حبيبة ماما .... سما

أجمل البنات .... تمت 5سنوات
******
سما
هتشوفى الكلام دة فى يوم من الأيام تكونى بتعرفى تقرى
انتى حاجة جميلة قوى فى نظرى ... وبحبك قوى قوى
انتى الوحيدة اللى بتخلينى اضحك من قلبى ... وانتى الوحيدة اللى بتقدرى ترسمى ابتسامة على وشى
وانا معاكى بتهون علية كل الاحزان لأنك انتى فرحة قلبى
********
لما عرفت انك جوايا زعلت وقلت لباباكى مش وقته خالص
لأن نور كان عندها 8شهور بس ... باباكى دافع عنك قوى وزعل منى
قلتله طيب انت زعلت ليه ؟هو انت تعرف اللى فى بطنى لسة ..... قال معرفهوش لكن أعرف اللى خلقه
************
رحت للدكتور عماد حسنى قالى لو انا دلوقتى فتحت الخزنة وقلتلك خدى المليون جنيه دى هتعملى ايه؟؟
قلتله هاخدهم ... قل يعنى مش هتقولى مش وقته؟؟ ... العيال يا آسر أغلى من مال الدنيا
وفى ناس تتمنى تدفع كل مالها عشان طقل ............. فسكتت
**************
يوم ما اتولدتى كنت بايتة عند نانا فى العجوزة .... وكان لسة على معادك 20يوم
قمت من النوم الصبح وقلت لمامتى انا حاسة انى هأولد النهاردة
قالت دى تفاسيح ,, تحبى اعملك ايه النهاردة ,,بط ولا كوارع ....اصلى قلتلها ان كان نفسى فيهم
************
مادام هأولد يبقى لازم أخلص مشاويرى قبل ما اتربط جنب البيبى
لبست بسرعة وتزلت رحت البنك وانا فى الطابور قلت للناس انا هأولد يا ريت توسعولى
ضحكوا ومحدش اتحرك ,, محدش صدقنى
**********
طلعت من البنك لقيت الونش بيشيل العربية
اصلى ركنت صف تانى عشان مكنتش قادرة امشى من الالم
جريت على الظابط وقلتله ,, سامحنى اصلى رايحة أولد .... ضحك وقالهم سيبوا العربية
كانت عربيتى سيينا لونها رصاصى فى الوقت دة
***********
رحت على شركة التأمين على السيارات عشان أجدد التأمين
المندوب كان قريبنا ،كلمته قلتله ينزل بالورق لأنى مش قادرة اطلع ... ومرضتش اقول انى هأولد أحسن يكلم العيلة كلها
نزل واول ما شافنى قالى انتى شكلك تعبان قوى روحى المستشفى احسن وانا هأخلصلك كل حاجة
**************
كان الموبايل بتاعى فيه مشكلة فرحت نوكيا عشان اصلحه
وانا فى الطريق اتصل بية باباكى وهو بيكلمنى جالى الألم .... فسكتت من الوجع
وهو حس وقالى انتى تعبانة ولا ايه؟ .... قلتله انا حاسة انى هأولد النهاردة
قالى اقفى مكانك وانا هأجيلك حالا
ولأنى مامى مش بتسمع الكلام مشيت برضه ورحت نوكيا اصلح الموبايل
*****************
فى نوكيا بالدور طبعا ومقدرتش اقول للناس انى هأولد ليضحكوا تانى وميصدقونيش
باباكى اتصل وهو بيصرخ ,, انتى فييييييييييييين؟ فى نوكيا ...... انتى بتستهبلى وقفل السكة
*****************
فى نوكيا فضلوا يتدلعوا والولد اللى كان معايا بيتابع كان بطىء جدا
او يمكن انا اللى حسيت كدة .... فقلتله على فكرة انت لازم تبقى اسرع من كدة والا هأولد هنا
فضحك ... قلتله ... على فكرة انا بأتكلم جد جدا
وقلت انى محتاجة الموبايل جدا جدا حالا
ادانى موبايل من عندهم لحد ما موبايلى يخلص
ويا دوبك بحط الشريحة لقيت باباكى بيتصل وبيصرخ فى التليفون
انا برة قدام نوكيا جنب عربيتك بقالى ساعة ... اطلعى حالا هنروح المستشفى
اديت للموظف الموبايل بتاعهم وقلت بلاش مكالمات لحد ما موبايلى يخلص
واستنيت لحد ما اتصلح الموبايل بعد ييجى ساعة ونص فى نوكيا
**************
طلعت لقيت باباكى عصبى ومتوتر وقال انه كلم الدكتور وطلب منه يجيبنى حالا
بس انا قلتله ... لازم أروح بيتى الأول عشان اجيب لبس البيبى واحضر الشنطة
اتحايل علية انه هو يروح او اى حد بعد ما يودينى المستشفى
وانا مرضتش ابدا ... انتى عارفة مامى بتحب تعمل حاجتها بنفسها
**************
رضخ فى النهاية وانطلق بسرعة من الدقى على المقطم
وكان بيسوق بسرعة جدا وقالى ان الدكتور قاله هاتها بسرعة ومتسمعش كلامها
بس بابى مقدرش يقنعنى وكان خايف علينا انا وانتى يا سما
*****************
حضرت الحاجة ورجعنا المستشفى
وانا داخلة من الباب اتصلت بية سحر مامة ميرو مادى يا سما
قلتلها عرفتى منين ؟؟؟ دة انا لسة مقلتش لحد
طبعا قريبنا بتاع شركة التأمين اتصل بيها اول ما روح وقالها انى شكلى هأولد خلاص
****************
فى المستشفى جت نهى مامة جنة وعمر وكانت معاها طنط نادية
وكنت خلاص بأتألم جدا لما سألتنى نهى ... تفتكرى اعمل لون السيراميك ايه
اصلها كانت لسة هتتجوز ... صرخت فيها جامد .... سيراميك ايه وهو دة وقت سيراميك؟؟
باباكى قالى انه هيروح يجيب غدا ... وطلبوا بيتزا ... ونزل
***************
بعدها بدقايق قالوا لازم تدخلى العمليات حالا
صرخت وكنت عايزة باباكى ... حاولت ما اولدكيش غير وهو هنا
بس انتى كنتى مستعجلة قوى ومرضتيش تستنى بابى
**************
فتحت عنية وقلت هى فين ؟؟
كانوا مشغولين بأختك نور اللى فكروها هتغير منك
قمت من السرير ورحت شفتك ... كنتى صغيرة قوى قوى
شلتك وحضنتك وبوستك
وكل يوم كنت بأسهر معاكى اغنيلك اغنية نوال الزغبى
آه يا انا يا انا م اللى احبه يا نا
الناس تنام الليل وانا سهرانة
*************
ومن يومها وابتسامتك منورة حياتى
بحبك يا سما