة مايهمكش

الرسالة اللى بتوصل للرجل فى الحالة دى انه مالهوش لازمة
دة فى عقله الباطن طبعا
وتبقى الحياة بالنسبة له مجرد مكاسب بيحصل عليها من امرأته
لكن جواه بيحس بنقص شديد وبفقدان رجولته وبيحس انها تقدر تعيش من غيره ومن غير مساندته لها

دايما بنسمع الناس بتستعجب على اللى اتجوز على مراته اللى وقفت جنبه لحد نا وقف على رجليه ونجح
لأنه بيحس ان دة مش نجاحه وبيروح يدور على واحدة تاخد منه وما تديهوش غير احساسه برجولته وبس
وتلاقى راجل بيعمل لمراته البدع وهى مدللة عليه وهو متمسك بيها وبيديها على طول الخط ولا يمكن يفكر فى ست غيرها
ليه؟
لأنه حاسس بأهميته وبيبذل كل جهد لإرضاءها كإمرأة
تحياتى

أسوور يقول...

Anonymous
سيتلك رد على تعليقك فى بوست الطلاق
تحياتى لكى ومنتظرة الرد برضه

أسوور يقول...

ريرى
اشكرك على الإطراء يا رب بجد حد يطبق الكلام دة والا اصبح فعلا مجرد كلام
تحياتى

أسوور يقول...

محمد مفيد

:)
اشكرك بجد ويارب تعبى ما يروحش هدر
تحياتى

أسوور يقول...

أحمد سلامة
النصائح دى هيفهمها كويس المتزوجون
انا بأفترض فى بداية البوست ان الحب موجود اصلا لكن لما كل واحد بيركز على نفسه بس بتبوظ العلاقة
تحياتى

vetrinary يقول...

الراجل بيدور على واحده يشيل مسئوليتها
ده حقيقى
وطبيعى
بس حاسس فكلامك ان الراجل مريض نفسى
وعنده حب التملك
السيده بطبعها مخلوق ضعيف
جايز تبقى انتى مش ضعيفه
لكل قاعده شواذ
والراجل بطبعه قوى
الفطرة هى اللى بتجبر الراجل انه يهتم بالانسانه اللى معاه
سواء صديقه
او عشيقه
او زوجه
الموضوع مش بيخص الراجل الشرقى بس على فكرة
المشكله بقى ان الست فاهمه انها الاقوى
وانها الاذكى
وانها المسيطره على الموضوع
بس لما تكون جنب الراجل
بتنسى الحجات دى كلها

أسوور يقول...

ضد الظلم
نورتنى فى اول زيارة
الغالبية منا لا يستطيعون ايفهمون بعضهم البعض
انا افترض وجود الحب وعشان ننقذ العلاقة لازم نفهم الآخر
انا كتبت بوستات للرجال من قبل
ودلوقتى توجهت بالكتابة للمرأة
تحياتى

أسوور يقول...

رانيا
هتلاقيه
ولما تلاقيه .. ماتنسيش الكلام دة ابدا
حطيه قدام عنيكى دايما
تحياتى للرقيقة رانيا

أسوور يقول...

شارم
انت بتطفش الناس من مدونتك ولا ايه؟
تحياتى

أسوور يقول...

عبد الله
أشكرك للزيارة
واحشنى والله
تحياتى

أسوور يقول...

دكتور لذيذ
أعرفك عليها قوى .. قوى قوى

بس المهم ما تروحش بعد كدة تدور على غيرها وتتجوز عليها وتقول اصل دة تكليف من عند الله وشرع من فوق سبع سموات

انت تستحق عموما 4 من النوع دة مش واحدة بس
:))))))))))

عموما انا عارفة انك مش كدة .. دى مجرد دعابة

طب أدلك على واحدة من النوع دة وانت تدلنى على واحد قلبه أكبر حاجة فيه؟
ويكون كله عنده من هنا
يا سلام على كدة يا سلام

أسوور يقول...

الشنكوتى الكبير
انا هأكتب بوستات تانية ترشد الرجل لاسلوب التعامل مع المرأة وعشان يفهموا بعض
تحياتى لك ونورتنى

أسوور يقول...

vetrinary
انا لم اقل ابدا ان الرجل مريض نفسى لكن لكل منا طبيعته وفطرته
لما بتتعرف على حد من دولة تانية بتحاول تعرف ايه اتجاهاته وميوله وهواياته وثقافته
دة الوضع نفسه فى العلاقة بين الرجل والمرأة لما تتعرف على واحدة لازم يبقى كل واحد عارف ان فى اختلاف فى الطبيعة
ولو ما راعيناش افختلاف دة بيموت الحب من عدم الفهم
تحياتى

islam yusuf يقول...

كلامك فيه شىء كتير من الصحة
انتى الوقتى بتدعى المؤأة انها تاخد الراجل على اد عقلة و دى حاجة مش وحشه
ده ممكن يكون السبيل الوحيد لمواجة المشاكل او الابتعاد عنها

بس كده ممكن الراجل يتغر فى نفسه لو مراته بتزاول نفس انشطته الحياتيه خارج البيت

اما لو نشاطها داخل البيت فقط ف ده تحفيز كبير للرجل
اول زيارة و مش هاتكون الأخيرة
تحياتى

أسوور يقول...

islam yousef
نورت المدونة
الكلام دة لكل النساء على فكرة اللى بتشتغل واللى مش بتشتغل برضه
لو كل امراة فهمت الإحتياجات الطبيعية والفطرية للرجل واهتماماته الحقيقية لإرتاحت وأراحت

المشكلة ان ماحدش بيفهم التانى حتى لو فى حب
الرجل عملى يحب ان يكون فى فوهة المدفع وانه يكون موثوق فيه وانه يكون مسئول وشعوره بإعتماد زوجته عليه وثقتها فيه بيزيده تقدير لنفسه

أما المراة فهى عاطفية شعورها بالتقدير ينبع من شعورها بحب زوجها لها وتقدير مشاعرها وتعاطفه معها فى ابسط متاعبها .. اذا اشتكت المراة فهى لا تريد سوى حضن كبير وتقدير لشكواها وفهم لمشاعرها ودة الأصعب

الجزء الأصعب يقع على الرجل وهأتكلم عن دة فى بوست آخر انشاء الله
تحياتى

Reemo يقول...

ياسمين
بجد مش عارفه اقولك البوست ده روعه ازاى
وقد ايه كنت محتاجاه اليومين دول بالذات
بجد كانك بتقرى أفكارى
وهحاول انفذ كل اللى قلوتيه بالظبط
ادعيلى بس بجد يا حبى
مستنيه الجزء التانى بفارغ الصبر
متتأخريش فى تنزيله
محبتى

BinO يقول...

السلام عليكم ورحمة الله وبركاته

Eric Matt يقول...


ربنا يكرمك يا رب

اختلافي معاكي في حاجات بس مش مركز دلوقتي

ربنا يكرمك يا رب

تحياتي لك من ماناساس البلد

Ezz يقول...

الجميلة ياسمين:
قد أكون أكثر حظا من رجال كثيرين..فبعد عشرة عمر تمتد لتسع سنوات أستطيع القول بأنني و زوجتي توصلنا لحل وسط في العلاقة بيننا مبنية على إحترام متبادل و تقدير لظروف متبادلة، و تفهم لحاجات الأخر.. ولكن لا يسلم الأمر من محاولة (لمجرد المحاولة و رؤية ردة الفعل عل و عسى نعود للماضي و الماضي ده كان اول سنتين حيث المشاحنات أمر طبيعي في الحياة الزوجية في بدايتها) فرض رأي أو القيام بمقارنة ما لموقف ما لا علاقة له بواقعناالمعاش فقط لمجرد جر الشكل.. و ساعات بيكون الموضوع زي الأطفال محاولة لشد الإنتباه.. أما بخصوص تعليقي السابق فكان سببه سعادة حقيقية و إكتشاف أن الدنيا لسه بخير و أن في ستات ممكن تفكر بصورة إيجابية. الرجال يا سيدتي لآ استطيع أن أتحدث بالنيابه عنهم و لكني أستطيع ان اتحدث عن نفسي و أقول أنني و جدت نفسي و اخرين مثلي (طبقا لحالات كنت شخصيا شاهد على حدوثها) نتحول لشخصيات -في بعض الأحيان- مقيته كرد فعل لفعل أكتر مقتا و قرفا و صدقيني يا عزيزتي كثير من الرجال يبحثون عن الراحة بعيدا عن المشاكل..... في نكته بتقول أن المرأة تريد من زوجها أن يكون متفهم، حنون، رومانسي، يحب التسوق، رياضي، فنان، متدين، شجاع، طيب، يجيد الأعمال اليدوية، خشن الملمس، رقيق القلب، دمعته قريبه، يمطرها يوميا بكلمات العشق و الحب و الوله، مستعد للموت فداء لحماته، غني و مقتدر، غاوي سفر، لا يجلس أمام التلفزيون ، و يحقر من شأن الجميلات أمامهاووووو الصفات في النكته تعدت الخمسين صفه.. بالنسبة للرجل فهو يريد من زوجته ما يلي:

تسيبه في حاله!!!!!!

أرجو أن يكون موقفي واضح .. أما بخصوص عدم الكتابة في مدوتني فسببه حالة من الجفاف و رغبة ملحة في السفر.. و عموما أنا مسافر ماليزيا مع زوجتي الحبيبة (و يا ريت نركز في كلمة الحبيبة)و ابني و بنتي لقضاء أسبوعين هناك منهم أسبوع في منتجع تروبيكال خالص!!!!! علشان زوجتي الحبيبة (تاني) تنبسط.. سلامات يا ياسمين..عز

harmless يقول...

ياااااااااسمين

اتذكر ان زمان رئيس البرازيل اصدر قرار بان بيليه ثروة قومية للبرازيل ومعنى القرار انه صار ملكا للشعب ولا يجوز انتقاله لاى نادى خارج البرازيل

وانا كلما قرأت كلماتك وكلمات اصدقائك المعلقين اشعر انك ثروة قومية ملك للجميع
واتمنى لو كان للمدونين صلاحية اصدار قوانين تمنعك من الغياب عنهم وتأمنهم من تقلبات مشاعرك او مخاطر غيابك

تحباتى واعجابى
واشكرك على السعاده التى تمنحيها لى

بييبو يقول...

كلامك حلو اوى يا ياسمين فعلا وحقيقى جدا وهاكون من القارئين دايما لمدونتك
تحياتى

Unknown يقول...

اه يا بنتى التلقائيه و الحب ده كله

الكلام ده لو حصل الدنيا كلها تتملى حب

ده انا حتى حبيت البوست ده و مش قادر اسيبه و كمان بطلب ايده منك


بجد يا ياسمين كلام زى العسل صادر من انسان اكيد حب واتحب


تحياتى يا صديقتى العزيزه

gohayna يقول...

كلامك رائع ونصايحك اروع

بس تفتكري ان الحياه بتسمح للست دائما انها تمارس الدور دا

او بالاحري هل تعامل الرجل معاها يعطليها الاراده لان تستمر في الور الكبير الي بتعمله

معلش يعني معظم الرجال بيعتقدوا ان الست لازم تكون ام بديله
ودا حقيقي لانه طفل محتاج الرعايه حتي لما شعره يشيب


وبينسي دايما انه كمان عليه واجبات تجاهها علشان يحسسها بوجودها واهميتها

ازا كان الرجل طفل محتاج للعنايه
فالمرأه زهره محتاجه للحنان والحب كي تستمر في عملها

يعني لازم الاتنين يشتركوا في اسعاد نفسهم

مش كل حاجه علي الست والست فقط

ولا ايه يا قمر

البوست الي جاي بقي ياريت يكون موجه للرجاله

بعنوان كيف تسعد زوجتك

ربنا يخليكي يا سمسم

وتكتبي وتوعي الناس اكتر واكتر

تحياتي يا قمر

micheal يقول...

يا ريت الناس كلها كانت بتطبق نصائح ياسمين
تحياتي لكي

أسوور يقول...

ريمو
متشكرين يا فندم
أى خدمة
تحياتى يا سكر

أسوور يقول...

بينو
وعليكم السلام ورحمة الله وبركاته

أسوور يقول...

جروووووم
ازيك انت عامل ايه؟
كان نفسى تبقى مركز وتقولى رايك
معلش المرة الجاية
ربنا يكرمك ويوفقك
تحياتى

أسوور يقول...

عـــز
سعدت بتعليقك ورايك الشخصى فى كإمرأة
مش عاوزة اقولك أحسن تتصدم
لكن هقول
لقد طبقت كل نظريات انجاح الزواج وكنت نعم الزوجة ونعم الحبيبة وتفانيت فى استعمال كل وسائل الراحة لزوجى وتفننت فى افبتعاد عن المجادلة والرد والمشاكسة التى كنت اجدها عقيمة جدا بين الأزواج
كتبت قواعد ومشيت عليها ولكن فجأة انهار معبدى دون سبب واضح
لمت نفسى كثيرا لأننى كنت نهرا للعطاء فنسى من حولى انى ممكن يكون لى اى احتياجات
وكرهت كتالوج الزوجة الصالحة اللى كنت ماشية عليه وأعلنت الحرب على نفسى وعلى كل الرجال
وفجأة استيقظت على صوت صديق يخبرنى اننى لم اخطىء بينما الآخرون هم الذين لم يقدرون هذا العطاء
عدت لصوابى وقررت ان افيد الاخرون من وجهة نظرى فى دور المرأة ونفسية الرجل كما أرشدتنى فطرتى ووجهنى عقلى وقلبى
اتمنى لك رحلة ممتعة

أسوور يقول...

harmless
ايه دة كله ايه دة كله
بلاش كدة احسن اصدق بجد

انت مختفى فين بقالك شوية قلقتنى عليك
تحياتى

el condor يقول...

سلام من المغرب أرحب بك صديقة وهذه مدونتي
http://el-condor.piczo.com

&

elcondorito.blogspot.com

أسوور يقول...

بيبو
اهلا بيك فى مدونتى دائما
وهآجى ازورك حالا
تحياتى

أسوور يقول...

whyme
انت على طول كدة رافع من روحى المعنوية
اتمنى انك تلاقى الحب الحقيقى ودة الجزء السهل
أما الجزء الصعب هو اننا نحافظ على الحب دة
تحياتى لصديقى المجامل جدا

غير معرف يقول...

عزيزتى ياسمين
وحشتينى كتييير ... الكمبيوتر الشقى بتاعى كان متعطل عشان كده ماكنتش قادرة اتابع معاكم .. و آدينى جيت اهه و الحمد لله
البوست ده رااائع كالمعتاد بس لازم كلمة للرجاله انهم يفتكروا
" و لهن مثل الذى عليهن "
و شكرا لكى ياسمين يا قمر
nadiataha.maktoobblog.com
حوريه

أسوور يقول...

جهينة
انتى كلامك مظبوط مية فى المية
لكن لما كتبت عن متطلبات المرأة هاجمنى البعض واعتبرونى عدوة للرجل

فكتبت البوست دة عشان يعرفوا ان دى مش الحقيقة

لكن عشان المرأة أكثر تعقيدا نظرا لحاجاتها العاطفية التى يصعب ترجمتها لماديات كنت بأكتب أكتر أنقد معاملة الرجل للمرأة بتجاهل لإنسانيتها

لكن بجد أوعدك انى اتابع كتاباتى للتقريب بين وجهات النظر والشرح المفصل لطرق التعامل مع كلاهما .. رجل أو امرأة

نورتينى ياسكر

أسوور يقول...

مايكل
شرفتنا يا باشا
والله ليك وحشة

جايالك حالا
تحياتى

الطائر الحزين يقول...

السلام عليكم
الموضوع ليس اكثر من حقوق وواجبات لابد ان يعيها الطرفان
وهناك وصية ام لابنتها ياريت نعيها جميعا مفيدة جدا
http://www.sunna.info/Lessons/islam_719.html

أسوور يقول...

el condor
نورت المدونة وأهلا بك فى عالم التدوين
رايحة ازورك حالا
تحياتى

أسوور يقول...

حورية
واحشانى يا حبيبتى
اخبارك ايه؟

البوست دة موجه للنساء حتى يصلحوا من علاقاتهم مع الرجل والزوج

فى بوستات جاية للرجل مخصوص

:)))
تحياتى

أسوور يقول...

الطائر الحزين
هأروح اشوف اللينك حالا

تحياتى

أبو ضحى يقول...

ده ايه الرضا ده
يا سلام ..يا سلام

أسوور يقول...

أبو ضحى
وااااااااااااحشنى جدا
اخبارك ايه بجد التدوين وحش من غيرك

يا سلام على كدة

أبو ضحى يقول...

و الله انتى كمان وحشانى
تعرفى موضوع كتابة المدكرات ده فكرة كويسة
كده بقه هتشوفى جديد قريب ان شاء الله
قريب جدا

عمرو غريب يقول...

يا سلام لو النصائح دة تطبق فعلا

كراكيب عادل يقول...

اية اللون دة

واية العقل دة كلة

اش اش اش

هروح اجيب بخور

وارجع

:)

islam يقول...

السلام عليكم

أشعر أنك تقرئين الرجال، نعم كل ما قلتيه هو ما حاولت عمرا أفكر فيه، عما أريده كرجل .. وعن أسباب الخلاف التى دائما ما تحدث فى البيوت المصرية بين الزوج والمرأة
نعم الرجل خلق للعمل فى الحياة، ثم لرعاية المرأة، أما المرأة فهدفها الأول هو الرجل، وهذا يشعر الرجل بإختناق، حين يشعر بإهتمام زائد من المرأة، ويشعره بدونيه حين تبكته كل لحظه، وتقول له شوفت فلان بيعمل وعلان بيسوى - ياريت تحطى الجزء ده عندك - ده بيخليه يشيط

تحياتى
وأنتظر المزيد

وعلى فكرة أنا كمان فى مجال وسائل الإتصال

السلام عليكم

غير معرف يقول...

كلامك جميل بس مش قابل كلمة سيدك حتي ولو جت بعدها كلمة ملكه

أسوور يقول...

أبو ضحى
انت هنا تانى عندى .. يا مرحبا يا مرحبا

هاستنى بقى البوست الجاى بتاع أحداث حياتك فى الشغل الجديد
اكتب عن الناس .. عن زمايلك .. عن مديرك .. عن علاقاتك بيهم
مادة ثرية جدا على فكرة انك تحاول اكتشاف شخصيات اللى حواليك
هتلاقى العجب
هاستنى .. تحياتى

أسوور يقول...

عمرو غريب
الرياضى الوحيد فى المدونات

ارجو انها تطبق فعلا عشان الحياة تبقى أحسن
تحياتى

أسوور يقول...

كراكيب عادل
آه والنبى هات البخور وخرزة زرقة وخمسة وخميسة عشان الحسد
:)))
تحياتى نورتنى يا فنان

أسوور يقول...

واهد
يمكن ما تقبلهاش ككلمة لكن هتقبلها لفعل
لما حبيبتك تحسسك انها الملكة لكن انت سيدها وقائد الدفة فى حياتها هتحس بفرق كبير
الكلام المنمق كتير لكن الفعل هو الصعب وتنفيذه هو اللى بيدينا الإحساس بيه
تحياتى

أسوور يقول...

اسلام
فعلا دى حاجة بتضايق اى راجل وتحسسه انه غير قادر على دعم ومساندة المرأة التى اختارها الى جواره

لكن احب برضه اقولك حاجة
المرأة تبدا فى توجيه النقد للرجل ومقارنته بغيره عندما تشعر انه لا يحبها ولا يمنحها المشاعر الدافئة التى تتمناها
حينئذ فقط تبدا فى البحث عن الماديات وما يعوضها عن الجفاف فى العواطف
امنحها اقصى عاطفة وحب وتقدير كانثى وسوف تنسى كل الرجال الاخرين وسوف تشعر انك افضل من خلق على الأرض
ولا تتوقف عن هذا ابدا والا انقلبت الأمور عليك وتتحول من مخلوق عاطفى مسالم الى مخلوق مادى يبحث عن اى شىء ناقص لينقده بعيدا عن العاطفة
يصعب على المرأة ان تطلب من رجلها ان يحبها أو ان تجبره على ذلك
فتجد ان من السهل ان تطلب منه كذا زى فلانة وكذا زى علانة حين تشعر انه انسان عملى يترجم الحب لأشياء وليش لكلمات وأحضان وحب وحنان
دة بجد بقى
تحياتى

you know who يقول...

كلام جميل وكلام معقول مقدرش اقول حلجه عنه
::: لكن ::::
فيه حد فى الزمان ده بيعمل كيده و لو عمل كيده كام يوم و ترجع ريمه لعدتها القديمه

سيدتى ارى من حديثك انكى على دريه ووعى بمتطلبات الرجل ولكن استحلفك بالله كم امرأه تعرفينها تفعل هدا فى الحياه

الوردة السوداء يقول...

بحييكى من كل قلبىىىى

بجد هايلة يابنتى

وعاقلة

غير معرف يقول...

مقال يدل على شخصيه ذو عقل ناضج رزين اسمحى لى سيدتى ان انحنى امام عقيلتك العاليه ورزانه تفكيرك واسلوبك الراقى فى التعبير اقل ما يقدم هو الشكر لكى على نصائحك الغاليه للمفروض ان تقوم به الفتاة