الأحد، 11 مارس، 2007

حلم اللقاء - بقالى كتير خايفة أحلم

أحمد حداد يسجل بعدسة حسنى سليمان اللقاء بكل حب
آدم المصرى اصل البشرية وفى الخلف اسامة ومحمد حامد .. شكرا لحضورك
ناس حلوة قوى قوى .. نادين الجميلة .. ابراهيم معانا بقى المرة دى
وايمن راسبوتين الصديق الجميل وكان من الناس الفعالين جدا وماقعدش لحظة طول اللقاء .. شكرا يا أيمن
ايمن بيقول كلمته اللى كلها حماس .. والجماهير تهتف .. ايمن .. ايمن .. ايمن
الفنان الكبير الجميل حسنى سليمان والمدونين ملمومين حواليه وبيسمعوه بكل اهتمام .. ربنا ما يحرمنا منك يا كبير العيلة

بيكيا وطارق واحد من الناس ومصر هى أمى محمد عادل .. نجوم اللقاء من أول لحظة

أحمد حداد السكرة وحواليه الناس الحلوة منورة

سفاح كرموز بيقول قتل الأزواج هيبقى غالى شوية ..ومعاه الفنان الجميل حسنى سليمان .. وبشوى ذو الفكر المتحرر من أى قيود .. وكمان شادى فايد بلدياتى اللى جه من اسيوط مخصوص عشان يحضر اللقاء .. تحية كبيرة يا شادى

أنا .. ياسمين

حسنى سليمان- بشوى- شادى منخرطين فى حوار مدونين جامد موووت
حضرت فى الموعد أنا والصديقة سهر الليالى والصديقة دوللي معا .. توقعت عدد ما بين 30 الى 40 مدون ومدونة
فوجئت بالعدد الضخم الذى أخذ يتزايد حتى وصل الى ما يقرب الـ 60 من المدونين والمدونات الحلوين جدا جدا
طبعا سعادتى كانت لا توصف وأنا بأشوف الناس بتزيد .. الحلم بيكبر .. حلم حلمته فى ليلة وقررت أحققه .. الله .. دة بيتحقق .. مذهولة ومبسوطة .. لأ طايرة .. ما تعودش ان أحلامى تتحقق .. بقالى كتير خايفة أحلم .. دلوقتى خلاص .. بقى حلمى الوحيد وكل تركيزى وتفكيرى فى الصحو والمنام يدور حول لقاء المدونين الشهرى
اللقاء كان فى غاية الجمال .. اتكلمت كتير وصوتى راح بس مبسوطة .. كل ما اتكلم والاقى صوتى مبحوح افتكر وافرح وأحس بنشوة عجيبة تشبة نشوة تذكر الفتاه لأول قبلة من الحبيب.

فى ناس اقترحت اقتراحات جميلة زى سمراء النيل ..المتحمسة دائما .. النشيطة ابداً .. اقتراحات تخص الأيتام
والعجائز والعمل الإجتماعى الخيرى .. روحوا زوروا مدونتها وانتوا تعرفوا أكتر
micheal
اتعرفت على ناس جداد .. بحبهم .. بحبكوا كلكوا .. بحب كل اللى شجعنى حتى لو ماكانش معانا .. ولسة فاكرة كلام مايكل محسن بعد أول لقاء .. قال ياسمين عملت ثورة فى عالم المدونات .. ومايكل يشارك معنا قلبا وقالبا ..
harmless
وكلامه بخصوص المؤتمر الخامس عشر للمدونين لما قال انه بيتخيل المؤتمر دة هتحضره الصحافة وهيكون فى قاعة المؤتمرات .. نبؤة مش بعيد قوى تحقيقها
قررت ان اللقاء الجاى يكون فى قاعة فعلا واستنوا التفاصيل

اعتذر صديق التدوين العزيز عن الحضور لظروف مرض والد .. ألف سلامة للوالد يا محمد وشكرا لإهتمامك ومش هأنسى ابدا انك انت وسمراء النيل وسهر الليالى أول ناس رحبت بالفكرة وحضروا أول لقاء وكنا ستة بس دلوقتى بقينا ستين يا محمد
الدبور و إبراهيم
حضر معانا ناس جميلة كتير .. كتير قوى .. وكان فى سلبيات كتب عنها
إبراهيم– انظر حولك فى غضب و اسامة – الدبور .. ابراهيم عجبنى قوى فى نقده وتحليله .. اسامة الدبور زعل ناس كتير بالبوست الأول عن اللقاء مش عشان النقد لكن عشان اسلوب النقد وكمان التعميم .. لكن هو تدارك الخطأ مشكورا و وضح ان دة كان فعلا نتيجة حماسه ورغبته فى نجاح اللقاء .. شكرا يا اسامة .. انت انسان فاضل فعلا لأن الإعتراف بالحق فضيلة ..
عــيل شــقي
حضر اللقاء الطفل الجميل
عــيل شــقي .. وهو أصغر مدون وتحدى وهو الخ الاصغر للمدون الجميل ادم المصري .. كمان المشاركة النسائية كانت أكثر من رائعة .. اشكركم يا بنات
واحد من الناس::طارق::

كتب لستة بالمدونين اللى حضروا كلهم فى المدونة عنده.. وهى مرجع رائع لمن يرغب فى الإطلاع على مدونات المشاركين فى اللقاء .. شكرا طارق .. بجد شكرا
hosnysoliman & حكاوى آخر الليل
تانى مرة يحضر لى أحمد شقير والفنان حسنى سليمان .. مش قادرة اصدق نفسى .. دة نجاح .. انا نجحت انى أجيبهم مرتين .. تخيلوا .. مرتين .. ويا رب يبقوا معانا على طول

مداراتى & amira

كما حضر الزوجين الجمال جدا اميرة وباسم وهما يعملا نفى مجال الإعلام المرئى
تحية كبيرة لكل من تكبد العناء وحضر الى مكان اللقاء .. ومهما كانت السلبيات .. أنا مازلت متفائلة .. هيفضل اللقاء دة ابنى اللى هارعاه ومش هأتخلى عنه ولما يغلط اقومه ولما يقع اساعده يقوم تانى ..
frozen love
محمد حامد عنده حفلة فى الساقية يوم الثلاثاء الموافق 13/3/2007 ولازم تيجوا كلكلم .. محمد يستاهل كل خير واوعدكم انكم تمبسطوا
استنوا المفاجآت فى اللقاءات القادمة .. وعاوزاكم معانا .. مش هتندموا
tota

حضر اللقاء كثير من مدونات الرائعات بنسبة تصل الى 35% من الحضور وعلى راسهم المدونة الجميلة توتا التى اضاءت بوجودها اللقاء


اشكركم جميعا على تحمسكم ودعمكم ومشاركتكم

بحبكم كلكم

هناك 112 تعليقًا:

شادي فايد يقول...

للمرة الثالثة بشكرك جدا يا ياسمين

والله كان لقاء فعلا عالمي
وسلبياته اكبر دليل على نجاحة

ادعيلي ان اقدر اجي اللقاء القادم

وعلى فكرة انا كتبت عن اللقاء

بس بصراحة انا فعلا عاجز عن توصيل ما بداخلي عن طريق الكتابة

شادي فايد يقول...

اه صحيح

فين الصور

انا لازم أخذ الصور كلها

اه مش عشان انا في اسيوط تنفضولي

ياسمين يقول...

شادى فايد

انت انسان جميل جدا فعلا و وجودك معانا فى اليوم دة وانت جاى من اسيوط مخصوص وسام للجميع

وبعدين احنا طلعنا بلديات
وسلم لى على الفطير المشلتت

مادو يقول...

هاي بزعيمة البلوجرية
بجد أنا فعلا فرحت كتير جدا بالقاء
من حظي السعيد أني عرفته بالصدفة
و ان شاء الله يتكرر كتييييييييير
بس يكون منظم أكتر إن شاء الله

whyme يقول...

فعلاً يا ياسمين ليكى الحق انك تفرحى لانك حلمت و بادرتى و اتجرأتى و مخفتيش من الفشل و لا من القيود المتخلفه و واصلتى و ناجحــــــــــــــــــــــــــــــــــــــــــــتى

ايوه نجحتى يا ياسمين و بجد من كل قلبى بهنيكى انتى و كل الى بادروا معاكى و مخافوش و على رأسهم الرائـــــــــع راسبوتين و الجميله سمــــــــــراء

برافوا عليكم


و كمان برافوا هلى كل النماذج الرائعه الى اتعلمنا منهم كتير

برافو على استاذ حسنى الى حماسه قد حماسنا كلنا و برافو على احمد شقير الى
شرفنا لتانى مره و ادى للقاء طابع تانى و تاثير اوسع
و برافو على دكتووووووووور مجدى الى حضر هوه و اولاده ليعطينا نموذج رائع للابوه

و برافووووو على كل البنات الى كسروا حاجز الخوف و التردد و شرفونا و كانوا حضرهم اجمل مثال على تحرر الفكر و نضج العقل
و برافو على محمد ذو التسعه اعوام اصغر بلوجر و اخف دم
و برافو على ادم المصرى اخوه الى اهتم بيه و عرفوا ازاى يبتدى صح


و برافو على كل الى حضروا بجد تحيه كبيره
و معلــــــــــش طولت عليكم

و يا ريت اشوفك كلكم المره الى جايه

MoHaMeD HoSSaM يقول...

كان لقاء رائع بجد بس انا مش لاقى غير الصورة الى متصورها مع ابراهيم عند كل الناس يا جدعان انا متصور صور تانية ملقتوش غير الصورة الى بخوف فيها الناس وطالع عينى حمرا

ياسمين يقول...

مادو

لازم تبقى معانا المرة الجاية
هاستنى

تحياتى

مصر هى أمى يقول...

ياسمين

طبعا لو شكرتك من هنا لبكرة مش كفاية على المجهود الكبير اللى انتى عملتيه وكفاية انك قعدتى اكتر من ساعة تكلمى بتواصل مدهش اسمعى كلامى وانزلى الانتخابات كلنا معاك يا ريس المهم اما تنجحى متنسيناش فى المعونة والمنحة

شكرا جدا ليكى مرة تانية

ياسمين يقول...

why me

كلماتك تنبض بالحماس والحب للى عملناه

تعليق كان لازم يبقى بوست

انت جميل قوى يا ايلارى .. قوى

ياسمين يقول...

محمد حسام

هى دى الصورة اللى عندى وبعدين انت وريهم العين الحمرا كدة من الأول عشان ماحدش ياخد عليك

تحياتى يا أحلى مدون

ياسمين يقول...

مصر هى أمى

انت هتجننى خلاص .. عاوزاك فى حاجة مهمة جدا .. جدا

انت فييييييييييييييييين

ابعتلى رقم تليفونك على الميل يا محمد

عبوووووووود يقول...

أحيي العقل اللي أبدع هذه الفكرة الرائعة
مش هاقدر أوصفلك سعادتي باللقاء
صحيح ما أنكرش إني كنت قلقان منه في الأول
لكن لما حضرت وشوفت انبهرت جدا بالفكرة
طبعا كان فيه بعض الأخطاء اللي حصلت نتيجة للتطور المفاجئ في العدد لكن بجد كفاية إننا اتجمعنا كلنا
هاستنى اللقاء الرابع بفارغ الصبر

ياسمين يقول...

عبوووووووود

انت نورت اللقاء وطبعا هتبقى معانا المرة الجاية

تحياتى للشباب الواعى المثقف

Sampateek يقول...

متجمعين دايما على كل خير و سعادة
تحياتي

micheal يقول...

ياسمين
باذن الله لقائنا حيتطور كل مره من حيث العدد و المضمون طول ما فيه ناس زيك بتشرف عليه...و المهم نبتدي نفكر من دلوقتي في اقتراحات سمرا لان وقتها الكل حيبتدي يحس أكتر بفاعليه اللقاء...و باذن الله سنمضي من نجاح الي نجاح
تحياتي لكي

raspoutine يقول...

شكرا ياسمين

الفضل اكيد لربنا سبحانه وتعالى
وليكى انتى وانجى

وللناس الجميلة اللى حضرت اللقاء الجميل ده واتمنالكم التوفيق بأذن الله تعالى
وبكرة اكيد اكيد هيبقى احلى


ايمن

Epitaph يقول...

مبروك نجاح اللقاء
لم يسعدني الحظ اني اكون معاكم

انما تتكرر ان شاء الله


تحياتي لمجهوداتكم

Sharm يقول...

تلاقيكي موصلتيش سلامي

!!!


من لقى احبابه نسى اصحابه

:((((

ياسمين يقول...

سمباتيك

اشكرك يا حبيبة قلبى وعارفةان كلامك من القلب

ياسمين يقول...

مايكل

انت عندك حق وربنا يسهل .. المهم سمرا تنفذ وتحدد مكان ومعاد واحنا وراها

ياسمين يقول...

راسبوتين

بكرة اكيد أحلى
بيك وبالناس الحلوين اللى زيك

ياسمين يقول...

ابيتاف

شكرا ليكى واتمنى اشوفك المرة الجاية

ياسمين يقول...

شارم

تعالى المرة الجاية سلم على الناس الحلوة بنفسك

تحياتى

الدبور يقول...

شكرا علي رعايتك للقاء و اهتمامك الشديد
اما بخصوص البوست فانا اكرر

انا لم اعمم ياياسمين
و البوست عندك و اقريه كويس و بتمعن

تحياتي

ياسمين يقول...

الدبور

شكرا يا اسامة
ومعلش ما تزعلش ومش عاوزة أى حد يزعل منى

Ahmed Shokeir يقول...

ياسمين

بصراحة مجهود جامد عليكي بعد مازاد العدد من ستة إلى ستاشر ثم إلى حوالي الستين
نجحتي في تجميع هذا العدد الكبير
أول ماجيت وقبل ماقدر استوعب الموضوع كنت بقول كلمة لو تفتكري إني طلبت فيها من الجميع أنه يتناسى أي سلبيات قد يراها في وجود هذا العدد الضخم فالإيجابيات اكثر بكثير
وإن كنت اعتقد ان التعامل مع هذا النوع من اللقاءات يحتاج لإستراتيجية جدية تختلف عن لقاء الستة والستة عشر

تحية لكي ولجميع الحضور

ياسمين يقول...

أحمد شقير

شرف لية انك جيت اللقاءات دى
وشرف لية انك تزور مدونتى
وتعليق كما وتوجيهات من القيادات العليا .. اشكرك

أكيد الموضوع هيبقى اصعب
لكن عندى أمل كبير فى حاجات كتير

تحياتى

واحد من الناس::طارق:: يقول...

مبرووك ياسمين.. سعيد جدا بمعرفتكم كلكم
بحاول يكون اللقاء دة بداية حياة جديدة لى

daktara يقول...

طبعا اللقاء في حد زاته شيء جميل
للاسف ظروفي مكانتش تسمح
بس المره الجايه ان شاء الله هاحضر

محمد ياسر يقول...

ياسمين كنت سعيد باللقاء وبيكوا كلكو واكيد فى ايجابيات كتير وانا عارف انك اكتر واحدة تعبتى فى اللقاء ده و صوتك راح بس ان شاء الله بعد كده يبقى مكان مغلق و فيه ميكروفون هيسهل الموضوع كتير
و ربنا معاكى

تحياتى

frozen love يقول...

متصوريش يا ياسمن انا فرحان قد ايه

اولا فرحان عشان شايف فكرتك بتكبر..محتاجة شوية تنظيم وتبقى فوق الرائعة

وثانيا عشان الحب اللي انتوا بتقدموهولي ده بدون اي مقابل لمجرد اننا بقينا اصحاب واهل متتصوروش انا مبسوط قد ايه من كلامكم عن الحفة في مدوناتكم

وطاير من الفرح اني هاشوفكم هناك
شكرا يا ياسمين
وان شاء الله يومها نسال عن موضوع الساقية ده

تحياتي

safa7_karmooz يقول...

كان يوووم تحفة ...وبجد كان الشرف لى انى ااتعرفت على انسانه زيك يومها يا ياسمين ...يكفى افكارك ...والطموح او الهدف اللى عاوزاه يوصل لينا من اللقاء الشهرى

وسعيد جدا بانى اتعرفت على اصدقاء جدد ...وناس عقولهم بسم الله ما شاء الله ...

ان شاء الله تتكرر القعده ...

ولو عرفتوا تحجزولنا الصالة المغطاة بتاعت استاد القاهرة يبقى كويس :p

el2ahwagi يقول...

rabena yekhaleeki lelmodaweneen weltadween ...!!

ana bashoof feeki ezay el7elm yet7awel le7a2ee2a ..!

مجهول يقول...

تاني مره حقولها ياريتني كنت معاكوا ياريتني كنت معاكوا
عملوها الوحوش


سعيد بلقاؤكوا وتعيس لاني مكنتش معاكوا
بس حقول تاني
تتعوض


بجد كان نفسي اتعرف عليكوا

وكان نفسي علي الاخص اتشرف بيكي و بأستاذ الفنان حسني و بالرائعه المفضله لدي توتا
بس ارزااااااااااااااق بقا
لك تحياتي يا نائب رئيس منظمه الفكر للجميع ت د و ي ن

dr_lazeez يقول...

zay ma2oltelek ya yasmine
el mara el gaya lazem tekon fe ka3a kebera .
wana lazem 2agy .
enty 2ensana 3azema

ياسمين يقول...

طارق
واحد من الناس

الله يخليك يا طارق

انت بتحاول ان اللقاء يكون بداية حياة جديدة ليك لكن هو بالفعل بالنسبة لى حياة جديدة

تحياتى ويارب تبقى معانا على طول

ياسمين يقول...

دكترة

اشكرك لإهتمامك وهنستناك تبقى معانا على طول بعد كدة

ياسمين يقول...

محمد ياسر

فعلا هو كان لقاء جميل رغم ان صوتى راح
بس فى ناس كتير صوتها بيروح فى الفراغ لكن المرة دى صوتى ما راحش اونطة

شرفتنا بوجودك معانا بجد .. انت خلاص بقيت واحد مننا

ياسمين يقول...

فروزن لاف

انت فعلا واحد مننا .. من عيلة المدونين الكبير واللى بتكبر يوم بعد يوم

وانت تستحق النجاح عشان كدة هأدعم موهبتك الجميلة للنهاية

نشوفك فى الحفلة بقى يا موهوب

ياسمين يقول...

سفاح كرموز

انت اللى شرفتنا بوجودك
وسعداء انك بقيت واحد مننا

اكيد هيحصل فى يوم من الأيام انى احجز الإستاد
:))))

ياسمين يقول...

القهوجى

شفت .. شفت يا قهوجى
شفت ازاى الحلم بيكبر بجد

انا يا ما حلمت بس مش عارفة ليه متمسكة بالحلم دة ومصرة أحققه

مصرة فعلا .. وأكيد هيكبر ويكبر .. احنا بقى لينا كلنا عيلة تانية اسمها عائلة المدونين الكبيرة قوى

ياسمين يقول...

مجهول

نائب رئيس منظمه الفكر للجميع.. طب ليه ما اكونش رئيس المنظمة يعنى

لازم تبقى معايا المرة الجاية

لازم

ياسمين يقول...

dr_lazeez

فعلا لازم يبقى اللقاء فى قاعة المرة الجاية .. الناس المشاركة كتروا وزادوا وربنا يزيدهم كمان وكمان

شرف لية وللجميع انك تكون معانا المرة الجاية

اشكرك على الإطراء دة .. أنا عظيمة بحب الناس .. ربنا ساعات بيعوضنا برضه عن حاجات ضاعت مننا
تحياتى

Hannoda يقول...

ياسمين

أنا بشكرك "بتصفيق حاد جدا" ده كلمتك :))

لأ بجد.. أنا بشكر جدا على الحم الرائع اللي حلمتي بيه و بعدين خلتينا نحلم بيه و دلوقت قاعده بتفرج عليه محبوسة الأنفاس

مهما قلت مش حاتعرفي أنا فخورة باللي بيحصل عندكوا ده قد ايه و قاعدة بحلم إن أجازتي تيجي بسرعة و أقدر أشارك في الحدث المحترم جدا ده

طبعا كل اللي شاركوا يستحقوا الشكر و بالذات اللناس اللي قريت إنهم إحترموا اللقاء و القائمين عليه

لكن في العموم أكيد الكل مدين بالشكر ليك و الجميلة سمراء النيل

وبكل حبي و إحترامي و فخري .. "مين فخري ده؟!"...
بحكي عنكم و بالصور لكل زمايلي هنا و طلابي
قطريين و فلسطنيين وسوريين وغيرهم

وحسيت إني عرفت أبينلهم إن شباب مصر بعرف يجتمع و يكون إيجابي و سوي ومحترم .. بعد الاتهامات اللي دايما كانت بتدايقني و خصوصا اللي حصل بعد برنامج هالة سرحان

عدي اقتراحات كتير انشاء الله أجيلكم بيها في اللقاء اللي بعد اللي بعد اللي جاي

سوري ع الإطالة بس ده من الفرحة

ياسمين يقول...

هنودة

انا عمرى ما اتضايقت من اى تعليق طويل .. بالعكس بحس ان اللى كتبه ما استخسرش فية وقته

شوفتى الحلاوة .. حاسة انك حسيتى بفرحتى .. قريت دة بين سطور تعليقك

انا طايرة من الفرحة والحلم بيكبر وانتوا معايا.. القريب والبعيد بيشجع
اللى حضر واللى ما حضرش مبسوط

ايوة احنا لسة بخير وشباب مصر لسة بخير

هأستناكى اللقاء اللى بعد الجاى
تحياتى

محمد صلاح العزب يقول...

برافو يا ياسمين
شغل رائع

The Alien يقول...

أنا ف اﻷول كنت متردد
وبصراحة كنت مقلق من اللقاء والعدد
بس قررت أروح عشان أشوف البشر الجميلة
وفعلا كان لقاء جميل
ومينفعش نتكلم عن سلبيات وننسي الإيجابيات
إحنا لسه بنبدأ وطبيعي يكون فيه سلبيات كتير

تحياتي

mano يقول...

حقيقى يا ياسمين
للمره العشره بقولك اللقاء كان جميل
و اشكر مجهودك الرائع و طبعا مش هنسى ايمن و انجى
كلكوا تستحقوا التحيه
و اساسا مش لاقيه كلام يوصل شعورى
تحياتى

ياسمين يقول...

محمد صلاح عزب

شكرا يا محمد

تحياتى

ياسمين يقول...

مانو الجميلة

انتى اللى كنتى منورة اللقاء يا سكرة
واستمتعت جدا بمقابلتك اللى لازم تتكرر طبعا

تحياتى من القلب

ياسمين يقول...

The Alien

بشوى صديقى العزيز
أكيد كل ما العدد يزيد والناس تكتر هتبان سلبيات كتير ودى حاجة طبيعية ولو كانوا سمعوا كلمتى فى الأول وأنا بقول احنا بشر ومش عشان مدونين تفترضوا اننا مثاليين وان المدونين هم قطاع من البشر ويمثلون كل ما فى البشر من سلبيات وايجابيات

معانا على طول بقى

تحياتى من القلب

أيوب زمانه يقول...

إزيك يا ياسمين
أهنيكى على نجاح المدونة بتاعتك
لو ماكانتش كويسة ماكانتش نجحت ولا كان كل العدد ده من المدونين حريصين على حضور اللقاء الشهرى

ياسمين يقول...

ايوب زمانه

اشكرك يا أيوب على تهنئتك لى
انت كنت من أوائل الناس اللى علوقوا عندى .. ودة كان فى حد ذاته تشجيع منك
ولو انا نجحت فى أى حاجة فأنتم جميعا قد شاركتم فى هذا النجاح

تحياتى

gebson يقول...

yasmen
alf mabrok 3ala el lek2a we wade7 enek za3emt el bloggers we rabena yesahel we akon ma3ako el mara ely gaia.
ta7yaty

ياسمين يقول...

جبسون

شكرا ليك يا جبسون واتمنى فعلا انك تكون معانا المرة الجاية

انت انسان جميل ومبروك المدونة

تحية من قلب مجروح

harmless يقول...

تسير الجزيئات هائمه
مشتته
مفككه
لا تاثير لها
لا يشعر بها احد

ثم
لاسباب مجهوله
وفى زمن غير معلوم
وفى ظروف لا يمكن استنتاجها

تختار الاقدار جزئ
تصتدم به بعض الجزيئات
ثم بعض الجزيئات
سته ثم سبعة عشر ثم ستون ثم مائه ثم الف

فتكبر
وتتكلس
وتتضخم
وتتحجر

وفجأه تحدث الجلطه

الجزيئات الضعيفه صارت مثل الحجر
تستعصى على التفتيت
تنتصر على محاولات الاذابة

ويأتى دورها لتعلن عو وجودها
وتؤدى دورها
وتؤثر فى مجتمعها

ادعو لكم ان تكونوا الما فى كلية الجهل والتعصب
وشللا فى شرايين الظلم والاستبداد
وشوكه فى مخ الكهوله والجمود

اما الجزئ الاول
الذى كون الجلطه
وجمع الباقيين
وحقق الحلم

فله تحياتى واعجابى

ياسمين يقول...

هارملس

شكرا للتعليق الجميل اللى بيدل على قد ايه انت بتشجعنى ودعمك لية من أجمل ما يكون

أوعدك اننا نكون عند حسن ظنك
كما تخيلتنا وكما تتوقع أن نكون

تحية من قلب مجروح

الدبور يقول...

هو اللقاء اللي جاي امتي علشان استعد واحوش من دلوقتي
بس ياريت يكون في قاعه ويكون منظم اكتر من كده
واخيرا تذكري دائما "لعله خير" اجعليها امامك دائما

تحياتي
الدبور

ياسمين يقول...

الدبور

انا متشكرة يا اسامة

بجد شكرا .. انت انسان طيب قوى رغم كل شىء

david santos يقول...

Hello!
This work is very good, thank you
have nice week

ياسمين يقول...

david santos

thanks alot, hope to see you at the next meeting

regards

عــيل شــقي يقول...

والله انا بقولك ان


اخويا قال لي ان انا كنت وحش معاكى

والصراحةو انا مش حاسس بدة

لو فى اى حاجة بجد

قوليلى على اللوج بتعاى


بس بصراحة
لحسن ازعل

ياسمين يقول...

عيل شقى

لأ يا محمد انت طفل جميل وانا مش زعلانة منك خالص لنى عند ولاد صغيرين برضه

وكل ما تكبر هتتعلم حاجات كتير .. مافيش حاجة تستاهل انك تكبر نفسك وتسيب طفولتك الجميلة وتشغل نفسك بأمور الكبار
ودة مش عيبك يا محمد انت جميل قوى .. دة عيب الكبار اللى بيدخلوك فى مشاكلهم ومناقشاتهم

يا ريت تكتشف الدنيا بنفسك .. واحدة .. واحدة .. احنا مش مستعجلين

ادم المصري يقول...

الاستاذة ياسميين
ــــــــــــــ
اولا شكرا جدا جدا جدا علي المجهووود الرائع المبذول لعمل هذه اللقاءات الاكثر من رائعه

انا بصراحه اتخضيت جدا لما لقيت الصورة .. بتاعتي في الاول .. ياعني كنت ابدئي الموضوع بحاجة عدلة ياعني هههه

ثانيا احب افكرك برده بموضوع الساقية فعلا .. بافكر نعمل صالون يجمعنا كلنا بشكل رسمي غلشان يكون للقاء تقل وتاثير بعد كدا في الاوساط اللي يهمنا نوصل لها كلمتنا علي الاصعدة المختلفة

اذا كانت سياسية
او ثقافية
او حتي اعلامية

اخيرا احب اشكرك جدا واليكي خالص تحياتي

ياسمين يقول...

آدم المصرى

اقتراحاتك جميلة فعلا وانشاء الله نفعلها مع بعض

انت انسان نشيط ومتحمس فعلا

تحية

mano يقول...

واضح انك متضايقه يا ياسمين
شعرت بكده من تعليقك عندى
صدقينى الموضوع مش سىء قوى كده
انتى اللى تعبتى في تنظيم اللقاء و اجتهدتى
و السلبيات بسيطه صدقينى مقارنه بالأيجابيات
يكفى انك اول من فكر فى اجتماع بلوجرز بالشكل الثقافى ده
كل ده و تكونى متضايقه
لأ يا ياسمين انتى لازم تكونى سعيده باللى حققتيه و كل مره هيكون احسن من اللى قبلها و كل مره هنتفادى اخطاء المره اللى فاتت
اوعى تزعلى يا ياسمين

tamer يقول...

انا فين بقى ياسيمن هو انا ما كنتش موجود ولا اية معاكم
لا انا زعلان

على فكرة موضوع الجمعية دة اقتراح اكثر من رائع وانا وياكى فية

تحياتى

bassem يقول...

حقيقى يا ياسمين كان لقاء هايل , بالرغم من إننا أميرة و أنا وصلنا متأخرين و فاتنا كتير , بس أتمنى المرة الجاية نكون فى الميعاد . أشكرك على هذا المجهود الرائع , و أن شاء الله تشوفى حلمك أكبر و أجمل

karakib يقول...

اللقاء كان جميل علي فكرة و أن شاء الله المرات القادمة يكون أفضل
شكرا لتعبك في تنظيمه
هاني

No Fear يقول...

السلام عليكم
ياريت الصور بس علشان انا ظاهر في صورة منهم

35L يقول...

أدعوكم جميعا للمشاركة فى البلوج بتاعى...موضوع مهم بدأت فيه....و أحتاجكم معى

ياسمين يقول...

مانو

انا مش متضايقمن اللقاء دة كان أحلى حاجة حصلت فى حياتى اليومين دول

أنا بس بأمر بأزمة عاصفة شوية فى حياتى

وشكرا يا مانوا لإهتمامك انتى انسانة جميلة فعلا

ياسمين يقول...

تامر

انت انسان ممتاز على فكرة وانا اتشرفت بمعرفتك
معلش فى ناس كتير حطت اللينكات
بس أوعدك المرة الجاية أجيب سيرتك يا بطل

nadine يقول...

ياسمين

كنت هخسر كتييييير لو ماكنتش جيت
و بجد لمست مجهودك انت و كل اللى تعبوا عشان اللقاء ده يظهر للنور

اليوم ده استحالة انساه
كفاية انه اول يوم فيه اقابل ناس جدعان زيكوا

لسة لحد دلوقتى كل ما بفتكر جو القعدة و الناس ببتسم
مبسوطة قوى انى شفتكوا
اتمنى اتعرف عليكوا اكتر
معرفتكم دى بجد شرف لى

سلام يا جميل

shady يقول...

شكرا فعلا يا يامين علي اللقاء التحفة دا .. انا بقالي شهر تقر يبا عامل المدونة .. وأول مرة احضر لقاء زي دا .. وغالبا مش هاتفتكريني .. المهم .. حبيت اشكرك فعلا .. كان لقاء جميل .. افادني جدا .. وان شاء الله تتكرر قريب

شادي

Majed Jarrar يقول...

شعرت بالإساءة والإهانة الشديدة عندما قرأت الدعوة على بضعة مواقع ووجدتها موجهة للمدونين المصريين

مع العلم أني كنت قمت بكتابة ملاحظة أني غير مصري وأن العراق و فلسطين و مصر كلها داخلها إف بعض ...

أنا كانت في نيتي الحضور، ولكن أحسست بأن الدعوة كان فيها تخصيص للمصريين من غيرهم

على كل حال، الله يسامحكو


:)
هههه أنا كنت بهزر

الحقيقة أني كسرت صباعين في رجلي ولم أستطع القدوم


ترقبوا، مفاجأة اللقاء الرابع
ماجد جرار
بعضمو وجلدو وشوية لحمه

ahmEd_H يقول...

ليه بقالك كتير خايفة تحلمى

دى الحياة كلها عبارة عن حلم جميل
احلمى علشان بجد الاحلام بتتحقق

انا كتبت عن اللقاء

ياسمين يقول...

باسم

انت نورتنا بوجودك انت واميرة
وكفاية اننا شفناكوا واتكلمنا معاكوا

وهاستناكوا المرة الجاية

تحية من القلب

ياسمين يقول...

كراكيب

اللقاء كان جميل بيكم انتم

واكيد تبقى معانا المرة الجاية

ياسمين يقول...

no fear

سيب الميل بتاعك وانا ابعتلك الصور
تحياتى

ياسمين يقول...

نادين

دة انا اللى مبسوطة قوى قوى انى اتعرفت على بنت جميلة جدا زيك

انتى خلاص بقيتى واحدة مننا يا نادين ومش هتعرفى تفلفصى

تحية كبيرة للجميلة نادين

amira يقول...

ميرسي يا ياسمين على مجهودك
وبجد اتبسطت
وبجد مقدّرة تعبك وقلقك علشان اللقاء يتم
لأن فعلاً الناس عندها هموم وأحلام زي اللي أنا شفتهم في الأوبرا
لازم يتقابلوا ويشوفوا بعض ويطّمنوا ببعض
ربنا يكرمك

تحياتي

محمد صلاح العزب يقول...
أزال المؤلف هذا التعليق.
محمد صلاح العزب يقول...

ياسمين
أنا عاوزك تبعتيلي إيميل عشان أعرف إيميلك عشان أنا عاوز أتفق معاكي على حاجة في اللقاء اللي جي بتاع المدونين
وياريت تقولليلي في الإيميل اللقاء اللي جي ده هيبقى إمتى
إيميلي هو
mohamedal3zab@gmail.com
شكرا ومنتظرك

ياسمين يقول...

شادى

انت شرفتنا بحضورك يا شادى
ونحب انك تكون معانا على طول

تحياتى

ياسمين يقول...

ماجد جرار

انت مرحب بيك فى اى وقت يا ماجد

وانا متشكرة انك لفت نظرى للموضوع دة

ألف سلامة عليك يا ماجد
وتحيا الأمة العربية

انت عراقى مش كدة

تحياتى

ياسمين يقول...

أحمد حداد

ساعات الواحد يخاف يحلم لأحسن حلمه ما يتحققش بعد سلسلة طويلة من الأحلام المخفقة

المهم ان حلمى اتحقق وبيكبر وانتوا معايا

انت عزيز علية قوى يا أحمد

ياسمين يقول...

أميرة

انتى انسانة أكثر من رائعة ودخلتى قلبى بسهولة من أول مرة اتقابلنا

أرجو تكونوا معانا دايما ويكفينى وجهك البشوش والذى يحمل فى طياته كل ما فى قلبك بسهولة

تحياتى من القلب

ياسمين يقول...

محمد صلاح عزب

أنا ايميلى موجود فى البروفايل بتاعى على المدونة وممكن تبعتلى عليه

هاستنى ايميل منك
وشكرا لتفاعلك واهتمامك بجد

تحياتى

أميرة ويلز يقول...

سعيدة اوى انى شفت صوركوا

وياريتنى كنت معاكوا بجد

وحشتينى ياياسمين

shady يقول...

بالنسبة للجمعية .. علي الاقل .محتاجين نتفق علي بروتوكول للتعامل .. يعني قواعد احنا اللي هانتفق عليه ونحاسب بعض عليها لو حد خرج عنها .. دي مشكلة الانضمام لتجمع .. تصرف فرد واحد يمس الكل .. لو ناويين فعلا تعملو حاجة جد .. نتفق علي بروتوكول .. افتحي موضوع ونتناقش

واحد من الناس يقول...

للأسف ضاعت الفرصه دي مني
بسبب ظروف السفر يوم الجمعه
كان نفسي اكون معاكوا
بس عالعموم انا فرحان لكل المدونين
ويارب اكون موجود المره الجايه

http://1minelnas.blogspot.com

mano يقول...

اخبارك ايه دلوقتى يا ياسمين
يا ريت اطمن عليكى

الدبور يقول...

ايه الاخبار النهارده كنت مروقه يعني ومبسوطه ن شاء الله علي طول كده
وانا اللي كنت عندي امل ان الاقي حد يعزمني علي الحفله و قلت مش في غير ياسمين ؟ الاقيكي كده بتبعيني و انا واقف !

مجهول يقول...

العزيزه ياسمين
ياريت تطمنينا عليكي
مش عارف ليه النحس ده
ادخل عالم التدوين الناس تخرج منه و تختفي
هوه فيه ايه
اكيد العيب مني
خلاص انا ماشي ومش راجعلكوا تاني
بس ياسمين لاء
وعلي فكره انا رقيتك
بقيتي
عميد
زي حسام حسن كده
بس قمر يعني مش زيه قوي
انتي بقيتي
نائب اول رئيس المنظمه
ت د و ي ن
ابسطي بقا و اضحكي
عايز ضحكتك تاني تنور
ثم ايه الزعل و الغيبه دي هوه خلاص يعني ممكن انتي كمان تتهزمي
هوه الدنيا جرا فيها ايه
انا ياللي لسه طالع من البيضه حديكوا درس برضه
القدوه قدوه يا ياسمين
مش مجهول اللي ممكن يتكلم عن ياسمين
ثم ما هي توتا انسحبت رغم حبي الشديد لما تكتب وده برضه مزهقني
ياجماعه افهموني بقا
مش من حقكوا دلوقتي تقولوا لاء
مش من حقكوا تتراجعوا
حرام بجد انتي وتوتا وحسني و شقير ومحمد رفاعي وناس كتير متبعدوش عننا
احنا عايزين اللي ينقدنا و يضيف لينا تعليق يوضح و ينقد ويزيد معلومه
بالصدفه البحته عرفت انك في مشكله من مدونه اسمها سهر الليالي
يانهار بمبي
انا صحيح معرفكيش وكل رصيدي في التعليق عندك مرتين تلاته بس تقولي ايه بقا
حاسس كده انك انسانه كبيره مش في السن طبعا علشان متزعليش
ويمكن حظي مكنش كويس اني التقي بيكوا واحترت كتير بين اني افضل كده احبكوا لما تكتبون فقط وبين اني اكون صديق واخ ونتقابل و نعرف بعض اكتر
قررت الابتعاد شويه ويمكن اغير رأيي في اي وقت
ارجوكي لا ترحلي بعيدا
فالمدونون سيبدأون عالما جديدا
وكم من كلام خلق واقعا بالعمل
وياستي لو طمعانه في المنصب بتاع رئيس المنظمه افكر
افكر
ممكن ابقا اتناقش كده مع نفسي واشوف
...................................
عزيزتي عارف برضه زمانك بتقولي ايه الرغاي ده بس استحملي بقا
بس بجد من انسان يمكن الا تريه يوما في حياتك لكنه مؤمن بفكره ان تضئ شمعه في الظلام خير من تلعن الظلام بقيه حياتك
لا ترحلي فجميعنا عصفت بنا الاحزان و الازمات وخصوصا العبد لله صاحب نظريه توقع السئ فالقادم اسوأ
لكن قليلون من ابحروا من ظلام همه الي شمس دنياهم
واثق انك ستعودين لنا مره اخري لانك كما قالوا جميعا عنك و اقرب الناس ليك
فقط انتي ياسمين
.................................................
سؤال غبي
هوه اسم ياسمين يعني ده مرتبط بالاراده؟؟؟؟
لك تحياتي دوما

ياسمين يقول...

أميرة ويلز

أنا مبسوطة عشان انتى مبسوطة

وأنا نفسى بجد اشوفك برضه

يا ريت تحاولى تبقى معانا المرة الجاية

تحية من قلب مجروح

ياسمين يقول...

شادى

كلامك مظبوط وطبعا لازم يبقى فى قوانين للجمعية وآداب عامة وبروتوكولات يتفق عليها الأعضاء ويوافقون عليها

قريب قوى الموضوع هيتفتح .. أوعدك

شكرا لإهتمامك

تحية من قلب مجروح

ياسمين يقول...

واحد من الناس

لازم تبقى معانا المرة الجاية

بس كان فى واحد من الناس تانى برضه اسمه طارق

لما تيجى هتبقوا اتنين من الناس

تحية من قلب مجروح

ياسمين يقول...

مانو

أنا كويسة يا مانو ياجميلة
وماحدش بيموت من الحب

شكرا لسؤالك ربنا يخليكى ليا يا قمر

تحية من قلب مجروح

ياسمين يقول...

الدبور

لما انت عاوز حد يعزمك طب ليه ما قلتش وكنا اتصرفنا

وبعدين مالقيتش غيرى يعنى
ماشى بس انت تبقى معانا على طول

تحية من قلب مجروح

ياسمين يقول...

مجهول

ايه الكلام الجميل دة
انت خلتيت عنية دمعت
كمان ذكرت اسمى وسط فطاحل التدوين اللى بيدونوا من زمن وانا لسة برضه تلميذة فى مدرستهم

ةالله أنا فعلا بأمر بأزمة فى حياتى بس لما فكرت انى أتقوقع شوية لقيت حب الناس ولقيت ناس بتقول عاوزينك معانا رغم ان معرفتى بيهم من فترة قصيرة
تخيل لما حد تبقى قريب منه سنين ويتخلى عنك وعلى الجانب الاخر ناس لسة عارفاهم قريب يهتفوا بإسمك

احساس جميل وكلام جميل
تليفونى ما بطلش رن من ساعة ما سهر الليالى كتبت البوست الفضيحة
حسيت قد ايه انتوا حلوين

شكرا يا مجهول .. بجد اشكرك لتعليقك الجميل جدا اللى طالع من القلب

تحية من قلب مجروح

Shower-Mirror يقول...

ايه النحس ده ...يعنى انا بقالى فتره بادون و ماكنش فيه حد بكل الحيويه دى و انتى الوحيده تقريبا اللى حولتى التدوين من ناس بتكلم روحها على الشاشات الى تفاعل من دم وروح و عشان انا فقرى زى ماقلت فأنا اخترت الوقت ده با>ات عشان اهج و امشى من البلد ... و يفضل التدوين بالنسبه لى و كأنى طفل اراقب ملعب كره من فوق كرسى متحرك ... لأ وزياده فى الفقر و النحس انتى كمـان عايزه تبطلى ..اوعى تعملى كده لاحسن كده يبقى الكرسى ابو عجل بقى عكاز ... :) طبعا انتى مستغربه لأنك ماتعرفنيش بس انا متابعك من زمان انتى و كل فعالياتك و انا اعض شفتى من الغيظ لانى مش معاكو ... :) ... بالنسبه لجرحك .... اه لو تعرفى التجارب بتعمل ايه فى الواحد و بتفيده ازاى ...!! كنتى تتمنى ان كل التجارب تكون مؤلمه .. و اول فوائد التجربه انك عرفتى الناس بتحبك قد ايه و هاتتجنن عليكى بعد ما سهر الليالى فرجت عليكى الدنيا :) تحياتى و من فضلك ضيعى شويه من وقتك و زورى مدونتى و اقريها من الاقدم للاحدث .. و النبى ياشيخه - و حياة مرات خالك - لاتقولى رأيك ... تشـــاو

mostafa يقول...

بداية أنا أول مره أقرا لكي وأول مره أتعرف عليكي لسبب أني جديد علي عالم التدوين .عمري في عالم التدوين كم أسبوع لا أكثر وخبراتي فيه ضئيله جدا لكن بجد أعجبني كتير لقاء المدونيين ويا رب يكون هذا نواة لمشروع كبير أنتي صاحبة الفضل فيه.أتمني أنه في يوم من الايام التقي بكم انا حاليا لا أستطيع كتير التفاعل معكم لسبب انا ذكرته ألا وهو خبرتي الضئله في عالم التدوين.ختاما أحب ان أقول لكي أستاذه ياسمين لا أحد منا تخلو حياته من الهموم والمشاكل أدري ان النصيحه سهله ممن هو خارج دائرة الحزن والهموم لكن بجد ياسمين الكل يعاني وكل فرد فيسنا بيعتبر مشكلته نهاية العالم لكن بجد ياسمين أصبري وأري أن خير وسيله للهروب من المعانا وهذا عن تجربه أشغلي نفسك بالعمل او شئ مفيد وأعتقد ان عالم التدوين والتفاعل مع الاصدقاء والحكي معهم هو مخرجك من الهموم. لان فيهم من سوف ياخذ بيدك وينصحك باخلاص .أتمني لكي كل خير ويا رب يفرج عنك كربك وهمومك امين يا رب في حفظ الله استاذه ياسمين.

micheal يقول...

ياسمين...أنتي بخير؟.../علش أصلي قلقت عليكي لاني لقيت بوست عند أميره بتقول فيه أنك بتفكري تقفلي المدونه..ابقي طمنيني
تحياتي و أمنياتي الطيبه لكي

amany يقول...

مبروك عليكى ياقمر ويارب احلامك كلها تتحقق واشوفك اسعد انسانه فى الدنيا كلها لان تستحقى ده فعلا
تحياتى للزعيمه المتالقه
هو فى زعيمه حلوه اوى كده

الأرمـوطــي يقول...

ياسمين انا قرات الكلام بتاع سهر اليالي اتا كنت واحد من الى اتجمعوا فى الاوبرا بس كنت الوحيد الى مليش مدونة ولاعندى فكرة عن الموضوع لكن جو المجموعة حبيتوا قوى انا من زمان كان نفسى انتمى لمجموعة لكن مكنتش ملاقى مجموعة مناسبة ليا واعتقد انى اخيرا لاقيت انت من الشخصيات القيادية في المجموعة يمكن انتى اكتر واحدة عندها كارزمة القيادة انتى بتعتبرى حجر الزاوية للمجموعة مينفعش نسيبينا مش هنقدر نكمل من غيرك..اخيرا احب اقولك انى مشارك معاكى بمشاعرى فى المشكلة الى بتقبليها بغض النظر عن ماهيتها وياريت كان فى شئ اكتر من كدة ممكن اساعد بية

Ahmad El-Saeed يقول...

إيه ده ... هو المدونين بيعملوا لقاءات ؟!؟!؟ ... أى كلام ده فى أنهى دنيا

الكلام ده بيحصل فين و إمتى ?!! من فضلك يا ياسمين إبقى إهتمى بالدعاية شوية

و أنا كمان هحاول اهتم بالمتابعة اكتر

:-D

ِأحمد السعيد

white seagull يقول...

ياسمين أعتذر بشدة عن إنى مأعدتش معاكوا بس أنا أصلى أتاخدت على خوانة,أنا بصراحة ماكنتش أعرف حاجة عن البلوج بتاعك و لا عن لقاء البلوجرز ده و كنت رايحة الأوبرا لغرض تانى خالص فكنت حسة إنى عبيطة كدة و مش فاهمة حاجة وسطكوا بس إن شاء الله تتعوض و اللقاءات جاية كتير و لا إيه؟
أنا بس كنت عايزة أسألك سؤال..إنتى ليه مهتمية قوى كدة بموضوع اللقاء ده و إن أكبر عدد يشارك؟ مجرد إستفسار مش غلاسة و الله..
و أشكرك على ترحيبك بيا رغم عدم معرفتك بيا و ياريت تبقى تزورينى فى البلوج من حين لأخر يعنى :)

The Groom يقول...


مش عارف ايه اللي جابني هنا؟ تقريبا من عند مدون ما
انا والله كنت بفكر في الموضوع ده من زمان

حلو أوي ان الناس تتقابل في الحقيقة
انا كنت بعمل كده

ان شاء الله لما أنزل مصر تاني حخليكي تعملي لقاء تاني أحضره أنا المرة دي والله مفيش أحلى من ان الواحد يقابل ناس ميعرفهاش من كل شكل و مكان ولون من بلاده

ربنا يخليكم جميعا يا رب

تصبحي على خير بتوقيت ماناساس البلد

سلااااام

عبدالله يقول...

ازيك يا ياسمين عامله ايه دلوقتي
اكيد دلوقتي نفسي كنت خدت تلفونك اتصل بيكي بس يالا اكيد كنت هلاقيه مشغول
:)
اتمني تكوني بخير

ملاحظة صغيره
غيرتي التعليق الجامد الي كان تخت الصوره ليه
:)

تحياتي

غير معرف يقول...
أزال أحد مشرفي المدونة هذا التعليق.
safa7_karmooz يقول...

i miss that day :'(