الخميس، 25 يناير 2007

رفيقة العمر

سعيدة هذه الأيام .. مبتهجة .. زى عوايدى زمان .. كنت أستيقظ صباحا والحياة ترقص أمام عينى على دقات قلبى الفرح .. وبعد غياب طويل .. يعود قلبى الذى اعتزل الفرحة لسيرته .. أما السبب .. فإلتئام الشمل مع توأم روحى .. أختى الحبيبة ..القريبة .. البعيدة
حضرت فى إجازة من غربتها .. لتمضى معى بعض الوقت فى القاهرة الساحرة التى لم تغيب عن خاطرها ابدا
أنا لية أخوات كتير لكن هى دى بالذات توأم روحى
الفرق بيننا بسيط جدا فى السن .. لا اذكر لى طفولة بدونها .. ولا صبا بدونها .. ولا مراهقة بدونها .. حتى الشباب .. حتى أيام الجامعة .. والرحلات .. والأقصر وأسوان .. النمسا .. ألمانيا .. الإمارات .. العجمى .. المعمورة .. الساحل الشمالى
.. لم نكن نفترق ابدا .. كنا دائما معا .. فى العذاب كنا معا .. فى الصفاء كنا معا
الدنيا ياما كشرت عن أنيابها لينا .. برضه سوا .. وياما ضحكت برضه لينا سوا
مرة واحنا صغيرين قابلنا على باب العمارة واحد جارنا صغير برضه .. كان عمرنا لا يتعدى 9 سنوات
وأول ما شافنا راح بسرعة علسها وباسها فى خدها .. رحت أنا برضه جارية عليه بسرعة وضارباه بالقلم وقايلة له يا قليل الأدب
هى لما تفتكر الحكاية دى تقعد تضحك وتقولى .. طب انتى ضربتيه ليه انه باسنى .. انتى غيرانة انه باسنى أنا وما باسكيش انتى
ولما كنا صغيرين كانت ماما تنزل وتروح الشغل وتسيبنا مع بعض ..كنا نروح ونركب على سور البلكونة أنا وهى ونقول .. درجن درجن درجن .. وكأننا كاوبوى وراكبين حصان .. طبعا ربنا ستر اننا ما وقعناش لأننا كنا فى الدور الرابع .. بس اتعلمنا اننا عمرنا ما اسيب ولادنا لوحدهم .. الأطفال بتعمل حاجات غبية مووووووووووت
فى يوم ماما بعتتها تجيب عيش .. بعد شوية جت شغالة الجيران تقول انها لقيتها عند الراجل مش راضية تاخد الباقى منه وبتقوله بإصرار .. لأ شكرا .. مما قالتلى ما آخدش فلوس من حد
كنت أنا دايما متعهد المشتروات فى البيت .. لكن ساعات كنت بأرفض واقول ما تنزل هى .. طبعا اقصد أختى .. وفى يوم ماما قالتلها انزلى هاتى طلبات من البقال .. طبعا رفضت كعادتها .. هى مش بتحب تعمل حاجة من صغرها .. ماما قالتلها بعد ما كتبت الطلبات فى ورقة .. انتى روحى بس ادى الورقة دى للبقال .. غابت شوية ورجعت من غير حاجة .. قلنالها فين الطلبات
قالت .. طلبات ايه يا ماما مش انتى قلتيلى روحى بس ادى الورقة دى للبقال .. أنا رحت حطيت الورقة قدامه ومشيت
كنا ننتقل من مكان لمكان سوا ... ومن حياة إلى أخرى .. برضه سوا .. نتخانق كتير .. ونتصالح أكتر
نزعل من بعض .. لكن بنحب بعض .. نخاصم بعض .. بس عارفين اننا لازم هنتصالح ..بخاف عليها من الهوا .. بحبها زى بنتى وزى مامتى وهى أعز الصحاب .. وعارفة ان كل كلمة قلتها عنها هى جواها برضه .. الثقة فى حبنا لبعض غير محدودة
بنزعل لزعل بعض وبنفرح لفرح بعض .. اللى يمسها يمسنى .. واللى يكرهنى تكرهه .. واللى يضايقها يبقى ضايقنى .. واللى يبهجنى يبهجها .. كنا بنحب سوا ونصيع سوا .. نفرح سوا ونحزن سوا .. سرى معاها وسرها معايا
ولادى ولادها و ولادها ولادى .. نستأمن بعض على كل شىء بمنتهى الثقة .. أكثر من ثقتنا فى ماما وبابا نفسهم .. هى .. كل عيلتى
هى نعمة ربنا ادهالى .. ودلوقتى هى جاية تزور القاهرة
مش ملاحظين النور

هناك 76 تعليقًا:

محمد عبد الغفار يقول...

النور طالع من كلماتك ببساطتها المفرطه والصدق المتخمة بيه ، مشاعر جميله جميله ده انا حبيتكم على حبكم ده لو كل الأخوات يحبو بعض كده ميبقاش فى مشاكل فى الدنيا

ربنا تقضوا إجازه سعديه ويهنيكم ببعض ويبعد عنكم الشيطان ويهون البعد المكانى اللى بنكم ويتلم شملكم على طول

أسوور يقول...

محمد عبد الغفار

سباق كالمعتاد فى التعليق على بوستاتى المتواضعة
ودة يدل على انك متابع مدونتى

أشكرك على متابعتك مدونتى بصورة دائمة
وربنا يخليك .. كلماتك اسعدتنى حقا

ولازم تعرف انك من أعز أصدقاء المدونات بالنسبة لى

Shreif fahmy يقول...

بلغي أختك على لساني وقوليلها الولد المزعج شريف بيقولك


...........نورتي مصر...............

على فكرة بعت إيميل ياترى وصل؟

غير معرف يقول...

سبحان الله
مافيش حاجه فى الدنيا حلوة الا لها آثار جانبيه وحشه
ومافيش حاجه وحشه الا ولها آثار جانبيه حلوة

الكريم حاجه جميله قوى
تلاقى الاولاد والاهل عايشين فى نغنغه وعيون مليانه
بس لما يموت بلاقوا نفسهم فقرا

البخيل اولاده فى ضنك وحرمان بس لما يموت يلاقوا نفسهم اغنيا

الحروب دمار وموت بس بتسبب نهضه واختراعات وشجاعه وقوة

والسلام هدوء وراحه بس بيعود على الخنوع والكسل والتمسك بالدنيا وبيضيع الشجاعه والرجولة

جميل جدا وجود اختك
جميل جدا مشاعركم
جميل جدا سعادتك

بس
اختفيتى

micheal يقول...

و الللة البوست منور لوحدة بكلامة الرقيق و بلغي اختك بالنيابة عني أن مصر نورت

smraa alnil يقول...

مش عارفة ليه حسيت بغيرة
بس بجد ربنا يخليكم لبعض
ذكرياتك تحفة
وطاهرة اوي زي قلبك
انتي رائعة في كل حاجة يا ياسمين بجد
وتتحبي اوووووووي
بس اوعي زيارة اختك تلهيكي عني
او تلهيكي عن لقائنا ولا نسيتي

ربنا يحبب فيكي خلقه يارب
ويسعدك ويخليلك اختك
وتقضوا مع بعض وقت ظريف
بحبك

غير معرف يقول...

طيب وإحنا مالنا

يعني المفروض نعمل إيه

وإيه الغريب في كده

طيب وده بيحصلك كثير

يالله حصل خير

أسوور يقول...

شريف فهمى

هى فعلا نورت مصر
اشكرك جدا وبلغتها خلاص وبتقولك مصر منورة بأهلها

انا رديت على الإيميل

أسوور يقول...

هارملس
معلش على اختفائى
بس بقالى كتير ما فرحتش وحاسة بالفرحة دلوقتى عشان هى معايا

وبعدين أنا هأروح فين .. موجودة على طول لكن هى اللى موجودة دلوقتى ولازم ابقى معاها

والله انت واحشنى جدا

أسوور يقول...

مايكل

بلغتها .. وقالت مصر منورة دايما بأهلها الحلوين اللى زيك

شكرا يا جميل

أسوور يقول...

سمراء النيل

أوعى تغيرى يا حبيبة قلبى .. دا انتى فى القلب من جوة
ولا يمكن أنساكى ولا أنسى لقاء القمة بتاعنا

ويمكن أجيبها معايا كمان رغم ان مالهاش مدونة الا انى عارفة انكم هترحبوا بيها
انا بحبك اكتر يا سكر

أسوور يقول...

Anonymous
طب وهو حد قالك تقرا البوست
وتعلق كمان
هو دة بيحصلك كتير
ويا ترى دة من ايه

سهر الليالى يقول...

نورتى مصر كلها يا حبيبة قلبى
ويا بختك بأختك حبيبتك وحبيبتى فى نفس الوقت

وربنا يخلينا لبعض يا رب مهما الأيام فرقتنا هنفضل على طول مع بعض انشاء الله

dead man يقول...

حمدلله علي سلامتها.. وان شاء الله تفضلو زي مانتو علطول كده

raspoutine يقول...

ياسمين
ازيك عامل ايه
انا كمان اختى لسه جايه من الخارج من كام ابوع ومعاها بنتها وجوزها
وقد ايه انا فرحت بأنى شوفتها
فعلا الاخوات اخوت مهما يبعدو عن بعض حتى لو فى بينهم مشاكل بس
برضه بتيجى عليهم لحظات كتير بيحنو وبيشتاقو ولبلقوا هيتجننو على بعض



ربنا يخليكم لبعض
ويباركم فى كل الاخوات يا رب


يا سمين ابقى زورينى
محداك لدعمك


ايمن

الحصان الأسود يقول...

مصر نورت بيها
وبيكي

حمد لله على سلامتها وانشالله دايما

تحياتي

أسوور يقول...

أمانى حبيبتى

ربنا ما يفرقنا أبدا وانتى اعز صديقاتنا أنا وهى

ومبروك البلوج يا قمر

أسوور يقول...

dead man
شكرا يا جميل
يا رب فعلا نفضل زى ما احنا على طول

أسوور يقول...

راسبوتين
ايمن فاروق

فعلا الإخوات أعز الناس مهما حصل بينهم
وربنا يخليلك أختك يا رب

على فكرة انا على طول بأزورك

أسوور يقول...

الحصان الأسود

كتر خيرك
مصر منورة دايما بأهلها الحلوين

Unknown يقول...

انتى بتفكرينى بعلاقتى باختى الاى اصغر منى سنه لأن انا الحقيقه معنديش اخوات ولاد تانيين بس كنت بالقى ولغاية دلوقتى فى اختى دى نفسى و روحى و توأمى و دايماً كنا مترابطين و متوافقين مع ان ده مش كتير بيحصل بين الاولاد و البنات
و لغاية دلوقتى رغم جوازها وبعدها عننابس بتفضل هيه اكتر واحده فاهمانى فى العيله كلها
ربنا يخليكوا و يخاينا لبعض
وعلى فكره اختك شكلها دمها خفيف اوى
وكمان شكلك لما ضربتى الواد كنتى غيرانه منها
تحياتى
واحد لسه اخ فى زمن الاخوه فيه مجرد اداء واجب و صله رحم و بس

Amr Ahmed يقول...

ربنا يخليكم لبعض

وحمدا لله علي السلامة

تحياتي

عماد رفعت يقول...

الله
ايه الجمال ده
بس هي كانت فين مش المفروض بعد كل شيء كنتوا فيه مع بعض انكم برده ماتسيبوش بعض ولا ايه؟

غير معرف يقول...

يعني واحدة كل اللي عملته إنهالا فتحت مدونة للكلام عن الجنس وبصراحة الهيجان

وبعدين تتكلم عن لقاء شهري...!

وبعدين أختها تيجي من السفر

وكل التهاني والتبريكات على وصول الأخت المبروكة

وفي الآخر زعلانة إن في واحد بيشتمها

بصراحة إن لم تستح فأفعل ما شئت

غير معرف يقول...

في البدايه ياسمين انا سعيد جدا بالغوص في مدونتك خدت مني تلات ساعات اهه
:)))
نادر قوي لما اقعد اشوف تاريخ مدونه كامله من الاول و اتابع كل الردود بس طريقتك كلامك تستحق فعلا
رغم الاعتراض الكثير و الكثير علي الكثير برضه في مدونتك ولكن السعاده بالسباحه في مشاعر كتبتها بصراحه ووضح اعتقد انها تجربه فريده
اتمني ان نجد لكي بوستات قريبه بها تجاربك عن الناحيه الايجابيه من الحب و الحياة او حتي تاريخ حياتك كما تحكيها مشاعرك
و اللقاء الشهري للمدونين جميل فكرني بمصر و القعد في تريانون و الحاجات الجميله الي مفتقدها جدا بره مصر
اعتقد اول مره مدونه شخصيه بتكتب عن مشاعرها نقدر نشوفها في الحياة الطبيعيه كان نفسي اكون معاكوا واكيد لو في مصر كنت هحاول اكون موجود خصوصا تريانون و المهندسي دي منطقتي
شكرا ليكي تاني ياسمين انك سمحتلنا نعرفك واتمني اشوفك دايما بصوره افضل بس سؤال صغير ياسمين ليه بتدخني

بالنسبه للمعترضين علي ياسمين من حقكوا تعترضوا بس بطريقه عقليه من حق اي حد يطلع الي جواه و من حقه علينا نقوله الصح الي شايفينه فين

اتمني اشوف ليكي بوستات جديده قريبه ياسمين

أسوور يقول...

why me

جميلة جدا لما بتبقى علاقة الأخوة صداقة

ربنا يخليلك أختك يا رب وتفضلوا تحبوا بعض كدة على طول

وهى فعلا دمها خفيف وزى السكر موووت

ممكن أكون غيرانة بس عليها مش منها لأنى عمرى ما غرت منها وبأحس دايما انها الأجمل والأذكى والأكثر حضورا ومحبوبة من الجميع وتستاهل كل خير

أسوور يقول...

عمرو أحمد

دى أول زيارة منك لمدونتى

شكرا جدا وارجوك ما تحرمنيش من زيارتك

أسوور يقول...

وله نهاية

كان مفروض فعلا ما نسيبش بعض ابدا
بس حكم القوى بقى
جوزها أخدها معاه وسافر
ودلوقتى جاية تزور مصر عشان وحشتها
اصلها بتحب مصر قوى
بتقولى انا وحشتنى الشوارع الزحمة وريحة عرق الغلابة

أسوور يقول...

Anonymous

ما جادلت عالما الا وغلبته
معلش ما ناقشت جاهلا الا وغلبنى

أسوور يقول...

عبد الله

أشكرك جدا على دعمك وتشجيعك الكبير دة

والحمد لله ان تعليقك جاء بعد تعليق من أحد التعليقات العجيبة اياها لأن دة رفع من روحى المعنوية جدا

وياريت كنت فى مصر وتبقى معانا

أنت سألتنى سؤال حساس جدا .. هو .. انتى ليه بتدخنى

الإجابة .. مش عارفة اقولك ايه
بس كفاية انك تعرف انى بأكره التدخين وبأعتبره ضعف وقلة حيلة وطريقة للموت البطىء .. ونوع من عدم تقدير الذات

أشكرك على قراءة مدونتى
وأشكرك على قوة ملاحظتك عن موضوع التدخين

وأوعدك زى ما بأوعد نفسى انى أبطل أول ما اقدر .. أنا بطلت قبل كدة لمدة 4 سنين وللأسف رجعت بس من 8 شهور

والله يسامح اللى كان السبب

frozen love يقول...

7md allah 3la eslama..mbsoten 3la enbsatk klna

el2ahwagi يقول...

Blog gameel ..

sa3eed enni zorto ...!

rabena yekhaleeki lokhtik weykhaleehlik ..

7obokom betonbod beeh kalematik .. !

عبدالله يقول...

وكمان بتردي بسرعه
:)
اتمني فعلا ان اسمع قريب انك بطلتي التدخين دايما بشوف التدخين مناقض للعقل السليم و النفسيه السليمه
اوعي تخلي تاثير اي انسان عليكي انك تدمري نفسك انه بكده يبقي حقق هدفه و ب ايديكي كمان
تحياتي

بيجاسوس المصرى يقول...

ايه ده ايه النور ده كله النور الواحد بقى اتنين نور رفيقتك ونور المدونة

كلام جميل ما يشعر به الا من احسه
مدونتك جميله جدا

تحياتى
بيجاسوس المصرى

أسوور يقول...

frozen love

الله يسلمك من كل شر وسوء

مدونتك جميلة

وماتحرمنيش من زيارتك

أسوور يقول...

القهوجى

أشكرك على زيارتك وتعليقك

انت اللى كلامك بينبض بالمشاعر

زرت مدونتك الجميلة وسعدت جدا انى زرتها

اشكرك مرة أخرى مش بس على الزيارة

لأ على الكلام الجميل اللى انت كاتبه فى مدونتك

أسوور يقول...

عبد الله

شكرا على اهتمامك بالآخرين حتى من غير ما تعرفهم

انت انسان حساس وألف مبروك المدونة يا بطل

ومادمت بدات الكتابة أكيد مش هتتوقف

وأنا مش هابطل أتابع مدونتك وهاستنى بفارغ الصبر البوست القادم

أسوور يقول...

بيجاسوس المصرى

اشكرك على تعليقك الرقيق

وعلى فكرة أنا دايما قبل ما أعلق بأدخل على مدونة من ترك التعليق

وقرأت تدوينتك الأخيرة
وبقول لكل الزوار
روحوا عليها واقروها

اقرأ تعليقى

سيف من خشب يقول...

الحمد الله انا بالف خير ولكن التفت الى عملى قليلا دعائك

أسوور يقول...

سيف من خشب

أخيرا عزيزى سيف
وحشتنى

وأوعى تختفى تانى

Nohaz يقول...

عارفة يا ياسمين

انا كمان بحب اختي الي اكبر مني ب 12 سنة قوي
بحبها اكتر واحدة في اخواتي

ساذجة مع انها مهندسة و 39 سنة
بس مسخرة طفلة بريئة

مصر هى أمى يقول...

ياسمين دى اول زيارة ليا بس بجد ربنا يخليكوا لبعض ويبعد عنكم قر الناس على العلاقة الحلوة اللى بينكم ياريت تشوفى المدونة بتاعتى محتاج لخبرتك وممكن اتنازل ونبقى صحاب

الدمعه يقول...

ايه المشاعر الصادقه والجميله دي بجد جميل ربنا يخليكم لبعض دايماً

Shreif fahmy يقول...

أفهم من ردك على الايميل ان العرض غير مقبول

شمعى أسعد يقول...

حمدلله على السلامة

عقبال شريف صديقى مايرجع
واكتب عنه بوستين تلاتة كده

هاتيها وتعالوا اسكندرية بقى

Unknown يقول...

مانا عارف طبعاً انك غيرانه عليها مش منها
ده انا كنت بهزر


و شكراً جداً لاضافتى عندك فى مدونتك

الرائعه
و مستنى دايماً ارائك لانها فعلاً تهمنى
شكراً مره تانيه
تحياتى
واحد مبسوط جداً لانك ضفتيه عندك

كلبوزة لكن سمباتيك يقول...

ربنا يديم عليكي السعادة يا جميلة

تصدقي انا عملت موقف شبه ده و انا صغيرة ههههه
قالت .. طلبات ايه يا ماما مش انتى قلتيلى روحى بس ادى الورقة دى للبقال .. أنا رحت حطيت الورقة قدامه ومشيت


مش عارفة ليه ماماهتنا مكنوش بيوضحوا الطلب
:)

هراءات منطقية يقول...

حمدالله على السلامة

zordeak يقول...

ربنا يخليكو لبعض


وربنا يفرحك دايما كده


بجد شكرا ليكى انك رسمتى بسمة على وشى واحشانى من زمان

غرقتينى معاكى فى طوفان مشاعرك الرقيقة


وضحكت لما رحتى وضربتى ابن الجيران

ولما اختك نزلت للبقال رمتله الورقة وطلعت ايديها فاضية


يااه

بجد شكرا على مشاعرك الجميلة دى اللى مبخلتيش بيها علينا


وقولى لاختك ألف حمد الله عالسلامة

غير معرف يقول...

مش عارف افرح و لا ازعل
بجد فرحت جدا و انا بقرأ البوست بتاعك وزعلت اكتر ان انا واخويا علي طول في خناق مستمر و خصام بالشهور مش عارف لما نكبر و نبقي عندنا اولاد هنفتكر ايه حلو و احنا علي طول بنتخانق
كتابتك يلقائيه جدا و انا حبتها وانا من متابعي مدونتك من فترة مش طويله اوي بس ساعات بكسل ارد و الله
ان شاء الله تبقي تشرفيني يا يسمين في المدونه بتاعتي اللي هفتتحها في خلال ساعات و انت طبعا موجوده في اللينكات هناك و ابقي دوري علي اسمك وسط الناس

اسامه

raspoutine يقول...

شكرا ليكى لوى يا يا يا سمين وربنا يديم الخير والمعروف ما بين الاصدقاء

ونهارك فل يا جميل

الدبور يقول...

الحمد لله تم الافتتاح ابقي شرفيني و اقري اول بوست ليا وقولي ايه رايك
في البوست و التصميم بشكل عام

www.dabbor.blogspot.com

osama

أسوور يقول...

نهاز

ربنا يخليكم لبعض

وأشكرك على الزيارة

أسوور يقول...

مصر هى أمى

أنا زرت مدونتك وهى جميلة فعلا

وشكرا انك دلتنى عليها

عاوزة بقى ألاقى كل يوم بوست جديد

ماشى

أسوور يقول...

الدمعة

وربنا يخلى زوار المدونة لية

يا رب

أسوور يقول...

الدمعة

انتى اللى جميلة

أنا زرت مدونتك و تركت كومنت

يا ريت تلغى المودريتور عشان التعليقات تظهر على طول

أسوور يقول...

شريف فهمى

أنا رديت عليك

روح اقرأ الإيميل

واشكرك بجد على الإيميل دة

أسوور يقول...

شمعى اسعد

عقبال ما ربنا يجمعك مع صاحبك

وتفرحوا سوا وتقضوا أيام حلوة زى اللى بقضيها دلوقتى معاها

أسوور يقول...

why me

انا ضفتك عشان مدونتك حلوة بجد

وشكرا لأنك شايف ان دى حاجة تبسطك

بجد شكرا

أنا اللى مبسوطة بمدونتك

أسوور يقول...

سمباتيك

ضحكت من قلبى وأنا أقرا تعيقك

ورحت قلت لأختى .. توأمك موجودة هنا أهيه

وهى موافقاكى على موضوع انهم ما كانوش بيوضحوا فعلا طلباتهم بدقة

أسوور يقول...

اياكش تولع

الله يسلمك

زرت مدونتك وتركت تعليق يا ريت تقراه

وبلاش سياسة جلد الذات دى

أسوور يقول...

zordeak

شكرا ليك

الله يسلمك يار رب

مبسوطة بويارتك ومبسوطة انى رسمت ابتسامة على وشك ..

يا رب البسمة ما تفارقكش ابدا

أسوور يقول...

الدبور

ألف مبروك المدونة الجميلة

sara... يقول...

انا بجد اتبسطت لما شفت البوست ده
حلو اوى احساسك
مواقف حلوة وشقيه
حمد الله على السلامه

Hannoda يقول...

حمدالله على سلامتها ويارب تفضل الروح ده بينكم مهما زادت المسافة اللي بتعملها الغربةبين الناس
وماتغيبيش علينا

مصر هى أمى يقول...

ياسمين شكرا جدا على زيارتك لمدونتى وربنا يسهل البوست بتاعى هيكون الجمعة عايزك تقريه وتقوليلى رايك ماشى

أسوور يقول...

سارة

شكرا يا قمر على رايك فى البوست

وشكرا أكتر على زيارتك لى

زرت مدونتك الفنية الجميلة وتركت تعليق

أسوور يقول...

هنودة

آه والله الغربة دى فظيعة وبتبعد الحبايب
قريت البوست الأخير فى مدونتك وفهمت احساسك بالغربة

الله يسلمك يا سكر ويرجعك بالسلامة

أسوور يقول...

مصر هى أمى

ماشى يا جميل مستنية يوم الجمعة

بسمه عبدالباسط يقول...

بجد بوست جميل جدا وذكريات اجمل عجبنى قوى البساطة فى التعبير والحكايات الجميلة ربنا يخليكا لبعض

islamz يقول...

بصراحة يا ياسمين .. انا اول مرة ازور مدونتك .. انا عجبنى اسلوبك فى مواضيعك انا مش بقول كده تلميع وش زى ما بيقولو لكن فعلا انا معجب بجرأتك .. الجرأة تنقص كتير مننا الجرأة ومواجهة انواع الناس من اصحاب التفكير الغبي او التفكير الغلط والاصرار على الجرأة منتهى الروعة ...
نيجى بأه لموضوع اختك .. حلوة اوى حب الاخوات لبعض وذكريات الطفولة دى احلى حاجة طبعا ... وخصوصا الذكريات اللذيذة دى .... ربنا يخليلك اختك وسلميلي عليها كتييير ... وخللوا بالكوا من بعض ...

تحيااااتى ... :]

أحمد سلامــة يقول...

يااااه
قد ايه طفوله بريئة وجميلة يا ياسميين
وقد ايه علاقتكم ببعض ترقق قلب اي انسان
بس اشمعنى حكتيلنا على مواقف من الطفولة المجنونه دي ومحكتيش على حاجات من اللي بعد كده
إيه هي حاجات متتحكيش ولا إيه؟؟
ربنا يخليكوم لبعض يا ياسمين ويا رب تتبسطو في الاجازة دي كتييييييييير

أسوور يقول...

بسبس

شكرا ليكى على التعليق

دخلت مدونتك وعجبتنى جدا جدا

ما تقطعيش الزيارة

أسوور يقول...

أشكرك جدا على رايك فى شخصى وفى مدونتى

وأرجوك ما تحرمنيش من الزيارة

مدونتك جميلة على فكرة

أسوور يقول...

احمد سلامة

لا والله احنا ذكرياتنا كتير

وياما عشنا ايام حلوة

بس ذكريات الطفولة صعب تتكرر

ولو حكيت كل حاجة لحد دلوقتى مش هتكفينى 10 بوستات

أميرة يقول...

دة جمهورية مصر العربية كلها منورة بسماها وارضها

من مشاعرك وكلامك الجميل

انا دايما بتأخر فى الدر كدة عليكى وباجى بعد الخمسين نفسى مرة اجى فى الرد العشرين

ربنا يخليهالك ياياسمين سلميلى عليها وحمدالله على السلامة