الأحد، 10 يونيو 2007

يا بتاع القزقزة


مررت بمقلة اللب فتوقفت بالسيارة وقررت ان اشترى بعضا من اللب الأسمر السوبر
قعدت اقزقز فى اللب وأنا بادندن أغنية لبلبة الشهيرة
يا بتاع التسالى .. يا بتاع القزقزة
بيقولوا اللب بتاعك علاج للنرفزة
فكرتنى بزمان .. ايام التلمذة
يا بتاع القزقزة
واللب السوبر والأغنية فكرونى بنفسى لما كنت صغيرة فى الإعدادى وكنت ومازلت قريبة جدا من أختى الحبيبة الجميلة سوسو وفى يوم جت سوسو وقالتلى على سرها الكبير .. قالتلى انها بتحب ابن الجيران الأمور قوى قوى اللى ساكن فى الشارع بتاعنا فى بيت العز
بيت العز دة كان الإسم المكتوب على العمارة اللى بينا وبينها 3 عمارات فقط
قالتلى انها شافته وأول ماشافته وقعت فى غرامه على طول والحب دة حاجة غصب عن أى حد يهاجم القلب وما حدش يعرف يتحكم فيه .. وانتهزنا فرصة اننا رايحين نشترى لب علشان تورينى ابن الجيران الأمور
وقفنا قدام بيت العز وكل واحدة فى ايديها كيس لب ونازلين قزقزة .. وطالت الوقفة .. ولم يظهر الأمور
وتكرر المشهد لحد ما فى يوم فعلا لقيناه نازل من العمارة
شهقت فى لوعة وأنا أقول : دة امور بجد .. دة أمور قوى
سوسو بكل ثقة : طيب ما تحبيه .. انا بحبه .. بذمتك مش يتحب
أنا : آه فعلا .. طب أعمل ايه ما انتى بتحبيه
سوسو : حبيه معايا .. ونبقى بنحبه سوا
وفعلا قررنا اننا نحبه سوا سوا
كل يوم ننزل نجيب لب سوبر ونقف قدام بيته علشان نشوفه وهو نازل أو طالع من العمارة
ولما نشوفه نتنح ونسنتح ونتنهد لكن دة عمره ما منعنا نمشى وراه ونراقبه زى المخبرين لو رايح فى اى حتة
المهم فى يوم نزلت لنا جارتنا نونى وكانت صاحبتنا قوى وكل يوم مع بعض نلعب
قمنا رحنا كلنا نجيب لب سوبر وطبعا على بيت العز عدل .. نونى استغربت لكن فهمت بعد ما قلنالها السر
اصل فى ولد أمور قوى ساكن فى العمارة دى واحنا بنحبه
نونى فضلت تروح كل يوم معانا نجيب اللب ونراقب بيت العز بمنتهى الصبر لحد ما شافته نازل من العمارة
شهقت وقالت : دة أمور قوى قوى ...... أنا وسوسو بكل ثقة : طب ما تحبيه معانا
نونى: هو ينفع؟ .. مش هتزعلوا يعنى؟
أنا وسوسو : لا أبدا براحتك حبيه معانا ونبقى احنا التلاتة بنحبه مع بعض
وطبعا كل يوم معانا اللب وومش ناقصنا غير جرنال مخروم عشان المراقبة المحكمة
الولد كان طول ما هو ماشى بيتلفت حواليه وهو مستغرب طبعا .. ينزل .. نمشى وراه .. يرجع .. نرجع معاه
لحد ما قدرنا نتعرف على الشغالة بتاعتهم فى البيت واتصاحبنا عليها .. ومنها جمعنا معلومات غاية فى الأهمية عنه .. عرفنا ان اسمه حمادة وانه ساكن فى الدور الأول .. وعرفنا بقى كمان بلكونته فين .. وعرفنا انه فى أولى ثانوى باسم الله ماشاء الله وان له اختين وهو الولد الوحيد
أمال ايه .. انت بتتعامل مع أقوى جهاز مخابرات فى العالم
بعد ما حددنا مكان الشقة بدأنا نراقبها .. وعرفنا من الشغالة انه اعز اصحابه هو جاره أشرف اللى ساكن قصاده .. وكان لأشرف أخ صغير عنده 6 سنين بيلعب قدام العمارة دايما .. وكانت فرصتنا عشان نحكم قبضتنا على الولد الأمور حمادة .. الولد الصغير كان برضه اسمه حمادة .. الظاهر المنطقة كلها ملغمة حمادة
وطوال فترة المراقبة والتحريات ونحن لا نتوقف عن القزقزة ابدا
وفى يوم كان حظ حمادة الصغير انه نزل يلعب فى الشارع .. أحكمنا قبضتنا حوله ولم يستطيع الفكاك من اغراء اللب والقزقزة وقرر يقبل مننا شوية لب كرشوة لنقل الأخبار .. ومن يومها وبقى صاحبنا وكل ما يشوفنا ياخد مننا لب ومرة كان بيكح وقررت انا بصفتى الطبيب المعالج للشلة انى اشترى له دوا كحة من مصروفى بدل اللب لكن سوسو ونونى ما سابونيش كدة وادونى جرعة من نصيبهم فى المخدر.. قصدى فى اللب
بعد كل دة فى يوم نازلين لقينا حمادة الأمور واقف مع بنت اسمها منى
وكانت صدمة كبيرة لنا كلنا .. وأكلت الغيرة قلوبنا من منى
منى كانت معايا فى المدرسة والنادى وكانت بتكلم كل الصبيان وماما قالت ماتكلموش منى عشان دى بنت وحشة
كانوا بيتكلموا وبيضحكوا واحنا واقفين بنراقب زى قراطيس اللب
ساعتها قلنا لبعض أنا وسوسو ونونى فى حسرة
يا ريتنــــــــا كنـــــا منـــــى
ملحوظة .. رجاء قراءة تعليق سوسو نفسها على البوست عشان تعرفوا بقية الحكاية

هناك 131 تعليقًا:

غير معرف يقول...

ههههههههههههههههههه

جهاز مخابرات محكم
هههههههههههه
طب ليه مكملتوش الموضوع
ومحاولتوش تعرفي ايه حكايتها

متهيألي تعملوا فيلم اسمه الثلاثة يحبونه

تحياتي ليكي:)

LOJAIN يقول...

هتصدقينى لو قلت لك بعد ما قريت البوست عنيا دمعت بعد ما كنت لسة مخلصة عياط اصلا وانا مش ناقصة كمان يعنى
بجد بجد بجد انتى تحفة يا ياسمين لان فعلااااااا ياريتنى كنت منى ده رد طفولى برىء قوى بيعكس الظرف اللى بامر به حاليا بشكل ناضج قوى مع الاختلاف , انى مبحبش حد الحمد لله دلوقت
بس هى نفس الحالة

منى كنت زمان بحسب انها معندهاش رضى نفسى زى اللى عندى وكلام مش هثقدر اقولهولك فى البوست طبعا,, الرضا ده كان زى كنز انا كنت فاكرة انى لوحدى اللى امكله, لكن اكتشفت من وقت قريب انى املك لا شىء

انا فهمت رسالتك يا ياسمين والله
كان ممكن تلاقونى بحبه معاكم
كنت فعلا امتلك النفسيه دى ومازلت
نفسى اعرف ليه بتعاقب بسببها

عارفة انك الوحيده اللى هتفهمى الجملة الاخيرة اللى جاية دى

عارفة موقف سيدنا ابراهيم هو بيقول ولكن ليطمئن قلبى
نفسى يطمئن قلبى

Regards:
Lojain :)

Mirage يقول...

بتفكرينى بفيلم بحبك وبموت فيك

بتاع فارس وادوارد واحمد هارون

:)

بس كويس ان انتو مرحتوش اتقدمتوا بالمرة

:)

Masry يقول...

التعليق الثالث
ضحكت فعلا من قلبي علي البوست و كنت داخل اعلق تعليق كوميدي بس تعليق
LOJAIN رجعني لان البوست مش كوميدي و ان ورا الضحك حاجات تانية كتير .. مش هعلق علي تعليقها و مش هتفلسف و اقعد اقول اصل لو و ملوش علشان انا عايز شوية لب و همشي علي طول :)

Xee يقول...

هههههههه

معلش سؤال فني بس، كانت خطتكم ايه بالظبط؟

تتصوري يا ياسمين، امبارح بس كنت بتكلم مع واحد صاحبي، و صعقنا لما اكتشفنا إن مواليد 92 بقوا في ثانوية عامة
بجد السنين عدت على سهوة
بس لسه جوانا كلنا شوية لب

تحياتي

الزعيـمة يقول...

محدش استنفع فى الموضوع دا كلة
غير بتاع اللب طبعا :)))

فكرتيني بايام الطفولة البريئة
اصل اختي كانت نفس الحكاية بتحب ابن الجيران الامور وبرضة كان اسمة حماده
اه بجد والله

بس مكنتش مني باه كانت نهي

اظنك يا ياسمين بطلتى قزقزة من ساعتها
هههههههههههههههههه

dr_lazeez يقول...

ya salaaaam 3ala keda ya slaaaam
ana ba7eb 2awe 2el 7ekayat el gamela deah beta3et el wa7ed lama kan `3albaaan 2awy we tayeb mooot
we faker 2eno saye3 we lafeeef we 3aref kol 7aga :)
we 3agebny gehaz el mokhabarat beta3eeek :)
2el leb wel gornaan wel nadara el soda .

ya ba`7t 7amada :)

Reemo يقول...

مش عارفه أقولك ايه ياسمين
بس من اللى شوفته فى حياتى والبنات اللى عرفتهم
دايما منى هى اللى بتكسب فى الأخر
مش عارفه ليه
بس هو ده فعلا اللى بيحصل
وبنكتفى فى الاخر بالمشاهده والمراقبه
وقزقزه اللب
أعلب الحالات اللى شوفتها كده
منى كسبت فى الاخر وغيرها منابوش غير قزقزه لب
مش عارفه ليه الدنيا ماشيه بالعكس
واللى بنتعلمه وبنتربى عليه حاجه
واللى بيحصل فى الواقع حاجه تانيه
تفتكرى ليه؟؟

محبتى

dr_lazeez يقول...

enty lesa ma2aratesh el comment :)

harmless يقول...

تصدقى
لغايه من سبع سنين ماكنتش اعرف ان فيه لب سوبر

لكن فى الفترة دى كان لى صديقة
او حبيبة
او صديقة وحبيبة
غاوية لب

واول مره قالتلى موضوع السوبر قولتلها سوبر ايه هو سجاير؟
قالتلى ازاى؟
ده السوبر غير العادى والفرق كبير
وفهمتنى ان الفرق فى الحجم

ساعتها قولت فى سرى حجم ايه وبتاع ايه
ده كله حبات منمنمه طولها 4 ملى
لا حتصغر ولا تكبر
ايه الناس الرايقه دى

لكن بعد شوية بقيت افهم فى اللب
وبقيت احبه
صحيح لسه مش باقدر افرق بين السوبر واللى مش سوبر لانى تقريبا عمرى ما شوفت اللب اللى مش سوبر وعمرى ما شوفت مقلا حاطه لب وكاتبه عليه مش سوبر
كله سوبر

لكنى دائما اذكر صديقتى او حبيبتى او صديقتى وحبيبتى وهى تركن عربيتها البيضاء امام مقلا فى شارع مراد امام موقف السوبرجيت من الناحية التانية

بتقولى المقلا دى هايله
ولبها طازه
وسوبر على حق

من يومها وكل ما اتواجد فى المنطقه دى اخد لب من المقلا دى
بس الحقيقه لب طرطوسيه احلى
ولب مفيد احلى
واللب بتاع طنطا احلى

المهم ان انا وانتى بقينا دلوقتى فى نفس الوضع
كل الاحداث انتهت
وكل الشخصيات اختفت
وكل الناس اتغيرت
الا اللب

هو اللى فاضل
يمكن عشان سوبر

Unknown يقول...

الفكرة في المكان أساسا مش في اللب

أنا فاكر كان قدام المدرسة عندنا محل بقالة كان محور العلاقات العاطفية بتاعت المدرسة كلها (كانت مشتركة). بس جميلة قوي والله الحكاية ده :)

بسمه عبدالباسط يقول...

ضحكتينى والله بس عايزة اسأل سؤال لو كان هو بقى حب واحدة منكم بس كان الباقين هايعموا ايه دى كانت تبقى كارثة لو حصل وكوي انه سابكم وراح لمنى
تحياتى

reri يقول...

هقولك زي لجين وريم
مني دايما كانت هي اللي بتكسب
والمشكله إني لما كبرت
أنا وأصحابي اللي مش بنصاحب مني أبدا
بس بنتفرج عليها
وأوقات بينا وبين نفسنا كان نفسنا نبقي هي
لقيت إن مني برده هي اللي كسبت في الآخر
وحسيت إني كنت غلط وما عيشتش سني ولا حياتي
وقفت أتفرج من بعيد لبعيد
وما كسبتش أي حاجه غير الفرجه

ولا مني طلت مني ولا طلت نفسي

أنا ضحكت علي فكره من قلبي وأنا بقرأ
البوست
علشان فيه طفوله وبراءه عشناها كلنا
بس كلام لجين اللي إتكلمنا فيه أنا وهي قبل كده ومعاه كلام ريم فكرني بحاجات تانيه يمكن راحت عن بالي وأنا بقرا البوست

سلامااااااااات يا ياسمين

Gid-Do - جدو يقول...

ياسمين

بعد ما قريت التدوينة لقيتنى تذكرت حاجة حصلت من اكتر من خمسة وخمسين سنة ـ الرقم صحيح ـ واول مرة افتكرها

كنت فى اول سنة فى المدرسة وانا راجع من المدرسة وقريب من البيت ندة عليا ولد كبير عنى بزمان وادانى ظرف جواب مقفول وطلب منى توصيلة لبنت ساكنة معنا فى البيت ـ طبعا قمت بتوصيل الجواب بعدها نزلت ابله تهانى ـ كدة كنت بقولها ـ وقالتى لو الولد دة اداك جواب تانى متاخدوش منه ـ حاضر يابلة

ابلة تهانى كانت فى الاعدادية ولما نجحت فى الاعدادية اهلها جوزوها لواحد من قريبها ومشيت من البيت ومفتكرش انى شفتها تانى من بعدها لكن كنت اسمع من امى اخبار عنها
تهانى خلفت
تهانى ولدها فى الجامعة
مش تهانى جوزها توفى
تهانى جوزت بنتها
زمن

semsem يقول...

هههههههههههههههه
يا رتنى كنت منى
هو امور امور يعنى

MoHaMeD HoSSaM يقول...

يا ريتنى انا كنت حمادة

بجد بوست رائع
عمل حالة من الحنين والذكريات

مع انى مش كبير اوى بس بجد حرك جوايا حاجات كتير

شكرا بجد

أبو ضحى يقول...

ياسمين
مش عارف أقولك ايه...انتى المرة دى تفوقت على نفسك كتير..طريقة الحكى و الاسلوب الساخر الجميل المطعم بروح فكاهة تنم عن اشراق صاحبتها..الحكاية شدتنى من البداية للنهاية..وك كنت بضحك من القلب و انا بتخيلهم بيقزقزوا اللب و هما واقفين قدام بيت العز فى انتظار حماده

برافو عليكى يا ياسمين..حقيقى برافو
أسعدتينى

safa7_karmooz يقول...

هههههههههههههههههههههههههه

طب لو كنتوا كملتوا...

كان زمانكم شلتوا منىلا وامها والشغالة بتاعت حمادة ...والعمارة باللى فيها

اييييييييييييييييييييييه

فينك يا انجى :D

أسوور يقول...

مش قادرة
بجد اسم حلو
كان ينفع عنوان للبوست
نورتى المدونة
تحياتى

أسوور يقول...

لجين
اتضايقت لما لقيتك بكيتى من البوست
انا كان هدفى فعلا انى اظهر التناقض بشكل ساخر
انتى فهمتينى بسهولة
وفهمتى اللى اقصده بالبوست .. انا جبت بنات غاية فى الطيبة والسذاجة اهلهم يسيطرون ومع ذلك انتصرت البنت المتحررة أو المنحلة كما يسميها البعض
طب انهى الأحسن؟
انى اكون مكبوتة ولا اكون متحررة؟

أسوور يقول...

ميراج
والله دة اللى كان فى بالنا
كنا بنفكر نتجوزه
:)))))))))))
تحياتى

غير معرف يقول...

احب اقول اني انا البطلة بتاعة القصة دي عشان كده لازم اعلق
اولا) انا لما كنت صغيرة مش عارفة ليه كنت كل ما احب واحد اخلي واحدة صاحبتي تحبه معايا ؟؟؟ اكيد ده مرض لسه ما اكتشفوهوش!!
ثانيا) الحكاية دي حصلت لما كان عندي عشر سنين ولازم اقول كده عشان الاحراج وكمان عشان ثالثا.
ثالثا) لما كبرت ورحت الكلية في يوم ما لقيت حماده بشحمه ولحمه في وشي جاي يزور خطيبته اللي هي كانت زميلتي ونفس دفعتي بس مش صاحبتي واللي هو اتجوزها بعد كده . لكن طبعا لما شفته كنت نفسي الارض تنشق وتبلعني او انه ما يفتكرش شكلي. بس مش هي دي القضية . القضية اني لقيت حماده الأمور الصغير شكله بقى وحش قوي قوي قوي.
استني في رابعا
رابعا) انتي جيتي ع الجرح في حكاية اللب السوبر دي عشان اللب هنا وحش قوي قوي قوي زي حماده وهو كبير . وانا نفسي وهاموت على اللب السوبر بتاع مقلة الاوقاف اللي مفيش زيه في العالم حضريه لما اجي وبرضه هنقزقز سوا
;-)

أسوور يقول...

آخر من الآخرين
بس كدة
انت تأمر
نبعت نجيبلك قرطاس لب حلو كدة ييجى نص كيلو تقعد تقزقز لما تزهق

تحياتى

أسوور يقول...

Xee
انا نفسى مش عارفة كانت ايه الخطة خالص
هو احنا كنا بنراقبه وبس وما كناش عندنا اهداف غير جمع معلومات عن حمادة الأمور والتقرب من كل شخص يعرفه تيمنا بإسمه
:)))))))))))))
نورت يا باشا

أسوور يقول...

الزعية
تعليقك زى السكر
اختك برضه .. حمادة .. ونهى

منهم لله منى ونهى بقى

اقرى تعليق سوسو بنفسها على البوست

عبسميع يقول...

حلوة التسالي دي والله

وانا في المدرسة وانا في ابتدائي كنا الولاد مقسمين البنات علينا المشكلة بقي مش في كده المشكلة كانت إن البنات نفسهم مكنوش يعرفوا حاجة وكنا احنا الولاد نتخانق لو واحد راح كلم بنت من بتوع غيره
وأه بقي لما الموضوع اتكشف خدنا علقة من المدرسين

أهو دلوقتي بقي كل البنات دول كبروا وفي منهم اللي اتجوز واللي اتخطب ومنهم اللي لسه اصحابي

ومنهم اللي اتخطب لزمايلنا
أصل لينا واحد زميلنا كان بيحب واحدة من وهو في ابتدائي وخطبها السنة دي فضلوا يحبوا بعض حوالي 18 سنة ربنا يستر ويتمملهم علي خير

بوستك دا فكرني بحجات كتيرة جميلة بتاعة سن جميل نفسي أرجع له
تحياتي فعلاً

محمد

YHYيــوســف الـمصـرى يقول...

السلام عليكم
زكريات حلوة واكيد اللب كان احلى :D
تحياتى ياسمين

The Alien يقول...

واضح إن كل الناس عرفت إن مني كانت صح
وقزقزة اللب مجابتش نتيجة
طب ياتري هنعمل إيه مع ولادنا؟
هنخليهم مني؟
ولا هنقضيها قزقزة؟

بوست جميل يا ياسمين
تحياتي

Ehab يقول...

والله يعني زي ما انتوا كان عندكوا حماده انا كمان كان عندي شخص تاني بنت طبعا
بس الغريب انها لما كبرت بقت احلى واحلى من الأول واعجبت بيها بس فضلنا اصحاب بس في الكليه وفجاه كده وقبل ما افهم حاجه جت تقولي انها بتحب واحد وعايزه تاخد رأيي وفضلت شهور اسمع منها مشاعرها ليه وحبها ليه وزعلها منه ساعات وكل اللي قادر اعمله اني اعتبرتها زي اختي وانصحها دايما في مشاكلها واصبرها على المشاكل واقولها اكيد هو كمان بيحبك مفيش حد يلاقي الحب زي حبك ويضيعه
وفي يوم بعد ما قعدت تشكيلي منه ومن المشاكل اللي بينهم قالتلي انا حاسه اني بحبك انت
بس انا ساعتها كنت خلاص عرفت يعني ايه الفرق بين انك تحب حد خب كده من غير مبررات وتدهول من غير ما تعرف السبب بكل عيوبه ومميزاته وبين انك تحب حد عشان هو كويس معاك
صدقوني كويس انكوا متكلمتوش مع حماده
سلاااااااااااااااااااااام

حقى اهرتل يقول...

لوكنتى كتبتيها بجد كانت بقت قصه قصيره

Ezz يقول...

حضرتك أنتي كنتي بتقززي لب و أنا كنت بأكل القطة.. منتظر زيارتك عشان تقري حكايتي مع القطة.. عز

أسوور يقول...

dr_lazeez
فعلا كنت طيبة وغلبانة وفاكرة نفسى صايعة ولافة وفاهمة كل حاجة بس الدنيا ياما بتعلم

ويا ريتك كنت حمادة ليه؟؟ ما هو انت فعلا حمادة يا دكتور

تفرق ايه حمادة من عبده
أهى كلها اسماء والسلام

تحياتى

أسوور يقول...

ريمو
فعلا منى هى اللى بتكسب على طول
انا قابلت منى دى بعد سنين مرة ولقيتها متجوزة وعايشة مع جوزها فى منتهى السعادة والهناء
يعنى عاشت حياتها بكل مراحلها كما ينبغى
قلت
يا ريتنى كنت منى
تحياتى

أسوور يقول...

هارملس
حقيقى كل الشخصيات راحت فين؟
على فكرة مافيش حد اختفى غير حمادة ومنى بس
لكن انا وسوسو ونونى لسة اصحاب ونعرف بعض كويس رغم بعد المسافات

على فكرة لو عاوز تعرف بقية الحكاية بجد روح اقرا تعليق سوسو نفسها على البوست
تحياتى

أسوور يقول...

IRC President
جميلة الذكريات
ومضحكة
المكان والزمان هم الأبطال
تحياتى

أسوور يقول...

بوس بوس
تصدقى مافكرناش خالص فى الموضوع دة

لو عايزة تعرفى باقى الحكاية روحى اقرى تعليق سوسو نفسها على البوست
تحياتى

أسوور يقول...

ريرى
آه والله منى هى اللى بتكسب فعلا
انتى لسة قدامك عمرك
عيشى عمرك وحياتك واستمتعى بكل مرحلة عشان لما تعدى ما تقوليش كان نفسى اعمل كذا وما عملتهوش
اليوم اللى بيعدى ما بيرجعش وكدة كدة كل شىء مؤنث مابيعجبش حد
افعلى ما يحلو لكى واستمتعى بحياتك
تحياتى

loumi يقول...

ياسمين
ايه يا بنتى ده؟؟
بجد تحفه
معلش اصل انا من زمان علاقتى بالاولاد غير كده خالص
يمكن اختلاف التربيه فى البلد اللى انا كنت فيها وبيتنا على الاخص
البنت=الولد
عشان كده العلاقه بيننا دايما علاقه لعب
ما علينا مش ده المهم
اللى هاممنى هو موقف سمسم
انا شايفه انها عندها مبدأ مهم جدا
الا وهو المشاركه فى كل شىء من اول اللب لحماده شخصيا وده مبدأ جميل يا ريت نتبعه كلنا
ههههههههههه
و طبعا هى شايفه ان القفه ام ودنين ممكن يشيلوها اتنين وما فيش مانع 3
ده بقا من منطلق المشاركه برضه
ولانه حب برىء من طرف واحد
قصدى من 3 اطراف
فالفشل لما يكون من نصيب 3 احسن من ما يكون نصيب واحده
وده برضه من منطلق الشاركه
عشان طبعا حيعملوا مناحه جماعيه
ويقزقزوا لب طبعا على روح حب حماده اللى طلع من نصيب الانسه منى
اما انها لما شافت حماده بعد سنين حسيت انه وحش قوى قوى قوى على حد قولها
فده منطقى قوى قوى قوى
واكيد انت وسوسو عارفين ليه
تحياتى لك ولسوسو

سهر الليالى يقول...

ايه الذكريات والفضايح دى يا ياسمين قلقت منك لما قريت البوست ومش هخبى عليكى قلقانه تكتبى اكتر عن الفتره دى وتحكى باقى المغامرات اللى كنا بنعيشها زى حكايه ابو حبل مثلا فكراه طبعا ولا الجراج ولا اسوار العماير والنط من عليها وكمان سوسو معلقه وبتكمل الحكايه لا دى هاسط سلمتى القط مفتاح الكرار وانتى عرفاها كويس صريحه صريحه ..ماتنسيش نجيب لها كيلو لب فى المطار :)))
البوست حلو واكتبى اللى انت عايزاه دى مغامرات تنفع تتنشر ولا الشياطين ال13

نـــ..!..ــور يقول...

إلى أين تمضي كلمات الحب .. بعد أن نقولها؟
قبل أن نعرف أين تمضي فيجب أن نعرف من أين جاءت ؟!
إلى أين تمضي مشاعر الحب .. بعد أن نعيشها؟
قبل أن نعرف أين تمضي فيجب أن نعرف كيف نعيشها ؟!

إن كانت من الفم فمصيرها مدن النسيان حيث الطوابير الطويلة من الكلمات المستعملة !
وإن خرجت من القلب فستعود لنفس القلب ولو بعد حين لتسخر منه .. وربما لتقتله!



نور

smraa alnil يقول...

ههههههههههههههههههههههه
ياسمين
حلوة اوي موضوع القزقزة دة

ههههههههههههه
بس انتو التلاتة حبتوه
طب كنتو خدتوني معاكم احبه انا كمان
اصلي بموت في العيال الامورة دي

Unknown يقول...

والله ذكريات جميلة والمعنى اللي قصدتيه وصل ومعاه اتقلبت المواجع القديمة بس اقول ايه برضه العيب مش فينا يا سيدتي العيب في اللي مش مقدر قيمة الاخلاق لانه في النهاية لا يصح الا الصحيح وربنا يكرمنا براحة القلب ورضا النفس امين

سندباد يقول...

يابختك ياحمادة تلات بنات زي القمر بيحبوك وكمان مني اللي بتاخد كل حاجة
عارفة انا فكرت في ايه لما قريت البوست فعلا الدنيا متديش محتاج يعني مني دي بتكلم كل الولاد يعني ميفرقش معاها حمادة انما المحتاج ياكل لب ويندب حظة جاتنا نيلة علي حظنا الهباب

micheal يقول...

هههههههههه...و الله الواحد حيبتدي كده يحسد الواد ابن الجيران المحظوووووظ ده
:)
ايه أخبار اللب دلوقتي ؟
:)
بوست لذيذ أوي يا ياسمين
تحياتي

أسوور يقول...

جدو
سعيدة جدا بتشريفك لمدونتى
وحكاية تهانى دى حكاية بتتكرر كتير وفى كل زمن
الصغيرين بيفكروا دايما ان الكبار اتولدوا كبار وما يعرفوش حاجة من اللى بيعيشوها هم
مع انى متأكدة ان كل اللى مروا بيه احنا مرينا بيه وكمان آباءنا مروا بيه
تحياتى على التعليق المثير للتأمل

أسوور يقول...

سمسم
هو لو انتى عاوزة تعرفى
اقرى تعليق سوسو نفسها على البوست من ضمن التعليقات بس هى معلقة بعدك بكام تعليق
تحياتى

أسوور يقول...

محمد حسام
تلاقيك فعلا حمادة بس بتاع بنات تانيين
قوم بص من الشباك هتلاقيهم واقفين قدام شباكك بيقزقزوا لب

شفتهم؟
طيب
سلام

أسوور يقول...

ابو ضحى
صديقى اللى دايما رافع من روحى المعنوية
انا قلت اكتب بقى كتابات ساخرة بعد كل الجدية التى تملأ المدونة
بس شكلى مش هبطل بعد ما عجب الناس
تحياتى

أسوور يقول...

سفاح كرموز
جهاز مخابرات قوى جدا على فكرة
ولو عاوز تراقب اى حد قولى بس وانا هاستدعى الفرقة فى الحال
تحياتى

أسوور يقول...

soso
سوسو حبيبتى
وحياتك يا غالية لأغرقك لب فى لب بس انتى تهلى بضحتك الحلوة وطلتك البهية وشياكتك ورقتك وجمالك وحضورك اللى مالهمش حل
صدر فرمان بإلغاء فكرة استقبال الوافدين من الخارج بالزهور وقررنا استقبالك باللب السوبر المصرى المعتبر بتاع مقلة الأوقاف واللى هنوصى عليه خصيصا من قبلها بيومين
اصله بالحجز دلوقتى من ساعة ما البوست دة نزل
وحشتينى و وحشتنى ايامنا الحلوة اللى ما بتخلصش ومش هتخلص ابدا
بحبك قوى قوى ومالناش سيرة غيرك على فكرة فى كل موقف وفى كل مناسبة وفى كل خروجة أو قعدة حلوة
وحياتك حتى فى النكد فاكرينك
قبلاتى لحد ماتيجى

أسوور يقول...

الديكيلون
هو المدرسين ضربوكوا ليه؟
هو اللى يحب فى البلد دى بيضرب ولا ايه؟
لأ بجد انتوا شكلكوا تحرشتوا بيهم مش مجرد حب
تحرشات فى المرحلة الإبتدائي
:))))
تحياتى

أسوور يقول...

يوسف المصرى
انت الأحلى
تاخد شوية لب؟
:)))
تحياتى

أسوور يقول...

The Alien
فعلا منى كانت صح
عشات سنها وتعاملت مع الجنس الآخر بطريقة فطرية .. وقعت فى الحب وتركت لقلبها العنان .. ولم تقف للمراقبة من بعيد
وانا قابلت منى فعلا بعد سنين ولقيتها زوجة سعيدة وأم لـ 3 اطفال سعداء باسرتهم
تحياتى لك ولمنى

أسوور يقول...

الشنكوتى الكبير
حلوة قوى حكايتك وكلها عبر بجد
ما تنشرها بجد عندك على البلوج فى بوست
هاستنى تنشرها
تحياتى

أسوور يقول...

حقى اهرتل
دى قصة من الواقع بجد
وممكن تقرا باقيتها فى تعليق سوسو قبلك بشوية
تحياتى

ابن مرّ يقول...

يااه دنيا تانية وعالم تاني

بس فكرة الحب في السن الصغير ده وبالشكل الطفولي الجماعي ده غريبة علية

بس كويس انك فاكرة وانتي صغيرة وان الدنيا عندك مش خلاط شغال عمال على بطال

عموما بوست رايق قوي

و موود جميل
سلام

Unknown يقول...

ههههههههههههههههه

ده انتوا عملتوا جمعية فى حب الواد الأمور ههههههههههه

بس الحق يتقال سوسو طيبة جداااااا وكريمة موووووووت عشان تخلى حد يحب الواد الأمور معاها .. فعلا ونعم الصديقة الصدوقة بجد
ههههههههههههههههههه

بوست جميل اوى وتحياتى ليكى ولمدونتك

:)

حدوته مصرية يقول...

مش عارف لما هو كان جميل اوى كده وهو صغير اتقلب وحش اوى اوى ازاى يعنى الا لو تقصدو جمال الشخص مش الوجه او نظرتها اللى اختلفت عن زمان لما شفته جميل اوى ودلوقتى وحش



تحياتى على البوست الرائع

.:.-=- ELGaZaLy-=-.:. يقول...

ياسمين بعد السنين د يسعدنى انى اقولك انى انا حمادة اصلا واتجوزت منى خلاص

وهيا بتسلم عليكى كتير
بجد

هههههههههههههههههههههههههه

عحبنى البوست اوى يا ياسمين

كويس ان ربنا نجى حمادة منكم

شيماء الجيزى يقول...

هههههههههههههههههه

ايه ده وبتحبوه كمان سوا ...وعادى حبيه معانا

يا حوستى

وايه جهاز المخابرات البى ده ...قصدى الدولى

بس تصدقى
هى ذكريات
مفضلش منها غير اللب السوبر
..............

بدعوكى وبدعوا كل الاصدقاء المدونين علشان يدخلوا مدونتى ويشوفوا

لقاء المدونين فى بورسعيد
اكيد عارفاه
ومرة تانيه بشكرك يا ياسمين على تحفيزك
وبجد اتمنى من كل المدونين انهم يشتركوا معانا

تحياتى وقبلاتى

Shreif fahmy يقول...

مفكرتيش في مرة تكتبي قصة قصيرة عن بنيتن قرروا يتقاسموا حب شخص واحد ويكونوا الاتنين مقتنعين بالاتفاق ده

أسوور يقول...

عز
انا جاية أعرف ايه حكاية القطة دى
اصلى بموت فى القطط
تحياتى

محمد حمدي يقول...

البوست حلو اوى اوى اوى ياياسمين

بجد انتى قاصه شاطرة جدا , بكرة تكتببى مجموعه قصصيه وتنزل بتلاتين جنيه فى معرض الكتاب .. بس ابقى افتكرينى ساعتها

تعليق سوسو جامد ’ وجريتى ريقى على اللب السوبر

ابقى شوفى المدونه عندى فيها تاج موجه ليكى شخصيا
سلام

شـريف الصيـفي يقول...

لاسباب تقنية تغير عنوان المدونة
من الغد تواصل هيباتيا الكتابة في موضوع : الله .. النص ... البشر
http://hypatia-theu.blogspot.com

أبو ضحى يقول...

شفتى يا ياسمين شفتى ازاى مدونتى فقدت كل زوارها..تخيلى بقالى يومين كاتب بوست جديد و مفيش الا تعليقك و بس

تعرفى..أنا فكرت إن أى بوست جديد انزله الغى التعليقات عشان مقعدش ادخل كل يوم اكتر من مرة اشوف التعليقات الجديدة و يجيلى احباط ، لكن لقيتها فكرة اسخف من الواقع

šσяšαяαα يقول...

انا سخسخت من الضحك بجد

النهاردة كل شوية بتعرف على ناس زى العسل.. سعيدة انى اتعرفت بيكى

وماتنسيناش فى عزومة لب سوبر طازة من بتوع ابن الجيران;-)

أحمد سلامــة يقول...

احنا ليه مش راضيين نصدق اننا كبرنا
وليه لازم لازم
غصب عننا
الايام دي بتبقى احلى ايام
دي حاجة تقتل

لا يسعني الا الابتسام

الربان يقول...

تحياتي....

الموضوع جميل ...و يفتح الباب لمعرفة الفرق بين : الحب ...الإعجاب ...النزوة.

لان هناك فروق كثيرة و كبية بين الاشياء الثلاثة.

في رأيي ان ما كان بينكن انتن الثلاثة هو مجرد إعجاب بشاب جميل الشكل... و لم تكن عاطفة حب.... لان الحب لا يعرف الشركة...او الشراكة...

تحياتي و دائما متميزة بموضوعاتك.

أسوور يقول...

لومى
رقيقة المدونات
ازيك يا سكر
شوفتى المغامرات يا بنتى .. عاملين فيها مباحث
فعلا سوسو كانت بتحب تشارك كل الناس فى كل حاجة لكن تعالى شوفى سوسو دلوقتى بقى .. حد يقدر يهوب من جوزها؟؟
دى تقطعه حتت وترميه فى الزيت بكل شراسة
:))
نورتينى يا لومى يا سكرة
تحياتى

أسوور يقول...

سهر الليالى
انا بقول نعمل حملة ذكريات بمناسبة ما سوسو راجعة بقى بالسلامة

ونفضح بعض

وكل واحدة فينا تتحدى التانية فى مين يفضح التانى أكتر
:)))))

هأسيبك بقى انتى تحكى عن موضوع الجراج وابو حبل دة
تحياتى

أسوور يقول...

صور وخواطر نور
اهلا بيك فى مدونتى
استمتعت بالحديث معك على الماسنجر
تحياتى

أسوور يقول...

سمراء النيل
أهلا عروسة المدونات
منورانى يا سكرة

عاوزة تحبيه معانا؟
يعنى انتى شايفة حد كسب فى الآخر؟
:)))))
تحياتى

أسوور يقول...

رانيا حبيبتى
عاوزينك تعملى مدونة بقى
انتى ليكى افكار كويسة كتير مش من حقك لوحدك

مستنية ردك
تحياتى

gohayna يقول...

يادي الب الي محير الناس معاه كدا

قدام مسلسل ولا فيلم رومانسي

حتي عندك هنا
اللب واخد واضعه اوي يا ياسمين بجد

بجد تحفه الموضوع
بس بيني وبينك هو كان امور اوي كدا علشان تبقوا حوليه زي الرز كدا وتتحوله؟
وبعدين مش كنتي تاخدي رقمي عشان اجي معاكم

الي ياكل لوحده يزور

واديكي شايفه النتيجه

يلا ماعلينا
المشوار الي جاي لازم اكون فيه بقي

خليكي حلوه
انا حجزت خلاص


اوعي تنسي

تسلم ايدك يا ياسمين

تحياتي يا حبيبه قلبي

Ezz يقول...

حكينا تاني يا ياسمين.. زوريني و اضحكي

أسوور يقول...

سندباد
آه والله عندك حق
هى كانت بتكلم كل الولاد ومش بيهمها حد وكلهم كانوا مهتمين بيها قوى
لكن احنا .. المؤدبين .. اللى مش بيكلموا الولاد
ماكانش حد بيعبرنا
وكان آخرنا نحب واحد احنا التلاتة ونقزقز لب واحنا يا دوبك بنشوفه من بعيد
وعجبى

أسوور يقول...

مايكل
نورتنى
ومبسوطة ان البوست عجبك
تحياتى

أسوور يقول...

ابن مر
والله بافرح لما اشوف تعليقك عندى يا شاعر المدونات
من ناحية انى فاكرة فأنا مشكلتى فى ذاكرة قوية لا تنسى الحلو ولا الوحش
كل لحظة فى حياتى مسجلة فى ذاكرة كمبيوترية خاصة بى

قريت تعليق سوسو؟؟
نورتنى

أسوور يقول...

انسانة
سوسو دى تبقى اختى الجميلة
ربنا يخليها لية على طول يا رب

طول عمرها مابتعزش حاجة على حد
:))))))))))
نورتينى يا عزيزتى

أسوور يقول...

محمد ياسر
هو فعلا كان امور لما كان صغير بس لما كبر وطلع له شنب ودقن وعضلات خنشر كدة واتغيرت ملامحه ومبقاش أمور زى زمان
دة بجد بقى
تحياتى

أسوور يقول...

غزالى يا صاحبى
واحشنى والنبى
بقى انت حمادة بقى وانا عمالة ادور عليك واتاريك قاعد هنا جنبى
طب كلمنى .. يا شاغلنى
طمنى .. يا ظالمنى
:)))))
طب ومين قال ان حمادة يعنى احلى منك
طب دة حمادة نفسه بيغير منك مووووت
تحياتى

أسوور يقول...

شيماء الجيزى
معاكى انشاء الله
ربنا يسهل واليوم يكون جميل زيك
تحياتى

أسوور يقول...

شريف فهمى
على فكرة دى مش مجموعة قصصية
انا بأحكى حاجة حصلت بجد من ذكريات الصبا

انت ماقرتش تعليق سوسو نفسها ولا ايه؟؟
تحياتى

أسوور يقول...

صرصارة
اسمك عجيب شوية بس نورتينى بجد
تعالى قزقزى معانا بس بشرط تاخدى دورية مراقبة انتى كمان
:)))))))))))
تحياتى لكى يا عزيزتى

أسوور يقول...

أحمد سلامة
طبعا كبرنا يا دكتور
بس جوانا لسة صغير
أصغر من عمر الدنيا
اصغر من عمر الكون
تحياتى

أسوور يقول...

الربان
اكيد فى فرق طبعا بين الحب والإعجاب والنزوة

بس دى كانت شقاوة مراهقين
تحياتى

أسوور يقول...

جهينة حبيبتى
منورة يا ست الكل
والله نورتى المدونة بجد
عاملة ايه فى الغربة يا قلبى

واحشتنيى

دمك شربات وضحكنى التعليق بتاعك

سألت نفسى ياترى جهينة مشتاقة للب السوبر الحلو الكبير بتاع المقلة فى مصر هنا؟؟
أكيد

تحياتى عزيزتى الجميلة الرقيقة جهينة

مدونة كسبان يقول...

جميل أوى البوست ده ياياسمين
بجد جميل

انا بيتهيأ لى كده والله أعلم
ان الأمور ده ماكنش بيحب

(اللب)

انا متأسف

أسوور يقول...

مدونة كسبان
تفتكر ان السر فى اللب؟؟
يمكن لو كانوا بيقزقزوا فستق مثلا كان نفع يعنى؟؟

:)))
تحياتى

Eric Matt يقول...


صباح الدحك

ربنا يخليلكم ذكرياتكم دي يا رب

تحياتي لك من ماناساس البلد

ادعيلنا

Shreif fahmy يقول...

متشكر على اهتمامك وتنبيهك ليا بس عدم التعليق أكيد مش مقصود وأن كان ده طبعا مش مبرر للرد على تعليقات الناس
ميرسي مرة تانية

قلب يحترق يقول...

هههههههههههههههههه

ضحكت من كل قلبي لما قريت الموضوع

تعرفي يا مينا احلي حاجة في سوسو انها

طيبة اوي بيتهيألي لو كنتوا طولتوا

كان الشارع كله جه حب الولد معاكم

أسلوبك جميل اوي و عجبني جدا

Shreif fahmy يقول...

انتهيت من كتابة الجزء الاول من أصعب بوست كتبته لحد دلوقتي مش عارف قلقان ومنتظر رد فعل الناس اللي بثق في رأيهم وطبعا انتي واحدة منهم
منتظر تعقيبك
http://sfahmy78.blogspot.com/2007/06/blog-post.html

أسوور يقول...

جروووووم
ازيك يا باشا
واحشنى يا أخى
ومبسوطة انى ضحكتك بجد
هاروح أزورك حالا بس اوعى ما يكونش في بوست جديد
تحياتى

-_- يقول...

هههههه

ضحكتنى من كل قلبي

هههههههههه

أبو ضحى يقول...

ياسمين

يا ريت يكون البوست اللى جاى بنفس الروح الساخرة بتاعة البوست ده
أنا معجب جدا بالبوست ده..أنا اضفته فى ابداعات المدونين عندى

تحياتى

أسوور يقول...

شريف فهمى
هاروح أشوف البوست حالا
تحياتى

أسوور يقول...

dyin_soul
نورتينى يا سكرة التدوين

سوسو دى تبقى أختى الحبوبة اللى مش بتعز حاجة على حد
تعالى بقى شوفيها مع جوزها
بتغير عليه من الهوا

الناس بتتغير
بس بذمتك مش زمان كان أحسن
تحياتى للحبوبة

أسوور يقول...

شارم
نورت يا باشا
فينك مختفى

كويس ان عجبك البوست
تحياتى

elkamhawi يقول...

هههههههههههه
حبيه معانا

غير معرف يقول...

هاي عليكي يا ياسمينا يا جميلة عاملة ايه معلش زيارتي جت متاخرة بس واللهي مشغولة المهم المشاعر اللي انتي بتتكلمي عليها بينك انتي وصحابك ان دلت على شي فهي تدلعلىبراءة الاطفال والحب النقي لبعضنا واننا يكفينا ان نرى اقرب الناس الينا في سعادة حتى اذا ما كان يشاركنا في حاجة نحبها تحياتي ليكي ولموضوعك ياقمرية وبعد اذنك انا هضيف ميلك

YHYيــوســف الـمصـرى يقول...

ازيك يا ياسمين
جيت اسلم واصبح

Hannoda يقول...

لا يا ياسمين

أنا كنت فاكرة إن أنا لوحدي اللي حبيت إبن الجيران و عملت شغل المخابرات السرية ده حواليه

و الله إتفاجئت و ضحكت موت.. بس جديدة جمعية الحب اللي كنتم عاملينها ده..

تقريبا على كلام سوسو إنكم كنتوا 10 سنين تقريبا

بس العشر سنين رغم براءتهم لكن مش لدرجة إنكم تحبّوه مع بعض

حلوة الذكريات أم دم خفيف ده

أنا حر يقول...

مش عارف يا بخت مين بتاع اللب ولا حماده ولا احنا اللي بنقرا البوستات بتاعتك الجميلة دي
على فكةرلو دورتو كويس هتلاقوا ان في صلة قرابة بين بتاع اللب وحماده
تحياتي ليكي

.:.-=- ELGaZaLy-=-.:. يقول...

هههههههههههههه


بجد يا ياسيمن ياريت تكتبى قصة قصيرة عن ذكريات طفولتك بجد هاتبقى رهيبة

فاكرة موضوع السيكلوجيات؟

بتاع التدوين ... عملتة

The Eagles يقول...

يا اهلالالالالالالالالالالا
ازيك يا ياسمين
عاملة ايه
يا ترى لسه فاكرانى
انا لسه مخلص اول امبارح عشان كدة الفترة دى كنت منقطع فيها تماما
المهم ان تكونى بخير


والسلام..........

أسوور يقول...

القمحاوى
نورتنى

أسوور يقول...

قلوب حائرة
فعلا كانت أيام بريئة وجميلة
يشرفنى انك اضفتى الميل يا سكر

دكتور مستكنيص يقول...

ههههههههه حكاية دمها خفيف مش هقدر أعلق عليها لكن اللي أقدر اعلق عليه هو المدونة جميلة جدا واكيد هبقي ضيف اساسي رخم عليها
تحياتي

جار القمر يقول...

بصراحه مش عارف أقول أيه
بس كلامك فكرني بالعبقري أمل دنقل لما قال...
هل أنا كنت طفلا؟..... أم أن الذي كان طفلا سواي؟؟؟؟
تحياتي وتشكراتي على الموضوع اللي صحا فيا محمد علي العيل الصغير اللي كان بيرسم قلب ويكتب حرف اسم بنت الجيران اللي كان بيحبها بقشر اللب وتروح عليه نومه ويقوم يلاقي مامته شالت القلب واللب .

nohamy يقول...

لذيذة اوى الحكاية دى
بس غريبة ازاى 3 اطفال يحبوا ولد واحد
مفروض صاحبتك الاولى كانت
تزعل
على عموم ذكريات سعيدة

غير معرف يقول...

فكرتيني في المفعوصة أختي الصغيرة عندها خمستاشر سنة و قال ايه بتتنافس معايا في اعجابي بممثل بريزن بريك

هههههههههه

بتعرفي انه الصداقة اللي ما بين الأخوات بتكون أحلى
و كمان سوسو باين عليها طيبة بتشارك الناس في كل حاجة, لو كانت واجدة ثانية لأحتفظت بيه لنفسها

ربنا يخليكوا لبعض

.:.-=- ELGaZaLy-=-.:. يقول...

طيب انا جاى اسلم اصلا

انتى فين يا بنتى؟؟؟

مش عوايدك

مفتقدك وبشدة

tona يقول...

بجد
احلي بوست قريتهولك

tona يقول...
أزال المؤلف هذا التعليق.
Shreif fahmy يقول...

متتخيلش سعادتي قد أيه برد فعل الناس وخصوصا أنتي ياسيدتي في موضوع كنت لأول مرة بكتب فيه
وأد أيه سعيد ان من كلماتي المتواضعة دي قدرت أفكرك بذكريات جميلة وان شاء الله الجزء الثاني يكون عند حسن ظنك وحسن ظن الناس كلها
ميرسي كتير ليكي ياسمين

Unknown يقول...

تسلميلي ويسلملي سؤالك يا صاحبتي

سر إختفائي يا ستي هو أكل العيش
هو رمضان قرّب ولا إيه ؟؟؟

إبقي طمنيني عليكي
بالموبايل ياهانم مش علناً كده

.:.-=- ELGaZaLy-=-.:. يقول...

طيب واية بقى؟؟

انتى اساسا مش بتغيبى ربع ساعة مش يوم...؟؟


طيب خير

barbie girl يقول...

ماهى منى طلعت شاطرة عشان مالهاش فى اللب

كراكيب عادل يقول...

انا جاي اقولك سر

تعرفي الولد المور دة يبقي مين يا ياسمين

دة انا

شوفتي الدنيا صغيرة ازي

ياااااااه

شوية لب بئي

ممكن ؟؟

نفسنا يقول...

العدد الثانى من مجلة نفسنا نزل
روحوا الحقوا النسخ

Unknown يقول...

والله هتوحشينا يا ياسمين و مش عارفين هنعمل ايه من غيرك

بس اوعدك سجايرك و العيش و الحلاوه كلها عليا

بس متنسينيش فى موضوع الحزب
http://www.almasry-alyoum.com/article.aspx?ArticleID=64940

ربنا معاكى و تحياتى
رئيس امانه سياسات الحزب بتاع ياسمين

Shreif fahmy يقول...

الجزء الثاني من عفوا حبيبي متقدرش ومتعرفش
http://sfahmy78.blogspot.com/2007/06/blog-post_19.html

منتظر تعليقك

FloNa يقول...

انا اول مرة ادخل المدونة دي بس بجد مبسوطة جدا اني دخلتها لا وايه على موضوع يجنن


ربنا يكرمك يا ياسمين يارب كان ليا تعليق على يلا حبيه معانا


اد ايه الواحد كان زمان عنده براءة الطفولة وقلبه طيب اوي


كان عنده من جواه ايثار طبيعي وحب للمشاركة مش زي دلوقتي والله :(


النفوس بتتغير مش قصدي عليكم طبعا

بس يعين عموما :)

صاحب البوابــة يقول...

أضحكتيني للغاية

حقيقة أعجبت كثيراً بذكرياتك الطقولية البريئة

تحياتي اختاة

Nadine Alfred يقول...

يانهاااااار
ده انتوا كنتوا عاملين عليه كومبينه مالهاش حل

ايام الطفولة دى كان الواحد بيعمل عمايل بس المهم انه كان بيتصرف بتلقائية و عفوية و براءة إنطلاقا من الإنسان اللى جواه

إنما بقى حكاية منى و كلنا نفسنا نبقى منى
فاحب اقول ان منى عاملة زى اى قيمة اتشقلبت فى زمننا
عاملة زى الواسطة عشان الواحد يلاقى شغل
عاملة زى الرشوة عشان الواحد يقضى مصالحه
عاملة زى حاجات كتير قوى بقينا نلجألها عشان نعيش بس هى فى الأساس و هتفضل لآخر العمر غلط

بوست جميل قوى يا ياسمين
خلانى قعد افتكر انا كنت بعمل ايه زمان و اتغيرت قد ايه
تحياتى لك يا وردة جميلة فى بستان التدوين

غمض عينيك يقول...

ضحكتيني اوي والله يا ياسمين
كويس انها جت عليكوا انتة التلاته بس ومجاش حماده في يوم ولقى بنات الشارع كله تحت بلكونته

تحياتي ليكي
دي اول زيارة ليا

محمد سمير

inspector يقول...

الكل فائز مع اللب
بتاع اللب فاز (تلاقيه كان ماجر حمادة الكبير)وحمادة الصغير كسب(تجار الازمات)و حمادة الكبير كان على الارجح بيكسب من تلات جهات
ا-بتاع اللب اكيد كان بيدفعله حاجة
2-اكيد حمادة الصغير كان بيقسم معاه اللب
3-كان محط اهتمام مجموعة من البنات و اعتقد ده غاية كل مراهق
منى كسبت حمادة
انتم كسبتم حب حمادة
احنا كسبنا اننا قرانا البوست التحفة ده
اعتقد الخاسر الوحيد هم شخصان
اشرف اخو حمادة(4 بيتخنقوا على صاحبه و هو ملهوش نصيب)
و عامل النظافة بتاع الشارع اكيد طلع عينه من اللب اللى انتم قزقزتوه
هههههههههههههه
بس اسلوبك روععععععععة
سوري بس دماغى لفة اليومين دول بهيص

دينا فهمي يقول...
أزال المؤلف هذا التعليق.
دينا فهمي يقول...

ماكنتش أعرف إنك كمان دمك خفيف (:

غير معرف يقول...

مهما كان عمر الفتاة المهم انها فتاة تتمتع بأنانيه عاليه جدا واعتقد ان اقتراحك لاصحابك ان يحبوة معكى تجعل القصه فيلم عربى ابيض واسود من الدرجه الاولى لان بطبع المرأة انها انانيه ولا تنسى ذلك لكن بدون مجامله اسلوبك حلو يتمتع بخفه الدم ورقه التعبير مع قزقزة اللب اما بدون ذلك لا اعرف