دكتور الأسنان .. والألم الذى كان
من مدة طويلة .. سنين .. كان عندى ضرس بيوجعنى من حين لحين .. ضرس فى الفك العلوى على الشمال
المهم انى كل شوية أروح لدكتور شكل .. يروح شايل الحشوة القديمة ويحط واحدة جديدة ويقولى مش هيوجعك تانى ولما اقوله لسة بيوجعنى يقولى متهيألك .. أو انتى بتدلعى .. او دة من آثار الشغل فيه..كدة يعنى
ومن دكتور لدكتور ولافيش فايدة .. كل واحد يبص فى اسنانى ويقولى أنا مش شايف غير صفين لولى .. للعلم ولا سنة مسوسة عندى خالص غير الضرس دة اللى بيسموه السفن فى عالم طب الأسنان يعنى الضرس السابع
المهم أختى كانت بتروح لدكتور فى المهندسين ورحت مرة معاها وقالى برضه هنغير الحشوة
وبعد ما فتح الضرس وحط حشوة مؤقتة ما عرفتش أنام من الوجع ودة كان من حوالى 8 شهور تقريبا
ومن ساعتها فضلت اتعذب، يشيل الحشو يحط غيره مؤقت وبرضه بيوجعنى .. قال نموت عصب .. وموتناه .. وبرضه بيوجعنى .. مرة فتح لقاه بيطلع صديد وحاول يفهم دة من ايه ما فهمش .. فضلت آخد مضاد حيوى ومافيش فايدة .. أول ما ابطل المضاد يرجع الصديد .. الدكتورغلب وانا غلبت معاه
.. قلت أروح لدكتور تانى .. عيادة فخمة مووووووت فى المهندسين برضه وكاميرات وكمبيوتر هيلامان .. بس حسيت انه مصور اكتر منه دكتور اسنان .. التكنولوجيا لازم تخضع للإنسان مش الإنسان هو اللى يخضع للتكنولوجيا
وطبعا ما كملتش معاه لنى ما حسيتش براحة فى عيادته الفخمة قوى قوى واللى حسستنى انى فى سرايا مش فى عيادة اسنان
واحدة صاحبتى قوى قوى وهى صاحبة مدونة سهر الليالى الجميلة أمانى قالتلى تعالى اوديكى لأصحابى الأطباء الشبان اللى فاتحين مركز اسنان فى مكرم عبيد .. قلت ماشى .. نروح نجرب .. كل دة والضرس مفتوح على البحرى .. وفى الحقيقة هم ساعتها بقوا ضرسين مفتوحين السيكس او السادس والسفن أى السابع اللى بدأت منه المشكلة اصلا
رحت للمركز وقابلت الدكتور الجميل أحمد الروبى ومدير مركز النيل للأسنان وأخبرنى ان هناك خراج بالفك العلوى فوق الضرس وان دة سبب الوجع .. وقالى بصراحة ان العلاج هيطول شوية عشان نتفادى الجراحة لأن الجراحة هتبقى آخر حل وبدأ معى العلاج..
وقدم لى دكتور أحمد الروبى شريكه فى المركز دكتور محمد رمضان الفار .. ورغم ان تخصصه جراحة فم فى الاصل الا انه استكمل معى رحلة علاج طويلة استمرت لمدة 3 شهور تقريبا لتفادى الجراحة .. ولم ييأس وهو يقوم بفتح الضرسين مرتين فى الاسبوع وغسيل الصديد المتدفق الذى لم يجف ابدا حتى اتخذ قرارا نهائيا بإجراء الجراحة التى بدا فيما بعد أنه لا مفر منها
ساعدنى على تحمل تلك الفترة الطويلة من الألم الصداقة القوية التى ربطت بيننا والتى يجب ان تتوفر بين الطبيب والمريض خاصة فى حالات العلاج الطويل الشبيهة بحالتى
حدد لى الطبيب الشاب الإنسان المتألق دائما دكتور محمد رمضان الفار موعدا للجراحة ولأنه صديق طلبت منه أن يؤجلها حتى تسافر أختى فوافق بشرط الإلتزام بالغسيل مرتين اسبوعيا .. ثم طلبت التأجيل مرة اخرى حتى يمر موعد اللقاء الشهرى للمدونين ولم يتأخر الرجل .. ثم حدد موعدا آخر يناسب مواعيد تواجده فى العيادة مساء كل يوم وكان السبت الماضى وفى الصباح هاتفنى لتأكيد الموعد ، وعندما علم أنه لا يوجد من يصحبنى بعد الجراحة للبيت قرر ان يغير الموعد لصباح الأحد وهو يدرس فى احدى الجامعات المصرية ، وقد قام بأخذ أجازة خصيصا عندما تأكد أن الصديقة الجميلة سهر الليالى سوف تصطحبنى بسيارتها فى هذا الموعد الصباحى وأنه يناسبها
استغرق حوالى 4 ساعات وهو يقوم باغلاق الضرسين ثم فتح اللثة وتفتيت الجذر ثم استئصال 3 جيوب صديدية وليس جيبا واحدا كما اعتقدت ثم خياطة الجرح بما يزيد عن 7 غرز شعرت بأغلبها لأن تاثير البنج كان قد قل كثيرا
ولم يساعدنى على الصبر والتحمل سوى وجهه البشوش طوال الجراحة
تحية لدكتور محمد رمضان الفار فهو انسان يندر وجود مثله فى زمن اصبح الطب فيه تجارة
اذكروا معى هذا الإسم فلسوف يصبح من اكبر واشهر الأطباء فى مجاله .. وهتقولوا ياسمين قالت