الأربعاء، 10 يونيو 2009

حبيبة ماما .... سما




أجمل البنات .... تمت 5سنوات
******
سما
هتشوفى الكلام دة فى يوم من الأيام تكونى بتعرفى تقرى
انتى حاجة جميلة قوى فى نظرى ... وبحبك قوى قوى
انتى الوحيدة اللى بتخلينى اضحك من قلبى ... وانتى الوحيدة اللى بتقدرى ترسمى ابتسامة على وشى
وانا معاكى بتهون علية كل الاحزان لأنك انتى فرحة قلبى
********
لما عرفت انك جوايا زعلت وقلت لباباكى مش وقته خالص
لأن نور كان عندها 8شهور بس ... باباكى دافع عنك قوى وزعل منى
قلتله طيب انت زعلت ليه ؟هو انت تعرف اللى فى بطنى لسة ..... قال معرفهوش لكن أعرف اللى خلقه
************
رحت للدكتور عماد حسنى قالى لو انا دلوقتى فتحت الخزنة وقلتلك خدى المليون جنيه دى هتعملى ايه؟؟
قلتله هاخدهم ... قل يعنى مش هتقولى مش وقته؟؟ ... العيال يا آسر أغلى من مال الدنيا
وفى ناس تتمنى تدفع كل مالها عشان طقل ............. فسكتت
**************
يوم ما اتولدتى كنت بايتة عند نانا فى العجوزة .... وكان لسة على معادك 20يوم
قمت من النوم الصبح وقلت لمامتى انا حاسة انى هأولد النهاردة
قالت دى تفاسيح ,, تحبى اعملك ايه النهاردة ,,بط ولا كوارع ....اصلى قلتلها ان كان نفسى فيهم
************
مادام هأولد يبقى لازم أخلص مشاويرى قبل ما اتربط جنب البيبى
لبست بسرعة وتزلت رحت البنك وانا فى الطابور قلت للناس انا هأولد يا ريت توسعولى
ضحكوا ومحدش اتحرك ,, محدش صدقنى
**********
طلعت من البنك لقيت الونش بيشيل العربية
اصلى ركنت صف تانى عشان مكنتش قادرة امشى من الالم
جريت على الظابط وقلتله ,, سامحنى اصلى رايحة أولد .... ضحك وقالهم سيبوا العربية
كانت عربيتى سيينا لونها رصاصى فى الوقت دة
***********
رحت على شركة التأمين على السيارات عشان أجدد التأمين
المندوب كان قريبنا ،كلمته قلتله ينزل بالورق لأنى مش قادرة اطلع ... ومرضتش اقول انى هأولد أحسن يكلم العيلة كلها
نزل واول ما شافنى قالى انتى شكلك تعبان قوى روحى المستشفى احسن وانا هأخلصلك كل حاجة
**************
كان الموبايل بتاعى فيه مشكلة فرحت نوكيا عشان اصلحه
وانا فى الطريق اتصل بية باباكى وهو بيكلمنى جالى الألم .... فسكتت من الوجع
وهو حس وقالى انتى تعبانة ولا ايه؟ .... قلتله انا حاسة انى هأولد النهاردة
قالى اقفى مكانك وانا هأجيلك حالا
ولأنى مامى مش بتسمع الكلام مشيت برضه ورحت نوكيا اصلح الموبايل
*****************
فى نوكيا بالدور طبعا ومقدرتش اقول للناس انى هأولد ليضحكوا تانى وميصدقونيش
باباكى اتصل وهو بيصرخ ,, انتى فييييييييييييين؟ فى نوكيا ...... انتى بتستهبلى وقفل السكة
*****************
فى نوكيا فضلوا يتدلعوا والولد اللى كان معايا بيتابع كان بطىء جدا
او يمكن انا اللى حسيت كدة .... فقلتله على فكرة انت لازم تبقى اسرع من كدة والا هأولد هنا
فضحك ... قلتله ... على فكرة انا بأتكلم جد جدا
وقلت انى محتاجة الموبايل جدا جدا حالا
ادانى موبايل من عندهم لحد ما موبايلى يخلص
ويا دوبك بحط الشريحة لقيت باباكى بيتصل وبيصرخ فى التليفون
انا برة قدام نوكيا جنب عربيتك بقالى ساعة ... اطلعى حالا هنروح المستشفى
اديت للموظف الموبايل بتاعهم وقلت بلاش مكالمات لحد ما موبايلى يخلص
واستنيت لحد ما اتصلح الموبايل بعد ييجى ساعة ونص فى نوكيا
**************
طلعت لقيت باباكى عصبى ومتوتر وقال انه كلم الدكتور وطلب منه يجيبنى حالا
بس انا قلتله ... لازم أروح بيتى الأول عشان اجيب لبس البيبى واحضر الشنطة
اتحايل علية انه هو يروح او اى حد بعد ما يودينى المستشفى
وانا مرضتش ابدا ... انتى عارفة مامى بتحب تعمل حاجتها بنفسها
**************
رضخ فى النهاية وانطلق بسرعة من الدقى على المقطم
وكان بيسوق بسرعة جدا وقالى ان الدكتور قاله هاتها بسرعة ومتسمعش كلامها
بس بابى مقدرش يقنعنى وكان خايف علينا انا وانتى يا سما
*****************
حضرت الحاجة ورجعنا المستشفى
وانا داخلة من الباب اتصلت بية سحر مامة ميرو مادى يا سما
قلتلها عرفتى منين ؟؟؟ دة انا لسة مقلتش لحد
طبعا قريبنا بتاع شركة التأمين اتصل بيها اول ما روح وقالها انى شكلى هأولد خلاص
****************
فى المستشفى جت نهى مامة جنة وعمر وكانت معاها طنط نادية
وكنت خلاص بأتألم جدا لما سألتنى نهى ... تفتكرى اعمل لون السيراميك ايه
اصلها كانت لسة هتتجوز ... صرخت فيها جامد .... سيراميك ايه وهو دة وقت سيراميك؟؟
باباكى قالى انه هيروح يجيب غدا ... وطلبوا بيتزا ... ونزل
***************
بعدها بدقايق قالوا لازم تدخلى العمليات حالا
صرخت وكنت عايزة باباكى ... حاولت ما اولدكيش غير وهو هنا
بس انتى كنتى مستعجلة قوى ومرضتيش تستنى بابى
**************
فتحت عنية وقلت هى فين ؟؟
كانوا مشغولين بأختك نور اللى فكروها هتغير منك
قمت من السرير ورحت شفتك ... كنتى صغيرة قوى قوى
شلتك وحضنتك وبوستك
وكل يوم كنت بأسهر معاكى اغنيلك اغنية نوال الزغبى
آه يا انا يا انا م اللى احبه يا نا
الناس تنام الليل وانا سهرانة
*************
ومن يومها وابتسامتك منورة حياتى
بحبك يا سما




هناك 64 تعليقًا:

غير معرف يقول...

ربنا يخليهالك يا رب......زي القمر وعسوله......ربنا يخليكي لبناتك ويخليهم ليكي وتغنيلهم دايما :)

أسوور يقول...

فتاه من الصعيد

كتر خيرك يا ست الكل

السنونو يقول...

كل سنة وهى وأنت طيبة وعقبال ما تشوفيها وهى عروسة

ابن المليونير يقول...

يا نهارى ، حضرتك فاكرة التفاصيل دى كلها من خمس سنين!!!، دة انا مش فاكر عملت اية امبارح، صحيح ذاكرة الستات ملهاش حل ، متعرفليش شوية تمارين للذاكرة و لا لازم اتجوز و اخلف و يكون عندى بنوتة زى سما كدة عشان الذاكرة ترجعلى :)

Desert cat يقول...

ربنا يخليها لك يا قلبى
احلى قمرتين شوفتهم فى الدنيا
نور وسما

Unknown يقول...

ربنا يخليهلكم

ايه ده كلعملتيه في يوم الولادة

soaad fakoory يقول...

واحشانى جدا"يا آسر فينك من يوم اعدام
السكرى وهشام ومبروك لنا عودتك للتدوين و يخليلك سما ونقرألكى دائما الجديد والجديد...و

safa7_karmooz يقول...

كل سنة وسما طيبة وعسولة ومطيعه وحلوة كده مع اهلها دايما...^_^

ربنا يخليهالك ويخليلك عائلتك دايما ...وتكونوا سعداء يااااارب

Unknown يقول...

كل سنة وسما بالف خير وسلامة
وتكبر كدة وتشوفيها عروسة يارب
دمتي بخير تحياتي وللامام

إيمان قنديل يقول...

كل سنه وهي طيبه وعقبال ماتشوفيها عروسه هي واختها




هي شبهك جامد على فكره



بس انتي مشاكسه وجدعه بجد






كل اللي عملتيه


وجت على السيراميك



تصدقي افتكرتك حاتسيبي المستشفى وتروحي مع تجيبي معاها السيراميك ماهو ده اللي كان ناقص بس




مبرووووووووووووك

beautiful mind يقول...

الاستاذه اسر

غبتي غيبه طويله جدا ملاتنا قلقا عليك

ثم عدتي الينا باجمل كلامات لاحلي البنات

ربنا يخليهالك يارب

وان شاء الله تكوني بخير وباتم الصحه والسلامه

وتقبلي تحياتي

!!! عارفة ... مش عارف ليه يقول...

ربنا يخليها لك

ويخليكي لها

وإن شاء الله تكبر وتقرا كل ده

علشان تعرف أنت تعبتي علشانها اد ايه

وكل سنة وهي طيبة

وعقبال ما تشوفيها أجمل بنوته في الدنيا يوم فرحها إن شاء الله


وليد

احساس طفلة محبة للرومانسية بس واقعية يقول...

كل سنة وهى طيبة
هم دائما تعبنا كدا
بس ضحكتهم بالدنيا كلها
ربنا يباركلك فيها ويحميها

تقبلى مرورى

أسوور يقول...

السنونو

وانتى طيبة يا زهرة التدوين كما أسميكى

تحياتى

أسوور يقول...

ابن المليونير

زعلت لما جيت مدونتك ولقيتنى مش عارفة ادخل اقرا .. المدونة بتاعتك كانت من مدوناتى المفضلة

معلش .... نصيب بقى

بس على فكرة فرحت لما لقيتك جيت زرتنى وعلقت عندى

لسة فى أمل تفتح مدونتك ... اصل التدوين دة زى المخدرات ... ادمان

تحياتى

أسوور يقول...

قطة الصحراء

واحشانى يا بنتى .... على فكرة انا جبت قطة صغيرة .... شبه القطة اللى فى الصورة بالظبط ... لونها وشقاوتها وكل حاجة فيها تشبهها

لازم تيجى تشوفيها بنفسك وكل سنة وانتى طيبة يا قمر

أسوور يقول...

أحمد

تخيل ان دة كله عملته ... ولأن كل اللى يعرفونى لسة بيرددوا القصة دى .. حبيت اكتبها لسما علشان تعرف ان ماما قوية من قبل ما تولدها ...
:)

أسوور يقول...

سعاد

كلامط فرحنى والله ... معلش مشغولة بإمتحانات البنات وكمان جالهم جديرى همة الإتنين ورا بعض

لكن مقدرش استغنى عنكم ابدا مهما غبت هتلاقينى رجعت تانى

نورتينى يا رقيقة التدوين

أسوور يقول...

سفاح كرموز

على فكرة انت انسان رائع ... عارف ليه ؟؟؟؟ لأنى بحس انك دايما موجود من زمااااااااااان من سنتين لما اتقابلنا فى الأوبرا .... من يومها وانت دايما موجود

اشكرك

أسوور يقول...

ميدوس

وانت طيب ... دى احلى دعوة بجد

يا رب تكبر واعملها فرحها زى ما عملتلها عيد ميلادها

أسوور يقول...

غرام

طبعا لازم تضحكينى وانتى بتعلقى

اه والله يا غرام .. تخيلى انى عملت كل دة وانا بأتوجع ... بس متخافيش كنت ماسكة الساعة عشان اعد الدقايق الفرق ... كل الناس كانت مخضوضة لكن انا اللى كنت عارفة ان لسة بدرى

انتى اكيد فاهمانى

وحتشتيييييييييييييييييييينى

Wild at Heart يقول...

تدوينة رائعة. :)

أسوور يقول...

beautiful mind

شكرا لك يا عزيزى ... انهم فلذة الأكباد

نورتنى

أسوور يقول...

عارفة .. مش عارفة ليه

شكرا للزيارة والتعليق

ولما تكبر هتقرا المدونة والبوست والتعليقات وتحب نفسها عشان تعرف تحب غيرها

أسوور يقول...

احساس طفلة محبة للرومانسية بس واقعية

ايوة صحيح ... همة دايما تاعبينا ... بس بنحبهم قوى ... لأنهم حتة مننا وحتى من اللى بنحبه

شكرا لمرورك

أسوور يقول...

Wild at Heart

نورتى يا عزيزتى مدونتى

وشكرا لمرورك

حبيبه يقول...

ربنا يخليها ليكى وتفرحى بيها

نبراس العتمة يقول...

اعجبتني حكايتك مع المنقبة وسما في مدونة قطة الصحراء

وقرأت هنا هذا البوست لأزداد اعجابا بسما وبك كأم لها

أنا أيضا أب لأايمن وأقدر هذه المشاعر الجميلة

لا أملك إلا أن أقول لك
ربنا يخليها لك وتكبر وتزداد جمالا وتألقا

مودتي

micheal يقول...

ربنا يخليكوا لبعض يا اسر

duffy يقول...

ربنا يخليهالك وتشوفيها زي ما تتمنى واكتر

احساس لسه حى يقول...

قطتنا

طبعا مش هتنشرى التعليق كالعادة

بس انا هنشره عند كل اللى علقوا

واقول رأى فى كلامك وكلامهم

طبعا حقى راى يوصلكم

ليه شوية ملاحظات

اول ملاحظة


مع ان الموضوع مش عن منقبة خالص

عن واحد بيقيم علاقة مع واحدة

انا شايف الكلام هنا عن النقاب

تانى ملاحظة

تفتكرورا لو منعوا النقاب الراجل ده مكنش هيعرف يقيم العلاقه دى مع الست دى يعنى النقاب السبب فى اقامة العلاقه ولا اخلاقهم اللى سمحت بكدة وبالنقاب او من غيره كان هيكون فيه علاقة

تالت ملاحظة

طيب ما فيه ستات مومس بتلبس لبس عارى علشان تصطاد رجالة وبتغويهم ايه رائيكم نمنع اللبس العارى علشان بيستغل فى امور غلط

رابعا

طيب يا جماعة انا شايف ستات كتير بتهاحم النقاب طيب الستات دى تقريبا مش محجبات طيب لو المنقبة دى عملت موضوع عن اللى مش محجبات وسمحت للناس تخش وتشتمهم وتقول الالفاظ اللى بتقولوها زى


فالخيمه السوداء فتحت الأبواب ودخل من دخل وانبسط وخرج

ممكن تتقال

الخيمة الشفافة الضيقة المتعرية


ودى كمان

مشهد النقاب يؤرقني بشدة

ممكن تتقال

منظر العرى المينى والضيق بيؤرقنى بشدة

وده كمان


وفى لنك مرفق مع نفس الخبر اللى انتى قريتيه يحمل نفس الماساه

ضبط مزارع يرتدي النقاب للأخذ بالثأر بالعياط

ممكن تتقال

فى لينك مرفق شابة بملابس فاضحة تقوم بأغراء الرجال وتقوم لسرقاتهم

وكمان دى

انا متهيألى ان النقاب هو تعبير عن عدم الامان

ممكن تتقال

متهيألى ان العرى بيدل على الانحطاط وعدم التربية والبعد عن الدين

وكمان دى

بالرغم من بشاعة منظره

ممكن تتقال على اللى مش محجبات

بالرغم من بشاعة منظرهم

ودى كمان

هذا الرداء القبيح ... من السهل جدااا التخفى ورائوا فمن اين يعرف الشخص ان كان هذا الكيس المتحرك مرأة ام رجل ام قاتل مسلح ام مهوس جنسى بالتحرش بالنساء

وتتقال كده

هذا الراداء العارى ممكن تتخفى وراءه مومس او حرامية او مهوسة بالجنس

ويلا كمان بقيت التعليقات

عزيزتي قلناها وهنفضل نقولها النقاب خطر على الامن العام

تتقال زى كدة

قولنا وهنفضل نقول ان الحجاب فرض والعرى حرام وخطر على البنات والاولاد معا

وده كمان اقروا

و نتساوا بالناس النضيفه و الدول الغربيه اللي منعت النقاب لامن شعوبها

ده بقه يترد عليه كده

الناس النظيفة مش بيمنعوا النقاب الناس الوسخه بس بتمنعوا

ولو منعوه هما حريين زى ما هما سابين الستات عايشين الجنس ومجربينه من وهم اطفال ومراهقين

ونشوف ده كمان

النقاب ده بيعملي قلق بجد يا قطة
وبخاف بصراحة من المنقبات لان بحسهم متل الغربان

تتقال كده

العرى ده بيعملى قلق بجد يا كلبة سورى قطةوبخاف الصراحة من العاريات لان بحس انهم زى الفرخة المسلوقة اللى نتفوا ريشها

ونشوف ده كمان

اما النقاب فهو رمز للخيبه القويه واهنزاز الشخصيه

تتقال كده

انا شايف العرى ده رمز للانحلال والبعد عن الدين وانحلال الشخصية

ونقرأ بقية التعليقات

المشكله انى لما باشوف واحدة منقبه باحس انها بتشتمنى

تتقال كده دى

المشكلة لما بشوف واحدة متعرية بحس انها بتقولى اتفرج على جسمى ايه رائيك

كمان لسه فى تعليقات

أصل النقاب جنة المطاريد و اللي مش عايزين حد يعرفهم

رد بردوا هنا

وهو من غيرة مش بيكون فى جنة للمطاريد واللى مش عاوزين حد يعرفهم

كمان يلا تانى

مشكلة النقاب
هو أنه ينتهك حرية الآخر

فالمنقب أو المنقبة يراك أو تراك/ في حين ليس لك الحق في رؤيته


يتقال كده

مشكلة العرى انه بينتهك حرية الاخر

انه بيخليك تشوف حاجه كتيرة مش من حقى اشوفها وغصب عنى بشوفها


ده كمان وليه رد مخصوص

يعنى يلبسوا نقاب ... يلبسوا بكينى .... همة أحرار


ومن يومها عرفت ان النقاب شىء غير مقبول ..

ردى

يلبسوا نقال لو مش حلال يبقا مش حرام

يلبسوا بكينى بالنسبة للمسلمة حرام ولا عندك اعتراض

اما بقه انك تقبلى تقولى على لبس اختارته انسانه بحريتها غير مقبول

يبقا تسمحى لاى انسان يقول على لبسك غير مقبول

واعملى المقبول قبل ان ترفضى الغير مقبول

تانى اكررها

واعملى المقبول قبل ان ترفضى الغير مقبول

والتعليق ده كمان

يا بنتى النقاب ده مشكلته انه اى حد يتخفى وراه وبلتالى الطالح

ويتقال كده

العرى ده مشكلة لان المومس وغير المومس بيتخفوا وراه ومنعرفش مين المحترمة من الغير محترمة

ايه رائيك

اه طبعا كل مدون عارف رأئية ايه وكان ممكن يتقال ازاى

وطبعا انا بحطه عندكم لانى معروم من شرف التعليق عند القطة لانى بعرف اقول راى صح وبنقدها صح وبرد على المعلقين صح لانها جبانة وبتخش بس تشتمنى باسم غير معروف شوفتوا انها برضوا منقبة بس بشكل تانى

سلام

احساس لسه حى يقول...

يا ريت تعلميها متخافش من حد وانتى معاها

بالذات لو بيقدملها وردة

safa7_karmooz يقول...

بجد تعليقك ثبتنى فى مكانى

ربنا يكرمك ..:)

Blank-Socrate يقول...

ربنا يخليها و تفرحى بيها
و هى انشاء الله تكبر و تملى الدنيا عليكى
:)
تحياتى

بهجت الاباصيري يقول...

كل سنة وهي طيبة ..... ياعني حقيقي
happy new year
بس انا مش شايف اي شمع في السبانخ ولا حتي دسته جاتوه مالهاش صاحب .... الذكريات حلوة وجميلة , بس الجلاش برضه حلو وفي اختراع كده جامد برضه بيطلع اول الشهر بيسموه والعياذ بالله لحمة او كباب

عموما ربنا يخليهالك وعقبال ميت سنة

وفي انتظار الحاجة الساقعة

أسوور يقول...

حبيبة

لك كل الشكر على الزيارة والتعليق

تحياتى

أسوور يقول...

نبراس العتمة

ربنا يخليلك أيمن ... غاليين قوى بجد ... بنحبهم أكتر من نفسنا ... ربنا يبارك فيهم ويجعل أيامهم الحلوة أكتر

تحياتى

أسوور يقول...

مايكل

بأمبسط والله لما بتزور المدونة وألاقى تعليقك ... وبفتكر أيام بورصة والأوبرا

نورتنى

أسوور يقول...

duffy

شكرا لك

تحياتى

أسوور يقول...

احساس لسة حى

انت غريب على فكرة جدا ... كل واحد حر فى رأيه .. انت مش هتحجر على رأى الناس .. وبعدين أنا بأمسح التعليقات اللى فيها اساءة فقط لآخرين سواء كانت ألفاظ خارجة محبش ان زوار مدونتى يقروها أو سواء كانت موجهة لشخص آخر

ولما انت ممنوع من دخول مدونة قطة الصحراء ... بتدخل وتقرا ليه ؟؟؟ ويهمك رأينا فى ايه؟؟؟ ويهمك اللى هية بتكتبه عشان ايه؟؟؟

هو جر شكل وخلاص

انا معرفش اى حاجة عن خلافك مع حنان وهى انسانة ممتازة من وجهة نظرى ولم نختلف الا برقى وتحضر

ولم اراها بتشتمك ولا بتوجهلك اى سباب .. لكن شفتك بتشتمها فى مدونتك بألفاظ لا تخرج من انسان مثقف زيك أبدا

عشان كدة استغربت بصراحة انك جاى تشتمها هنا عندى ... ومش فاهمة ايه الإصرار الغريب دة على العداوة

رأيك فى النقاب انا أحترمه حتى لو اختلفت معه ولكنى لم أكتب عن النقاب ولا يهمنى الموضوع اصلا ولا أعتبره شىء هام حتى أضيع مساحة من مدونتى لأكتب عنه

وانا لم أطرح فى المدونة أى مجال لمناقشة النقاب

البوست عن عيد ميلاد بنتى لو مكنتش يعنى أخدت بالك

وانت مرحب بيك فى أى وقت طبعا لكن لى عندك طلب

التعليق يكون فى حدود الموضوع المطروح

التزام حدود الآداب العامة التى تربينا عليها والتى ألتزم بها انا شخصيا فى مدونتى زى ما انت عارف

رجاء عدم توجيه أى ألفاظ خارجة لأى شخص أيا كان من خلال مدونتى

احترام زوارى من احترامى انا شخصيا .. وانت من الناس اللى بحترمها ... ليه مصر تعمل مشاكل بقى؟؟

ولو سمحت متعلقش عندى على موضوع فى مدونة أخرى

ايه الضرورى يعنى اللى يخليك تتحمس كدة؟؟؟

تحياتى

أسوور يقول...

سفاح كرموز

انت من الناس الجامدة فى التدوين وانت عارف كدة كويس .. دة غير ان مجموعتنا بالذات مجموعة راقية فى أفكارها وفى معاملاتها مه بعضها البعض .. عشان كدة لازم كلنا نستمر

تحياتى

أسوور يقول...

Blank-Socrate

دعوة جميلة قوى .. كتر خيرك

تحياتى

أسوور يقول...

بهجت الأباصيرى

لو كنت من المعازيم فى الحفلة كنت أكلت من ايدية أكل عمرك ما دقته... على فكرة أنا طباخة ماهرة وكل أصحابى وأهلى بيستنوا حفلات عيد ميلاد بناتى عشان ياكلوا ما لذ وطاب من الطعام والشراب

البوفيه كا فيه 9 أصناف متنوعة من أطباق من صنع ايدية وحياة عنية

غير التورتة طبعا والفروت سالاد والساقع والسخن

انت معزوم على العيد ميلاد الجاى بتاع بنتى نور فى يناير

حضر نفسك وماتاكلش لحد الحفلة عشان تستمتع
:)

تحياتى

احساس لسه حى يقول...

عزيزتى

انا ولا بنتهك حريتك ومدونتك ولا حاجه

انا بس قولت انى ليه راى فى البوست والتعليقات

وبدال صاحبة المدونة بترفض الاراء اللى بتعارضها وترفض تنزلها يبقى من حقى اعرض رائى فى الكلام اللى شوفته

ومعلش انتى انا قريت ردك على تعليقى وهنفذ رغبتك بس على الااقل من حقى تردى على كلامى الموجهه ليكى فى تعليقى

واهو هحطه تانى


يعنى يلبسوا نقاب ... يلبسوا بكينى .... همة أحرار


ومن يومها عرفت ان النقاب شىء غير مقبول ..

ردى

يلبسوا نقال لو مش حلال يبقا مش حرام

يلبسوا بكينى بالنسبة للمسلمة حرام ولا عندك اعتراض

اما بقه انك تقبلى تقولى على لبس اختارته انسانه بحريتها غير مقبول

يبقا تسمحى لاى انسان يقول على لبسك غير مقبول

واعملى المقبول قبل ان ترفضى الغير مقبول

اصل مينفعش تدافعى عن حق المراه فى لبسها وحريتها وترفضى حق المقبة وحريتها فى لبسه

اللى بيدافع عن حق فئة يدافع عنها بكل اتجاهتها

اظن ده خاص برئيك اللى قولتيه

وارائك اللى بتقوليها

وبرضوا اللى بعمله ده مش هجوم عليكى فى شئ حنان حالة خاصة وفيه كتير متعرفوش

سلام

أسوور يقول...

احساس لسة حى

يبدو انك لم تقرأ تعليقى جيدا

انا قلت ان دة بوست خاص بعيد ميلاد بنتى وان مليش دعوة بالبوستات اللى عند أى حد تانى ومش من حقك تتكلم فى موضوع انا مفتحتهوش فى مدونتى أصلا

وكمان مش مفروض تيجى مدونتى وترد على بوستات ناس تانية منهتك من الرد عندها نظرا للألفاظ اللى حضرتك بتستخدمها فى التعبير عن رأيك وكفاية اللى انت كاتبه فى مدونتك عن البنت اللى من حقها انها تقول رأيها عن أى شىء تعتقده بحرية زيها زى غيرها ... ولا عشان بنت يعنى تبقى كيس زبالة لو خالفت الذات العليا لأى ذكر؟؟

رأيى فى النقاب انت عرفته خلاص وأى مناقشة مش مفتوحة فى مدونتى مش هأتناقش فيها ومش من حقك تفرض علية انى أرد عليك فى تساؤلاتك أو ممكن نقول تهكماتك ونقدك

انا شايفة ان كل واحد يعمل اللى هو عايزه بدون ما يجرح الآخرين أو يخيفهم ... ومش من حقك انت بالذات تتكلم عن الحقوق لأنك أول من ينتهك حقوق الآخرين من المدونين

ومع ذلك هأرد عليك
اما عن النقاب .. فهو عادة جاهلية كانت موجودة قبل عهد الرسول اصلا ومازالت منتشرة فى شبه الجزيرة العربية

والدليل على ذلك قوله تعالى: (يَا أَيُّهَا النَّبِيُّ قُل لأَزْوَاجِكَ وَبَنَاتِكَ وَنِسَاء الْمُؤْمِنِينَ يُدْنِينَ عَلَيْهِنَّ مِن جَلَابِيبِهِنَّ ذَلِكَ أَدْنَى أَن يُعْرَفْنَ فَلا يُؤْذَيْنَ) سورة الأحزاب: 59.

يعنى ربنا نفسه بيقول اقلعوا النقاب لنساء النبى عشان الناس تعرفهم لأن دة يقلل من أذيتهم... نيجى احنا ونتمسك بيه ليه؟؟؟

ثانيا ... لو كتب لك ان تحج هتعرف انه ممنوع شرعا على المرأة أن تحج وهى منتقبة ... وانا شخصيا لى صديقة قريبة جدا منى انتقبت وبعد 3 سنوات كتب لها أن تحج .. ولما عادت رحت اسلم عليها قالتلى انها قلعت النقاب لأن قلبها لم يقتنع بمنعه فى الحج واباحته فى غيره لذلك استفتت قلبها وارتاحت لخلع النقاب والإكتفاء بالحجاب الشرعى

ارجو اننا نقفل الموضوع بقى

Desert cat يقول...

يا حبيبتى يا آسوور سورى بجد على التطفل اللى حصل عندك بسبب حجب تعليقاتى للمذكور أعلاه اصلى بجد مستخسرة اكتب اسمه بخاف على نقاء كيبوردى
المشكلة بقى اللى ملهاش حل بجد لما يكون حد انتى متجاهلاه وبتعامليه على انه مجرد شئ اترمى جنب الحيط ولم تلتفتى اليه مرة اخرى ويوصر كل الاصرار على كتابة تعليق يوميا فى مدونتك وبرغم انه عارف انك بتحذفى تعليقاته من مجرد الاسم يعنى مجرد فتح الكومنت مش بيحصل الا انه برضه مش بيزهق ولا يكل ولا يمل وبيروح مدونات الاصدقاء يمكن يلفت انتباهى يا حرام وابص فى كومنتاته لكن برضه مش بيحصل يمكن انا استنتجت الكلام من خلال تعليقاتك انتى
علشان كدا بجد سورى يا حبيبتى لهذا التطفل الغريب

Desert cat يقول...

بخصوص ردك على تعليقى بقى ميرسى اوى على دعوتك انى اشوف القطة على الطبيعة وطبعا فى اقرب فرصه لازم اجى اشوفها والعب مع احلى قمرتين

الكلمة نور يقول...

عظيمة شركة نوكيا
:D
ربنا يخلى

بهجت الاباصيري يقول...

يا الهي .... 9 اصناف غير التورتة طبعا والفاروق صلاح والساقع والسخن ... دي اكيد كانت ملحمة تاريخية

عموما اشكرك علي الدعوة الكريمة دي ..... بس صعب اني البيها .. لاني ما افتكرش اقدر اعيش من غير اكل لحد يناير الجاي ..... لاني لو قدرت ممكن يسحبوا مني الجنسية واتحول من مواطن مصري لمواطن صومالي ... وممكن اطلع فيها وابقي قرصان

عموما لو قدرت اكيد حاكون اول واحد يقص الشريط بتاع البوفيه .... وبالمرة ادخل موسوعة جينس لاني نفسي اشوفها من زمان

واخيرا اقول ان الاطفال هما فعلا ال
cans
الحقيقي في هذه الحياة
وعقبال
meat
سنة مرة تانية

وشكرا علي الدعوة الكريمة ..... وربنا يخليكي للغلابة

Magi Mostafa يقول...

ربنا يخليهالك يا رب بنوته زى السكر
من اجمل البوستات الى قريتها

..... يقول...

استمتعت كثيرا بقراءة يوم ولادتك بأحداثه كلها
ابهرتني جداً
حفظ الله لك سما ونور وادم وجود والدهما لكم جميعاً
تحياتي لك وياهناك ياسما

احساس لسه حى يقول...

عزيزتى

معلش بقه ليه ملاحظة انك زعلانه من انى بقول على البنت اياها كيس زبالة

وشايفة الكلمة جارحة

طيب ما البنت دى بتقول اللفظ ده على المنقبات واكتر ومنه

مشوفتش حضرتك معترضه عليها وعلى لفظها اقصد الفاظها القذرة

ولا علشان انا ذكر بتعترضى على وكلمتى جارحة ومنها علشان انثلا مش جارحة

افهم بس

مع العلم كلامى عنها عن فرد يعنى احتمال اصيب واحتمال اكون خطأ

لاكن هى بتتكلم عن ناس وفئة يعنى اكيد اصابت ناس بالحق وناس بالباطل

تحياتى

سلام

نبراس العتمة يقول...

العزيزة أسوور

هناك من يطالب برأس مدونتي أتمنى أن تدخلي على الفوانيس مدونتي
رأيك يهمني

أسوور يقول...

سجود

شكرا لك يا عزيزتى

نورتى المدونة

أسوور يقول...

احساس لسة حى

مبحبش الألفاظ الوحشة عموما


وبعدين انت بتقول عليها كدة فى اعلان على مدونتك .... لكن هى اتكلمت عن فئة معينة (المنقبات) على حسب كلامك رغم انى مشفتش الكلام بتاعها الا ان كل اللى رايح واللى جاى شايف الشتيمة على مدونتك ودة فيه اساءة ليك مش ليها ... وبعدين لو حتى هى كتبت كدة ... هو انت واحدة منقبة؟؟؟؟؟؟

ولو انت شايف انها غلط ... بتعمل زيها ليه؟؟؟

الموضوع مش محتاج لت كتير وكل المدونين بيتكلموا عن الألفاظ اللى انت بتستخدمها وتقريبا ناس كتير قاطعت مدونتك ... قدامك انك تلطف علاقتك مع الناس وتتعلم النقد البناء والإختلاف برقى .. وقدامك انك تفضل على اسلوب الشتيمة والنقد بالسباب اللى بيؤذى صاحبه أولا

انا بادون من سنين وعارفة كويس بأكلمك عن ايه... انت بتكتب كويس واسلوبك حلو بس يا ريت تنقيه من الألفاظ اللى بتؤذى العين

تحياتى

احساس لسه حى يقول...

عزيزتى

مع انى مستغرب من تعليقك بس هرد


اكيد كلنا مش بنحب الالفاظ الوحشة

بس بنضطر ساعات نستعملها مع ناس معينة فى وقت معين

يعنى مين الاحسن انى اشتم فرد وممكن يكون صح كلامى نحيته واكون صح

ولا اللى يشتم فئة واكيد الفئة مش كلها زى ما بيقول يعنى اكيد غلطان

وازاى مشوفتيش الكلام بتاعها وهو فى البوست اللى علقتى عليه غريبة

نيجى بقه لجملتك الغريبة هو اللى يدافع عن المنقبات لازم يكون منقبة

يعنى اوجه كلامك ده لحد بيدافع عن المتحرشات واقوله هو حد اتحرش بيك

منطق غريب ان اللى يدافع عن حد لازم يكون الشئ بيمسه او بيعمله

يعنى لو محجبة دافعت عن واحده مش محجبة ممكن حد يقولها انتى مالك هو انتى مش محجبة

خدى بالك من جملك لانها بتبين شخصيتك وارائك وفكرك

والمنظق ده يأذى حملتك ويمسها

مين كل المدونيين اللى بيتكلموا عن الفاظى اللى بستخدمها

انا شايف فئتين فئة متدينه وكلها بتقاطع قطة وفئة غير المتدينين ويا ريت بس غير متدينين لاكن فى منهم اللى بيشتم الاسلام ودول مع قطة

وانا عندى بنقد تقد واضح وبناء وعندى اسئلة واضحه تعالى جوبى عليها

واكيد اللى يعترض على الفاظى عمره ما هيدفع عن قطة ولا هيخش عندها

لانى مهما كان بهاجم او يشتم فرد

لاكن مدونة قطة فى مهاجمة وسب افراد وفئات واهم من دول الاسلام

لو مشوفتيش وعوزه تشوفى ابعتلك لينكات عندها فى تعليقات بتنزل بعد موافقتها بتشتم الاسلام والدين

ايه اولى بقه

انا مدونة بتشتم قطة

ولا مدونة قطة اللى فيها سب الدين الاسلامى

اظن لو انا وحش 1 من 10 يبقى هى اضعاف وحشتى

لتيت كتير يا ريت يكون وصلك قصدى


عارفة المشكلة فى ايه

انك بتدفعى عن انسانة مدونتها مليانه قذورات واى موقف فى مدونتك وجودك عندها هيهده

زى ما قولتى دلوقتى فى دفاعك عنها هو انت منقبة
سلام

أسوور يقول...

احساس لسة حى

انا قصدت بهو انت واحدة منقبة ان انفعالك كأن حد بيشتمك انت شخصيا مش بيخالف رأي لك

آخر كلام عندى

ما تقاطع مدونتها يا احساس وتخلصنا

انا زهقت من المناهدة ومبحبش أى حد بيقول الفاظ مش كويسة فى حق الآخر لمجرد انه مختلف معاه فى الرأى او فى الدين او فى اللون او فى الطبقة الإجتماعية او فى العقيدة والإعتقاد

اللى يعمل كدة يبقى متعصب وعنصرى من وجهة نظرى سواء انت او حنان او العفريت الأزرق

يا جماعة لماذا لا نتعلم الإختلاف برقى؟؟؟؟؟؟

مش عايزة ردود ولا منك ولا منها ولو سمحت لما تعلق انت او هى علقوا على البوست اللى انا كاتباه

عملتوا من عيد ميلاد بنتى ساحة معركة

بالذمة هى دى اخلاق الإسلام ولا حتى اخلاق المتحررين ولا أخلاق اى حد فى الدنيا؟؟؟؟؟؟؟؟؟؟


الصبر يا رب

assafo anaroze يقول...

ربنا يخليها لك يا ست اسور
يا رب
مودتي

ronny يقول...

مدونتك جميلة جدا ودخلت قلبى من غير استئذان وكلامك من القلب للقلب رسول فتحية لقلمك الجميل سا اجمل إمراة

dodda يقول...
أزال المؤلف هذا التعليق.
Entrümpelung wien يقول...

شكرا لكم ..))

الربح من الانترنت يقول...

الف شكر على الموضوع الرائع
التسويق الالكتروني
bookmarks

mohamed9000000 يقول...

like mother like doughter so sweet and lovely

mohamed يقول...

ههههههههههههه الستات مش حتيغيرو ابدا انتى حامل وبتعملى مشاوير برده بنتك الامورة ربنا يحفظها ياااارب بس انا متاكد انها حتعمل كذا حاجة لما تكبر بامر الله
1- حتقفل توكيل نوكيا
2-حتكون مؤيدة للداخلية
3-حسوق سمعة العربيات السيينا فى مصر ههههههههههه
ربنا يفرحك بيها