رفيقة العمر
سعيدة هذه الأيام .. مبتهجة .. زى عوايدى زمان .. كنت أستيقظ صباحا والحياة ترقص أمام عينى على دقات قلبى الفرح .. وبعد غياب طويل .. يعود قلبى الذى اعتزل الفرحة لسيرته .. أما السبب .. فإلتئام الشمل مع توأم روحى .. أختى الحبيبة ..القريبة .. البعيدة
حضرت فى إجازة من غربتها .. لتمضى معى بعض الوقت فى القاهرة الساحرة التى لم تغيب عن خاطرها ابدا
أنا لية أخوات كتير لكن هى دى بالذات توأم روحى
الفرق بيننا بسيط جدا فى السن .. لا اذكر لى طفولة بدونها .. ولا صبا بدونها .. ولا مراهقة بدونها .. حتى الشباب .. حتى أيام الجامعة .. والرحلات .. والأقصر وأسوان .. النمسا .. ألمانيا .. الإمارات .. العجمى .. المعمورة .. الساحل الشمالى
.. لم نكن نفترق ابدا .. كنا دائما معا .. فى العذاب كنا معا .. فى الصفاء كنا معا
الدنيا ياما كشرت عن أنيابها لينا .. برضه سوا .. وياما ضحكت برضه لينا سوا
مرة واحنا صغيرين قابلنا على باب العمارة واحد جارنا صغير برضه .. كان عمرنا لا يتعدى 9 سنوات
وأول ما شافنا راح بسرعة علسها وباسها فى خدها .. رحت أنا برضه جارية عليه بسرعة وضارباه بالقلم وقايلة له يا قليل الأدب
هى لما تفتكر الحكاية دى تقعد تضحك وتقولى .. طب انتى ضربتيه ليه انه باسنى .. انتى غيرانة انه باسنى أنا وما باسكيش انتى
ولما كنا صغيرين كانت ماما تنزل وتروح الشغل وتسيبنا مع بعض ..كنا نروح ونركب على سور البلكونة أنا وهى ونقول .. درجن درجن درجن .. وكأننا كاوبوى وراكبين حصان .. طبعا ربنا ستر اننا ما وقعناش لأننا كنا فى الدور الرابع .. بس اتعلمنا اننا عمرنا ما اسيب ولادنا لوحدهم .. الأطفال بتعمل حاجات غبية مووووووووووت
فى يوم ماما بعتتها تجيب عيش .. بعد شوية جت شغالة الجيران تقول انها لقيتها عند الراجل مش راضية تاخد الباقى منه وبتقوله بإصرار .. لأ شكرا .. مما قالتلى ما آخدش فلوس من حد
كنت أنا دايما متعهد المشتروات فى البيت .. لكن ساعات كنت بأرفض واقول ما تنزل هى .. طبعا اقصد أختى .. وفى يوم ماما قالتلها انزلى هاتى طلبات من البقال .. طبعا رفضت كعادتها .. هى مش بتحب تعمل حاجة من صغرها .. ماما قالتلها بعد ما كتبت الطلبات فى ورقة .. انتى روحى بس ادى الورقة دى للبقال .. غابت شوية ورجعت من غير حاجة .. قلنالها فين الطلبات
قالت .. طلبات ايه يا ماما مش انتى قلتيلى روحى بس ادى الورقة دى للبقال .. أنا رحت حطيت الورقة قدامه ومشيت
كنا ننتقل من مكان لمكان سوا ... ومن حياة إلى أخرى .. برضه سوا .. نتخانق كتير .. ونتصالح أكتر
نزعل من بعض .. لكن بنحب بعض .. نخاصم بعض .. بس عارفين اننا لازم هنتصالح ..بخاف عليها من الهوا .. بحبها زى بنتى وزى مامتى وهى أعز الصحاب .. وعارفة ان كل كلمة قلتها عنها هى جواها برضه .. الثقة فى حبنا لبعض غير محدودة
بنزعل لزعل بعض وبنفرح لفرح بعض .. اللى يمسها يمسنى .. واللى يكرهنى تكرهه .. واللى يضايقها يبقى ضايقنى .. واللى يبهجنى يبهجها .. كنا بنحب سوا ونصيع سوا .. نفرح سوا ونحزن سوا .. سرى معاها وسرها معايا
ولادى ولادها و ولادها ولادى .. نستأمن بعض على كل شىء بمنتهى الثقة .. أكثر من ثقتنا فى ماما وبابا نفسهم .. هى .. كل عيلتى
هى نعمة ربنا ادهالى .. ودلوقتى هى جاية تزور القاهرة
مش ملاحظين النور
هناك 76 تعليقًا:
النور طالع من كلماتك ببساطتها المفرطه والصدق المتخمة بيه ، مشاعر جميله جميله ده انا حبيتكم على حبكم ده لو كل الأخوات يحبو بعض كده ميبقاش فى مشاكل فى الدنيا
ربنا تقضوا إجازه سعديه ويهنيكم ببعض ويبعد عنكم الشيطان ويهون البعد المكانى اللى بنكم ويتلم شملكم على طول
محمد عبد الغفار
سباق كالمعتاد فى التعليق على بوستاتى المتواضعة
ودة يدل على انك متابع مدونتى
أشكرك على متابعتك مدونتى بصورة دائمة
وربنا يخليك .. كلماتك اسعدتنى حقا
ولازم تعرف انك من أعز أصدقاء المدونات بالنسبة لى
بلغي أختك على لساني وقوليلها الولد المزعج شريف بيقولك
...........نورتي مصر...............
على فكرة بعت إيميل ياترى وصل؟
سبحان الله
مافيش حاجه فى الدنيا حلوة الا لها آثار جانبيه وحشه
ومافيش حاجه وحشه الا ولها آثار جانبيه حلوة
الكريم حاجه جميله قوى
تلاقى الاولاد والاهل عايشين فى نغنغه وعيون مليانه
بس لما يموت بلاقوا نفسهم فقرا
البخيل اولاده فى ضنك وحرمان بس لما يموت يلاقوا نفسهم اغنيا
الحروب دمار وموت بس بتسبب نهضه واختراعات وشجاعه وقوة
والسلام هدوء وراحه بس بيعود على الخنوع والكسل والتمسك بالدنيا وبيضيع الشجاعه والرجولة
جميل جدا وجود اختك
جميل جدا مشاعركم
جميل جدا سعادتك
بس
اختفيتى
و الللة البوست منور لوحدة بكلامة الرقيق و بلغي اختك بالنيابة عني أن مصر نورت
مش عارفة ليه حسيت بغيرة
بس بجد ربنا يخليكم لبعض
ذكرياتك تحفة
وطاهرة اوي زي قلبك
انتي رائعة في كل حاجة يا ياسمين بجد
وتتحبي اوووووووي
بس اوعي زيارة اختك تلهيكي عني
او تلهيكي عن لقائنا ولا نسيتي
ربنا يحبب فيكي خلقه يارب
ويسعدك ويخليلك اختك
وتقضوا مع بعض وقت ظريف
بحبك
طيب وإحنا مالنا
يعني المفروض نعمل إيه
وإيه الغريب في كده
طيب وده بيحصلك كثير
يالله حصل خير
شريف فهمى
هى فعلا نورت مصر
اشكرك جدا وبلغتها خلاص وبتقولك مصر منورة بأهلها
انا رديت على الإيميل
هارملس
معلش على اختفائى
بس بقالى كتير ما فرحتش وحاسة بالفرحة دلوقتى عشان هى معايا
وبعدين أنا هأروح فين .. موجودة على طول لكن هى اللى موجودة دلوقتى ولازم ابقى معاها
والله انت واحشنى جدا
مايكل
بلغتها .. وقالت مصر منورة دايما بأهلها الحلوين اللى زيك
شكرا يا جميل
سمراء النيل
أوعى تغيرى يا حبيبة قلبى .. دا انتى فى القلب من جوة
ولا يمكن أنساكى ولا أنسى لقاء القمة بتاعنا
ويمكن أجيبها معايا كمان رغم ان مالهاش مدونة الا انى عارفة انكم هترحبوا بيها
انا بحبك اكتر يا سكر
Anonymous
طب وهو حد قالك تقرا البوست
وتعلق كمان
هو دة بيحصلك كتير
ويا ترى دة من ايه
نورتى مصر كلها يا حبيبة قلبى
ويا بختك بأختك حبيبتك وحبيبتى فى نفس الوقت
وربنا يخلينا لبعض يا رب مهما الأيام فرقتنا هنفضل على طول مع بعض انشاء الله
حمدلله علي سلامتها.. وان شاء الله تفضلو زي مانتو علطول كده
ياسمين
ازيك عامل ايه
انا كمان اختى لسه جايه من الخارج من كام ابوع ومعاها بنتها وجوزها
وقد ايه انا فرحت بأنى شوفتها
فعلا الاخوات اخوت مهما يبعدو عن بعض حتى لو فى بينهم مشاكل بس
برضه بتيجى عليهم لحظات كتير بيحنو وبيشتاقو ولبلقوا هيتجننو على بعض
ربنا يخليكم لبعض
ويباركم فى كل الاخوات يا رب
يا سمين ابقى زورينى
محداك لدعمك
ايمن
مصر نورت بيها
وبيكي
حمد لله على سلامتها وانشالله دايما
تحياتي
أمانى حبيبتى
ربنا ما يفرقنا أبدا وانتى اعز صديقاتنا أنا وهى
ومبروك البلوج يا قمر
dead man
شكرا يا جميل
يا رب فعلا نفضل زى ما احنا على طول
راسبوتين
ايمن فاروق
فعلا الإخوات أعز الناس مهما حصل بينهم
وربنا يخليلك أختك يا رب
على فكرة انا على طول بأزورك
الحصان الأسود
كتر خيرك
مصر منورة دايما بأهلها الحلوين
انتى بتفكرينى بعلاقتى باختى الاى اصغر منى سنه لأن انا الحقيقه معنديش اخوات ولاد تانيين بس كنت بالقى ولغاية دلوقتى فى اختى دى نفسى و روحى و توأمى و دايماً كنا مترابطين و متوافقين مع ان ده مش كتير بيحصل بين الاولاد و البنات
و لغاية دلوقتى رغم جوازها وبعدها عننابس بتفضل هيه اكتر واحده فاهمانى فى العيله كلها
ربنا يخليكوا و يخاينا لبعض
وعلى فكره اختك شكلها دمها خفيف اوى
وكمان شكلك لما ضربتى الواد كنتى غيرانه منها
تحياتى
واحد لسه اخ فى زمن الاخوه فيه مجرد اداء واجب و صله رحم و بس
ربنا يخليكم لبعض
وحمدا لله علي السلامة
تحياتي
الله
ايه الجمال ده
بس هي كانت فين مش المفروض بعد كل شيء كنتوا فيه مع بعض انكم برده ماتسيبوش بعض ولا ايه؟
يعني واحدة كل اللي عملته إنهالا فتحت مدونة للكلام عن الجنس وبصراحة الهيجان
وبعدين تتكلم عن لقاء شهري...!
وبعدين أختها تيجي من السفر
وكل التهاني والتبريكات على وصول الأخت المبروكة
وفي الآخر زعلانة إن في واحد بيشتمها
بصراحة إن لم تستح فأفعل ما شئت
في البدايه ياسمين انا سعيد جدا بالغوص في مدونتك خدت مني تلات ساعات اهه
:)))
نادر قوي لما اقعد اشوف تاريخ مدونه كامله من الاول و اتابع كل الردود بس طريقتك كلامك تستحق فعلا
رغم الاعتراض الكثير و الكثير علي الكثير برضه في مدونتك ولكن السعاده بالسباحه في مشاعر كتبتها بصراحه ووضح اعتقد انها تجربه فريده
اتمني ان نجد لكي بوستات قريبه بها تجاربك عن الناحيه الايجابيه من الحب و الحياة او حتي تاريخ حياتك كما تحكيها مشاعرك
و اللقاء الشهري للمدونين جميل فكرني بمصر و القعد في تريانون و الحاجات الجميله الي مفتقدها جدا بره مصر
اعتقد اول مره مدونه شخصيه بتكتب عن مشاعرها نقدر نشوفها في الحياة الطبيعيه كان نفسي اكون معاكوا واكيد لو في مصر كنت هحاول اكون موجود خصوصا تريانون و المهندسي دي منطقتي
شكرا ليكي تاني ياسمين انك سمحتلنا نعرفك واتمني اشوفك دايما بصوره افضل بس سؤال صغير ياسمين ليه بتدخني
بالنسبه للمعترضين علي ياسمين من حقكوا تعترضوا بس بطريقه عقليه من حق اي حد يطلع الي جواه و من حقه علينا نقوله الصح الي شايفينه فين
اتمني اشوف ليكي بوستات جديده قريبه ياسمين
why me
جميلة جدا لما بتبقى علاقة الأخوة صداقة
ربنا يخليلك أختك يا رب وتفضلوا تحبوا بعض كدة على طول
وهى فعلا دمها خفيف وزى السكر موووت
ممكن أكون غيرانة بس عليها مش منها لأنى عمرى ما غرت منها وبأحس دايما انها الأجمل والأذكى والأكثر حضورا ومحبوبة من الجميع وتستاهل كل خير
عمرو أحمد
دى أول زيارة منك لمدونتى
شكرا جدا وارجوك ما تحرمنيش من زيارتك
وله نهاية
كان مفروض فعلا ما نسيبش بعض ابدا
بس حكم القوى بقى
جوزها أخدها معاه وسافر
ودلوقتى جاية تزور مصر عشان وحشتها
اصلها بتحب مصر قوى
بتقولى انا وحشتنى الشوارع الزحمة وريحة عرق الغلابة
Anonymous
ما جادلت عالما الا وغلبته
معلش ما ناقشت جاهلا الا وغلبنى
عبد الله
أشكرك جدا على دعمك وتشجيعك الكبير دة
والحمد لله ان تعليقك جاء بعد تعليق من أحد التعليقات العجيبة اياها لأن دة رفع من روحى المعنوية جدا
وياريت كنت فى مصر وتبقى معانا
أنت سألتنى سؤال حساس جدا .. هو .. انتى ليه بتدخنى
الإجابة .. مش عارفة اقولك ايه
بس كفاية انك تعرف انى بأكره التدخين وبأعتبره ضعف وقلة حيلة وطريقة للموت البطىء .. ونوع من عدم تقدير الذات
أشكرك على قراءة مدونتى
وأشكرك على قوة ملاحظتك عن موضوع التدخين
وأوعدك زى ما بأوعد نفسى انى أبطل أول ما اقدر .. أنا بطلت قبل كدة لمدة 4 سنين وللأسف رجعت بس من 8 شهور
والله يسامح اللى كان السبب
7md allah 3la eslama..mbsoten 3la enbsatk klna
Blog gameel ..
sa3eed enni zorto ...!
rabena yekhaleeki lokhtik weykhaleehlik ..
7obokom betonbod beeh kalematik .. !
وكمان بتردي بسرعه
:)
اتمني فعلا ان اسمع قريب انك بطلتي التدخين دايما بشوف التدخين مناقض للعقل السليم و النفسيه السليمه
اوعي تخلي تاثير اي انسان عليكي انك تدمري نفسك انه بكده يبقي حقق هدفه و ب ايديكي كمان
تحياتي
ايه ده ايه النور ده كله النور الواحد بقى اتنين نور رفيقتك ونور المدونة
كلام جميل ما يشعر به الا من احسه
مدونتك جميله جدا
تحياتى
بيجاسوس المصرى
frozen love
الله يسلمك من كل شر وسوء
مدونتك جميلة
وماتحرمنيش من زيارتك
القهوجى
أشكرك على زيارتك وتعليقك
انت اللى كلامك بينبض بالمشاعر
زرت مدونتك الجميلة وسعدت جدا انى زرتها
اشكرك مرة أخرى مش بس على الزيارة
لأ على الكلام الجميل اللى انت كاتبه فى مدونتك
عبد الله
شكرا على اهتمامك بالآخرين حتى من غير ما تعرفهم
انت انسان حساس وألف مبروك المدونة يا بطل
ومادمت بدات الكتابة أكيد مش هتتوقف
وأنا مش هابطل أتابع مدونتك وهاستنى بفارغ الصبر البوست القادم
بيجاسوس المصرى
اشكرك على تعليقك الرقيق
وعلى فكرة أنا دايما قبل ما أعلق بأدخل على مدونة من ترك التعليق
وقرأت تدوينتك الأخيرة
وبقول لكل الزوار
روحوا عليها واقروها
اقرأ تعليقى
الحمد الله انا بالف خير ولكن التفت الى عملى قليلا دعائك
سيف من خشب
أخيرا عزيزى سيف
وحشتنى
وأوعى تختفى تانى
عارفة يا ياسمين
انا كمان بحب اختي الي اكبر مني ب 12 سنة قوي
بحبها اكتر واحدة في اخواتي
ساذجة مع انها مهندسة و 39 سنة
بس مسخرة طفلة بريئة
ياسمين دى اول زيارة ليا بس بجد ربنا يخليكوا لبعض ويبعد عنكم قر الناس على العلاقة الحلوة اللى بينكم ياريت تشوفى المدونة بتاعتى محتاج لخبرتك وممكن اتنازل ونبقى صحاب
ايه المشاعر الصادقه والجميله دي بجد جميل ربنا يخليكم لبعض دايماً
أفهم من ردك على الايميل ان العرض غير مقبول
حمدلله على السلامة
عقبال شريف صديقى مايرجع
واكتب عنه بوستين تلاتة كده
هاتيها وتعالوا اسكندرية بقى
مانا عارف طبعاً انك غيرانه عليها مش منها
ده انا كنت بهزر
و شكراً جداً لاضافتى عندك فى مدونتك
الرائعه
و مستنى دايماً ارائك لانها فعلاً تهمنى
شكراً مره تانيه
تحياتى
واحد مبسوط جداً لانك ضفتيه عندك
ربنا يديم عليكي السعادة يا جميلة
تصدقي انا عملت موقف شبه ده و انا صغيرة ههههه
قالت .. طلبات ايه يا ماما مش انتى قلتيلى روحى بس ادى الورقة دى للبقال .. أنا رحت حطيت الورقة قدامه ومشيت
مش عارفة ليه ماماهتنا مكنوش بيوضحوا الطلب
:)
حمدالله على السلامة
ربنا يخليكو لبعض
وربنا يفرحك دايما كده
بجد شكرا ليكى انك رسمتى بسمة على وشى واحشانى من زمان
غرقتينى معاكى فى طوفان مشاعرك الرقيقة
وضحكت لما رحتى وضربتى ابن الجيران
ولما اختك نزلت للبقال رمتله الورقة وطلعت ايديها فاضية
يااه
بجد شكرا على مشاعرك الجميلة دى اللى مبخلتيش بيها علينا
وقولى لاختك ألف حمد الله عالسلامة
مش عارف افرح و لا ازعل
بجد فرحت جدا و انا بقرأ البوست بتاعك وزعلت اكتر ان انا واخويا علي طول في خناق مستمر و خصام بالشهور مش عارف لما نكبر و نبقي عندنا اولاد هنفتكر ايه حلو و احنا علي طول بنتخانق
كتابتك يلقائيه جدا و انا حبتها وانا من متابعي مدونتك من فترة مش طويله اوي بس ساعات بكسل ارد و الله
ان شاء الله تبقي تشرفيني يا يسمين في المدونه بتاعتي اللي هفتتحها في خلال ساعات و انت طبعا موجوده في اللينكات هناك و ابقي دوري علي اسمك وسط الناس
اسامه
شكرا ليكى لوى يا يا يا سمين وربنا يديم الخير والمعروف ما بين الاصدقاء
ونهارك فل يا جميل
الحمد لله تم الافتتاح ابقي شرفيني و اقري اول بوست ليا وقولي ايه رايك
في البوست و التصميم بشكل عام
www.dabbor.blogspot.com
osama
نهاز
ربنا يخليكم لبعض
وأشكرك على الزيارة
مصر هى أمى
أنا زرت مدونتك وهى جميلة فعلا
وشكرا انك دلتنى عليها
عاوزة بقى ألاقى كل يوم بوست جديد
ماشى
الدمعة
وربنا يخلى زوار المدونة لية
يا رب
الدمعة
انتى اللى جميلة
أنا زرت مدونتك و تركت كومنت
يا ريت تلغى المودريتور عشان التعليقات تظهر على طول
شريف فهمى
أنا رديت عليك
روح اقرأ الإيميل
واشكرك بجد على الإيميل دة
شمعى اسعد
عقبال ما ربنا يجمعك مع صاحبك
وتفرحوا سوا وتقضوا أيام حلوة زى اللى بقضيها دلوقتى معاها
why me
انا ضفتك عشان مدونتك حلوة بجد
وشكرا لأنك شايف ان دى حاجة تبسطك
بجد شكرا
أنا اللى مبسوطة بمدونتك
سمباتيك
ضحكت من قلبى وأنا أقرا تعيقك
ورحت قلت لأختى .. توأمك موجودة هنا أهيه
وهى موافقاكى على موضوع انهم ما كانوش بيوضحوا فعلا طلباتهم بدقة
اياكش تولع
الله يسلمك
زرت مدونتك وتركت تعليق يا ريت تقراه
وبلاش سياسة جلد الذات دى
zordeak
شكرا ليك
الله يسلمك يار رب
مبسوطة بويارتك ومبسوطة انى رسمت ابتسامة على وشك ..
يا رب البسمة ما تفارقكش ابدا
الدبور
ألف مبروك المدونة الجميلة
انا بجد اتبسطت لما شفت البوست ده
حلو اوى احساسك
مواقف حلوة وشقيه
حمد الله على السلامه
حمدالله على سلامتها ويارب تفضل الروح ده بينكم مهما زادت المسافة اللي بتعملها الغربةبين الناس
وماتغيبيش علينا
ياسمين شكرا جدا على زيارتك لمدونتى وربنا يسهل البوست بتاعى هيكون الجمعة عايزك تقريه وتقوليلى رايك ماشى
سارة
شكرا يا قمر على رايك فى البوست
وشكرا أكتر على زيارتك لى
زرت مدونتك الفنية الجميلة وتركت تعليق
هنودة
آه والله الغربة دى فظيعة وبتبعد الحبايب
قريت البوست الأخير فى مدونتك وفهمت احساسك بالغربة
الله يسلمك يا سكر ويرجعك بالسلامة
مصر هى أمى
ماشى يا جميل مستنية يوم الجمعة
بجد بوست جميل جدا وذكريات اجمل عجبنى قوى البساطة فى التعبير والحكايات الجميلة ربنا يخليكا لبعض
بصراحة يا ياسمين .. انا اول مرة ازور مدونتك .. انا عجبنى اسلوبك فى مواضيعك انا مش بقول كده تلميع وش زى ما بيقولو لكن فعلا انا معجب بجرأتك .. الجرأة تنقص كتير مننا الجرأة ومواجهة انواع الناس من اصحاب التفكير الغبي او التفكير الغلط والاصرار على الجرأة منتهى الروعة ...
نيجى بأه لموضوع اختك .. حلوة اوى حب الاخوات لبعض وذكريات الطفولة دى احلى حاجة طبعا ... وخصوصا الذكريات اللذيذة دى .... ربنا يخليلك اختك وسلميلي عليها كتييير ... وخللوا بالكوا من بعض ...
تحيااااتى ... :]
يااااه
قد ايه طفوله بريئة وجميلة يا ياسميين
وقد ايه علاقتكم ببعض ترقق قلب اي انسان
بس اشمعنى حكتيلنا على مواقف من الطفولة المجنونه دي ومحكتيش على حاجات من اللي بعد كده
إيه هي حاجات متتحكيش ولا إيه؟؟
ربنا يخليكوم لبعض يا ياسمين ويا رب تتبسطو في الاجازة دي كتييييييييير
بسبس
شكرا ليكى على التعليق
دخلت مدونتك وعجبتنى جدا جدا
ما تقطعيش الزيارة
أشكرك جدا على رايك فى شخصى وفى مدونتى
وأرجوك ما تحرمنيش من الزيارة
مدونتك جميلة على فكرة
احمد سلامة
لا والله احنا ذكرياتنا كتير
وياما عشنا ايام حلوة
بس ذكريات الطفولة صعب تتكرر
ولو حكيت كل حاجة لحد دلوقتى مش هتكفينى 10 بوستات
دة جمهورية مصر العربية كلها منورة بسماها وارضها
من مشاعرك وكلامك الجميل
انا دايما بتأخر فى الدر كدة عليكى وباجى بعد الخمسين نفسى مرة اجى فى الرد العشرين
ربنا يخليهالك ياياسمين سلميلى عليها وحمدالله على السلامة
إرسال تعليق