السبت، 6 يناير 2007

اللقاء الشهرى

الى كل زوار مدونتى .. عاوزة أقترح عليكم اقتراح
ايه رايكم لو نعمل لقاء شهرى .. نتقابل فيه فى مكان عام .. قهوة مثلا .. بس بشرط يكون فيها شيشة ويا ريت تبقى فى المهندسين
أحب أسمع رأيكم
أولا موافقة أم غير موافقة
ثانيا اقتراح بميعاد اللقاء ويكون يوم ايه من كل شهر
ثالثا اقتراح بمكان اللقاء
رابعا العدد المقترح

هناك 65 تعليقًا:

smraa alnil يقول...

يا سمين

انا موافقة
بس لازم موضوع الشيشة دة ؟؟؟؟
يعني ممكن نتغاضي عنه
وياريت اليوم يبقي في اوائل الشهر علي الاقل الواحد يضمن ان يكون معاه فلوس فايضة من مرتبه
بالنسبة للمهندسين اشمعني يعني
ليه مش يبقي في اي حتة تانية
عامة مش فارقة
بس الناس توافق وانا معاهم

انحلت سيور العربه وسقط المهر من الاعياء يقول...

ياسمين

والله هى فكر ه كويسه

ممكن نر وح سا قية الصا وى
لان دا مكا نى مفضل
وعا دى الشيشه دى كويسه بس النا رجيله احسن
هههههههه

وكل واحد على حسا به ويكون يوم خميس او جمعه فى اى وقت
دا رايى والبا قى لما يقرره السا ده اعضا ء الفريق

وحشا نه والله يا يا سمين
انتى فين
كل سنه وانتى طيبه

محمد عبد الغفار يقول...
أزال المؤلف هذا التعليق.
محمد عبد الغفار يقول...

لغيت التعليق بتاعى عشان لقيت فيه لخبطه فى الكلام كالعادة وهنشره تانى بعد التصليح وهتلاقوا فى غلط بردو

السؤال الهام بما ان مدونتك موجهه لكل نساء الشرق فهل يا ترى الدعوه للنساء فقط ولا مختلطه؟؟

فكره جهنمية بتعبر عما بداخلى وجال بخاطرى الفتره اللى فاتت دى كلها واكتب الملاحظات التاليه والرد على اسئلتك ان كانت الدعوة مختلطه وان كانت للنساء فقط فلا مانع من الأسترشاد بمقترحاتى

موافق طبعاً، ده إذا كنتم تقبلى وجودى

بالنسبة للشيشة .. هى مش قضية يعنى مفيش مشكله بس لازم نحترم اللى مبيحبوهاش لإن ده ايذاء للأخرين وكحل وسط ممكن يبقى فى اعده شيشه بعد اللقاء العام

ميعاد اللقاء . . . يكون أول خميس او جمعه من اول كل شهر وبالنسبة للشهر الحالى نخليها الخميس 11/01/07 او الجمعه 12/01/07 عشان الأول فات خلاص

المكان . . . بالنسبة لى اى مكان موافق عليه كبدايه وبعد كده نبقى نقترع ، المهندسين الصراحه انا مبحبهاش خالص بس مش مشكله كبدايه ، واقتراح ساقيه الصاوى كويس بس انا مش عاوز اللقاء ينبعث من مكان له انتمائه واتجاهاته فإقتراح القهوة افضل ، اقتراح مكان محدد بعينه صعب اوى بالنسبة لى وكبداية موافق على اللى توافق عليه ياسمين بما انها صاحبه الدعوه

العدد المقترح . . . مش مستوعب السؤال اوى بس قصدك اننا نحدد عدد للحضور مش شايف انها منطقية لإن مش معقول واحد ولا واحده عاوز يحضر نقله معلش المره الجايه اصل العدد كمل ، أقترح نسيبها مفتوحه والعدد هيصفى نفسه بنفسه

رجاء وملاحطه هامه . . . أحنا كمصريين حبالنا طويله وبنحب نغوص فى بحور من الجدل فأرجو سرعه البت فى الموضوع وتحديد ميعاد ومكان فوراً لترى الفكره النور حتى لو بفردين وبعد كده نبقى نظبط اى إختلافات

سندباد مصري يقول...

هذا أول مرور لي

أحييك بشده علي جرئه موضوعاتك

فقد أصبحت الجرئه عمله نادره هذه الأيام

والسلام

أسوور يقول...

سندباد المصرى
دخلت على مدونتك ولقيت عبقرية غريبة
بحب الكتابات الصغيرة القصيرة اللى بتقول كل حاجة فى ولا حاجة .. طول عمرى بحب النمط دة .. لقيته فى مدونتك
أستاذ

أسوور يقول...

سمراء النيل

الجحيم هو الحقيقة

محمد عبد الغفار

انا بحب الشيشة لكن مش مهم .. زى ما تحبوا بلاهة شيشة

وطبعا موضوع أول الشهر أظن الكل هيوافق عليه

ولو مش فى المهندسين هنروح فين .. أنا شخصيا موافقة على المقطم .. جداجدا
بس كل الكافيهات الحلوة فى المهندسين
وساقية الصاوى مكان لطيف لكن عاوزين لقائنا فعلا يبقى له هوية خاصة
ممكن نفتح كافيه نتقابل فيه ههههه
متهيألى نختار مكان غلبان ومش مشهور وما فيهوش مينيمام تشارج (حد أدنى للطلبات) ونتقابل فيه ونشهره

وعلى فكرة يا محمد يا عبد الغفار
الدعوة عامة للجميع من أصحاب المدونات .. بنات وصبيان وكمان اللى بين البينين لو عاوزين .. المهم يكون له مدونة .. هو دة الشرط الوحيد
وأنا موافقة ان اللقاء يكون الخميس أو الجمعة الجايين

كدة متهيألى .. مبدئيا هقابل محمد عبد الغفار وسمراء والجحيم يوم الجمعة الجاية الساعة 7 م فى كافيه تريانون سور نادى الزمالك

وعلى فكرة أنا ممكن أرتب اللقاء فيما بعد فى نادى الصيد أول كل شهر بس نتقابل أول مرة وبعد كدة نتفق على اللى جاى

وممكن نتجمع فى ميدان السيدة عيشة ونطلع المقطم فى هناك كافيه حلوة بحبها مووووت اسمها قصر الشوق .. وما تخافوش اللى ماعاهوش عربية هأوصله بنفسى

أى اقتراحات أو تعديلات ويا ريت بسرعة عشان موضوع الحبال الطويلة دة ؟؟؟؟

محمد عبد الغفار يقول...

بقى بزمتك يا ياسمين تريانون مكان غلبان، امال قهوة ناصر وبدوى اللى بعد عليها تبقى إيه ما علينا

المقطم طبعاً تحفه قصر الشوق السكريه بين القصرين كله فل ، بس اعتقد صعب اوى فى اول مره

على اى حال انا لو محدش بعتلى اى تغييرات هتلاقونى فى تريانون سور نادى الزمالك الجمعه بإذن الله الساعه 7 مساءً

ونبقى نظبط موضوع الشيشه ده فيما بعد تريانون واوعوا تدونى بمبمة

غير معرف يقول...

فكرة كويسة
وخصوصاً إن هيه كل شهر
بس أنا ماضمنش برضه إنى أكون موجود كل شهر لأن أنا إسكندرانى
بس فعلاً لو فيه إمكانيه إنى أكون موجود مش هتأخر

Yasmine Adel Fouad يقول...

انا مش من الزوار بس موافقه و اجى ليه لا
و للا اللى بيجى لازم يكون وجه قديم

ياسر شمس الدين يقول...

انا كان نفسى اجى بس لو فكرتوا انكم تتقابلوا فى اسكندريه اوعوا تنسوا تقولولى لانى اسكندرانى ولما تيجوا انا عازمكم على حسابكم على اى كافيه تختاروه وانا بقترح لو جيتوا اسكندريه فى كوستا على البحر والا اقول عشان ياسمين بتحب الشيشه نقعد على جوهره ستانلى

SomeOne يقول...

امممممممممممممممم

وانا كمان

واناكمان

بس الجمعة الجاية دي قريب قوي

وانا دلوقتي في اسيوط بعمل شوبينج

ههههههههههه


اوعي يكون موضوع اللقاء ده فرقعة اعلامية؟؟؟؟؟؟؟؟؟؟؟؟؟؟؟؟؟؟؟؟؟؟؟؟
قصدي تدوينية

عموما ولوني مفلس بس ح احاول اجي
بس يا ريت نخليها اول الشهر

تسمحيلي
ادعي مدونيين اصحابي
؟؟؟؟؟؟؟؟؟؟؟؟؟؟؟
انا بقول نحدد عدد معين

بس انا احجزيلي 4 اماكن اصلي معايا ثلاث مدونين ذي العسل
وعايز استغلها فرصة و اقابلهمم

SomeOne يقول...

الله

جامدة قوي
حكاية عمرك
2007
اللي في البروفيل دي

أسوور يقول...

محمد عبد الغفار
وكل الزملاء من المدونين والمدونات
هبقى فى نفس المعاد فى تريانون وهأعرفك من صورتك يا عبد الغفار..
الساعة 7 يوم الجمعة الجاية فى تريانون

أسوور يقول...

مش فاهمة تقصد ايه يا شادى

أسوور يقول...

أنا حرة
ياسر
أيمن
الجميع مرحب بيه .. الجميع من المدونين المحترمين .. وممكن نعمل افجتماع فى اسكندرية فى الصيف وعليك خير

أحمد سلامــة يقول...

انا لسه ماقريتش أي حاجة في المدونه بتاعتك بس الفكره دي تحفه و وكلالي دماغي من ساعة ما عملت المدونة بتاعتي
بس في حاجه
ساقية الصاوي ممنوع فيها التدخين للأسف

أسوور يقول...

أحمد سلامة
مرحبا بيك معانا .. احنا اتفقنا خلاص ان اللقاء يبقى فى تريانون المهندسين .. سور نادى الزمالك .. الساعة 7 يوم الجمعة الجاى الموافق 19 يناير ..
واهلا بيك من أصدقاء المدونات
أرجو انك تقرأ مدوناتى وتقول رايك

maged stephen يقول...

ياسمين
ازيك
أنا عرفت المعاد والمكان
الساعة سبعة يوم الجمعة 19 يناير
تريلون سور نادى الزمالك
يا ريت لو فى تغيير يا ريت أعرف منك
0127438525
ده اذا كان ممكن أجى؟
لو مفيش مانع من حضورى
أقترح التنسيق بالذهاب للمكان قبل الميعاد لأنى عددنا هيكون كتير
لو موافقة ممكن تكلمينى؟

محمد عبد الغفار يقول...

يخرب بيت المهلبيه ، الجمعه الجايه يبقى 12 يناير أما 19 يناير يبقى الجمعه الى بعدها
انت كده هتخلينى أعمل زى علام الملوانى فى مدرسه المشاغبين

الميعاد بإذن الله الساعه 7 الجمعه 12 يناير اللى هى تبقى الجايه صح كده ولا ايه

أما حكايه المعرفه فأنااول اما بخش اى مكان براسى بنور على طول وهتعرفونى من الشعاع

maged stephen يقول...

12
والا
19
يا ياسمين
؟؟؟؟؟؟؟؟؟؟؟؟؟؟

أسوور يقول...

محمد عبد الغفار
ستيفن ماجد
المعاد فعلا 12 يناير .. أنا اللى غلطت فى النتيجة
ومتهيألى فعلا ان تريانون هيبقى زحمة موووت يوم الجمعة ..
ولازم نحجز قبلها .. أو لو فى اقتراحات بأماكن أخرى اقل زحاما ..

Shreif fahmy يقول...

ياسمين أزيك انا شريف صاحب مدونة يوم في وسط البلد طبيعي أني استأذن اني احضر معاكم أول خروجة تسمحيلي؟

Shreif fahmy يقول...

وعندي اقتراح يارب يعجبكم وياريت تعرضيه على الناس يااستاذة ياسمين وهو كل واحد يختار من وجهة نظره مدونة واحدة من مدوناته ويقراها ونناقشها مع بعض؟ ده مجرد اقتراح

الحصان الأسود يقول...

اقتراح هايل

بس بلاش ساقية الصاوي خلليها اي كوفي شوب هادي في المهندسين او مدينة نصر او المقطم بس بلاش ساقية الصاوي دي
وتريانون دة اكيد حايبقى زحمة

انا معاكم وعاوز شيشة كريز

الحصان الأسود يقول...

ياسمين

انا ممكن اظبطلك كوفي شوب تمام وفاضي تماما واحجزة من قبلها ومن غير مينيمم تشارج

فية واحد قدام الوفاء والامل عند السراج مول اسمة استرا

والتاني على مصطفى النحاس بعد المنهل اسمة سي لا في

و

أسوور يقول...

شريف فهمى
الحصان الأسود
طبعا أنا كل ما بألاقى مدونين معجبين بالفكرة بأحس بالفخر بجد

فى كافيه حلو وهادى فى المقطم اسمه قصر الشوق فى شارع 9 .. وأسعاره كمان كويسة وممكن نعمل منه ملتقى لينا نحن المدونين .. فيه شيشة وأكله كويس
هو المقطم هيبقى ظريف للى معاهم عربيات .. وما فيهوش مشكلة لكن اللى معاهوش عربية .. يركب أى حاجة لميدان السيدة عائشة ومنه ميكروباصات المقطم بالعبيط .. وقول للسلئق انك عاوز تنزل عند كافيه قصر الشوق فى التجاريين .. جميع المواصلات تمر عليه ودى أسهل مواصلة ..

هو فعلا يا شريف لازم يبقى عندنا برنامج للقاءاتنا

ممكن فى أول لقاء .. كل واحد يقول ويحكى عن متى أول مرة ومن من عرف عن البلوجات .. وما الذى دفعه لعمل مدونة خاصة بيه هو شخصيا..

ولكم الرأى الأخير فى النهاية

الحصان الأسود يقول...
أزال المؤلف هذا التعليق.
أسوور يقول...

الحصان الأسود
الطريق سهل من هناك اسأل تطلع المقطم منين .. تدخل المقطم من منطقة الزلزال .. تلاقى شارع 9 وهو أكبر شارع فى المقطم .. تمشى على طول فيه .. لحد ما تلاقى منطقة التجاريين على الشمال .. تلف وترجع يو تيرن .. هتلاقى الكافيه قصر الشوق على يمينك
صدقنى لو طلعت المقطم هتوصل بسهولة .. المقطم كله شارع واحد هو شارع 9 ومتفرع منه باقى المنطقة كلها

أسوور يقول...

ناخد رأى الأغلبية .. أنا موافقة على رأى الأغلبية .. عند الوفاء والأمل .. ماشى برضه .. اللى تشوفوه يا جماعة

الحصان الأسود يقول...

أش أش يا ياسمين

قاعده تكتبي الاسامي بدل اللينكات على مدوناتنا اخيرا اهو

اكيد دة بسبب انك لاحظتى انى النهاردة برضة عملت تعديلات على اساميكم عندي فيها طابع كاريكاتوري

اياك بس مايكونش عندك اعتراض عالاسم اللي انا لسة عامله النهاردة لمدونتك عندي بس هوة يعني تريقة زي مانتي شايفة على كل اسامي المدونات

لو بجد مش عاجبك قوليلي وانا غيرة

بس ماوعدكيش انة يكون احسن ويعجبك برضة
هههههههه

تحياتي يا فلة وياسمينةالمدونات

SomeOne يقول...

انا بقول
ان انت مكتوب في بروفيلك
ان عمرك
2007
سنة

انا كده
اتلخبط خالص من كتر الاقتراحات
ومش عارف انت رسيتوا على ايه

تريانون
ولا
قدام الوفاء والامل
ولا
قصر الشوق
؟؟؟؟؟؟

صدقيني خفت منك يقول...

على فكره انا عندي امتحان يوم 20 وعايز اجي خليها يوم 21 وفي المهندسين اوك عشان انا رايح العب كوره هناك وممكن العب كوره وبعدين نروح بس لو عملتوها من غيري هزعل اوي

الحصان الأسود يقول...

لا انا يوم 21 حايكون عندي برد

والمهندسين بعيدة عليا
والدنيا حاتكون بتمطر والشوارع مبلولة

خليها في مدينة نصر يوم 19الساعه عشرة علشان انا حاكون باشتري بقالة من عم عبدة البقال من 9 وممكن اجي بعدها قهوة كتكوت اللي جنبة

هههههههههههههه

ابتدينا خلافات القمم العربية بقى

واتفقوا على الا يتفقوا

وحاترسي في الآخر ان ولا حاجة حاتتعمل

هيه دي مصر يا عبلة

أسوور يقول...

الظاهر اننا فعلا مش عارفين نتفق .. وغريبة ان مافيش اى مشاركات من صديقاتى المدونات ..
يا ترى ليه ..؟؟؟

Shreif fahmy يقول...

ياسمين عاوزة نصيحتي بجد انتي صاحبة الاقتراح وبجد الاجتماع هينجح حتى لو ابتدينا 3 أو 4 أشخاص ويكون ميعاد ثابت زمحدد كلنا نحترمه ونواظب عليه يوم الخميس تكتبي وتقولي الميعاد والمكان النهائي ومرحبا باللي يجيي ومرحبا برده باللي مش هايجي ولما نتائج اجتماعنا تقوليها وتنشريها الناس بعد كده هتواظب وكالعادة دايما في كلامي ده اقتراح اتمني يأخذ حيز التنفيذ منك

smraa alnil يقول...

ياسمين
انا ان شاء الله جاية بس عشان خاطري بلاش موضوع المقطم دة
دة بعيييييييييييد موووووووووووت
عني
خليها المهندسين او مدينة نصر
حاجة الواحد يعرف يوصلها وعلي الاقل مش ابقي قلقانة وانا مروحة
لحسن اختك حمارة مواصلات ومش بتعرف تركب مواصلات بجد
يناسبني الجمعه
بس ياريت نتقابل انا وانتي الاول قبل ما الناس دول ما يجوا
يعني مثلا لو المعاد 7 نتقابل احنا 6 فاهماني
بس حاولي بجد

الأميره أوسه يقول...

أولآ أزيك
هو أقتراح كويس
بس أنا شايفه أقتراح شريف كويس
وهو تحديد يوم فى الشهر والأعلان عنه
وعن المكان
واللى عنده وقت يشرف
أنا مثلآ من شهر مش أخد أجازه
ولا حتى فى العيد
عشان كده مش برتبط بميعاد عشان الشغل
لكن لو فاضيه أجيلكوا
بس ياريت لو فى التحرير
عشان ده وسط البلد
والدعوه تبقا عامه
ومعلش سمراء النيل تستحمل
دخان الشيشه
انا عن نفسى باشرب حشيش
هههههههههههه بهرج
أنا بشرب قهوه بس
طيب هو ينفع أجيب معايا شندوشتات مربى
عشان لو جعت فى السكه
ممكن الدعوه تشمل أخواننا الناشطين السياسين بحيث بعد اللقاء ده نروح
نتغدى فى أمن الدوله ونعيش بقا
خاصة لو أنضمت لينا الرفيقه شهروزه
والجماعه اليساريين وبتوع حموم الأنسان
وممثلى كتلة الأخوان والأخوه الأشتركيين
كده نقضى ليله سعيده

أسوور يقول...

شريف فهمى
كلامك واقتراحك صح ومية مية
المعاد يوم الجمعة فى تريانون المهندسين سور نادى الزمالك الساعة 7 ودة آخر كلام
وممكن يومها نبقى نتفق على مكان المقابلة التالية وناخد رأى الأغلبية من الحاضرين بجد

أسوور يقول...

سمراء النيل .. حبيبتى الحنونة ذات القلب الذهبى
موافقة طبعا .. المعاد هيبقى انشاء الله فى تريانون سور نادى الزمالك فى المهندسين .. الساعة 7 يوم الجمعة ان كان لنا عمر انشاء الله
وطبعا عند الإتفاق .. نتقابل الأول قبل الجميع
دة أنا مشتاقة لرؤياكى جدا جدا .. وشرف لية انى أتعرف عليكى يا سمراء

أسوور يقول...

أوسا الغالية
والله وحشتينى .. فينك يا حبوبة
مبسوطة جدا جدا لمشاركتك .. بحبك من قبل ما أشوفك وجرأتك بتجننى
معلش المعاد الأول هيبقى فى تريانون المهندسين .. سور نادى الزمالك .. الساعة 7 م يوم الجمعة
وفى المقابلة ناخد رأى أغلبية الحاضرين بمكان المقابلة التالية
يا ريت تنورى المقابلة دى .. هيبقى ناقصنا حاجة كبيرة قوى لو ما جيتيش

elgharep يقول...

أنا على نفسى موافق مع أنى أنى أول مرة أزور مدونتك
تقريبا حكرر نفس الأئلة اللى سألتهالك سمراء النيل
ومع هذا أنا موافق

أسوور يقول...

الغريب
انت نورت البلوج
وأهلا بيك فى اللقاء الشهرى الأول
ويا رب تكون مدونتى عجبتك

الحصان الأسود يقول...

سمراء النيل

اية بقى حكاية تتقابلي انتي و ياسمين قبل الميعاد بساعه و "فاهماني" دي

شامم ريحة نميمة حريمي في الموضوع

خللي الاجتماع في النور يا ستات يا وحشين يا نمامين وبلاش الاجتماعات الجانبية دي

على فكرة بقى انا حاطب عليكم بدري انا كمان واشوفكم قاعدين تنموا على مين ياعفاريت

أسوور يقول...

الحصان الأسود
أهلا يا عريس .. هات عروستك معاك
لازم طبعا حتة كدة على هامش الإجتماع .. أمال ايه

الحصان الأسود يقول...

ياسمين

ههههه
عروستي مش معايا عروستي جزائرية وعايشة هناك

ولسة انا بافكر في الموضوع وماخدتش فية قرار

بصراحه متردد جدا فية لاسباب عديدة

اختلاف الثقافات والطباع وحتى اللغه عامل مهم لا استطيع تجاهلة

بس هيه فكرة في بالي بعد مافقدت الثقة تماماً في بنات البلد دي

nooooooooooo يقول...

فكرة جميلة جدا

بس مع الاسف مع الألم ماقدرش اجى علشان الحاكم بأمر الله سى السيد ممكن يعمل فيها جنايه

و انتى حبيبتى ماترضيش بخراب البيوت

على عينى انى ماجيش معاد نتقابل فيه كان نفسى اشوفكم اوى

اتمنى لكم وقت سعيد

أسوور يقول...

الحصان الأسود
عموما هى فكرة ممكن تكون كويسة لأنى أبصملك بالعشرة ان برضه بنات البلد دى .. فقدوا الثقة فى رجالتها
الظاهر الحال من بعضه
بس صدق أو لا تصدق .. الموضوع مش فى رجالة البلد أو بناتها أو البلد اللى جنبها
الستات والرجالة فى كل البلاد مش عارفين يحلوا المعضلة دى
أعرف ناس متجوزة من 30 سنة وسعداء جدا .. وأعرف ناس متجوزة من 30 يوم وتعساء جدا

لو قريت كتاب " الرجال من المريخ والنساء من الزهرة هتفهم حاجات جديدة عن علاقة الرجل والمرأة خلال الزواج
ولو اتقابلنا هابقى أسمع حكايتك .. واعرف سر صدمتك فى الستات
يا ريت تيجى مقابلةالجمعة

أسوور يقول...

فانسى الجميلة
مش معقول مدونة كبيرة زيك لسة بتأتمر بأوامر سى السيد
حتة تسخين ع الماشى كدة
والله كان نفسنا نشوفك ولو تحبى نعمل اجتماع تانى للبنات بس عشان خاطر عيونك الجميلة يا قمر
كلامك يمشى .. بس انتى أأمرى

الحصان الأسود يقول...

ياسمين

والله انا بحكم سني و خبرتي اعتقد اني فاهم "شوية" في العلاقات بين الراجل والمرأة
وكمان انا شفت الفيلم "الرجال من مارس والستات من الزهرة" من زمان

بس ماعنديش مانع لو تجيبي معاكي نسخة منة وانتي جاية يوم الجمعه تسلفيهالي اسبوع اقراها

دة مش معناة موافقة ضمنية اني اجي اجتماع الجمعه, لأني بصراحه خايف, ومنك انتي بالذات, وخاصة بعد ماقريت مقالاتك الاخيرة و تعليقاتك عالبوستات عندي يا عدوة الرجل
ههههه :)

سيف من خشب يقول...

السلام عليكى اختى العزيزه لم اشاء ان ارد على موعدك هذا فانا قد قرات البست اول مره نشر فيها وفكرت كثيرا فى انى ارد عليكى وبماذا ارد وهل يهمك فعلا ان تعرفى من هو السيف الخشبى وهل تريدى ان ترى هذا الشخص حقا واخيرا كنت عايز اعلق عند سمراء النيل لكن مش عارف هى تقريبا قفلت التعليقات ليه

أسوور يقول...

الحصان الأسود
على فكرة أنا مش بأعض .. بس برضه فاهمة شوية فى العلاقة بين الرجل والمرأة
وعموما أنا حكايتى مش مقياس خالص .. وكل كتاباتى نابعة من إحساس واحدة واخدة مقلب كبير وكانت فاكرة نفسها بتفهم
أنا كنت بأحل مشاكل الناس .. وفجاة لقيتنى محتاسة .. مع انى مشيت تبع الكتالوج .. زى ما الكتالوج قال .. أنا عملت .. وأحسن كمان
بمنتهى الحب .. بمنتهى التفانى .. بمنتهى الإنسانية .. بمنتهى الأنوثة .. بمنتهى الرغبة .. بمنتهى حنان .. بمنتهى الإيمان
كل دة ومانفعش
طب بذمتك مش لو مكانى تكتب أكتر من كدة
وتحس ان الدنيا مكان ضيق .. ضيق .. مايسعش حتى .. حبيبين

سيف من خشب يقول...

انا اقدر لكى لنك تذكرتينى بالدعوه لكن ان اتيت سوف اتى باكرا معكى ومع سمراء حتى اراكم انتم فقط فاعرفكم موافقه ام لا واسالى سمراء ايضا

أسوور يقول...

سيف من خشب
انت تنور يا باشا
بس المشكلة دلوقتى ان سمراء فى موود وحش وقفلت الكومنت عندها
و وحشتنى جدا ومش عارفة ايه موقفها من الموضوع دلوقتى .. أنا كنت نفسى اقابلها لكن مش عارفة ألاقيها ازاى دلوقتى

الحصان الأسود يقول...

ياسمين

والله حكاية الكتالوج دي انا معترض عليها

العلاقات الانسانية بين البشر مالهاش كتالوج

ومالهاش اي مقياس اصلا
وانما هي تخضع للتجربة الشخصية و التفكير الشخصي و التصرف بناء على ما يملية الضمير والعقل والقلب

مالهاش نظريات ولا اسس وانما هي تنبع من ذات نفس البشر وتبعا لميولهم واهوائهم

وفهم اغوار النفس البشرية لا يقدر علية كتاب لانة يختلف من شخص لاخر

يعني بالبلدي كدة انتي اللي تفهمي حبيبك او زوجك بناء على معرفتكم ببعض و بناء على خبراتكم و مشاعركم لكن مافيش كتاب حابفهمك تفهمية ازاي وتتعاملي معاه ازاي..... مالوش كتالوج يعني
انا عندي خلفية عن جرحك بس ماعرفش تفاصيل و لا ملابسات الموضوع
بس اقولك انا ماعرفش اكون مكانك ,بس اللي اعرفة ان مكاني ماهواش جنة ويمكن مش احسن من مكانك

ياريت على فكرة بلاش حكاية الاجتماعات الجانبية دي لاني شايف ان ,بعد طلب سيف خشب ومع كل احترامي, الموضوع حايبقى اجتماعين منفصلين
وشايف اننا كلنا كمجموعه من المدونين مانعرفش بعض ولا نعرف اسامي ولا اشكال
وماعتقدش اننا حتى حانتعرف تعارف كامل على المستوى الشخصي بسهولة ومن اول مرة احتراما لخصوصياتنا
بس من الافضل ان نجتمع سوا وندردش واللي عاوز يحكي يحكي بس من غير ماحد يقحم نفسة في خصوصياتة احتراما للحياة الشخصية لكل شخص وحقة الطبيعي الا تكون عرضة للنقاش على الملأ إلا إذا أراد

بالمناسبة هوة اية اللي حصل لأنجي ولية هيه عملت كدة
هل الموضوع ان حد علق عندها تعليق هاجمها او انتقدها انتقاد اثر على معنوياتها للدرجة ام حدث ظرف شخصي

انا عارف انكم بينكم وسائل اتصالات وياريت تطمنينا عليها

أسوور يقول...

الحصان الأسود
أولا .. الظاهر انك فهمتنى غلط شوية فى موضوع الكتالوج دة لكن مش مشكلة
والله عندك حق فى موضوع المقابلات الجانبية دة .. ممكن نتقابل أولا ثم جميعا كل شهر .. واللى عاوز يعمل اجتماعات تانية بقى مع البعض هم أحرار .ز يعنى ممكن أبقى أنا وسمراء أصحاب أكتر وأعزمها فى بيتى أو نخرج سوا .. دة مش معناه ان فرض علية انى ما أشوفهاش الا فى الإجتماع الشهرى
المهم ..
أما عن سمراء .. أنا مش عارفة ايه الحكاية .. لكن هى واحشانى .. ومش فاهمة دة حصل ليه
أو تقريبا كدة ممكن أكون حاسة بحاجة معينة لكن مش متأكدة .. وهى لما ترجع أكيد هتشرحلنا كلنا
يا رب ترجع بقى

الحصان الأسود يقول...

ياسمين

اة طبعا كلامك سليم ومن حق اي اتنين انهم يبقوا انتيم سوا اويخرجوا مع بعض أو يعزموا بعض في البيت بس انت ماتعزمينيش علشان باتكسف ههههه

انا بس رأيي اننا نخلي في اجتماع معلن وعام اول كل شهر و شوية بشوية حايزيد العدد ويضم مدونين كتير بمختلف توجهاتهم و انا متأكد انة ممكن يبقى ولا جلسات مجلس الشعب وممكن يبقالنا مقر و ندي حصانة برضة

بس ربنا يبعد عنا بتوع امن الدولة


انا عندي مشكلة مش عارف اخش عند سمراء ولا عند اوسة
اكتر من نص المدونات مش بتفتح معايا

بجد متشوق ييجي يوم الجمعه واشوفكم كلكم واتعرف عليكم

أسوور يقول...

الحصان الأسود
تمام .. الإجتماع انشاء الله يكون يوم الجمعة القادم فى تريانون الساعة 7م زى ما اتفقنا
ونشوفك على خير

SomeOne يقول...

الحصان الأسود

مشكلة عدم فتح المدونات بسبب
google

بيعملوا
Maintainance
اصلهم شوية كدة و هيلغو البلوجر القديم

أسوور يقول...

شادى
أنا فهمت كدة برضه
شكرا يا فادى على اهتمامك

micheal mohsen يقول...

yasmine:
tht is a good idea..but ll it be 4 ur old blogger friends only or there ll be new bloggers..hope u ll enjoy tht day isa

Unknown يقول...

One of the aims of Bloggers-Eg group is to arrange a bi-monthly meeting, you can come and join if you want.

أسوور يقول...

مايكل
أهلا بجميع زوار المدونة .. بلا استثناء

واحـــد مـــــن الـنـــاس يقول...

والله يا ياسمين انا اول مرة ادخل المدونة بتاعتك
وفوجئت بالموضوع ده
هوا كفكرة ممتازة جدا جدا

بس حطي في بالك ان تلات اربع المدونين طلبة زي حالاتي وعندهم امتحانات
ومش هيفضو غير في اجازة نص السنة

ينفع تأجلو الميعاد ويبقى اول يوم في اجازة نص السنة ؟؟
عشان يتجمع اكبر عددمن المدونين

وانا معاكم بإذن الله
ده بعد اذنك طبعا

أسوور يقول...

واحد من الناس
والله فى كتير من المدونين برضه بيشتغلوا ومخلصين
لكن لازم نبص لموضوع الطلبة دة بعين الإعتبار طبعا
وأهلا بيك من زوار المدونة
وأهلا بيك واحد من الناس المدونين