حلم اللقاء - بقالى كتير خايفة أحلم

حضرت فى الموعد أنا والصديقة سهر الليالى والصديقة دوللي معا .. توقعت عدد ما بين 30 الى 40 مدون ومدونة
فوجئت بالعدد الضخم الذى أخذ يتزايد حتى وصل الى ما يقرب الـ 60 من المدونين والمدونات الحلوين جدا جدا

طبعا سعادتى كانت لا توصف وأنا بأشوف الناس بتزيد .. الحلم بيكبر .. حلم حلمته فى ليلة وقررت أحققه .. الله .. دة بيتحقق .. مذهولة ومبسوطة .. لأ طايرة .. ما تعودش ان أحلامى تتحقق .. بقالى كتير خايفة أحلم .. دلوقتى خلاص .. بقى حلمى الوحيد وكل تركيزى وتفكيرى فى الصحو والمنام يدور حول لقاء المدونين الشهرى

اللقاء كان فى غاية الجمال .. اتكلمت كتير وصوتى راح بس مبسوطة .. كل ما اتكلم والاقى صوتى مبحوح افتكر وافرح وأحس بنشوة عجيبة تشبة نشوة تذكر الفتاه لأول قبلة من الحبيب.

smraa alnil

فى ناس اقترحت اقتراحات جميلة زى سمراء النيل ..المتحمسة دائما .. النشيطة ابداً .. اقتراحات تخص الأيتام والعجائز والعمل الإجتماعى الخيرى .. روحوا زوروا مدونتها وانتوا تعرفوا أكتر

اقتراح أحمد فؤاد بخصوص القيام بحملات تخص موضوعات معينة نتفق عليها مسبقا .. وتكون ضد السلبيات فى بلدنا الحبيب مصر .. اقتراح جميل
micheal
اتعرفت على ناس جداد .. بحبهم .. بحبكوا كلكوا .. بحب كل اللى شجعنى حتى لو ماكانش معانا .. ولسة فاكرة كلام مايكل ستيفن بعد أول لقاء .. قال ياسمين عملت ثورة فى عالم المدونات .. ومايكل يشارك معنا قلبا وقالبا .. harmless

وكلامه بخصوص المؤتمر الخامس عشر للمدونين لما قال انه بيتخيل المؤتمر دة هتحضره الصحافة وهيكون فى قاعة المؤتمرات .. نبؤة مش بعيد قوى تحقيقها

قررت ان اللقاء الجاى يكون فى قاعة فعلا واستنوا التفاصيل

Mohamed A. Ghaffar

اعتذر صديق التدوين العزيز عن الحضور لظروف مرض والد .. ألف سلامة للوالد يا محمد وشكرا لإهتمامك

حضر معانا ناس جميلة كتير .. كتير قوى .. وكان فى سلبيات كتب عنها ابراهيم – انظر حولك فى غضب و اسامة – الدبور .. ابراهيم عجبنى قوى فى نقده وتحليله .. اسامة الدبور زعل ناس كتير بالبوست الأول عن اللقاء مش عشان النقد لكن عشان اسلوب النقد وكمان التعميم .. لكن هو تدارك الخطأ مشكورا و وضح ان دة كان فعلا نتيجة حماسه ورغبته فى نجاح اللقاء .. شكرا يا اسامة .. انت انسان فاضل فعلا لأن الإعتراف بالحق فضيلة ..

حضر اللقاء الطفل الجميل عيل شقى .. وهو أصغر مدون وتحدى .. كمان المشاركة النسائية كانت أكثر من رائعة .. اشكركم يا بنات ..

طارق – واحد من الناس .. كتب لستة بالمدونين اللى حضروا كلهم .. شكرا طارق .. بجد شكرا

hosnysoliman &
تانى مرة يحضر لى أحمد شقير والفنان حسنى سليمان .. مش قادرة اصدق نفسى .. دة نجاح .. انا نجحت انى أجيبهم مرتين .. تخيلوا .. مرتين .. ويا رب يبقوا معانا على طول

مداراتى & amira

كما حضر الزوجين الجمال جدا اميرة وكراكيب وهما يعملا نفى مجال الإعلام المرئى

تحية كبيرة لكل من تكبد العناء وحضر الى مكان اللقاء .. ومهما كانت السلبيات .. أنا مازلت متفائلة .. هيفضل اللقاء دة ابنى اللى هارعاه ومش هأتخلى عنه ولما يغلط اقومه ولما يقع اساعده يقوم تانى ..
frozen love
محمد حامد عنده حفلة فى الساقية يوم الثلاثاء الموافق 13/3/2007 ولازم تيجوا كلكلم .. محمد يستاهل كل خير واوعدكم انكم تمبسطوا

استنوا المفاجآت فى اللقاءات القادمة .. وعاوزاكم معانا .. مش هتندموا

حضر اللقاء كثير من مدونات الرائعات بنسبة تصل الى 35% من الحضور .. اشكركم بجد

اشكركم جميعا على تحمسكم ودعمكم ومشاركتكم

بحبكم كلكم